Ma‸htehˍ li‸ 17
17
Yeˍsuˆ awˬ ho‸ awˬ han pa ve
1Hkaw‸ nyi ponˬ peuˬ hkʼaw‸ nawˉ, Yeˍsuˆ lehˬ Peˍtruˆ, Yaˍkoˆ leh Yaˍkoˆ ve awˬ nyi paˍ Yoˇhanˬ hta‸ ceh shiˍ veu leh, mvuh ve hkʼaw teˇ shiˍ awˬ hkʼoˆ lo yawˇ hui taˆ-e ve yoˬ. 2Oˇ htaˇ, yawˇ hui mehˆ gʼuˇ suhˍ yawˇ ve awˬ ho‸ awˬ han pa ve yoˬ. Yawˇ ve mehˆ hpfuhˇ lehˬ, mvuhˇ nyi hkʼa shuˍ shuˍ awˬ gʼeuˆ ba leh, yawˇ ve veu‸ kʼaˇ htawˇ awˬ gʼeuˆ hkʼa shuˍ shuˍ hpu la ve yoˬ. 3Moˉseˍ leh Eˇliˇya‸ htawˇ yawˇ hui mehˆ gʼuˇ suhˍ tawˆ la leh Yeˍsuˆ geh na‸ uˉ te da‸ chehˇ ve yoˬ. 4Oˇ htaˇ Peˍtruˆ lehˬ, Jawˇmawˇ-oˬ, ngaˬ hui choˬ kaˬ chehˇ ve lehˬ da‸ ve yoˬ. Nawˬ nyi ma cawˇ ve kʼo, choˬ kaˬ lo ngaˬ aˉ po kʼo shehˆ shiˍ te tuˬ yoˬ. Nawˬ awˬ pon teˇ shiˍ, Moˉseˍ awˬ pon teˇ shiˍ leh Eˇliˇya‸ awˬ pon teˇ shiˍ te tuˬ yoˬ teh‸, Yeˍsuˆ hta‸ kʼoˆ piˇ ve yoˬ.
5Yawˇ tawˇ yaw chehˇ ve teˇ yanˇ, awˬ gʼeuˆ ba ve moˬ yawˇ hui hta‸ hoˆ taˍ ve yoˬ. Moˬ oˇ ve awˬ hkʼaw lo awˬ hkawˇ chi hkʼe bvuhˬ la ve, Chaw chi lehˬ, ngaˬ ha‸ jaˇ ve ngaˬ ve Yaˇ hpu hpeh‸ leh, yawˇ hta‸ ngaˬ nyi hkʼaˇ suh jaˇ ve yoˬ. Yawˇ ve tawˇ hkawˇ hta‸ na yuˬ-o‸ teh‸ kʼoˆ ve yoˬ.
6Awˬ la‸ gʼawˇ teˇ hpaˍ chi hta‸ gʼa kaˇ htaˇ, yawˇ hui kawˆ jaˇ leh mehˆ hpfuhˇ miˬ chaˇ hkʼoˆ boˆ taˍ ve yoˬ. 7Oˇ htaˇ Yeˍsuˆ laˬ leh yawˇ hui hta‸ htawˇ leh, Tu-o, taˇ kawˆ teh‸ kʼoˆ piˇ ve yoˬ. 8Yawˇ hui kʼaw‸ chiˇ nyi ve teˇ yanˇ, awˬ kaˍ awˬ nu chaw teˇ gʼaˇ hta‸ ka‸ maˇ mawˬ. Yeˍsuˆ teˇ gʼaˇ hta‸ ceh tiˉ gʼa mawˬ ve yoˬ.
9Hkʼaw oˇ ve teˇ shiˍ lo yawˇ hui kʼaw‸ ya‸ la chehˇ ve teˇ yanˇ Yeˍsuˆ kʼoˆ ve, Chaw yaˇ ve Yaˇ hpu lehˬ, suh kuiˬ lo maˇ kʼaw‸ te‸ tu la sheˍ ve ceh ceh, nawˬ hui gʼa mawˬ peuˬ ve awˬ lawn chi, chaw teˇ gʼaˇ hta‸ ka‸ taˇ hto piˇ teh‸, yawˇ hui hta‸ tawˇ piˇ ve yoˬ.
