Gaˍlaˍtiˆ li‸ 5

Ponˬ ve chaw hpeh‸ ve pa taw hkʼa deh‸ yeˬ chehˇ-oˆ

1Ngaˬ hui gʼa ponˬ tuˬ awˬ pon Hkri‸ lehˬ ngaˬ hui hta‸ ponˬ laˇ peuˬ. Hkʼe te leh, hkʼa deh‸ yeˬ chehˇ leh, awˬ ceˬ pfuhˇ ve ehˉ kʼaweh‸ hta‸ teˇ pawˆ taˇ kʼaw‸ pfuhˇ-oˆ.

2Na sheˍ. Ngaˬ Pawˇlu‸ nawˬ hui hta‸ chi hkʼe kʼoˆ laˇ ve yoˬ. Nawˬ hui awˬ guiˬ meuˇ shoˍ ve hta‸ hkanˍ yuˬ ve kʼo, Hkri‸ lehˬ nawˬ hui awˬ pon awˬ bon te‸ chiˉ maˇ cawˬ. 3Awˬ guiˬ meuˇ shoˍ ve hta‸ hkanˍ yuˬ ve chaw hkʼa peu-eˬ hta‸ ngaˬ teˇ pawˆ kʼaw‸ kʼoˆ laˇ shaˍ. Oˇ hkʼe ve chaw lehˬ, awˬ liˇ tawˇ hkawˇ hkʼa peu-eˬ hta‸ gʼa na yuˬ leh gʼa te ve yoˬ. 4Awˬliˇtawˇhkawˇ hta‸ pa taw hteˇ ve cawˇ ve chaw hpeh‸ la tuˬ yoˬ teh‸ nawˬ hui hkʼa dawˇ ve chaw teˇ hpaˍ lehˬ, Hkri‸ hta‸ hpaˆ da‸ kʼai peuˬ. Awˬ bon hta‸ nawˬ hui shonˇ kʼai peuˬ. 5Ngaˬ hui lehˬ, yonˍ ve hta‸ pa taw hteˇ ve cawˇ ve chaw hpeh‸ la tuˬ dawˇ law ve teˇ ceuˬ hta‸ Awˬ ha hpu awˬ hkʼaw lo law chehˇ ve yoˬ. 6Awˬ lawn kʼo, Yeˍsuˆ Hkri‸ awˬ hkʼaw lo chehˇ ve chaw hui lehˬ, awˬ guiˬ meuˇ shoˍ ve maˇ kʼoˆ, maˇ shoˍ ve maˇ kʼoˆ, te‸ chiˉ awˬ bon maˇ cawˬ. Yonˍ ve teˇ ceuˬ ceh tiˉ awˬ bon cawˬ ve yoˬ. Yonˍ ve oˇ ve lehˬ, ha‸ pehnˇ ve awˬ hkʼaw lo kanˉ te ve teˇ ceuˬ yoˬ.

7Awˉ lawˉ htaˇ nawˬ hui hkʼa deh‸ gʼuiˇ kʼai chehˇ ve yoˬ. Hteˇ ve cawˇ ve teˇ ceuˬ hta‸ maˇ gʼa na yuˬ tuˬ, a shu nawˬ hui hta‸ tawˍ taˍ laˇ ve le. 8Nawˬ hui nyi ma chi hkʼe hpfuhˆ kʼai tuˬ beˬ ve oˇ ve lehˬ, nawˬ hui hta‸ kuˬ yuˬ shehˍ hpaˇ Gʼuiˬsha lo laˬ ve maˇ heˆ. 9Diˇ a ciˉ ceh tiˉ ka‸ hkaoˍmonˇ teˇ diˬ hkʼa peu-eˬ hta‸ ciˇ la piˇ puiˉ ve yoˬ. 10Ngaˬ dawˇ ve hkʼe nawˬ hui ka‸ teˇ ceuˬ ceh tiˉ dawˇ tuˬ ve hta‸ Jawˇmawˇ Yeˍsuˆ awˬ hkʼaw lo ngaˬ hkʼa deh‸ yonˍ taˍ ve yoˬ. Nawˬ hui hta‸ sho‸ sha‸ tuˬ te laˇ ve chaw teˇ gʼaˇ lehˬ, yawˇ hkʼaˬ hkʼe ve chaw hpeh‸ ve htawˇ, ciˍ yanˍ ve hta‸ gʼa hkanˍ tuˬ yoˬ.

