Yeˍsaˍkeˍlaˆ li‸ 32
32
Eˇjiˇtu‸ jawˇmawˇ caˬ hkehˍ lonˉ hta‸ tehˆ maˍ ve
1Ngaˬ hui shu mvuhˇmiˬ hkʼaw chehˇ taˍ ve 12 hkʼaw‸, ha pa 12 maˬ, awˉ lawˉ peuˇ ve teˇ nyi htaˇ, Gʼuiˬsha ngaˬ hta‸ chi hkʼe kʼoˆ laˇ ve yoˬ. 2Chaw yaˇ-oˬ, Eˇjiˇtu‸ jawˇmawˇ hta‸ shaˍ ti‸ piˇ-oˆ. Ngaˬ ve tawˇ chi teˇ hpaˍ yawˇ hta‸ hto maˍ piˇ-oˆ. Nawˬ lehˬ chaw ceuˬ teˇ hpaˍ awˬ kaˍ lo laˇ caˬ shiˉ hkʼe te chehˇ ve yoˬ. Ya‸ hkʼaˇ, nawˬ leh iˉ kaˆ lawˬ hkʼaw hpeˆ toˇ chehˇ ve caˬ hkehˍ lonˉ hta‸ leuˉ leh shuˍ ve yoˬ. Nawˬ ve hkui sheh lehˬ je‸ nehˆ hta‸ naˆ tu la piˇ leh, iˉ kaˆ lawˬ hta‸ cha‸ chiˆ tuˬ te piˇ chehˇ ve yoˬ. 3Chaw ceuˬ teˇ hpaˍ hpawnˬ da‸ la ve teˇ yanˇ, ngaˬ nawˬ hta‸ geu‸ hpehˇ yuˬ leh, yawˇ hui hta‸ gʼuiˬ pfuhˍ lo gʼawˬ yuˬ tcuh tuˬ yoˬ. 4Ngaˬ nawˬ hta‸ miˬ chaˇ hkʼoˆ lo baˬ peu leh, nawˬ hta‸ ca caˇ la tuˬ ngaˆ leh to nuˇ to shaˆ teˇ hpaˍ hta‸ ngaˬ shiˍ veu laˇ tuˬ yoˬ. 5Nawˬ ve kuiˇ taˍ ve awˬ to hta‸ ngaˬ yuˬ leh, hkʼaw hkʼoˆ lawˬ hkʼoˆ lo baˬ peu tuˬ yoˬ. 6Hkʼaw hkʼoˆ lo leh iˉ kaˆ lawˬ kʼaˉ teˇ hpaˍ hkʼaw lo biˇ la htaˇ hkʼa gaˬ, nawˬ ve awˬ suhˍ hta‸ ngaˬ ngeuˍ baˬ tuˬ yoˬ. 7Ngaˬ nawˬ hta‸ te luˬ te sheˆ piˇ ve teˇ yanˇ, mvuhˇ naw ma leh meu‸ keu shiˍ teˇ hpaˍ hta‸ ngaˬ beh taˍ tuˬ yoˬ. Mvuhˇ nyi lehˬ moˬ hkʼaw‸ nawˉ lo va‸ taˍ leh, ha pa htawˇ awˬ gʼeuˆ piˇ laˇ tuˬ ve maˇ heˆ. 8Ngaˬ lehˬ mvuhˇ naw ma ve awˬ gʼeuˆ hkʼa peu-eˬ ve hta‸ shiˉ pehˍ leh, nawˬ ve miˬguiˬ hta‸ naˆ ho‸ kʼai piˇ tuˬ yoˬ. Ngaˬ Gʼuiˬsha tawˇ yaw taˍ peuˬ.
