Oˉ kʼoˍ pui ve li‸ 20
20
Maˇ na yuˬ ve chaw hta‸ ciˍ yanˍ piˇ ve
1Gʼuiˬsha Moˉseˍ hta‸ cuˇ leh Iˉsaˍreˍlaˆ chaw hta‸ chi hkʼe kʼaw‸ kʼoˆ piˇ ve yoˬ. 2Nawˬ hui maˇ kʼoˆ, nawˬ hui geh ca chehˇ la taˍ ve awˬ nu ve chaw hkʼaˬ ve teˇ gʼaˇ maˇ kʼoˆ, a shu yawˇ ve yaˇ hta‸ yuˬ leh Mawˇloˆ gʼuiˬsha hta‸ tanˇ piˇ ve kʼo, chaw oˇ ve hta‸ haˉ pui gʼa baˬ pehˍ piˇ ve yoˬ. 3Chaw teˇ gʼaˇ a shu yawˇ ve yaˇ hta‸ yuˬ leh Mawˇloˆ gʼuiˬsha hta‸ piˇ leh, ngaˬ ve aˉ po kʼo bon yehˬ leh ngaˬ ve awˬ meh hta‸ cha‸ chiˆ tuˬ te ve kʼo, yawˇ hta‸ ngaˬ ve chaw, teh‸ kʼaw‸ shawˍ piˇ tuˬ ve maˇ heˆ. 4Iˉsaˍreˍlaˆ chaw teˇ hpaˍ lehˬ, chaw oˇ ve hta‸ maˇ tiˇ pehˍ ve kʼo, 5ngaˬ lehˬ chaw oˇ ve hpaˇ leh yawˇ ve yehˬ yaˇ kʼa yaˇ teˇ hpaˍ hta‸maˇ kʼoˆ, yawˇ geh teˇ geh Mawˇloˆ gʼuiˬsha hta‸ oˉ kʼoˍ hkʼa pui ve chaw teˇ hpaˍ hta‸ maˇ kʼoˆ, ngaˬ ve chaw teh‸ kʼaw‸ shawˍ piˇ tuˬ ve maˇ heˆ.
6Mawˉ paˍ sheˍ paˍ hui geh kʼai ve chaw hta‸ ngaˬ ve chaw, teh‸ kʼaw‸ shawˍ piˇ tuˬ ve maˇ heˆ. 7Nawˬ hui ve awˬ to hta‸ da‸ kehˬ piˇ-oˆ. Awˬ lawn kʼo, ngaˬ lehˬ nawˬ hui ve Gʼuiˬsha hpeh‸ ve yoˬ. 8Ngaˬ ve awˬliˇtawˇhkawˇ teˇ hpaˍ hta‸ na yuˬ-o‸. Awˬ lawn kʼo, ngaˬ lehˬ Gʼuiˬsha hpeh‸ leh nawˬ hui hta‸ da‸ kehˬ la piˇ taˍ peuˬ ve yoˬ.
9A shu yawˇ ve awˬ pa awˬ e hta‸ hkeu ve chaw hta‸ gʼa tiˇ pehˍ piˇ ve yoˬ.
