Heh puiˉ hkʼaw ve li‸ 12
12
Meˇriˆanˍ ciˍ yanˍ ve hta‸ gʼa hkanˍ ve
1Moˉseˍ lehˬ Kuˇshiˆ chaw yaˇ miˇ teˇ gʼaˇ hta‸ heuˆ ve yoˬ. Hkʼe te leh, Meˇ riˆanˍ leh Aˍronˍ yawˇ hta‸ deˇ leh kʼoˆ ve, 2Gʼuiˬsha Moˉseˍ hta‸ tiˉ tawˇ yaw piˇ taˍ ve laˇ. Yawˇ ngaˬ huiˉ maˬ hta‸ tawˇ maˇ yaw laˇ leh laˇ, teh‸ kʼoˆ ve yoˬ. Yawˇ huiˉ maˬ kʼoˆ ve tawˇ hta‸ Gʼuiˬsha gʼa kaˇ ve yoˬ. 3(Moˉseˍ lehˬ, miˬguiˬ hkʼoˆ chehˇ ve chaw hkʼa peu-eˬ a‸ kehˉ nyi ma nuˇ nehˬ jaˇ ve yoˬ)
4Hkʼe te leh Gʼuiˬsha Moˉseˍ, Aˍronˍ leh Meˇriˆanˍ hui hta‸, Ngaˬ ve aˉ po kʼo bon yehˬ hkʼaw tawˆ la-o, teh‸ yawˇ hui shehˆ gʼaˇ hta‸ kʼoˆ piˇ leh yawˇ hui tawˆ kʼai ve yoˬ. 5Gʼuiˬsha lehˬ aˉ po kʼo bon yehˬ yehˬmiˉhpe‸ lo moˬ yehˬ hkuiˉ daw hkʼaw chehˇ taˍ leh, Aˍronˍ leh Meˇriˆanˍ-oˬ, teh‸ kʼoˆ ve yoˬ. Yawˇ huiˉ maˬ awˬ gʼuˇ suhˍ jiˆ kʼai leh, 6Gʼuiˬsha yawˇ huiˉ maˬ hta‸ chi hkʼe kʼoˆ piˇ ve yoˬ. Chi beu‸ ngaˬ kʼoˆ ve tawˇ hta‸ na taˍ sheˍ. Nawˬ hui geh lo ngaˬ ve tcuh kaˍ paˍ teˇ hpaˍ chehˇ taˍ ve teˇ yanˇ, awˬ ha hkʼaw yawˇ hui hta‸ ngaˬ ve awˬ to maw piˇ leh, zuh‸ maˆ ve hkʼaw yawˇ hui hta‸ tawˇ yaw piˇ ve yoˬ. 7Ngaˬ Moˉseˍ hta‸ tawˇ yaw piˇ ve lehˬ, yawˇ hui hta‸ tawˇ yaw piˇ ve hkʼe maˇ heˆ. Moˉseˍ hta‸ ngaˬ ve chaw hkʼa peu-eˬ awˬ hkʼoˆ lo ngaˬ awˬ hoˉ te tcuh taˍ ve yoˬ. 8Hkʼe te leh, ngaˬ yawˇ hta‸ mehˆ hpfuhˇ tawˍ da‸ taˍ leh tawˇ yaw piˇ chehˇ ve yoˬ. Tawˇ veˆ shaˉ veˆ hkawˇ hta‸ cuˇ leh yaw piˇ ve maˇ heˆ. Ngaˬ ve awˬ ho‸ awˬ han hkʼaˬ hkʼe cawˬ ve hta‸ htawˇ, yawˇ gʼa mawˬ taˍ peuˬ ve yoˬ. Hkʼaˬ hkʼe te leh, nawˬ huiˉ maˬ yawˇ hta‸ deˇ haˆ ve le, teh‸ Gʼuiˬsha yawˇ huiˉ maˬ hta‸ kʼoˆ piˇ ve yoˬ.
9Gʼuiˬsha lehˬ, yawˇ huiˉ maˬ hta‸ nyi ma zuhˆ ve yoˬ. Hkʼe te leh, yawˇ moˬ hkʼaw lo taˆ kʼo‸-e chehˇ ve teˇ yanˇ, 10Meˇriˆanˍ lehˬ hkiˬ tu‸ a naˍ keuˆ la leh, vaˇ meu-e hkʼa shuˍ hpuˉ-ehˍ hpeh‸ la ve yoˬ. Aˍronˍ chiˇ nyi leh, Meˇriˆanˍ hkiˬ tu‸ keuˆ taˍ ve hta‸ gʼa mawˬ ve teˇ yanˇ, Moˉseˍ hta‸ chi hkʼe kʼoˆ piˇ ve yoˬ. 11Jawˇmawˇ-oˬ, ngaˬ huiˉ maˬ kʼoˆ ya‸ ve venˇbaˆ awˬ tan ngaˬ huiˉ maˬ hta‸ chi hkʼe a ciˉ taˇ tu‸ hkanˍ tcuh laˇ-oˆ. 12Paw tawˆ la htaˇ ka‸ awˬ shaˍ teˇ hkoˇ kuiˇ kʼai peuˬ ve yaˇ ehˉ hkʼa shuˍ, yawˇ hta‸ a ciˉ taˇ hpeh‸ tcuh piˇ-oˆ, teh‸ Moˉseˍ hta‸ kʼoˆ piˇ ve yoˬ.
13Hkʼe te leh Moˉseˍ Gʼuiˬsha hta‸ kuˬ leh, Gʼuiˬsha-oˬ, yawˇ hta‸ a ciˉ gu na-e piˇ-oˆ, teh‸ kʼoˆ ve yoˬ.
14Oˇ htaˇ Gʼuiˬsha kʼaw‸ yaw hkʼaw‸ leh kʼoˆ ve, Yawˇ ve awˬ pa yawˇ ve mehˆ hpfuhˇ hkʼaw ciˉ gʼuiˇ hpe‸ keu piˇ ve hkʼe kʼo, yawˇ lehˬ suhˍ nyi hkʼa gaˬ maˇ da‸ maˇ kehˬ ve chaw hpeh‸ chehˇ tuˬ ve maˇ heˆ laˇ. Chi hta‸ pa taw, yawˇ hta‸ fa la awˬ baˬ lo suhˍ nyi hkʼa gaˬ ca chehˇ tcuh taˍ-o‸. Oˇ ve hkʼaw‸ nawˉ, yawˇ fa la lo kʼaw‸ la hpeh‸ ve yoˬ, teh‸ Moˉseˍ hta‸ kʼoˆ piˇ ve yoˬ. 15Hkʼe te leh, yawˇ hui Meˇriˆanˍ hta‸ fa la awˬ baˬ hpawˇ lo suhˍ nyi ca chehˇ tcuh ve yoˬ. Yawˇ maˇ kʼaw‸ la sheˍ ve ceh ceh, Iˉsaˍreˍlaˆ chaw teˇ hpaˍ awˬ gʼuˇ suhˍ maˇ kʼai. 16Oˇ ve hkʼaw‸ nawˉ, yawˇ hui Haˍzeˍroˆ teh‸ kʼoˆ ve chehˇ kuiˬ oˇ ve hkʼaw tawˆ kʼai leh, Paˍranˍ heh puiˉ hkʼaw lo ca kʼaw‸ deh chehˇ taˍ ve yoˬ.
Currently Selected:
Heh puiˉ hkʼaw ve li‸ 12: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