10Oˇ htaˇ yawˇ ve awˬ la‸ gʼawˇ teˇ hpaˍ lehˬ, Hkʼe te kʼo, Eˇliˇya‸ awˉ lawˉ gʼa laˬ tuˬ yoˬ, teh‸ aˬ hto‸ ma pa taw li‸ bvuh‸ paˍ teˇ hpaˍ kʼoˆ taˍ ve le teh‸, yawˇ hta‸ na nyi ve teˇ yanˇ
11yawˇ kʼaw‸ kʼoˆ piˇ ve, Eˇliˇya‸ awˬ tehˬ awˬ na laˬ leh, hkʼa peu-eˬ hta‸ kʼaw‸ gu te tuˬ yoˬ. 12Ya‸ hkʼaˇ, ngaˬ nawˬ hui hta‸ kʼoˆ laˇ ve, Eˇliˇya‸ gaˬ la peuˬ leh, yawˇ hui yawˇ hta‸ maˇ shiˍ ve pa taw, te gaˇ ve hkʼe yawˇ hta‸ te piˇ ve yoˬ. Oˇ ve hkʼa shuˍ shuˍ chaw yaˇ ve Yaˇ hpu htawˇ yawˇ hui ve la‸ sheh awˬ hkʼaw lo gʼa hkanˍ tuˬ yoˬ teh‸ kʼoˆ ve yoˬ.
13Oˇ htaˇ, baˆtiˆsaˬ piˇ paˍ Yoˇhanˬ awˬ lawn yawˇ kʼoˆ chehˇ ve hta‸ awˬ la‸ gʼawˇ hui gʼa shiˍ ve yoˬ.
Paw‸ hpeuˆ ve yaˇ paˍ ehˉ teˇ gʼaˇ hta‸ Yeˍsuˆ gu na-e piˇ ve
14Chaw awˬ moˍ lonˉ geh yawˇ hui gaˬ la ve teˇ yanˇ, chaw teˇ gʼaˇ yawˇ geh laˬ leh, yawˇ mehˆ gʼuˇ suhˍ hkui tcuhˉ teh leh kʼoˆ ve, 15Jawˇmawˇ-oˬ, ngaˬ yaˇ paˍ hta‸ ha kʼaˉ laˇ-oˆ. Yawˇ paw‸ hpeuˆ leh gʼa hkanˍ jaˇ ve yoˬ. Awˬ lawn kʼo, yawˇ aˬ miˍ awˬ hkʼaw lo teˇ hkui teˇ hkui paˍ lo‸-e leh, iˉ kaˆ awˬ hkʼaw lo htawˇ teˇ hkui teˇ hkui paˍ lo‸-e ve yoˬ. 16Nawˬ ve awˬ la‸ gʼawˇ teˇ hpaˍ geh ngaˬ yawˇ hta‸ shiˍ veu laˇ htawˇ, yawˇ hui yawˇ hta‸ gu na-e piˇ maˇ gʼa teh‸ yawˇ kʼoˆ ve yoˬ.
17Yeˍsuˆ kʼaw‸ kʼoˆ ve, Yonˍ ve maˇ cawˬ leh nyi ma hpfuhˆ puiˉ ve chaw chi teˇ co-e, ngaˬ nawˬ hui geh hkʼaˬ maw gʼa chehˇ tuˬ sheˍ le. Nawˬ hui hta‸ hkʼaˬ maw gʼa yeunˇ hkanˍ tuˬ sheˍ le. Yawˇ hta‸ ngaˬ geh yuˬ laˬ-o‸ teh‸ kʼoˆ piˇ ve yoˬ. 18Oˇ htaˇ Yeˍsuˆ neˇ oˇ ve hta‸ deˇ leh, neˇ oˇ ve yaˇ paˍ awˬ hkʼaw lo tawˆ kʼai ve yoˬ. Oˇ ve teˇ hkui yaˇ paˍ oˇ ve na-e la ve yoˬ.
19Oˇ htaˇ, Yeˍsuˆ teˇ gʼaˇ ceh tiˉ chehˇ htaˇ, awˬ la‸ gʼawˇ teˇ hpaˍ yawˇ geh laˬ leh, Neˇ oˇ ve hta‸ aˬ hto‸ ma pa taw ngaˬ hui gʼa‸ kʼoˬ maˇ gʼa ve le teh‸ na nyi ve yoˬ.
