Hpeu‸maˍ ve li‸ 14

Chaw teˇ shehnˉ awˇ meunˍ awˇ hinˉ gʼaˇ kʼa muiˬ ve

1Oˇ htaˇ ngaˬ nyi leh, Ziˉonˍ hkʼaw hkʼoˆ lo Yawˬ ehˉ huˉ chehˇ ve hta‸ ngaˬ gʼa mawˬ ve yoˬ. Yawˬ ehˉ ve awˬ meh leh yawˇ Awˬ pa ve awˬ meh a shu yawˇ ve naˍ kʼaˍ pui hta‸ bvuh‸ taˍ ve chaw teˇ shehnˉ awˇ meunˍ awˇ hinˉ gʼaˇ htawˇ yawˇ geh teˇ geh huˉ taˍ ve yoˬ. 2Iˉ kaˆ gʼuiˬ baˇ maˇ jaˇ ve awˬ hkawˇ bvuhˬ ve hkʼa shuˍ shuˍ leh, hehnˇ jaˇ ve mvuhˇ tawˍ ve awˬ hkawˇ hkʼa shuˍ shuˍ, mvuhˇ naw ma lo awˬ hkawˇ bvuhˬ la ve hta‸ ngaˬ gʼa kaˇ ve yoˬ. Ngaˬ gʼa kaˇ ve awˬ hkawˇ lehˬ, tinˍ hteˆ shehˍ hpaˇ teˇ hpaˍ a shu yawˇ ve tinˍ hteˆ chehˇ ve awˬ hkawˇ hta‸ shuˍ ve yoˬ. 3Yawˇ hui lehˬ, kʼaw jaw awˬ gʼuˇ suhˍ maˇ kʼoˆ, a sha‸ te‸ chehˇ ve awˬ ceuˬ awˇ hkeh leh chaw mawˇ chaw kehˉ teˇ hpaˍ mehˆ gʼuˇ suhˍ maˇ kʼoˆ, kʼa muiˬ hkawˇ awˬ suhˉ hta‸ kʼa chehˇ ve yoˬ. Miˬ guiˬ hkʼoˆ lo vuiˬ hkʼaw‸ taˍ peuˬ ve chaw teˇ shehnˉ awˇ meunˍ awˇ hinˉ gʼaˇ maˇ heˆ kʼo, kʼa muiˬ hkawˇ awˬ suhˉ oˇ ve hta‸ chaw teˇ gʼaˇ ka‸ kʼa maˇ gʼa taˬ. 4Chaw oˇ ve teˇ hpaˍ lehˬ, yaˇ miˇ teˇ hpaˍ geh cha‸ chiˆ tuˬ maˇ te ve chaw hui hpeh‸ ve yoˬ. Awˬ lawn kʼo, yawˇ hui lehˬ da‸ kehˬ ve yaˇ miˇ haˉ hkʼe hpeh‸ leh, Yawˬ ehˉ hkʼa kʼai kuiˬ teˇ kaˬ le le lo awˬ hkʼaˇ suh kʼai ve chaw hui hpeh‸ ve yoˬ. Gʼuiˬsha leh Yawˬ ehˉ awˬ pon awˉ lawˉ naw‸ ve iˉ shiˍ hpeh‸ la tuˬ, chaw yaˇ hui awˬ hkʼaw lo yawˇ hui hta‸ vuiˬ hkʼaw‸ taˍ ve yoˬ. 5Yawˇ hui ve maw‸ kʼaw awˬ hkʼaw lo heˍ ve a ciˉ ka‸ maˇ cawˬ. Yawˇ hui hta‸ venˇbaˆ taˍ tuˬ ka‸ maˇ cawˬ.