9Nawˬ luˬ kʼai sheˆ kʼai peuˬ ve awˬ lawn, nawˬ teˇ pawˆ ka‸ maˇ kaˇ jaw ve mvuhˇmiˬ teˇ hpaˍ hta‸ ngaˬ kʼoˆ maˍ piˇ ve teˇ yanˇ, yawˇ hui dawˇ haˍ jaˇ tuˬ yoˬ. 10Ngaˬ nawˬ hta‸ te piˇ taˍ peuˬ ve kanˉ lehˬ, chaw ceuˬ maˇ maˇ ve hta‸ anˇ jaˇ kawˆ jaˇ piˇ lawˬ tuˬ yoˬ. Ngaˬ ve aˉhtaw hta‸ ngaˬ fui ve teˇ yanˇ, jawˇmawˇ teˇ hpaˍ kawˆ cheˇ jaˇ tuˬ yoˬ. Nawˬ paiˍ ve teˇ nyi htaˇ, yawˇ hui hkʼa peu-eˬ a shu yawˇ ve a sha‸ awˬ pon kawˆ cheˇ chehˇ tuˬ yoˬ, teh‸ Gʼuiˬsha kʼoˆ ve yoˬ.
11Gʼuiˬsha Eˇjiˇtu‸ jawˇmawˇ hta‸ chi hkʼe kʼoˆ piˇ ve yoˬ. Nawˬ lehˬ Baˍbuˍlonˍ jawˇmawˇ ve aˉhtaw hta‸ gʼa hpuˇ tuˬ yoˬ. 12Ngaˬ lehˬ haiˬ jaˇ ve awˬ nu ve chaw ceuˬ ve ma‸ yaˇ teˇ hpaˍ hta‸ aˉhtaw gʼawˬ tawˆ tcuh leh, nawˬ ve chaw hkʼa peu-eˬ ve hta‸ tiˇ pehˍ tcuh tuˬ yoˬ. Nawˬ ve chaw hkʼa peu-eˬ leh, nawˬ nyi ma uiˍ chehˇ ve awˬ ceuˬ hkʼa peu-eˬ te luˬ te sheˆ ve hta‸ gʼa hkanˍ tuˬ yoˬ. 13Iˉ kaˆ gʼuiˬ tuˇ teˇ maˬ le awˬ paˇ lo ngaˬ lehˬ nawˬ ve ceˇ caˬ teˇ hpaˍ hta‸ tiˇ pehˍ laˇ tuˬ yoˬ. Iˉ kaˆ hta‸ te tiˬ piˇ tuˬ ve chaw yaˇ leh to nuˇ to shaˆ cawˬ taˉ tuˬ ve maˇ heˆ. 14Ngaˬlehˬ nawˬ ve iˉ kaˆ teˇ hpaˍ hta‸ kehˬ lehˍ cawˬ piˇ leh, nawˬ ve iˉ kaˆ lawˬ teˇ hpaˍ hta‸ gawˬ lehˍ ya‸-e piˇ lawˬ tuˬ yoˬ. Ngaˬ Gʼuiˬsha tawˇ yaw taˍ peuˬ. 15Eˇjiˇtu‸ mvuhˇmiˬ hta‸ ngaˬ gawˬ cu gawˬ pehˆ hpeh‸ la piˇ leh, oˇ kaˬ lo chehˇ ve chaw hui hta‸ ngaˬ te luˬ te sheˆ piˇ peuˬ ve teˇ yanˇ, ngaˬ Gʼuiˬsha hpeh‸ ve hta‸ yawˇ hui shiˍ la tuˬ yoˬ. 16Shaˍ ti‸ piˇ taˍ ve tawˇ chi lehˬ, dawˇ haˍ ve kʼa muiˬ hkawˇ hpeh‸ la tuˬ yoˬ. Awˬ nu ve chaw ceuˬ ve yaˇ miˇ teˇ hpaˍ lehˬ, Eˇjiˇtu‸ leh yawˇ ve chaw teˇ hpaˍ awˬ pon dawˇ haˍ leh kʼa muiˬ hkawˇ oˇ ve hta‸ kʼa tuˬ yoˬ. Ngaˬ Gʼuiˬsha tawˇ yaw taˍ peuˬ, teh‸ kʼoˆ ve yoˬ.