20Yawˇ kʼaw‸ kʼoˆ ve, Nawˬ hui hkʼa deh‸ maˇ yonˍ ve pa taw yoˬ. Ngaˬ nawˬ hui hta‸ awˬ tehˬ awˬ na kʼoˆ laˇ ve, nawˬ hui yonˍ ve teˇ ceuˬ gʼawˇ caˉ yawˇ hkʼe hui cawˬ ve kʼo, hkʼaw chi teˇ shiˍ hta‸, Oˇ kaˬ lo jiˆ kʼai-o teh‸ kʼoˆ piˇ ve teˇ yanˇ, jiˆ kʼai tuˬ yoˬ. Nawˬ hui te maˇ gʼa ve teˇ ceuˬ ka‸ maˇ cawˬ teh‸, yawˇ hui hta‸ kʼoˆ piˇ ve yoˬ.#17:20 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -21 Bon lawˬ ve leh caˇ tuˬ ce ve ceh tiˉ chi teˇ ceuˬ hta‸ tawˆ kʼai piˇ lawˬ gʼa ve yoˬ.
Yeˍsuˆ yawˇ gʼa suh tuˬ ve awˬ lawn teˇ pawˆ kʼaw‸ hto piˇ ve
22Gaˍliˍlehˇ mvuhˇmiˬ awˬ hkʼaw lo yawˇ hui teˇ geh chehˇ ve teˇ yanˇ Yeˍsuˆ kʼoˆ ve, Chaw yaˇ ve Yaˇ hpu lehˬ, chaw yaˇ hui ve la‸ sheh awˬ hkʼaw lo chiˇ a‸ ve hta‸ gʼa hkanˍ ve awˬ yanˇ neˇ la peuˬ. 23Yawˇ hui yawˇ hta‸ tiˇ pehˍ leh shehˆ nyi teˇ nyi awˬ hkʼaw lo yawˇ kʼaw‸ te‸ tu la tuˬ yoˬ teh‸ kʼoˆ ve teˇ yanˇ,
awˬ la‸ gʼawˇ hui dawˇ haˍ jaˇ ve yoˬ.
Bon yehˬ lonˉ awˬ pon a moˇ hpu keu ve
24Yawˇ hui Kaˍpeˍneˍonˍ venˇ lo kʼaw‸ gaˬ la ve teˇ yanˇ, bon yehˬ lonˉ awˬ pon a moˇ shaw shehˍ hpaˇ teˇ hpaˍ Peˍtruˆ geh kʼai leh, Nawˬ ve saˍ la‸ lehˬ, a moˇ maˇ keu leh laˇ teh‸ na nyi ve yoˬ.
25Keu ve yoˬ teh‸ kʼaw‸ kʼoˆ piˇ ve yoˬ. Peˍtruˆ yehˬ hkʼaw lo‸-e ve teˇ yanˇ, Yeˍsuˆ tawˇ awˉ lawˉ yaw leh kʼoˆ ve, Siˉmonˍ-oˬ, nawˬ hkʼaˬ hkʼe dawˇ ve le. Chi miˬguiˬ ve hkunˉ hawˉ hkanˇ teˇ hpaˍ lehˬ, a shu geh a moˇ shaw ve le. A shu yawˇ ve yaˇ geh laˇ. Maˇ heˆ kʼo, shu geh shaw ve laˇ teh‸ na nyi ve yoˬ.
26Shu geh shaw ve yoˬ teh‸ Peˍtruˆ kʼaw‸ kʼoˆ ve teˇ yanˇ Yeˍsuˆ lehˬ, Hkʼe te kʼo, yawˇ hui ve yaˇ teˇ hpaˍ gʼa ponˬ ve yoˬ. 27Ya‸ hkʼaˇ, ngaˬ hui hta‸ pa taw shu maˇ gʼa dawˇ ya‸ tuˬ, gʼuiˬ po lo kʼai leh biˉ teˇ maˬ hta‸ ca baˬ keu-o. Awˉ lawˉ gʼa ve ngaˇ hta‸ yuˬ leh maw‸ kʼaw ngaˉ hkʼa nyi. Oˇ htaˇ, hpu teˇ hteh‸ hta‸ nawˬ gʼa mawˬ tuˬ yoˬ. Hpu oˇ ve hta‸ yuˬ leh, ngaˬ awˬ pon leh nawˬ awˬ pon yawˇ hui hta‸ ca piˇ-oˆ teh‸, Peˍtruˆ hta‸ kʼoˆ piˇ ve yoˬ.
Currently Selected:
Ma‸htehˍ li‸ 17: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.