11Awˬ viˉ awˬ nyi teˇ hpaˍ-oˬ, ngaˬ lehˬ awˬ guiˬ meuˇ shoˍ ve awˬ liˇ hta‸ maˍ piˇ chehˇ sheˍ ve hkʼe kʼo, aˬ hto‸ ma pa taw fawˉ mehˍ ve hta‸ ngaˬ gʼa hkanˍ chehˇ sheˍ le. Oˇ hkʼe maˍ piˇ ve kʼo, la‸ ka hta‸ caˉ da‸ ve hkui htiˇ poˬ paiˍ tuˬ ve teˇ ceuˬ hta‸ yuˬ baˬ peuˬ. 12Nawˬ hui hta‸ nyi ma sho‸ sha‸ tuˬ te chehˇ ve chaw hui lehˬ, a shu yawˇ awˬ to hta‸ yawˇ shawˆ baˬ tuˬ ngaˬ heuˆ gaˇ ve yoˬ.

13Awˬ viˉ awˬ nyi teˇ hpaˍ-oˬ, nawˬ hui gʼa ponˬ tuˬ Gʼuiˬsha nawˬ hui hta‸ kuˬ yuˬ taˍ ve yoˬ. Ya‸ hkʼaˇ, ponˬ ve chi, awˬ suhˍ awˬ shaˍ a loˍ awˬ hkʼaˇ suh te kʼai tuˬ awˬ pon taˇ yehˇ. Ha‸ pehnˇ ve awˬ hkʼaw lo, teˇ gʼaˇ leh teˇ gʼaˇ awˬ ceˬ te da‸-o‸. 14Nawˬ awˬ to hta‸ ha‸ ve hkʼe, awˬ paˇ awˬ kui chehˇ ve chaw teˇ hpaˍ hta‸ ha‸-o‸ teh‸ kʼoˆ taˍ ve tawˇ teˇ hkawˇ awˬ hkʼaw lo, awˬliˇtawˇhkawˇ hkʼa peu-eˬ biˇ la peuˬ.#Okʼo 19:18 15Nawˬ hui teˇ gʼaˇ hta‸ teˇ gʼaˇ che‸ caˇ da‸ ve kʼo, nawˬ hui teˇ gʼaˇ hta‸ teˇ gʼaˇ maˇ gʼa te luˬ da‸ tuˬ shaˍ ti‸ te-o.

Awˬ ha hpu ve awˬ shiˍ leh awˬ suhˍ awˬ shaˍ ve kanˉ teˇ hpaˍ awˬ lawn

16Ngaˬ kʼoˆ ve lehˬ, Awˬ ha hpu awˬ hkʼaˇ suh kʼai-o. Oˇ hkʼe te ve kʼo, awˬ suhˍ awˬ shaˍ a loˍ awˬ hkʼaˇ suh nawˬ hui maˇ kʼai taˬ. 17Awˬ lawn kʼo, awˬ suhˍ awˬ shaˍ a loˍ lehˬ, Awˬ ha hpu hta‸ heh‸ hkehnˉ leh, Awˬ ha hpu htawˇ, awˬ suhˍ awˬ shaˍ a loˍ hta‸ heh‸ hkehnˉ ve yoˬ. Nawˬ hui te gaˇ ve hta‸ maˇ gʼa te tuˬ, oˇ ve nyiˇ ceuˬ tanˬ da‸ chehˇ ve yoˬ. 18Ya‸ hkʼaˇ, Awˬ ha hpu nawˬ hui hta‸ sheh kʼai ve kʼo, nawˬ hui awˬliˇtawˇhkawˇ awˬ hawˉ lo maˇ kʼaw‸ chehˇ.

