Yeˍsaˍkeˍlaˆ li‸ 38
38
Gʼuiˬsha ve awˬ hkʼeun hpeh‸ ve Gawˇgaˆ
1Gʼuiˬsha ngaˬ hta‸ chi hkʼe kʼoˆ laˇ ve yoˬ. 2Chaw yaˇ-oˬ, Maˍgawˇgaˆ mvuhˇmiˬ hkʼaw chehˇ ve Meˍshehˆ leh Tuˇbaˍlaˆ chaw hui hta‸ uˉ peunˍ chehˇ ve jawˇmawˇ Gawˇgaˆ hta‸ hkeu piˇ-oˆ. 3Yawˇ hta‸ hkeu piˇ leh, ngaˬ Gʼuiˬsha lehˬ yawˇ ve canˇ paˍ hpeh‸ ve awˬ lawn yawˇ hta‸ kʼoˆ piˇ-oˆ. 4Ngaˬ yawˇ hta‸ yuˬ hpfuhˆ piˇ leh, yawˇ ve paˇ kaˇ hkʼaw biˉ yuˬ keu piˇ peuˬ hkʼaw‸ nawˉ, yawˇ leh yawˇ ve ma‸ yaˇ hkʼa peu-eˬ ve hta‸ ngaˬ gʼawˬ kʼai piˇ tuˬ yoˬ. Yawˇ ve iˉ mvuhˇ leh ma‸ yaˇ hkʼa peu-eˬ ve hta‸ ngaˬ gʼaw kʼai piˇ tuˬ yoˬ. Yawˇ ve iˉ mvuhˇ leh ma‸ yaˇ teˇ hpaˍ maˇ jaˇ ve yoˬ. Ma‸ yaˇ teˇ gʼaˇ le le htanˬ tuˬ leh aˉhtaw pfuhˇ taˍ ve yoˬ. 5Paˇshaˇ chaw, Suˍdanˍ chaw leh Liˆbi-aˇ chaw teˇ Hpaˍ yawˇ geh chehˇ taˍ leh, htanˬ tuˬ leh uˉ tcuhˍ cawˬ taˍ ve yoˬ. 6Awˬ na hpawˇ chehˇ ve Gawˇmaˍ leh Behˆtawˍgaˍmaˆ chaw teˇ hpaˍ htawˇ, yawˇ geh chehˇ taˍ ve yoˬ. Hkʼe te leh, yawˇ geh chaw maˇ maˇ hpoˆ chehˇ taˍ ve yoˬ. 7Yawˇ ve ma‸ yaˇ hta‸ shawˍ leh hkʼa deh‸ gu taˍ tuˬ yawˇ hui hta‸ kʼoˆ piˇ-oˆ. 8Awˬ hkʼaw‸ awˬ yanˇ maw la htaˇ, shu mvuhˇmiˬ lo kʼaw‸ la taˍ leh ma‸ bawˆ ve hta‸ maˇ kawˆ ve chaw hui hta‸, ngaˬ yawˇ hta‸ ca bawˆ la tcuh tuˬ yoˬ. Yawˇ lehˬ ponˬ laˬ htaˇ gawˬ cu gawˬ pehˆ hpeh‸ chehˇ ve htawˇ, chi beu‸ chaw yaˇ teˇ hpaˍ gawˬ lehˍ chehˇ taˍ ve Iˉsaˍreˍlaˆ ve hkʼaw pui teˇ hpaˍ hta‸ ca bawˆ la tuˬ yoˬ. 9Yawˇ awˬ to, yawˇ ve ma‸ yaˇ teˇ hpaˍ, leh yawˇ geh chehˇ taˍ ve awˬ nu ve chaw ceuˬ teˇ hpaˍ lehˬ, mvuhˇ haw mvuhˇ yeˬ lonˉ hkʼa shuˍ ma‸ bawˆ laˬ leh, moˬ hkʼa shuˍ mvuhˇmiˬ hta‸ hoˆ beh taˍ tuˬ yoˬ, teh‸ kʼoˆ ve yoˬ.
