Ma‸htehˍ li‸ 8
8
Yeˍsuˆ hkiˬ tu‸ paˍ hta‸ gu na-e piˇ ve
1Yeˍsuˆ hkʼaw pui hkʼoˆ lo ya‸ la htaˇ, chaw awˬ moˍ lonˉ teˇ hpaˍ yawˇ awˬ hkʼaˇ suh kʼai ve yoˬ. 2Oˇ htaˇ, hkiˬ tu‸ paˍ teˇ gʼaˇ laˬ leh yawˇ hta‸ oˉ kʼoˍ pui leh kʼoˆ ve, Jawˇmawˇ-oˬ, nawˬ te gaˇ ve kʼo, ngaˬ hta‸ da‸ la kehˬ la tuˬ nawˬ te hpeh‸ ve yoˬ teh‸ kʼoˆ piˇ ve yoˬ.
3Yeˍsuˆ la‸ sheh che leh yawˇ hta‸ htawˇ leh kʼoˆ ve, Ngaˬ te gaˇ ve yoˬ. Da‸ la kehˬ la-o teh‸ kʼoˆ piˇ ve yoˬ. Teˇ cawˬ haˉ hkiˬ tu‸ a naˍ mehˉ kʼai leh, yawˇ da‸ la kehˬ la ve yoˬ. 4Yeˍsuˆ yawˇ hta‸ kʼoˆ piˇ ve, Awˬ lawn chi chaw teˇ gʼaˇ hta‸ ka‸ taˇ hto piˇ. Ya‸ hkʼaˇ, kʼai leh paw hkuˇ hta‸ nawˬ awˬ to ca maw piˇ-oˆ. Shu mehˆ gʼuˇ suhˍ shaˉ hkiˆ hpeh‸ tuˬ, Moˉseˍ awˬ liˇ teh taˍ ve hkʼe tanˇ tuˬ ca tanˇ piˇ-oˆ teh‸ kʼoˆ piˇ ve yoˬ.
Yeˍsuˆ ma‸ poˍ ve awˬ ceˬ hta‸ gu na-e piˇ ve. #Okʼo 14:4
5Yeˍsuˆ Kaˍpeˍneˍonˍ venˇ hkʼaw lo‸-e htaˇ ma‸ poˍ teˇ gʼaˇ yawˇ geh laˬ leh, yawˇ hta‸ lawˬ hkawˉ leh kʼoˆ ve, 6Jawˇmawˇ-oˬ, ngaˬ ve awˬ ceˬ hkui sheh la‸ sheh suh leh aˉ hkʼaw lo zuh‸ chehˇ taˍ ve yoˬ. Yawˇ gʼa tu‸ gʼa hkanˍ jaˇ ve yoˬ teh‸ kʼoˆ piˇ ve yoˬ.
7Yeˍsuˆ yawˇ hta‸ kʼoˆ piˇ ve, Ngaˬ laˬ leh yawˇ hta‸ gu na-e piˇ tuˬ yoˬ teh‸ kʼoˆ ve yoˬ.
8Oˇ htaˇ, ma‸ poˍ yawˇ hta‸ kʼaw‸ kʼoˆ piˇ ve, Jawˇmawˇ-oˬ, ngaˬ ve yehˬ hkʼaw nawˬ lo‸ la ve hta‸ ngaˬ maˇ keunˍ. Ya‸ hkʼaˇ, nawˬ tawˇ teˇ peu-eˬ ceh tiˉ yaw ve ka‸, ngaˬ ve awˬ ceˬ na-e la tuˬ yoˬ. 9Awˬ lawn kʼo, ngaˬ lehˬ shu ve kanˇ paˆ awˬ hawˉ lo chehˇ leh, ngaˬ awˬ hawˉ lo ka‸ ma‸ yaˇ teˇ hpaˍ cawˬ ve yoˬ. Teˇ gʼaˇ hta‸, Kʼai-o teh‸ kʼoˆ piˇ ve kʼo, yawˇ kʼai ve yoˬ. Teˇ gʼaˇ hta‸, Laˬ-o‸ teh‸ kʼoˆ piˇ ve kʼo, yawˇ laˬ ve yoˬ. Ngaˬ ve awˬ ceˬ paˍ hta‸ htawˇ, Chi hta‸ te-o teh‸ kʼoˆ piˇ ve kʼo, yawˇ te ve yoˬ teh‸, ma‸ poˍ kʼaw‸ kʼoˆ piˇ ve yoˬ.
