Hpiˇliˇpiˆ li‸ 4
4
Jawˇmawˇ Gʼuiˬsha awˬ hkʼaw lo ha lehˬ chehˇ-oˆ
1Hkʼe te leh, ngaˬ ha‸ leh ngaˬ nyi ma haˍ ve awˬ viˉ awˬ nyi teˇ hpaˍoˬ, nawˬ hui lehˬ ngaˬ ve ha lehˬ tuˬ hpeh‸ leh ngaˬ ve shi uˉ tcuhˍ hpeh‸ ve yoˬ. Ngaˬ ha‸ ve chaw teˇ hpaˍ-oˬ, Jawˇmawˇ Yeˍsuˆ awˬ hkʼaw lo yeˬ chehˇ taˍ-o‸.
2Jawˇmawˇ Yeˍsuˆ awˬ hkʼaw lo nyi ma hawˍ da‸ la tuˬ, Eˇvawˇdiˆ leh Suˇtuˆ hta‸ ngaˬ lawˬ hkawˉ ve yoˬ. 3Ngaˬ geh teˇ geh kanˉ hkʼa deh‸ te jaw ve chaw teˇ gʼaˇ-oˬ, nawˬ htawˇ yaˇ miˇ oˇ ve nyiˇ gʼaˇ hta‸ ga piˇ tuˬ ngaˬ nawˬ hta‸ lawˬ hkawˉ ve yoˬ. Awˬ lawn kʼo, yawˇ huiˉ maˬ ka‸, Kaˍleˍmeˍ teˇ gʼaˇ ka‸, co ti‸ ha ti‸ li‸ awˬ hkʼaw lo awˬ meh bvuh‸ taˍ ve, ngaˬ geh kanˉ te ve awˬ kaˍ awˬ nu chaw teˇ hpaˍ ka‸, ngaˬ geh teˇ geh ha lehˬ ve bon hkawˇ bvuhˬ kʼai tuˬ te jaw ve yoˬ.
4Jawˇmawˇ Yeˍsuˆ awˬ hkʼaw lo hkʼaˬ htaˆ ka‸ ha lehˬ chehˇ-oˆ. Ngaˬ teˇ pawˆ kʼaw‸ kʼoˆ laˇ ve, ha lehˬ chehˇ-oˆ.
5Nawˬ hui nyi ma da‸ ve chaw hpeh‸ ve yoˬ teh‸ chaw hkʼa peu-eˬ shiˍ hpeh‸ tuˬ, shaˍ ti‸ taˍ-o‸. Jawˇmawˇ Yeˍsuˆ gaˬ la paˇ neˇ ve yoˬ. 6Aˬ hto‸ ma teˇ ceuˬ awˬ lawn hta‸ maˇ kʼoˆ, taˇ dawˇ hkiˉ. Teˇ ceuˬ le le awˬ hkʼaw lo nawˬ hui bon lawˬ ve, lawˬ hkawˉ ve leh chiˇ mvuh ve awˬ hkʼaw lo, nawˬ hui hkʼa lawˬ gaˇ ve teˇ hpaˍ Gʼuiˬsha hta‸ hto piˇ-oˆ. 7Oˇ hkʼe te ve kʼo, Gʼuiˬsha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ lehˬ, nawˬ hui ve nyi ma leh nawˬ hui ve dawˇ hkʼaˇ teˇ hpaˍ hta‸ Yeˍsuˆ Hkri‸ awˬ hkʼaw lo ha‸ shaˉ laˇ tuˬ yoˬ.