10Gʼuiˬsha Gawˇgaˆ hta‸ chi hkʼe kʼoˆ piˇ ve yoˬ. Awˬ yanˇ oˇ ve gaˬ la htaˇ, nawˬ lehˬ haiˬ ve dawˇ hkʼaˇ teˇ maˬ hta‸ dawˇ nyi tuˬ yoˬ. 11Nawˬ lehˬ te‸ chiˉ lanˇ venˇ maˇ cawˬ leh gawˬ lehˍ chehˇ taˍ ve mvuhˇmiˬ teˇ peˆ hta‸ ca lo‸ bawˆ piˇ tuˬ nawˬ dawˇ cheˆ tuˬ yoˬ. 12Teˇ pawˆ htaˇ luˬkʼai taˍ ve venˇ hkʼaw chehˇ ve chaw hui hta‸ nawˬ te luˬ leh, hiˉ yuˬlu yuˬ piˇ ve yoˬ. Yawˇ hui lehˬ, chaw laiˉ ceuˬ hkaw‸ da‸ chehˇ ve chaw hpeh‸ leh, chi beu‸ ceˇ caˬ leh mawˇ jeˬ hkʼa biˇ cawˬ leh, ya‸ kʼaw lonˉ ceh da‸ kuiˬ lo chehˇ taˍ ve yoˬ. 13Sheˍbaˆ chaw, Deˍdanˍ chaw leh Saˍpenˍ mvuhˇmiˬve tanˇ kaˬ paˍ teˇ hpaˍ nawˬ hta‸ chi hkʼe na nyi laˇ tuˬ yoˬ. Shu hta‸ ca bawˆ leh, shu ve mawˇ hta‸ hiˉ yuˬ lu yuˬ tuˬ nawˬ ve ma‸ moˍ hta‸ shawˍ taˍ peuˬ laˇ. Hpu shi mawˇ jeˬ leh ceˇ caˬ teˇ hpaˍ hta‸ yuˬ veu leh tawˆ-e tuˬ nawˬ dawˇ taˍ ve laˇ, teh‸ nawˬ hta‸ na nyi laˇ tuˬ yoˬ, teh‸ Gʼuiˬsha kʼoˆ ve yoˬ.
14Hkʼe te leh, Gʼuiˬsha ngaˬ hta‸ Gawˇgaˆ geh kʼai peu laˇ leh, yawˇ hta‸ chi hkʼe ca kʼoˆ piˇ tcuh laˇ ve yoˬ. Chi beu‸ ngaˬ ve Iˉsaˍreˍlaˆ chaw teˇ hpaˍ gawˬ lehˍ chehˇ taˍ htaˇ, 15nawˬ lehˬ iˉ mvuhˇ ciˇ taˍ ve nawˬ ve ma‸ moˍ lonˉ hta‸ chi beu‸ nawˬ chehˇ taˍ ve awˬ na mvuhˇmiˬ hkʼaw shiˍ tawˆ-e tuˬ yoˬ. 16Nawˬ lehˬ miˬguiˬ hkʼoˆ lo meuˆ laˬ chehˇ ve mvuhˇ haw mvuhˇ yeˬ lonˉ hkʼa shuˍ, ngaˬ ve Iˉsaˍreˍlaˆ chaw hui hta‸ ca bawˆ la tuˬ yoˬ. Awˬ yanˇ gaˬ la htaˇ ngaˬ a shu hpeh‸ ve leh nawˬ hta‸ cuˇ leh ngaˬ hkʼaˬ ma da‸ kehˬ jaˇ ve Gʼuiˬsha hpeh‸ ve chaw ceuˬ teˇ hpaˍ hta‸ maˍ piˇ tuˬ, ngaˬ nawˬ hta‸ ngaˬve mvuhˇmiˬ hta‸ ca bawˆ yuˬ tcuh tuˬ yoˬ. 17Ngaˬ nawˬ ve awˬ lawn kʼoˆ chehˇ ve maw jaˇ peuˬ. Teˇ nyi gaˬ kʼo, Iˉsaˍreˍlaˆ chaw hui hta‸ ca bawˆ la tuˬ, ngaˬ chaw teˇ gʼaˇ hta‸ shiˍ laˬ tuˬ yoˬ, teh‸ ngaˬ ve awˬ ceˬ Iˉsaˍreˍlaˆ ve tcuh kaˍ paˍ teˇ hpaˍ hta‸ kʼoˆ piˇ chehˇ ve lehˬ, nawˬ hta‸ kʼoˆ gaˇ ve yoˬ, teh‸ Gʼuiˬsha kʼoˆ ve yoˬ.