10Tawˇ chi hta‸ Yeˍsuˆ gʼa kaˇ htaˇ yawˇ anˇ leh, yawˇ awˬ hkʼaˇ suh kʼai ve chaw teˇ hpaˍ hta‸ yawˇ kʼoˆ piˇ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, Iˉsaˍ-reˍlaˆ chaw awˬ hkʼaw lo ka‸ chi taw taw yonˍ ve hta‸ ngaˬ maˇ gʼa mawˬ jaw sheˍ. 11Ngaˬ nawˬ hui hta‸ kʼoˆ laˇ ve, mvuhˇ nyi tawˆ hpawˇ mvuhˇ nyi kʼehˬ hpawˇ chehˇ ve chaw maˇ maˇ laˬ leh, mvuhˇ naw ma mvuhˇmiˬ awˬ hkʼaw lo Aˍbraˍhanˍ, Iˉcaˆ, Yaˍkoˆ hui geh hkʼa geh gʼa mui caˇ tuˬ yoˬ. 12Ya‸ hkʼaˇ, mvuhˇmiˬ yaˇ teˇ hpaˍ lehˬ, awˬ baˬ hpawˇ naˆ ho‸ kuiˬ lo yuˬ baˬ ve hta‸ gʼa hkanˍ tuˬ yoˬ. Oˇ kaˬ lo hkʼa chehˇ ve chaw hui hawˬ leh ciˬ geu‸ tuˬ yoˬ teh‸, Yeˍsuˆ kʼoˆ piˇ ve yoˬ. 13Yeˍsuˆ ma‸ poˍ hta‸ kʼoˆ piˇ ve, Nawˬ kʼo‸-e loˬ. Nawˬ yonˍ ve hkʼe nawˬ awˬ pon hpeh‸ la piˇ-oˆ teh‸ kʼoˆ piˇ ve yoˬ.
Oˇ teˇ hkui awˬ hkʼaw lo awˬ ceˬ oˇ ve na-e la ve yoˬ.
Yeˍsuˆ Peˍtruˆ awˬ miˇ ma ve awˬ e hta‸ gu na-e piˇ ve
14Yeˍsuˆ lehˬ Peˍtruˆ ve yehˬ hkʼaw lo‸-e htaˇ, Peˍtruˆ awˬ miˇ ma ve awˬ e kaˆ naˬ leh zuh‸ chehˇ ve hta‸ gʼa mawˬ ve yoˬ. 15Yawˇ ve la‸ sheh hta‸ Yeˍsuˆ htawˇ leh, kaˆ naˬ ve na-e la ve yoˬ. Oˇ htaˇ yawˇ tu leh Yeˍsuˆ hta‸ te caˍ te taw piˇ ve yoˬ.