Awˬ lawn chi teˇ hpaˍ hta‸ dawˇ nyi-o
8Awˬ viˉ awˬ nyi teˇ hpaˍ-oˬ, awˬ leh meuˇ ve tawˇ teˇ hkawˇ lehˬ chi hkʼe yoˬ. Hteˇ ve awˬ ceuˬ hkʼa peu-eˬ, yawˆ yan keunˍ ve awˬ ceuˬ hkʼa peu-eˬ, cawˇ ve awˬ ceuˬ hkʼa peu-eˬ, da‸ ve kehˬ ve awˬ ceuˬ hkʼa peu-eˬ, nyi sha ve awˬ ceuˬ hkʼa peu-eˬ leh, shu ve awˬ lawn da‸ ve awˬ ceuˬ gʼa kaˇ ve hkʼa peu-eˬ, oˇ ve teˇ hpaˍ awˬ hkʼaw lo da‸ jaˇ ve awˬ ceuˬ teˇ ceuˬ ceuˬ, chiˇ mvuh keunˍ ve awˬ ceuˬ teˇ ceuˬ ceuˬ cawˬ ve kʼo, awˬ lawn oˇ ve teˇ hpaˍ hta‸ dawˇ nyi-o. 9Ngaˬ geh nawˬ hui gʼa henˇ gʼa ha‸ yuˬ leh, gʼa kaˇ gʼa mawˬ peuˬ ve awˬ ceuˬ teˇ hpaˍ hta‸ te-o. Oˇ hkʼe te ve kʼo, dawˇ sha piˇ shehˍ hpaˇ Gʼuiˬsha lehˬ, nawˬ hui geh chehˇ tuˬ yoˬ.
Yawˇ hui la‸ shawnˍ feu laˇ ve awˬ lawn
10Chi beu‸ htawˇ, nawˬ hui ngaˬ hta‸ kʼaw‸ dawˇ nawˇ laˇ ve pa taw, Jawˇmawˇ Yeˍsuˆ awˬ hkʼaw lo ngaˬ ha lehˬ jaˇ ve yoˬ. Ponˬ laˬ htaˇ nawˬ hui ngaˬ hta‸ dawˇ nawˇ chehˇ ve htawˇ, ngaˬ hta‸ ga laˇ tuˬ ya‸ kʼaw maˇ cawˬ sheˍ ve yoˬ. 11Ngaˬ chi hkʼe kʼoˆ ve lehˬ, ngaˬ loˍ ve awˬ ceuˬ cawˬ leh kʼoˆ ve teˇ ceuˬ maˇ heˆ. Ngaˬ hkʼaˬ hkʼe gʼa hpuˇ da‸ ve htawˇ, oˇ ve awˬ hkʼaw lo nyi hkʼaˇ suh tuˬ ngaˬ shiˍ la peuˬ. 12Haˍ gʼawˇ jaˇ ve hta‸ maˇ kʼoˆ, paw sha jaˇ ve hta‸ maˇ kʼoˆ, ngaˬ hkanˍ puiˉ la peuˬ. Caˇ bvuhˆ dawˬ bvuhˆ ve maˇ kʼoˆ, meu‸ ve kaˆ ve maˇ kʼoˆ, paw sha ve maˇ kʼoˆ, haˍ gʼawˇ ve maˇ kʼoˆ, chi teˇ hpaˍ hta‸ hkʼaˬ hkʼe te hkanˍ tuˬ, teˇ ceuˬ le le awˬ hkʼaw lo ngaˬ shiˍ la peuˬ. 13Ngaˬ hta‸ awˬ gʼaˇ awˬ shaˉ pe‸ laˇ shehˍ hpaˇ hta‸ cuˇ ve awˬ hkʼaw lo, hkʼa peu-eˬ hta‸ ngaˬ te puiˉ te hpeh‸ ve yoˬ.