Gʼuiˬsha Gawˇgaˆ hta‸ ciˍ yanˍ piˇ tuˬ
18Gʼuiˬsha kʼoˆ ve, Gawˇgaˆ Iˉsaˍreˍlaˆ mvuhˇmiˬ hta‸ ca bawˆ la ve awˬ nyi gaˬ kʼo, ngaˬ nyi ma zuhˆ jaˇ tuˬ yoˬ. 19Awˬ nyi oˇ ve gaˬ la htaˇ, Iˉsaˍreˍlaˆ mvuhˇmiˬ hkʼaw miˬ hiˆ jaˇ tuˬ yoˬ, teh‸ nyi ma zuhˆ jaˇ ve hkʼaw ngaˬ kʼoˆ ve yoˬ. 20Ngaˇ leh ngaˆ hkʼa peu-eˬ, uiˍ ve i ve to nuˇ to shaˆ hkʼa peu-eˬ, leh miˬguiˬ hkʼoˆ chehˇ ve chaw yaˇ hkʼa peu-eˬ, ngaˬ hta‸ kawˆ jaˇ leh cheˇ cheˇ veˆ veˆ hpeh‸ tuˬ yoˬ. Hkʼaw pui teˇ hpaˍ paiˍ leh, haˉ hpawˇ teˇ hpaˍ paˆ ce kʼai leh, lanˇ venˇ hkʼa peu-eˬ paˆ hpoˆ sheˬ tuˬ yoˬ. 21Ngaˬ lehˬ kawˆ tuˬ dawˇ haˍ tuˬ awˬ ceuˬ teˇ ceuˬ peuˬ teˇ ceuˬ gaˬ la piˇ leh, Gawˇgaˆ hta‸ kawˆ la piˇ tuˬ yoˬ. Ngaˬ Gʼuiˬsha tawˇ yaw taˍ peuˬ. Yawˇ ve ma‸ yaˇ teˇ hpaˍ, teˇ gʼaˇ hta‸ teˇ gʼaˇ chaw pehˍ da‸ tuˬ yoˬ. 22Naˬ beuˬ leh chaw pehˍ da‸ ve hta‸ cuˇ leh, ngaˬ yawˇ hta‸ ciˍ yanˍ piˇ tuˬ yoˬ. Ngaˬ lehˬ yawˇ awˬ to, yawˇ ve ma‸ yaˇ, leh yawˇ hpawˇ chehˇ ve chaw hkʼa peu-eˬ awˬ hkʼoˆ lo, mvuhˇ yeˬ leh vaˇ shiˍ geh teˇ geh aˬ miˍ leh ma‸ shiˉ hta‸ ce ya‸ la piˇ tuˬ yoˬ. 23Chi hkʼe te piˇ ve hkʼaw, ngaˬ hkʼaˬ ma uiˍ ve leh hkʼaˬ ma da‸ kehˬ jaˇ ve awˬ lawn chaw ceuˬ hkʼa peu-eˬ ve hta‸ hpeu‸ maˍ piˇ tuˬ yoˬ. Oˇ htaˇ, ngaˬ Gʼuiˬsha hpeh‸ ve hta‸ yawˇ hui shiˍ la tuˬ yoˬ, teh‸ kʼoˆ ve yoˬ.
Currently Selected:
Yeˍsaˍkeˍlaˆ li‸ 38: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