10Chaw teˇ gʼaˇ shu miˇ ma hta‸ haˉ chawˇ ca te ve kʼo, yawˇ hta‸ ka‸ yaˇ miˇ oˇ ve hta‸ ka‸ gʼa tiˇ pehˍ piˇ ve yoˬ. 11Chaw teˇ gʼaˇ a shu yawˇ awˬ pa ve awˬ miˇ ma i hta‸ haˉ chawˇ ca te ve kʼo, yawˇ hta‸ ka‸ yaˇ miˇ oˇ ve hta‸ ka‸ gʼa tiˇ pehˍ piˇ ve yoˬ. Awˬ lawn kʼo, chaw oˇ ve lehˬ a shu yawˇ awˬ pa ve awˬ me‸ awˬ hponˇ hta‸ te luˬ ve pa taw yoˬ. Yawˇ huiˉ maˬ nyiˇ gʼaˇ gʼaˇ suh keunˍ ve yoˬ. 12Chaw teˇ gʼaˇ a shu yawˇ ve awˬ hkuiˇ ma hta‸ haˉ chawˇ te ve kʼo, yawˇ huiˉ maˬ nyiˇ gʼaˇ gʼaˇ hta‸ gʼa tiˇ pehˍ piˇ ve yoˬ. Yawˇ huiˉ maˬ lehˬ a shu yawˇ awˬ to hta‸ cha‸ chiˆ tuˬ te peuˬ ve pa taw suh keunˍ ve yoˬ. 13Hawˉ hkʼaˆ chawˇ hawˉ hkʼaˆ peh‸ ve tzuhˆ ve hta‸ te ve kʼo, yawˇ huiˉ maˬ nyiˇ gʼaˇ gʼaˇ hta‸ gʼa tiˇ pehˍ piˇ ve yoˬ. Yawˇ huiˉ maˬ cha‸ chiˆ ve kanˉ hta‸ te peuˬ ve pa taw suh keunˍ ve yoˬ. 14Chaw teˇ gʼaˇ lehˬ meh maˬ lanˉ hta‸ ka‸, yawˇ ve yaˇ miˇ hta‸ ka‸ teˇ pawˆ tiˉ heuˆ ve kʼo, yawˇ hui shehˆ gʼaˇ gʼaˇ hta‸ gʼa tiˇ pehˍ piˇ ve yoˬ. Chi hkʼe ve cha‸ chiˆ ve awˬ ceuˬ nawˬ hui awˬ hkʼaw lo maˇ gʼa cawˬ piˇ. 15Chaw teˇ gʼaˇ to nuˇ to shaˆ hta‸ haˉ chawˇ te ve kʼo, yawˇ hta‸ ka‸ to nuˇ to shaˆ oˇ ve hta‸ ka‸ gʼa tiˇ pehˍ piˇ ve yoˬ. 16Yaˇ miˇ teˇ gʼaˇ lehˬ to nuˇ to shaˆ hta‸ haˉ chawˇ te tuˬ coˇ caˇ ve kʼo, yawˇ leh to nuˇ to shaˆ oˇ ve hta‸ gʼa tiˇ pehˍ piˇ ve yoˬ. Yawˇ hui lehˬ suh keunˍ ve yoˬ.
17Chaw teˇ gʼaˇ yawˇ ve awˬ nyi ma hta‸ heuˆ ve kʼo, yawˇ huiˉ maˬ lehˬ ya‸ taw tuˬ uiˍ ve kanˉ hta‸ te peuˬ ve pa taw, yawˇ huiˉ maˬ hta‸ gʼa gʼa‸ kʼoˬ piˇ ve yoˬ. Yawˇ lehˬ a shu yawˇ ve awˬ nyi ma hta‸ haˉ chawˇ te peuˬ ve pa taw, oˇ hkʼe ciˍ yanˍ piˇ ve hta‸ gʼa hkanˍ ve yoˬ. 18Chaw teˇ gʼaˇ awˬ liˇ laˬ chehˇ ve yaˇ miˇ hta‸ haˉ chawˇ ca te ve kʼo, yawˇ huiˉ maˬ lehˬ da‸ kehˬ ve awˬ liˇ hta‸ te ya‸ peuˬ ve pa taw, gʼa‸ kʼoˬ ve hta‸ gʼa hkanˍ ve yoˬ.
19Chaw teˇ gʼaˇ, yawˇ ve aˉ shuˍ ma hta‸ haˉ chawˇ te ve kʼo, yawˇ huiˉ maˬ lehˬ cha‸ chiˆ ve kanˉ hta‸ te peuˬ ve pa taw, ciˍ yanˍ ve hta‸ gʼa hkanˍ ve yoˬ. 20Chaw teˇ gʼaˇ, yawˇ ve aˉ shuˍ paˍ miˇ ma hta‸ haˉ chawˇ te ve kʼo, yawˇ lehˬ aˉ shuˍ paˍ ve awˬ me‸ awˬ hponˇ hta‸ te luˬ ve pa taw, yawˇ huiˉ maˬ nyiˇ gʼaˇ gʼaˇ ciˍ yanˍ ve hta‸ gʼa hkanˍ ve yoˬ. Yawˇ huiˉ maˬ nyiˇ gʼaˇ gʼaˇ yaˇ cawˬ la tuˬ ve maˇ heˆ. 21Chaw teˇ gʼaˇ, a shu yawˇ ve awˬ nyi paˍ miˇ ma hta‸ heuˆ ve kʼo, yawˇ huiˉ maˬ yaˇ ehˉ cawˬ la tuˬ ve maˇ heˆ. Yawˇ lehˬ maˇ da‸ kehˬ ve kanˉ hta‸ te leh, a shu yawˇ awˬ nyi paˍ ve awˬ me‸ awˬ hponˇ hta‸ te luˬ piˇ ve yoˬ.