14Ya‸ hkʼaˇ, ngaˬ gʼa tu‸ gʼa hkanˍ ve awˬ hkʼaw lo nawˬ hui awˬ chawˇ te laˇ ve lehˬ, da‸ jaˇ ve yoˬ. 15Hpiˇliˇpiˆ chaw teˇ hpaˍ-oˬ, ha lehˬ ve bon hkawˇ hta‸ tanˬ maˍ gehˇ ve teˇ yanˇ, ngaˬ Maˍkeˍdawˇniˆ mvuhˇmiˬ awˬ hkʼaw lo tawˆ kʼai htaˇ, piˇ ve leh ha‸ yuˬ ve teˇ ceuˬ awˬ hkʼaw lo, nawˬ hui ceh tiˉ ngaˬ hta‸ awˬ chawˇ te laˇ ve yoˬ. Awˬ kaˍ awˬ nu Hkri‸ yaˇ awˬ moˍ teˇ moˍ ka‸ chi hkʼe maˇ te ve hta‸ nawˬ hui shiˍ ve yoˬ. 16Awˬ lawn kʼo, ngaˬ Hteˇsaˍlawˇniˆ venˇ awˬ hkʼaw lo chehˇ sheˍ ve teˇ yanˇ, ngaˬ loˍ ve awˬ ceuˬ teˇ hpaˍ nawˬ hui ngaˬ hta‸ teˇ pawˆ nyiˇ pawˆ feu laˇ ve yoˬ. 17Ngaˬ chi hkʼe kʼoˆ ve lehˬ, la‸ shawnˍ hta‸ ngaˬ ca ve maˇ heˆ. Nawˬ hui awˬ shiˍ naw‸ maˇ ve pa taw, nawˬ hui awˬ bon gʼa maˇ tuˬ ve hta‸ ceh tiˉ ngaˬ ca ve yoˬ. 18Chi beu‸ lehˬ, ngaˬ teˇ ceuˬ le le hkʼa law‸ cawˬ leh, awˬ leuˉ ka‸ cawˬ ve yoˬ. Eˇpaˍhpawˍdiˆ geh nawˬ hui feu laˇ ve la‸ shawnˍ teˇ hpaˍ hta‸ pa taw ngaˬ hkʼa biˇ cawˬ ve yoˬ. La‸ shawnˍ oˇ ve teˇ hpaˍ lehˬ, awˬ shaˉ hawnˉ ve awˬ ceuˬ ka‸, Gʼuiˬsha nyi hkʼaˇ suh leh ha‸ yuˬ ve tanˇ tuˬ ka‸ hpeh‸ ve yoˬ. 19Ngaˬ ve Gʼuiˬsha lehˬ awˬ me‸ awˬ hponˇ uiˍ jaˇ maˇ jaˇ ve awˬ hkʼaw lo, nawˬ hui hkʼa loˍ ve hkʼa peu-eˬ Yeˍsuˆ Hkri‸ hta‸ cuˇ leh, nawˬ hui hta‸ hkʼa biˇ pe‸ laˇ tuˬ yoˬ. 20Ngaˬ hui ve Awˬ pa Gʼuiˬsha hta‸ co co taiˍ taiˍ chiˇ uiˍ chiˇ mvuh piˇ-oˆ. A menˬ.
Awˬ leh meuˇ ve tawˇ hkawˇ
21Yeˍsuˆ Hkri‸ awˬ hkʼaw lo chehˇ ve Hkri‸ yaˇ hkʼa peu-eˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. Ngaˬ geh teˇ geh chehˇ ve awˬ viˉ awˬ nyi teˇ hpaˍ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 22Hkri‸ yaˇ hkʼa peu-eˬ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Leuˉ leh jawˇmawˇ Kehˉsaˍ ve hawˉ yehˬ hkʼaw chehˇ ve Hkri‸ yaˇ teˇ hpaˍ lehˬ, nawˬ hui hta‸ dawˇ nawˇ chehˇ ve yoˬ.
23Ngaˬ hui ve Jawˇmawˇ Yeˍsuˆ Hkri‸ ve awˬ bon awˬ shinˉ nawˬ hui ve nyi ma awˬ hkʼaw lo cawˬ piˇ-oˆ.
Currently Selected:
Hpiˇliˇpiˆ li‸ 4: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.