19Awˬ suhˍ awˬ shaˍ ve kanˉ teˇ hpaˍ hkʼa tawˍ lehˆ tawˆ la peuˬ. Kanˉ oˇ ve teˇ hpaˍ lehˬ, haˉ chawˇ haˉ paˆ te ve, cha‸ chiˆ ve hta‸ te ve, peh‸ ve tzuhˆ ve hta‸ te ve, 20shaˉ ho‸ hta‸ oˉ kʼoˍ pui ve, neˇ te ve, canˇ da‸ ve, ya‸ da‸ jiˆ da‸ ve, shu ve mawˇ hta‸ sheˉ lai ve, nyi ma zuhˆ ve, tawˇ gʼawˬ da‸ ve, hpaˆ da‸ guiˇ da‸ ve, awˬ moˍ pehˬ da‸ ve, 21hkawehˉ ve, tzuhˬ dawˬ bvuhˆ ve, ha lehˬ tuˬ te ponˬ te leuˉ ve, chi hkʼe ve teˇ hpaˍ yoˬ. Chi hkʼe te ve chaw teˇ hpaˍ lehˬ, Gʼuiˬsha ve mvuhˇmiˬ awˬ hkʼaw lo maˇ gʼa lo‸-e teh‸, awˉ lawˉ htaˇ ngaˬ kʼoˆ piˇ taˍ ve hkʼe, chi beu‸ htawˇ nawˬ hui hta‸ kʼaw‸ kʼoˆ laˇ ve yoˬ.

22Ya‸ hkʼaˇ, Awˬ ha hpu ve awˬ shiˍ naw‸ la ve teˇ hpaˍ lehˬ, ha‸ pehnˇ ve, ha lehˬ ve, dawˇ sha ve, dawˇ zuhˬ gaˇ zuhˬ ve, ha kʼaˉ ve, shu awˬ pon da‸ ve hta‸ te ve, ka ti‸ yeˬ ve, 23nyi ma nuˇ nehˬ ve leh, a shu yawˇ awˬ to hta‸ gʼaˇ puiˉ ve, chi teˇ hpaˍ yoˬ. Chi teˇ hpaˍ hta‸ maˇ gʼa te teh‸ kʼoˆ taˍ ve awˬliˇtawˇhkawˇ teˇ maˬ ka‸ maˇ cawˬ. 24Yeˍsuˆ Hkri‸ hta‸ hkʼa caˉ da‸ ve chaw hui lehˬ, awˬ suhˍ awˬ shaˍ hpawˇ hta‸ maˇ kʼoˆ, awˬ suhˍ awˬ shaˍ hta‸ caˉ da‸ ve a loˍ leh sheˉ lai ve teˇ hpaˍ hta‸ htawˇ maˇ kʼoˆ, teˇ geh la‸ ka hkʼoˆ lo hta‸ pehˍ peuˬ. 25Ngaˬ hui Awˬ ha hpu awˬ hkʼaw lo te‸ chehˇ ve kʼo, Awˬ ha hpu awˬ hkʼaˇ suh kʼai-a veuˬ. 26Ngaˬ hui nyi ma uiˍ ve maˇ kʼoˆ, teˇ gʼaˇ leh teˇ gʼaˇ ya‸ da‸ tuˬ te ve maˇ kʼoˆ, teˇ gʼaˇ leh teˇ gʼaˇ hkawehˉ da‸ ve maˇ kʼoˆ, chi teˇ hpaˍ hta‸ ngaˬ hui baˬ taˉ-a veuˬ.

Currently Selected:

Gaˍlaˍtiˆ li‸ 5: LHBE

Highlight

Copy

Compare