Mvuhˇ naw ma tcuh yaˇ shehˆ gʼaˇ awˬ lawn

6Oˇ htaˇ, mvuhˇ naw ma awˬ kʼaw ji lo awˬ kaˍ awˬ nu mvuhˇ naw ma tcuh yaˇ teˇ gʼaˇ poˬ chehˇ ve hta‸ ngaˬ gʼa mawˬ ve yoˬ. Miˬ guiˬ hkʼoˆ lo chehˇ ve chaw hkʼa peu-eˬ, mvuhˇmiˬ teˇ peˆ le le hta‸ maˇ kʼoˆ, awˬ ceuˬ awˬ hkʼaˇ teˇ ceuˬ le le hta‸ maˇ kʼoˆ, tawˇ hkawˇ teˇ ceuˬ le le hta‸ maˇ kʼoˆ, chaw ceuˬ teˇ ceuˬ le le hta‸ maˇ kʼoˆ, co co taiˍ taiˍ yeˬ ve ha lehˬ ve bon hkawˇ maˍ piˇ tuˬ yawˇ cawˬ taˍ ve yoˬ. 7Yawˇ awˬ hkawˇ bvuhˬ chaweh kuˬ leh kʼoˆ ve, Gʼuiˬsha hta‸ kawˆ leh yawˇ hta‸ chiˇ uiˍ chiˇ mvuh piˇ-oˆ. Awˬ lawn kʼo, yawˇ suhˉ jehˬ tuˬ ve awˬ yanˇ gaˬ la peuˬ. Mvuhˇ naw ma miˬ naˆ ma hta‸ maˇ kʼoˆ, laˇ tsuhˇ gʼuiˬ leh iˉ kaˆ tawˆ kuiˬ teˇ hpaˍ hta‸ maˇ kʼoˆ, te hpanˍ shehˍ hpaˇ hta‸ oˉ kʼoˍ pui-o teh‸ kʼoˆ ve yoˬ.

8Mvuhˇ naw ma tcuh yaˇ nyiˇ gʼaˇ teˇ gʼaˇ lehˬ, awˉ lawˉ teˇ gʼaˇ awˬ hkʼaˇ suh laˬ leh kʼoˆ ve, Awˬ meh uiˍ ve Baˍbuˍlonˍ venˇ lehˬ paiˍ peuˬ, paiˍ peuˬ. Awˬ lawn kʼo, a pehˉ meuˇ gʼuiˬ taw piˇ ve hkʼe, haˉ chawˇ haˉ paˆ te ve awˬ taw‸ ma yuˬ leh mvuhˇ miˬ hkʼa peu-eˬ hta‸ yawˇ taw piˇ peuˬ teh‸ kʼoˆ ve yoˬ.

9Mvuhˇ naw ma tcuh yaˇ shehˆ gʼaˇ teˇ gʼaˇ lehˬ, yawˇ huiˉ maˬ awˬ hkʼaˇ suh laˬ leh awˬ hkawˇ bvuhˬ chaweh kuˬ leh kʼoˆ ve, Chaw hkʼaˬ ve teˇ gʼaˇ maˇ kʼoˆ, haiˬ ve to nuˇ to shaˆ leh yawˇ ve awˬ ho‸ awˬ han hta‸ oˉ kʼoˍ pui leh, a shu yawˇ ve naˍ kʼaˍ pui hta‸ maˇ kʼoˆ, a shu yawˇ ve la‸ sheh hta‸ maˇ kʼoˆ, maiˉ taˍ ve hta‸ hkanˍ yuˬ ve kʼo, 10a pehˉ meuˇ gʼuiˬ dawˬ ve hkʼe, Gʼuiˬsha nyi ma zuhˆ jaˇ ve teˇ ceuˬ hta‸ yawˇ gʼa dawˬ tuˬ yoˬ. A pehˉ meuˇ gʼuiˬ oˇ ve hta‸ te‸ chiˉ maˇ hkaw‸ leh, Gʼuiˬsha ve nyi ma zuhˆ ve kawˆ awˬ hkʼaw lo ngeuˍ keu taˍ ve yoˬ. Da‸ kehˬ ve mvuhˇ naw ma tcuh yaˇ teˇ hpaˍ mehˆ gʼuˇ suhˍ maˇ kʼoˆ, Yawˬ ehˉ mehˆ gʼuˇ suhˍ maˇ kʼoˆ, aˬ miˍ leh ma‸ shiˉ hta‸ yehˇ leh, chaw oˇ ve hta‸ hehnˇ chaweh ciˍ yanˍ piˇ tuˬ yoˬ. 11Yawˇ hui hta‸ ciˍ yanˍ piˇ ve teˇ yanˇ, tawˆ la chehˇ ve aˬ miˍ mvuhˇ hkʼawˇ lehˬ, co co taiˍ taiˍ taˆ-e chehˇ ve yoˬ. Haiˬ ve to nuˇ to shaˆ leh yawˇ ve awˬ ho‸ awˬ han hta‸ oˉ kʼoˍ pui leh, yawˇ ve awˬ meh maiˉ taˍ ve hta‸ hkanˍ yuˬ ve chaw teˇ hpaˍ lehˬ, tanˇ hkuinˇ tanˇ vanˇ gʼaˇ gʼa jehˇ kuiˬ maˇ cawˬ teh‸ kʼoˆ ve yoˬ.