Suh mvuhˇmiˬ
17Ngaˬ hui shu mvuhˇmiˬ hkʼaw chehˇ taˍ ve teˇ chi nyiˇ hkʼaw‸, ha pa awˉ lawˉ peuˇ teˇ maˬ, teˇ chi ngaˇ nyi htaˇ, Gʼuiˬsha ngaˬ hta‸ chi hkʼe kʼoˆ laˇ ve yoˬ. 18Chaw yaˇ-oˬ, Eˇjiˇtu‸ chaw teˇ hpaˍ awˬ pon dawˇ haˍ leh hawˬ chehˇ-oˆ. Yawˇ hui hta‸ awˬ nu ve awˬ gʼaˇ uiˍ jaˇ ve chaw ceuˬ teˇ hpaˍ geh teˇ geh suh mvuhˇmiˬ lo kʼai tcuh-o. 19Yawˇ hui hta‸ chi hkʼe kʼoˆ piˇ-oˆ.
Nawˬ hui lehˬ awˬ nu ve chaw a‸ kehˉ awˬ hkiˇ awˬ naˬ da‸ ve yoˬ teh‸ dawˇ ve laˇ.
Nawˬ hui lehˬ suh mvuhˇmiˬ lo gʼa ya‸-e leh,
oˇ kaˬ lo Gʼuiˬsha hta‸ maˇ shiˍ ve chaw hui geh gʼa zuh‸ tuˬ yoˬ.
20Eˇjiˇtu‸ chaw teˇ hpaˍ lehˬ, ma‸ bawˆ kuiˬ lo tiˇ pehˍ ve hta‸ gʼa hkanˍ ve chaw hui geh teˇ geh paiˍ tuˬ yoˬ. Yawˇ hui hkʼa peu-eˬ ve hta‸ tiˇ pehˍ piˇ tuˬ, aˉhtaw teˇ taˬ hkʼa deh‸ gu taˍ peuˬ. 21Ha‸ hanˉ jaˇ ve ma‸ yaˇ teˇ hpaˍ leh Eˇjiˇtu‸ chaw hui hpawˇ chehˇ leh ma‸ bawˆ chehˇ ve chaw teˇ hpaˍ lehˬ, Eˇjiˇtu‸ chaw teˇ hpaˍ hta‸ suh mvuhˇmiˬ hkʼaw ha‸ yuˬ chehˇ ve yoˬ. Yawˇ hui kʼoˆ ve, Ma‸ bawˆ kuiˬ lo tiˇ pehˍ ve hta‸ gʼa hkanˍ ve Gʼuiˬsha hta‸ maˇ shiˍ ve chaw teˇ hpaˍ choˬ kaˬ lo ya‸ la leh zuh‸ chehˇ taˍ peuˬ, teh‸ kʼoˆ ve yoˬ.
22Aˍsuˇriˆ htawˇ oˇ kaˬ lo chehˇ taˍ leh, yawˇ ve tuˍ hpfuh awˬ paˇ awˬ kui lo, yawˇ ve ma‸ yaˇ teˇ hpaˍ ve tuˍ hpfuh hkʼa biˇ caw zuhˇ chehˇ ve yoˬ. Yawˇ hui hkʼa peu-eˬ ma‸bawˆ kuiˬ lo tiˇ pehˍ ve hta‸ gʼa hkanˍ leh, 23yawˇ hui ve tuˍ hpfuh teˇ hpaˍ lehˬ suh mvuhˇmiˬ hkʼaw naˉ jaˇ ve chehˇ kuiˬ lo cawˬ ve yoˬ. Yawˇ ve ma‸ yaˇ hkʼa peu-eˬ ma‸ bawˆ kuiˬ lo paiˍ leh, yawˇ hui ve tuˬ hpfuh teˇ hpaˍ yawˇ ve tuˍ hpfuh hkʼa caw zuhˇ lo cawˬ taˍ ve yoˬ. Teˇ pawˆ htaˇ, yawˇ hui lehˬ te‸ chehˇ ve chaw hui ve mvuhˇmiˬ hta‸ kawˆ tuˬ te piˇ ve yoˬ.
