Ma‸htehˍ li‸ 14

Baˆtiˆsaˬ piˇ paˍ Yoˇhanˬ suh ve

1Oˇ ve teˇ yanˇ jawˇmawˇ Heˍroˆ lehˬ, Yeˍsuˆ ve awˬ lawn bvuhˬ kʼai chehˇ ve hta‸ gʼa kaˇ leh, 2yawˇ ve awˬ ceˬ teˇ hpaˍ hta‸ kʼoˆ piˇ ve, Chi hpaˇ lehˬ, baˆtiˆsaˬ piˇ paˍ Yoˇhanˬ yoˬ. Yawˇ suh kuiˬ lo kʼaw‸ te‸ tu la ve pa taw, yawˇ awˬ hkʼaw lo kanˉ uiˍ ve chi teˇ hpaˍ hta‸ te tawˆ la ve yoˬ teh‸ kʼoˆ ve yoˬ.

3Jawˇmawˇ Heˍroˆ lehˬ, yawˇ ve awˬ nyi paˍ Hpiˇliˇpuˆ ve awˬ miˇ ma Heˍroˍdiˆ awˬ lawn hta‸ pa taw, Yoˇhanˬ hta‸ hpeh yuˬ leh htawnˍ hkʼaw keu taˍ ve yoˬ. 4Awˬ lawn kʼo Yoˇhanˬ lehˬ, Yaˇ miˇ oˇ ve hta‸ nawˬ heuˆ maˇ cawˇ teh‸ yawˇ hta‸ kʼoˆ piˇ ve pa taw yoˬ. 5Jawˇmawˇ Heˍroˆ lehˬ, Yoˇhanˬ hta‸ tiˇ pehˍ gaˇ ve htawˇ, mvuhˇmiˬ yaˇ hui hta‸ yawˇ kawˆ ve yoˬ. Awˬ lawn kʼo, Yoˇhanˬ lehˬ Gʼuiˬsha ve tcuh kaˍ paˍ yoˬ teh‸ mvuhˇmiˬ yaˇ hui shawˍ taˍ ve yoˬ.

6Jawˇmawˇ Heˍroˆ paw ve hta‸ dawˇ nawˇ tuˬ pawehˇ te ve awˬ nyi kʼaw‸ gaˬ la leh, Heˍroˍdiˆ ve awˬ yaˇ miˇ chaw chi ma ve mehˆ gʼuˇ suhˍ pawehˇ te maˍ piˇ htaˇ, Heˍroˆ nyi ma cawˇ jaˇ ve yoˬ. 7Hkʼe te leh, yaˇ miˇ oˇ ve hkʼa lawˬ ve teˇ hpaˍ yawˇ hta‸ piˇ tuˬ yoˬ teh‸, jawˇmawˇ Heˍroˆ ka ti‸ te leh hkanˍ taˍ ve yoˬ.

8Yaˇ miˇ oˇ ve lehˬ, awˬ e maˍ piˇ taˍ ve hkʼe, Baˆtiˆsaˬ piˇ paˍ Yoˇhanˬ ve oˉ kʼoˍ hta‸ hkehˇ pe le awˬ hkʼaw keu leh pe‸ laˇ-oˆ teh‸ kʼoˆ ve yoˬ.

9Hkunˉ hawˉ hkanˇ lehˬ dawˇ haˍ ve htawˇ, yawˇ hkanˍ taˍ peuˬ ve tawˇ hkawˇ leh, yawˇ geh mui caˇ chehˇ ve chaw hui hta‸ pa taw, yaˇ miˇ oˇ ve lawˬ ve hkʼe piˇ tuˬ yawˇ tawˇ piˇ ve yoˬ. 10Oˇ htaˇ, yawˇ chaw hta‸ hpehˇ peu leh, htawnˍ awˬ hkʼaw lo Yoˇhanˬ ve oˉ kʼoˍ hta‸ ca tawˆ tcuh ve yoˬ. 11Oˉ kʼoˍ hta‸ hkehˇ pe le awˬ hkʼaw keu veu laˇ leh, yaˇ miˇ oˇ ve hta‸ piˇ peuˬ hkʼaw‸ nawˉ, yawˇ htawˇ yawˇ ve awˬ e hta‸ ca yuˬ piˇ ve yoˬ. 12Oˇ htaˇ, Yoˇhanˬ ve awˬ la‸ gʼawˇ teˇ hpaˍ laˬ leh yawˇ ve awˬ to hta‸ tuˍ piˇ peuˬ hkʼaw‸ nawˉ, yawˇ hui Yeˍsuˆ hta‸ ca hto piˇ ve yoˬ.

