Yawˇbaˆ li‸ 2
2
Saˍtanˍ Yawˇbaˆ hta‸ kʼaw‸ lawˇ nyi ve
1Awˬ hkʼaw‸ nawˉ teˇ pawˆ, mvuhˇ naw yaˇ teˇ hpaˍ Gʼuiˬsha mehˆ gʼuˇ suhˍ kʼaw‸ hpawnˬ da‸ tuˬ awˬ yanˇ gaˬ la ve teˇ yanˇ, Saˍtanˍ htawˇ oˇ kaˬ lo chehˇ taˍ ve yoˬ. 2Nawˬ hkʼaˬ lo gaˬ taˉ peuˬ le, teh‸ Gʼuiˬsha yawˇ hta‸ kʼoˆ piˇ ve yoˬ.
Ngaˬ lehˬ miˬguiˬ hkʼoˆ caw toˇ chehˇ ve yoˬ, teh‸ Saˍtanˍ Yawˇ hta‸ kʼaw‸ yaw hkʼaw‸ piˇ ve yoˬ.
3Gʼuiˬsha yawˇ hta‸ kʼoˆ piˇ ve, Nawˬ ngaˬ ve awˬ ceˬ paˍ Yawˇbaˆ hta‸ mawˬ-aw laˇ. Miˬguiˬ hkʼoˆ yawˇ hkʼe ka ti‸ yeˬ leh da‸ ve chaw teˇ gʼaˇ ka‸ maˇ cawˬ. Yawˇ ngaˬ hta‸ oˉ kʼoˍ pui leh, hai‸ ve kanˉ htaˬ maˇ gʼa te tuˬ shaˍti‸ hkʼa deh‸ taˍ chehˇ ve chaw hpeh‸ ve yoˬ. Te‸ chiˉ awˬ lawn maˇ cawˬ ve ka‸, yawˇ hta‸ te luˬ piˇ tuˬ, nawˬ ngaˬ hta‸ ca lawˬ la ve yoˬ. Ya‸ hkʼaˇ, Yawˇ baˆ lehˬ ponˬ laˬ htaˇ hkʼa shuˍ ka ti‸ yeˬ chehˇ taˍ sheˍ ve yoˬ, teh‸ Saˍtanˍ hta‸ kʼo piˇ ve yoˬ.
4Saˍtanˍ kʼaw‸ yaw hkʼaw‸ leh kʼoˆ ve, Chaw teˇ gʼaˇ a sha‸ gʼa te‸ chehˇ hpeh‸ tuˬ, yawˇ hkʼa cawˬ ve mawˇ hkʼa peu-eˬ ve hta‸ shonˇ kʼai piˇ hpeh‸ ve yoˬ. 5Ya‸ hkʼaˇ, nawˬ chi beu‸ yawˇ ve awˬ to hta‸ naˬ tuˬ te piˇ ve hkʼe kʼo, yawˇ nawˬ hta‸ hkeu laˇ tuˬ yoˬ, teh‸ Gʼuiˬsha hta‸ kʼoˆ piˇ ve yoˬ.
6Oˇ htaˇ Gʼuiˬsha lehˬ, Oˇ hkʼe yoˬ kʼo, yawˇ lehˬ nawˬ ve la‸ sheh hkʼaw cawˬ ve yoˬ. Ya‸ hkʼaˇ, nawˬ yawˇ hta‸ maˇ gʼa tiˇ pehˍ, teh‸ Saˍtanˍ hta‸ kʼoˆ piˇ ve yoˬ.