24Eˇlanˍ htawˇ oˇ kaˬ lo chehˇ taˍ leh, yawˇ ve tuˍ hpfuh awˬ paˇ awˬ kui lo, yawˇ ve ma‸ yaˇ teˇ hpaˍ ve tuˍ hpfuh hkʼa biˇ caw zuhˇ chehˇ ve yoˬ. Yawˇ hui hkʼa peu-eˬ ma‸ bawˆ kuiˬ lo tiˇ pehˍ ve hta‸ gʼa hkanˍ leh, awˬ guiˬ meuˇ maˇ shoˍ shoˍ-ehˬ suh mvuhˇmiˬ lo gʼa ya‸-e ve yoˬ. Yawˇ hui a sha‸ te‸ chehˇ htaˇ shu hta‸ ca ho piˇ chehˇ ve yoˬ. Ya‸ hkʼaˇ, chi beu‸ yawˇ hui suh taˍ peuˬ leh, awˬ me‸ awˬ hponˇ luˬ kʼai peuˬ. 25Eˇlanˍ lehˬ ma‸ bawˆ kuiˬ lo tiˇ pehˍ ve hta‸ gʼa hkanˍ ve chaw hui geh zuh‸ chehˇ leh, yawˇ ve ma‸ yaˇ teˇ hpaˍ ve tuˍ hpfuh yawˇ awˬ paˇ lo hkʼa caw zuhˇ cawˬ taˍ ve yoˬ. Yawˇ hui hkʼa peu-eˬ awˬ guiˬ meuˇ shoˍ ve hta‸ maˇ hkanˍ yuˬ. Hkʼa peu-eˬ ka‸ ma‸ bawˆ kuiˬ lo tiˇ pehˍ ve hta‸ gʼa hkanˍ ve yoˬ. Yawˇ hui a sha‸ te‸ chehˇ htaˇ shu hta‸ ca ho piˇ chehˇ ve yoˬ. Ya‸ hkʼaˇ, chi beu‸ yawˇ hui suh taˍ peuˬ leh, awˬ me‸ awˬ hponˇ luˬ kʼai peuˬ. Ma‸ bawˆ kuiˬ lo tiˇ pehˍ ve hta‸ gʼa hkanˍ ve chaw hui hkʼe gʼa hkanˍchehˇ taˍ ve yoˬ.
26Meˍshehˆ leh Tuˇbaˍlaˆ yawˇ huiˉ maˬ htawˇ oˇ kaˬ lo chehˇ taˍ leh, yawˇ huiˉ maˬ ve tuˍ hpfuh awˬ paˇ awˬ kui lo, yawˇ hui ve ma‸ yaˇ teˇ hpaˍ ve tuˍ hpfuh hkʼa biˇ caw zuhˇ chehˇ ve yoˬ. Yawˇ hui hkʼa peu-eˬ awˬ guiˬ meuˇ shoˍ ve hta‸ maˇ hkanˍ yuˬ. Hkʼa peu-eˬ ka‸ ma‸ bawˆ kuiˬ lo tiˇ pehˍ ve hta‸ gʼa hkanˍ ve yoˬ. Teˇ pawˆ htaˇ yawˇ hui htawˇ te‸ chehˇ ve chaw hui hta‸ kawˆ tuˬ te piˇ ve yoˬ. 27Yawˇ hui lehˬ aˬ sho-eˬ htaˇ ve ha‸ hanˉ jaˇ ve ma‸ yaˇ teˇ hpaˍ hkʼa shuˍ, shu taˍ uiˍ taˍ mvuh leh tuˍ piˇ ve hta‸ maˇ gʼa hkanˍ. Ma‸ yaˇ oˇ ve teˇ hpaˍ lehˬ a shu yawˇ ve la‸ caˉ hkʼa deh‸ pfuhˇ leh suh mvuhˇmiˬ lo ya‸-e ve yoˬ. Yawˇ hui ve aˉhtaw yawˇ hui ve oˉ kʼoˍ hawˉ lo teh taˍ leh, yawˇ hui ve htanˬ tuˬ yawˇ hui ve awˬ to hkʼoˆ lo teh taˍ ve yoˬ. Ha‸ hanˉ ve ma‸ yaˇ chi teˇ hpaˍ lehˬ teˇ pawˆ htaˇ awˬ gʼaˇ uiˍ jaˇ leh te‸ chehˇ ve chaw hui hta‸ kawˆ tuˬ te piˇ ve yoˬ.