Chaw ngaˇ hinˉ gʼaˇ hta‸ caˍ piˇ ve

13Awˬ lawn chi hta‸ Yeˍsuˆ gʼa kaˇ htaˇ, yawˇ haw lo‸ kʼoˍ ciˇ leh oˇ kaˬ lo tawˆ-e leh, chaw gawˬ kuiˬ teˇ kaˬ lo kʼai ve yoˬ. Chaw awˬ moˍ lonˉ teˇ hpaˍ gʼa kaˇ htaˇ, venˇ teˇ hpaˍ awˬ hkʼaw lo tawˆ kʼai leh, miˬ chaˇ hkʼoˆ ya‸ kʼaw juˇ kʼai leh yawˇ awˬ hkʼaˇ suh kʼai ve yoˬ. 14Yawˇ haw lo‸ kʼoˍ hkʼaw tawˆ kʼai htaˇ, chaw awˬ moˍ lonˉ hta‸ yawˇ gʼa mawˬ ve yoˬ. Yawˇ yawˇ hui hta‸ ha kʼaˉ leh, yawˇ hui awˬ hkʼaw lo naˬ ve gawˬ ve chaw teˇ hpaˍ hta‸ gu na-e piˇ ve yoˬ.

15Mvuhˇ hpeu‸ la htaˇ, awˬ la‸ gʼawˇ teˇ hpaˍ yawˇ geh laˬ leh kʼoˆ ve, Choˬ kaˬ lehˬ heh puiˉ hkʼaw hpeh‸ leh, mvuhˇ ka‸ hpeu‸ la yoˬ. Chaw awˬ moˍ lonˉ chi teˇ hpaˍ hkʼaˆ hkʼaw lo kʼai leh caˇ tuˬ ca vuiˬ caˇ-e tuˬ yawˇ hui hta‸ hpehˇ piˇ-oˆ teh‸ kʼoˆ piˇ ve yoˬ.

16Yeˍsuˆ lehˬ, Yawˇ hui kʼai tuˬ maˇ loˍ. Nawˬ hui yawˇ hui hta‸ caˍ piˇ-oˆ teh‸ kʼoˆ piˇ ve yoˬ.

17Yawˇ hui kʼaw‸ kʼoˆ ve, Ngaˬ hui lehˬ, hkaoˍmonˇ ngaˇ diˬ leh ngaˇ nyiˇ hkeh ceh tiˉ cawˬ ve yoˬ teh‸ yawˇ hta‸ kʼoˆ piˇ ve yoˬ.

18Oˇ ve teˇ hpaˍ hta‸ ngaˬ geh yuˬ veu laˇ-oˆ teh‸ Yeˍsuˆ kʼoˆ piˇ ve yoˬ. 19Oˇ htaˇ chaw awˬ moˍ lonˉ teˇ hpaˍ hta‸, Mvuh‸ awˬ hkʼoˆ mui-o teh‸ yawˇ kʼoˆ piˇ ve yoˬ. Hkaoˍmonˇ oˇ ve ngaˇ diˬ leh ngaˇ oˇ ve nyiˇ hkeh hta‸ yawˇ yuˬ peuˬ hkʼaw‸ nawˉ, mvuhˇ naw ma lo chiˇ nyi leh bon hta‸ chiˇ mvuh ve yoˬ. Oˇ htaˇ, yawˇ hkaoˍmonˇ hta‸ hkʼeh‸ leh awˬ la‸ gʼawˇ hui hta‸ piˇ peuˬ hkʼaw‸ nawˉ, awˬ la‸ gʼawˇ teˇ hpaˍ htawˇ chaw awˬ moˍ lonˉ teˇ hpaˍ hta‸ pehˬ piˇ ve yoˬ. 20Oˇ htaˇ, chaw hkʼa peu-eˬ hkʼa bvuhˆ gʼa caˇ ve yoˬ. Caˇ leuˉ ve teˇ hpaˍ hta‸ kʼaw‸ gʼawˆ ve teˇ yanˇ, teˇ chi nyiˇ hkʼawˍ lawˇ hkʼa biˇ gʼa ve yoˬ. 21Caˇ ve chaw teˇ hpaˍ lehˬ, yaˇ miˇ leh yaˇ ehˉ hta‸ maˇ shawˍ kʼo, hawˉ hkʼaˆ chaw mawˇ tiˉ aˬ laˬ hkʼe ngaˇ hinˉ gʼaˇ cawˬ ve yoˬ.

Gʼuiˬ po hkʼoˆ Yeˍsuˆ juˇ kʼai ve

22Oˇ ve hkʼaw‸ nawˉ Yeˍsuˆ lehˬ, chaw awˬ moˍ lonˉ teˇ hpaˍ hta‸ hpehˇ piˇ chehˇ htaˇ, awˬ la‸ gʼawˇ teˇ hpaˍ hta‸ haw lo‸ kʼoˍ ciˇ leh, yawˇ awˬ gʼuˇ suhˍ gʼuiˬ pfuhˍ coˇ paˉ lo kʼai tcuh ve yoˬ. 23Yawˇ chaw awˬ moˍ lonˉ teˇ hpaˍ hta‸ hpehˇ piˇ peuˬ hkʼaw‸ nawˉ, bon ca lawˬ tuˬ yawˇ teˇ gʼaˇ tiˉ hkʼaw pui hkʼoˆ lo taˆ-e ve yoˬ. Mehˆ muiˉ naˆ la htaˇ, yawˇ teˇ gʼaˇ tiˉ oˇ kaˬ lo chehˇ taˍ ve yoˬ. 24Haw lo‸ kʼoˍ oˇ ve lehˬ, gʼuiˬ po awˬ kʼaw ji lo gaˬ htaˇ, mvuhˇ haw hpawˇ maˇ cawˇ ve pa taw, gʼuiˬ baˇ teˇ hpaˍ haw lo‸ kʼoˍ hta‸ htinˍ jaˇ ve yoˬ.