7Oˇ ve hkʼaw‸ nawˉ Saˍtanˍ Gʼuiˬsha mehˆ gʼuˇ suhˍ tawˆ kʼai leh, Yawˇbaˆ ve awˬ to hkʼoˆ lo shaˉ chuˇ teˇ hpaˍ tawˆ la piˇ lawˬ ve yoˬ. 8Yawˇbaˆ lehˬ, maˇ da‸ ve mawˇ gʼawˆ baˬ taˍ kuiˬ lo kʼai leh, yawˇ ve a naˍ hta‸ gaˆ tuˬ ve je‸ mu‸ hkʼu hkʼeh‸ teˇ maˬ gʼawˆ shi taˍ ve yoˬ. 9Oˇ htaˇ yawˇ ve awˬ miˇ ma kʼoˆ ve, Nawˬ lehˬ ponˬ laˬ htaˇ hkʼa shuˍ ka ti‸ yeˬ chehˇ sheˍ ve yoˬ. Aˬ hto‸ ma pa taw Gʼuiˬsha hta‸ hkeu taˉ leh maˇ suh-e ve le, teh‸ yawˇ hta‸ kʼoˆ piˇ ve yoˬ.
10Yawˇbaˆ kʼaw‸ yaw hkʼaw‸ leh kʼoˆ ve, Nawˬ lehˬ te‸ chiˉ tcuhˉ kuiˬ maˇ cawˬ ve tawˇ hta‸ yaw chehˇ ve yoˬ. Gʼuiˬsha ngaˬ hta‸ da‸ ve awˬ ceuˬ teˇ ceuˬ ceuˬ pe‸ laˇ ve teˇ yanˇ, ngaˬ hui ha‸ yuˬ ve yoˬ. Yawˇ ngaˬ hui hta‸ dawˇ haˍ tcuh laˇ ve teˇ yanˇ, ngaˬ hui hkʼaˬ hkʼe te hkʼanˇ hpeh‸ tuˬ le, teh‸ yawˇ ve awˬ miˇ ma hta‸ kʼoˆ piˇ ve yoˬ. Yawˇ gʼa tu‸ gʼa hkanˍ jaˇ chehˇ ve htawˇ, Yawˇbaˆ Gʼuiˬsha hta‸ maˇ da‸ ve tawˇ te‸ chiˉ maˇ yaw.
Yawˇbaˆ ve awˬ chawˇ teˇ hpaˍ laˬ ve
11Yawˇ baˆ ve awˬ chawˇ 3 gʼaˇ lehˬ, Teˍmanˍ venˇ yaˇ Eˇliˇhpaˆ, Shuˇaˍ venˇ yaˇ Biˇlaˍdaˆ, leh Neˍmaˆ venˇ yaˇ Zawˇhpaˆ hui hpeh‸ ve yoˬ. Yawˇbaˆ hkʼaˬ ma gʼa tu‸ gʼa hkanˍ chehˇ ve awˬ hkawˇ hta‸ yawˇ hui gʼa kaˇ ve teˇ yanˇ, yawˇ hui yawˇ geh kʼai leh dawˇ sha hkawˇ ca yaw piˇ tuˬ dawˇ cheˆ ve yoˬ. 12Yawˇ hui vuiˇ kuiˬ lo laˬ chehˇ sheˍ htaˇ ka‸, Yawˇbaˆ hta‸ gʼa mawˬ ve yoˬ. Ya‸ hkʼaˇ, yawˇ hui yawˇ hta‸ maˇ shiˍ. Yawˇ hui yawˇ hta‸ shiˍ la ve teˇ yanˇ, dawˇ haˍ jaˇ ve hkʼaw a shu yawˇ ve veu‸ kʼaˇ hta‸ tzuh‸ suhˍ leh hawˬ ve yoˬ. Yawˇ hui je‸ meu-e hta‸ mvuhˇ hpe lo hkaˆ baˬ leh, yawˇ hui ve oˉ kʼoˍ hkʼoˆ lo htawˇ je‸ meu-e hkʼaˆ pfuhˍ taˍ ve yoˬ. 13Oˇ hkʼe te peuˬ hkʼaw‸ nawˉ, yawˇ hui tawˇ teˇ peu-eˬ ka‸ maˇ yaw leh, suhˍ nyi suhˍ haˉ yawˇ geh teˇ geh miˬ chaˇ hkʼoˆ lo jo mui taˍ ve yoˬ. Awˬ lawn kʼo, yawˇ hkʼaˬ ma gʼa tu‸ gʼa hkanˍ jaˇ chehˇ ve hta‸ yawˇ hui gʼa mawˬ ve pa taw yoˬ.
Currently Selected:
Yawˇbaˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.