22Ngaˬ nawˬ hui hta‸ shiˍ kʼai laˇ tuˬ ve Hkaˍnanˍ mvuhˇmiˬ hkʼaw lo ngaˬ nawˬ hui hta‸ maˇ gʼa gʼa‸ kʼoˬ laˇ tuˬ, ngaˬ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ-o‸. 23Oˇ kaˬ lo chehˇ ve chaw hui te ve hkʼe, nawˬ hui taˇ te. Nawˬ hui mvuhˇmiˬ oˇ ve hkʼaw lo‸-e hpeh‸ tuˬ, ngaˬ lehˬ oˇ kaˬ lo chehˇ taˍ ve chaw hui hta‸ gʼa‸ kʼoˬ piˇ tuˬ yoˬ. Yawˇ hui lehˬ cha‸ chiˆ ve kanˉ hta‸ te leh, ngaˬ ve awˬ me‸ awˬ hponˇ hta‸ te luˬ peuˬ ve yoˬ. 24Ya‸ hkʼaˇ, hkuiˇ jaˇ da‸ jaˇ ve mvuhˇmiˬ oˇ ve ngaˬ nawˬ hui hta‸ piˇ laˇ tuˬ ka ti‸ te taˍ peuˬ ve hkʼe, ngaˬ nawˬ hui hta‸ awˬ tehˬ awˬ na piˇ laˇ tuˬ yoˬ. Ngaˬ lehˬ nawˬ hui ve Gʼuiˬsha hpeh‸ leh, nawˬ hui hta‸ leuˆ yuˬ taˍ ve yoˬ. 25Chi hta‸ pa taw, nawˬ hui lehˬ to nuˇ to shaˆ leh ngaˆ hkʼaˬ ve teˇ hpaˍ da‸ kehˬ ve leh, hkʼaˬ ve teˇ hpaˍ maˇ da‸ kehˬ ve hta‸ hkʼa deh‸ gʼa fuiˍ gʼa piˇ lawˬ ve yoˬ. Maˇ da‸ kehˬ ve to nuˇ to shaˆ leh ngaˆ teˇ hpaˍ hta‸ taˇ caˇ. Nawˬ lehˬ oˇ ve teˇ hpaˍ hta‸ cha‸ chiˆ ve awˬ ceuˬ teh‸ shawˍ taˍ ve pa taw, oˇ ve teˇ hpaˍ hta‸ caˇ ve chaw lehˬ cha‸ chiˆ kʼai tuˬ yoˬ. 26Nawˬ hui lehˬ ngaˬ hta‸ caˉ da‸ ve chaw gʼa hpeh‸ piˇ ve yoˬ. Awˬ lawn kʼo, ngaˬ lehˬ Gʼuiˬsha hpeh‸ leh da‸ kehˬ jaˇ ve yoˬ. Nawˬ hui ngaˬ hta‸ caˉ da‸ ve chaw hpeh‸ la piˇ tuˬ, ngaˬ nawˬ hui hta‸ leuˆ yuˬ taˍ peuˬ ve yoˬ.
27Mawˉ paˍ sheˍ paˍ te ve chaw hkʼaˬ ve teˇ gʼaˇ hta‸ maˇ kʼoˆ, haˉ pui gʼa baˬ pehˍ piˇ ve yoˬ. Chi hkʼe te ve chaw lehˬ suh keunˍ ve yoˬ, teh‸ Gʼuiˬsha kʼoˆ ve yoˬ.
Currently Selected:
Oˉ kʼoˍ pui ve li‸ 20: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