16Mehˆ muiˉ naˆ la htaˇ, neˇ geh ve chaw maˇ maˇ hta‸ shu Yeˍsuˆ geh shiˍ laˬ leh, yawˇ tawˇ teˇ peu-eˬ ceh tiˉ yaw leh neˇ teˇ hpaˍ hta‸ gʼa‸ kʼoˬ ve yoˬ. Chaw naˬ hkʼa peu-eˬ hta‸ ka‸ yawˇ gu na-e piˇ ve yoˬ. 17Yawˇ chi hkʼe te ve lehˬ, Yawˇ awˬ to ngaˬ hui ve gʼaˇ nuˇ shaˉ nuˇ ve teˇ hpaˍ hta‸ yuˬ taˆ leh, ngaˬ hui ve naˬ ve gawˬ ve teˇ hpaˍ hta‸ yuˬ pfuhˇ ve yoˬ teh‸, tcuh kaˍ paˍ Iˉsaˍyaˆ kʼoˆ taˍ ve hkʼe biˇ la tuˬ te ve yoˬ. #Isy 53:4
Yeˍsuˆ hkʼaˇ suh kʼai gaˇ ve chaw teˇ hpaˍ
18Chaw awˬ moˍ lonˉ teˇ hpaˍ yawˇ hta‸ hkʼa caw zuhˇ chehˇ taˍ ve hta‸ Yeˍsuˆ gʼa mawˬ htaˇ, Gʼuiˬ po coˇ paˉ lo hkanˍ kʼai-a veuˬ teh‸, yawˇ kʼoˆ piˇ ve yoˬ. 19Oˇ htaˇ li‸ bvuh‸ paˍ teˇ gʼaˇ yawˇ geh laˬ leh kʼoˆ ve, Saˍ la‸-oˬ, nawˬ hkʼaˬ lo kʼai ve maˇ kʼoˆ, nawˬ hkʼaˇ suh ngaˬ kʼai tuˬ yoˬ teh‸ kʼoˆ piˇ ve yoˬ.
20Yeˍsuˆ yawˇ hta‸ kʼoˆ ve, Heh hpuiˇ teˇ hpaˍ lehˬ, awˬ kʼoˍ cawˬ ve yoˬ. Mvuhˇ hpe lo poˬ ve ngaˆ teˇ hpaˍ htawˇ, zuh‸ kuiˬ cawˬ ve yoˬ. Ya‸ hkʼaˇ, chaw yaˇ ve Yaˇ hpu lehˬ, oˉ kʼoˍ taˍ kuiˬ ka‸ maˇ cawˬ teh‸ kʼoˆ piˇ ve yoˬ.
21Awˬ kaˍ awˬ nu awˬ la‸ gʼawˇ teˇ gʼaˇ yawˇ hta‸ kʼoˆ piˇ ve, Jawˇmawˇ-oˬ, ngaˬ ve awˬ pa hta‸ awˉ lawˉ ca tuˍ piˇ tuˬ a hkaw-anˬ a ciˉ pe‸ laˇ sheˍ teh‸ kʼoˆ ve yoˬ.
22Yeˍsuˆ yawˇ hta‸ kʼaw‸ kʼoˆ piˇ ve, Ngaˬ hkʼaˇ suh laˬ-o‸. Chaw suh teˇ hpaˍ lehˬ, yawˇ hui hkʼaˇ yawˇ hui chaw suh hta‸ tuˍ piˇ lawˬ-o‸ teh‸ kʼoˆ ve yoˬ.
Yeˍsuˆ mvuhˇ haw hta‸ dehˬ piˇ lawˬ ve
23Yawˇ haw lo‸ kʼoˍ hkʼaw lo‸-e leh, yawˇ ve awˬ la‸ gʼawˇ teˇ hpaˍ htawˇ yawˇ geh teˇ geh ciˇ kʼai ve yoˬ. 24Oˇ htaˇ, gʼuiˬ po awˬ hkʼaw lo mvuhˇ haw lonˉ meuˆ la ve pa taw, gʼuiˬ baˇ teˇ hpaˍ haw lo‸ kʼoˍ hta‸ hkʼa beh hkʼa beh kʼai chehˇ htawˇ, Yeˍsuˆ lehˬ zuh‸ muiˉ kʼa chehˇ ve yoˬ. 25Awˬ la‸ gʼawˇ teˇ hpaˍ yawˇ hta‸ ca nawˍ piˇ leh kʼoˆ ve, Jawˇmawˇ-oˬ, ngaˬ hui hta‸ htaiˍ hkʼaw‸ laˇ-oˆ. Ngaˬ hui gʼa luˬ la yoˬ teh‸ kʼoˆ piˇ ve yoˬ.
26Yawˇ lehˬ yawˇ hui hta‸ kʼoˆ piˇ ve, Hkʼa deh‸ maˇ yonˍ ve chaw teˇ hpaˍ-oˬ, nawˬ hui aˬ hto‸ ma te kawˆ ve le teh‸ kʼoˆ ve yoˬ. Oˇ htaˇ yawˇ tu la leh, mvuhˇ haw leh gʼuiˬ po hta‸ deˇ piˇ htaˇ, ta‸ iˉ gawˬ lehˍ hpeh‸ sheˬ ve yoˬ.