28Oˇ ve hkʼa shuˍ Eˇjiˇtu‸ chaw teˇ hpaˍ htawˇ, awˬ guiˬ meuˇ shoˍ ve hta‸ maˇ hkanˍ yuˬ leh, ma‸ bawˆ kuiˬ lo tiˇ pehˍ ve hta‸ gʼa hkanˍ ve chaw oˇ ve teˇ hpaˍ geh gʼa zuh‸ taˍ tuˬ yoˬ.
29Eˇdonˍ htawˇ, yawˇ ve jawˇmawˇ leh uˉ peunˍ shehˍ hpaˇ teˇ hpaˍ geh teˇ geh oˇ kaˬ lo chehˇ taˍ ve yoˬ. Yawˇ hui lehˬ awˬ gʼaˇ uiˍ ve ma‸ yaˇ teˇ hpaˍ hpeh‸ve yoˬ. Ya‸ hkʼaˇ, yawˇ hui htawˇ chi beu‸ ma‸ bawˆ kuiˬ lo tiˇ pehˍ ve hta‸ gʼa hkanˍ ve awˬ guiˬ meuˇ maˇ shoˍ ve chaw hui geh zuh‸ chehˇ taˍ ve yoˬ.
30Awˬ na hpawˇ lo chehˇ ve jawˇmawˇ yaˇ teˇ hpaˍ leh, Siˉdonˍ chaw teˇ hpaˍ htawˇ oˇ kaˬ lo chehˇ taˍ ve yoˬ. Teˇ pawˆ htaˇ yawˇ hui htawˇ shu hta‸ kawˆ tuˬ te piˇ ve yoˬ. Ya‸ hkʼaˇ chi beu‸ awˬ me‸ awˬ hponˇ luˬ kʼai leh, ma‸ bawˆ kuiˬ lo tiˇ pehˍ ve hta‸ gʼa hkanˍ ve chaw hui geh teˇ geh, awˬ guiˬ meuˇ maˇ shoˍ shoˍ-ehˬ zuh‸ chehˇ taˍ peuˬ. Yawˇ hui lehˬ awˬ me‸ awˬ hponˇ luˬ kʼai leh, suh mvuhˇmiˬ lo ya‸-e ve chaw hui geh teˇ geh gʼa hkanˍ chehˇ ve yoˬ.
31Eˇjiˇtu‸ jawˇmawˇ leh yawˇ ve ma‸ yaˇ teˇ hpaˍ lehˬ, ma‸ bawˆ kuiˬ lo tiˇ pehˍ ve hta‸ gʼa hkanˍ ve chaw oˇ ve teˇ hpaˍ hta‸ gʼa mawˬ leh, yawˇ ve nyi ma sha la tuˬ yoˬ.
32Ngaˬ lehˬ Eˇjiˇtu‸ jawˇmawˇ hta‸ te‸ chehˇ ve chaw hui hta‸ kawˆ la tuˬ te piˇ tcuh tuˬ yoˬ. Ya‸ hkʼaˇ, yawˇ leh yawˇ ve ma‸ yaˇ hkʼa peu-eˬ tiˇ pehˍ ve hta‸ gʼa hkanˍ leh, ma‸ bawˆ kuiˬ lo tiˇ pehˍ ve hta‸ gʼa hkanˍ ve awˬ guiˬ meuˇ maˇ shoˍ ve chaw hui geh teˇ geh gʼa zuh‸ taˍ tuˬ yoˬ. Ngaˬ Gʼuiˬsha tawˇ yaw taˍ peuˬ, teh‸ kʼoˆ ve yoˬ.
Currently Selected:
Yeˍsaˍkeˍlaˆ li‸ 32: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