12Gʼuiˬsha piˇ taˍ ve tawˇ hkawˇ leh Yeˍsuˆ hta‸ yonˍ ve teˇ ceuˬ awˬ hkʼaˇ suh kʼai ve Hkri‸ yaˇ hui lehˬ, nyi ma yeˬ ve teˇ ceuˬ cawˬ tuˬ chi awˬ hkʼaw lo gʼa mawˬ ve yoˬ.

13Oˇ htaˇ, mvuhˇ naw ma lo awˬ hkawˇ bvuhˬ la ve hta‸ ngaˬ gʼa kaˇ ve, Chi hkʼe bvuh‸ taˍ-o‸. Ya‸ nyi hkʼaw‸ nawˉ kʼo, Jawˇmawˇ Yeˍsuˆ awˬ hkʼaw lo suh ve chaw teˇ hpaˍ lehˬ awˬ bon uiˍ ve yoˬ teh‸ kʼoˆ laˇ ve yoˬ.

Awˬ ha hpu htawˇ kʼoˆ ve, Cawˇ ve yoˬ. Yawˇ hui te taˍ ve kanˉ teˇ hpaˍ lehˬ, yawˇ hui awˬ hkʼaˇ suh kʼai ve pa taw, a shu yawˇ kanˉ te hkeu‸ ve awˬ hkʼaw lo ponˬ peuˬ leh, yawˇ hui gʼaˇ gʼa jehˇ ve yoˬ teh‸ kʼoˆ ve yoˬ.

Miˬguiˬ hta‸ caˬ gʼeu‸ ve

14Oˇ ve awˬ hkʼaw‸ nawˉ ngaˬ nyi leh hpuˉ-ehˍ ve moˬ hta‸ ngaˬ gʼa mawˬ ve yoˬ. Moˬ oˇ ve awˬ hkʼoˆ hta‸ chaw yaˇ ve yaˇ hta‸ shuˍ ve teˇ gʼaˇ mui taˍ ve yoˬ. Yawˇ lehˬ, shi uˉ tcuhˍ hkʼawˆ taˍ leh, yawˇ ve la‸ sheh awˬ hkʼaw lo tcuhˆ jaˇ ve law‸ kʼawˉ hta‸ vawˆ taˍ ve yoˬ. 15Awˬ kaˍ awˬ nu mvuhˇ naw ma tcuh yaˇ teˇ gʼaˇ lehˬ, bon yehˬ lonˉ awˬ hkʼaw lo tawˆ la leh, moˬ awˬ hkʼoˆ lo mui taˍ ve teˇ gʼaˇ hta‸ awˬ hkawˇ bvuhˬ chaweh kuˬ leh kʼoˆ piˇ ve, Miˬguiˬ hkʼoˆ lo caˬ meh jaˇ peuˬ. Caˬ gʼeu‸ ve awˬ yanˇ gaˬ peuˬ ve pa taw, law‸ kʼawˉ hta‸ yuˬ leh caˬ gʼeu‸-o‸ teh‸ kʼoˆ ve yoˬ. 16Oˇ htaˇ, moˬ awˬ hkʼoˆ hta‸ mui taˍ ve teˇ gʼaˇ lehˬ, yawˇ ve law‸ kʼawˉ yuˬ leh, miˬ guiˬ hkʼoˆ ve caˬ hkʼa peu-eˬ hta‸ kʼuˉ yuˬ leh gʼeu‸ peuˬ ve yoˬ.