27Chaw oˇ ve teˇ hpaˍ anˇ jaˇ leh kʼoˆ ve, Chaw chi lehˬ, hkʼaˬ hkʼe ve chaw le. Mvuhˇ haw leh gʼuiˬ po ka‸ yawˇ ve hkawˇ hta‸ na yuˬ ve law teh‸ kʼoˆ da‸ ve yoˬ.
Neˇ geh ve Gaˍdaˍraˆ chaw nyiˇ gʼaˇ
28Gʼuiˬ po coˇ paˉ Gaˍdaˍraˆ mvuhˇmiˬ lo gaˬ htaˇ, chaw tuˍ hpfuh lo tawˆ la ve neˇ geh ve chaw nyiˇ gʼaˇ yawˇ hta‸ ca ha‸ la ve yoˬ. Yawˇ huiˉ maˬ caˬ jaˇ ve pa taw, ya‸ kʼaw oˇ ve hta‸ chaw teˇ gʼaˇ ka‸ kʼai maˇ hpeh‸. 29Yawˇ huiˉ maˬ gʼaˇ hte‸ kuˬ leh kʼoˆ ve, Gʼuiˬsha ve Yaˇ hpu-oˬ, nawˬ ngaˬ huiˉ maˬ hta‸ hkʼaˬ hkʼe caˉ da‸ le. Awˬ yanˇ maˇ gaˬ sheˍ ka‸ ngaˬ huiˉ maˬ hta‸ fawˉ mehˍ laˇ tuˬ nawˬ laˬ ve laˇ teh‸ kʼoˆ ve yoˬ.
30Oˇ teˇ hkui yawˇ hui hta‸ hkʼa cawˇ cawˇ vuiˇ ve teˇ kaˬ lo va‸ teˇ moˍ lonˉ kʼaˆ caˇ chehˇ ve yoˬ. 31Hkʼe te leh, neˇ teˇ hpaˍ yawˇ hta‸ lawˬ hkawˉ leh kʼoˆ ve, Nawˬ ngaˬ hui hta‸ gʼa‸ kʼoˬ laˇ ve kʼo, va‸ moˍ lonˉ oˇ ve awˬ hkʼaw lo ngaˬ hui hta‸ lo‸-e tcuh laˇ-oˆ teh‸ kʼoˆ piˇ ve yoˬ.
32Oˇ htaˇ yawˇ yawˇ hui hta‸, Kʼai loˬ teh‸ kʼoˆ piˇ ve yoˬ. Yawˇ hui tawˆ-e leh, va‸ awˬ moˍ lonˉ hkʼaw lo‸-e ve teˇ yanˇ, va‸ oˇ ve teˇ moˍ hkʼa peu-eˬ miˬ haˍ kuiˬ lo gʼaˇ hte‸ gʼuiˇ ya‸-e leh, gʼuiˬ po hkʼaw lo lo‸-e leh kʼa suh peuˬ sheˬ ve yoˬ.
33Va‸ hawˉ paˍ teˇ hpaˍ hpaw-e leh venˇ hkʼaw lo‸-e ve yoˬ. Hkʼa hpeh‸ la ve awˬ lawn hkʼa peu-eˬ leh, neˇ geh ve chaw nyiˇ gʼaˇ awˬ lawn yawˇ hui kʼaoˍ maˍ piˇ ve yoˬ. 34Venˇ yaˇ hkʼa peu-eˬ Yeˍsuˆ hta‸ hpuˇ da‸ tuˬ tawˆ la ve yoˬ. Yawˇ hta‸ gʼa mawˬ htaˇ, yawˇ hui ve mvuhˇmiˬ hkʼaw lo tawˆ kʼai tuˬ yawˇ hui yawˇ hta‸ lawˬ hkawˉ ve yoˬ.
Currently Selected:
Ma‸htehˍ li‸ 8: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.