25Tanˇ hkuinˇ shehˆ naˍ riˍ ponˬ peuˬ hkʼaw‸ nawˉ, Yeˍsuˆ gʼuiˬ po hkʼoˆ ya‸ kʼaw juˇ leh yawˇ hui geh laˬ ve yoˬ. 26Gʼuiˬ po hkʼoˆ lo yawˇ ya‸ kʼaw juˇ laˬ ve hta‸ awˬ la‸ gʼawˇ hui gʼa mawˬ htaˇ, yawˇ hui kawˆ jaˇ leh, Chaw ha ku yoˬ teh‸ kʼoˆ ve yoˬ.

27Yawˇ hui kawˆ ve pa taw gʼaˇ hte‸ kuˬ ve yoˬ. Teˇ cawˬ haˉ Yeˍsuˆ yawˇ hui hta‸ kʼoˆ piˇ ve, Nyi ma ha‸ hanˉ te-o. Taˇ kawˆ, ngaˬ yoˬ teh‸ kʼoˆ piˇ ve yoˬ.

28Peˍtruˆ yawˇ hta‸ kʼoˆ piˇ ve, Jawˇmawˇ-oˬ, nawˬ yoˬ kʼo, iˉ kaˆ awˬ hkʼoˆ ngaˬ hta‸ nawˬ geh laˬ tcuh laˇ-oˆ teh‸ kʼoˆ piˇ htaˇ, Laˬ-o‸ teh‸ yawˇ kʼaw‸ kʼoˆ piˇ ve yoˬ.

29Hkʼe te leh Peˍtruˆ haw lo‸ kʼoˍ hkʼaw tawˆ-e leh, iˉ kaˆ hkʼoˆ ya‸ kʼaw juˇ leh Yeˍsuˆ geh kʼai ve yoˬ. 30Ya‸ hkʼaˇ, mvuhˇ haw hehnˇ jaˇ ve hta‸ yawˇ mawˬ htaˇ, kawˆ jaˇ ve yoˬ. Yawˇ iˉ kaˆ awˬ hkʼaw lo tuˍ lo‸-e chehˇ ve teˇ yanˇ, Jawˇmawˇ-oˬ, htaiˍ hkʼaw‸ laˇ-oˆ teh‸ kuˬ ve yoˬ.

31Teˇ cawˬ haˉ Yeˍsuˆ yawˇ ve la‸ sheh che leh, yawˇ hta‸ gʼawˬ tawˆ leh kʼoˆ piˇ ve, Hkʼa deh‸ maˇ yonˍ ve chaw-oˬ, nawˬ aˬ hto‸ ma te htawˇ dawˇ nawˬ dawˇ te ve le teh‸ yawˇ hta‸ kʼoˆ piˇ ve yoˬ.

32Yawˇ huiˉ maˬ haw lo‸ kʼoˍ hkʼaw lo‸-e ve teˇ yanˇ, mvuhˇ haw htawˇ dehˬ sheˬ ve yoˬ. 33Haw lo‸ kʼoˍ hkʼaw chehˇ ve chaw teˇ hpaˍ yawˇ hta‸ oˉ kʼoˍ pui leh, Nawˬ lehˬ awˬ tehˬ awˬ na Gʼuiˬsha ve Yaˇ hpu yoˬ teh‸ kʼoˆ ve yoˬ.

Geˍneˍsaˍrehˆ mvuhˇmiˬ hkʼaw lo chaw naˬ teˇ hpaˍ hta‸ Yeˍsuˆ gu na-e piˇ ve

34Gʼuiˬ po coˇ paˉ lo yawˇ hui hkanˍ kʼai leh Geˍneˍsaˍrehˆ mvuhˇmiˬ lo gaˬ ve yoˬ. 35Oˇ kaˬ lo chehˇ ve chaw teˇ hpaˍ lehˬ, Yeˍsuˆ yoˬ teh‸ gʼa shiˍ ve teˇ yanˇ, mvuhˇmiˬ oˇ ve awˬ hkʼaw teˇ kaˬ le le lo chaw hta‸ kʼai tcuh leh, naˬ ve gawˬ ve chaw hkʼa peu-eˬ hta‸ Yeˍsuˆ geh yuˬ laˬ ve yoˬ. 36Yawˇ ve aˉ po‸ awˬ caˍ hta‸ ceh gʼa htawˇ tuˬ yawˇ hta‸ lawˬ hkawˉ ve yoˬ. Hkʼa htawˇ ve chaw teˇ hpaˍ htawˇ na-e la ve yoˬ.

Currently Selected:

Ma‸htehˍ li‸ 14: LHBE

Highlight

Copy