17Awˬ kaˍ awˬ nu mvuhˇ naw ma tcuh yaˇ teˇ gʼaˇ lehˬ, mvuhˇ naw ma hkʼoˆ ve bon yehˬ lonˉ awˬ hkʼaw lo tawˆ la ve yoˬ. Yawˇ htawˇ, tcuhˆ jaˇ ve law‸ kʼawˉ cawˬ taˍ ve yoˬ.

18Peuˬ leh, aˬ miˍ awˬ hkʼoˆ kanˇ paˆ cawˬ ve mvuhˇ naw ma tcuh yaˇ teˇ gʼaˇ lehˬ, tanˇ kuiˬ awˬ hkʼaw lo tawˆ la leh, tcuhˆ ve law‸ kʼawˉ cawˬ ve teˇ gʼaˇ hta‸ awˬ hkawˇ bvuhˬ chaweh kuˬ leh kʼoˆ piˇ ve, Nawˬ ve tcuhˆ ve law‸ kʼawˉ hta‸ yuˬ leh, miˬguiˬ ve a pehˉ meuˇ shiˍ awˬ kʼoˍ teˇ hpaˍ hta‸ gʼeu‸-o‸. Awˬ lawn kʼo, a pehˉ meuˇ shiˍ teˇ hpaˍ meh la peuˬ teh‸ kʼoˆ ve yoˬ. 19Oˇ htaˇ, mvuhˇ naw ma tcuh yaˇ oˇ ve teˇ gʼaˇ lehˬ, yawˇ ve law‸ kʼawˉ yuˬ leh miˬ guiˬ hkʼoˆ ve a pehˉ meuˇ shiˍ awˬ kʼoˍ hkʼa peu-eˬ hta‸ kʼuˉ yuˬ leh shaw yuˬ peuˬ hkʼaw‸ nawˉ, a pehˉ meuˇ gʼuiˬ nyiˉ kuiˬ awˬ hkʼaw lo baˬ keu ve yoˬ. A pehˉ meuˇ gʼuiˬ nyiˉ kuiˬ oˇ ve lehˬ, Gʼuiˬsha ve nyi ma zuhˆ ve teˇ ceuˬ hpeh‸ ve yoˬ. 20A pehˉ meuˇ gʼuiˬ nyiˉ kuiˬ oˇ ve hta‸ venˇ awˬ baˬ hpawˇ lo naˆ leh, a pehˉ meuˇ gʼuiˬ nyiˉ kuiˬ oˇ ve awˬ hkʼaw lo awˬ suhˍ tawˆ la ve yoˬ. Awˬ suhˍ oˇ ve lehˬ, teˇ hinˉ hkaw‸ ha hpaˍlonˍ #14:20 chi lehˬ, nyiˇ ha laˆ hk’e cawˬ ve yo kʼa gaˬ iˉ mvuhˇ maw‸ kʼaw caˆ hkʼe mvuh naˉ ve yoˬ.

Currently Selected:

Hpeu‸maˍ ve li‸ 14: LHBE

Highlight

Copy

Compare