Hawˇseˍ li‸ 6
6
Awˬ hta‸ hpawˇ ceh venˇbaˆ dawˇ hpfuhˆ ve
1Chaw yaˇ teˇ hpaˍ lehˬ, Ngaˬ hui Gʼuiˬsha geh kʼaw‸ kʼo‸-e veuˬ. Awˬ lawn kʼo, yawˇ ngaˬ hui hta‸ naˬ tuˬ te laˇ peuˬ. Ya‸ hkʼaˇ, yawˇ ngaˬ hui hta‸ gu na-e laˇ tuˬ yoˬ. Yawˇ ngaˬ hui hta‸ naˬ tuˬ te laˇ ve yoˬ. Ya‸ hkʼaˇ, ngaˬ hui ve naˬ kuiˬ teˇ hpaˍ hta‸ yawˇ peh laˇ tuˬ yoˬ. 2Nyiˇ shehˆ nyi awˬ hkʼaw lo ceh tiˉ, yawˇ ngaˬ hui hta‸ kʼaw‸ da‸ la piˇ leh, ngaˬ hui yawˇ mehˆ gʼuˇ suhˍ gʼa chehˇ tuˬ yoˬ. 3Ngaˬ hui Gʼuiˬsha hta‸ shiˍ tuˬ coˇ caˇ-a veuˬ. Mvuhˇ htiˇ la ve hkʼa shuˍ, yawˇ ngaˬ hui geh laˬ tuˬ ve yoˬ. Miˬguiˬ hta‸ iˉ kaˆ nehˆ la piˇ ve mvuhˇ yeˬ hkʼa shuˍ, yawˇ ngaˬ hui geh laˬ tuˬ ve yoˬ, teh‸ kʼoˆ ve yoˬ.
4Gʼuiˬsha kʼoˆ ve, Iˉsaˍreˍlaˆ leh Yuˇda‸-oˬ, nawˬ hui hta‸ ngaˬ hkʼaˬ hkʼe gʼa te laˇ tuˬ ve le. Nawˬ hui ngaˬ hta‸ ha‸ ve teˇ ceuˬ lehˬ, mvuhˇ shawˉ htaˇ ve ciˍ gʼuiˬ leh, mvuhˇ shawˉ teˇ na‸ ve moˬ hkʼa shuˍ teˇ hkui tiˉ mehˉ kʼai chehˇ ve yoˬ. 5Chi hta‸ pa taw, ngaˬ ve tcuh kaˍ paˍ teˇ hpaˍ nawˬ hui geh kʼai peu leh, suhˉ jehˬ ve awˬ lawn leh luˬve sheˆ ve awˬ lawn nawˬ hui hta‸ ca kʼoˆ maˍ laˇ tcuh taˍ ve yoˬ. 6Ngaˬ heuˆ gaˇ ve awˬ ceuˬ lehˬ, nawˬ hui ve ha‸ pehnˇ ve teˇ ceuˬ yoˬ. Ngaˬ hta‸ tuˉ tanˇ laˇ ve a‸ kehˉ, ngaˬ ve chaw teˇ hpaˍ ngaˬ hta‸ shiˍ ve teˇ ceuˬ hta‸ ngaˬ leuˉ leh nyi hkʼaˇ suh ve yoˬ.
7Ya‸ hkʼaˇ, chaw chi teˇ hpaˍ yawˇ hui hta‸ piˇ tuˬ ka ti‸ te taˍ ve mvuhˇmiˬ hkʼaw gaˬ la ve teˇ yanˇ, yawˇ hui ngaˬ ve ka ti‸ tawˇ hkawˇ teˇ hpaˍ hta‸ te luˬ ve yoˬ. 8Giˇlaˆ venˇ hkʼaw lo haiˬ ve chaw leh, shu hta‸ tiˇ pehˍ ve chaw hkʼa biˇ chehˇ taˍ ve yoˬ. 9Paw hkuˇ teˇ hpaˍ lehˬ, shu hta‸ hkʼawˇ dawˆ tuˬ ya‸ kʼaw hpuiˇ lo law taˍ ve chaw hkʼawˇ moˍ lonˉ hta‸ shuˍ ve yoˬ. Sheˍhkenˍ venˇ hkʼaw cawˬ ve da‸ kehˬ ve chehˇ kuiˬ lo kʼai ve ya‸ kʼaw hpuiˇ lo htawˇ, yawˇ hui shu hta‸ tiˇ pehˍ chehˇ ve yoˬ. Yawˇ hui lehˬ haiˬ ve kanˉ chi teˇ hpaˍ hta‸ hkʼa tawˍ lehˆ te chehˇ taˍ ve yoˬ. 10Iˉsaˍreˍlaˆ chaw hui lehˬ, kawˆ tuˬ uiˍ jaˇ ve kanˉ hta‸ te chehˇ taˍ ve hta‸ ngaˬ gʼa mawˬ peuˬ. Yawˇ hui lehˬ, shaˉ ho‸ hta‸ oˉ kʼoˍ pui leh a shu yawˇ awˬ to hta‸ cha‸ chiˆ tuˬ te chehˇ ve yoˬ.
11Yuˇda‸ chaw teˇ hpaˍ-o‸, nawˬ hui te chehˇ ve kanˉ hta‸ keunˍ da‸ ve hkʼe, nawˬ hui hta‸ htawˇ ciˍ yanˍ laˇ tuˬ awˬ yanˇ teˇ yanˇ ngaˬ fuiˍ teh taˍ peuˬ.
Currently Selected:
Hawˇseˍ li‸ 6: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
