Yeˍsaˍkeˍlaˆ li‸ 29
29
Eˇjiˇtu‸ awˬ lawn kʼoˆ ve
1Ngaˬ hui shu mvuhˇmiˬ hkʼaw chehˇ taˍ ve teˇ chi hkʼaw‸ teˇ hkʼaw‸, ha pa teˇ chi maˬ, teˇ chi nyi htaˇ, Gʼuiˬsha ngaˬ hta‸ chi hkʼe kʼoˆ laˇ ve yoˬ. 2Chaw yaˇ-oˬ, Eˇjiˇtu‸ jawˇmawˇ hta‸ hkeu piˇ-oˆ. Yawˇ leh yawˇ ve mvuhˇmiˬ hkʼa peu-eˬ, hkʼaˬ hkʼe ciˍ yanˍve hta‸ gʼa hkanˍ tuˬ yawˇ hui hta‸ kʼoˆ piˇ-oˆ. 3Ngaˬ Gʼuiˬsha Eˇjiˇtu‸ jawˇmawˇ hta‸ kʼoˆ chehˇ ve tawˇ chi teˇ hpaˍ yawˇ hta‸ kʼoˆ piˇ-oˆ. Lawˬ kʼaˉ hkʼaw zuh‸ chehˇ ve caˬ hkehˍ lonˉ-oˬ, ngaˬ lehˬ nawˬ ve canˇ paˍ hpeh‸ ve yoˬ. Niˍlaˆ iˉ kaˆ lawˬ lehˬ nawˬ te taˍ ve mawˇ hpeh‸ ve yoˬ teh‸ nawˬ kʼoˆ chehˇ ve yoˬ. 4Ngaˬ lehˬ nawˬ ve paˇ kaˇ hkʼaw biˉ teˇ maˬ keu laˇ leh, nawˬ ve iˉ kaˆ lawˬ hkʼaw chehˇ ve ngaˇ teˇ hpaˍ, nawˬ hta‸ ngawˉ taˍ tcuh piˇ lawˬ tuˬ yoˬ. Oˇ ve hkʼaw‸ nawˉ, nawˬ leh nawˬ hta‸ ngawˉ taˍ ve ngaˇ oˇ ve teˇ hpaˍ hta‸, Niˍlaˆ iˉ kaˆ lawˬ hkʼaw ngaˬ gʼawˬ tawˆ tuˬ yoˬ. 5Nawˬ leh ngaˇ oˇ ve teˇ hpaˍ hta‸ shehˇ de hkʼaw ngaˬ baˬ keu laˇ tuˬ yoˬ. Nawˬ lehˬ miˬ chaˇ hkʼoˆ lo ce leh, chaw teˇ gʼaˇ ka‸ gʼawˆ yuˬ tuˬ ve maˇ heˆ. Ngaˬ lehˬ nawˬve awˬ shaˍ hta‸ ngaˆ leh to nuˇ to shaˆ teˇ hpaˍ hta‸ caˍ piˇ tuˬ yoˬ. 6Oˇ htaˇ, ngaˬlehˬ Gʼuiˬsha hpeh‸ ve hta‸ Eˇjiˇtu‸ chaw hkʼa peu-eˬ gʼa shiˍ tuˍ yoˬ, teh‸ kʼoˆ ve yoˬ.
Gʼuiˬsha kʼoˆ ve, Iˉsaˍreˍlaˆ chaw lehˬ nawˬ hui Eˇjiˇtu‸ chaw hui hta‸ gʼaˇ va chehˇ ve yoˬ. Ya‸ hkʼaˇ, nawˬ hui lehˬ nuˇ jaˇ ve suhˆ taˬ hkʼe ceh ka‸ maˇ da‸. 7Yawˇ hui nawˬ hta‸ ca peun la ve teˇ yanˇ, nawˬ yawˇ hui ve la‸ sheh hta‸ dawˆ hteh piˇ, juˆ hpehˇ piˇ leh yawˇ hui ve caw‸ hta‸ naˬ tuˬ te piˇ ve yoˬ. 8Chi hta‸ pa taw, ngaˬ Gʼuiˬsha nawˬ hta‸ chi hkʼe kʼoˆ laˇ ve yoˬ. Ngaˬ lehˬ aˉhtaw pfuhˇ taˍ ve chaw teˇ hpaˍ nawˬ hta‸ ca bawˆ la tcuh leh, yawˇ hui lehˬ nawˬ ve chaw leh nawˬ ve ceˇ teˇ hpaˍ hta‸ tiˇ pehˍ tuˬ yoˬ. 9Eˇjiˇtu‸ mvuhˇmiˬ lehˬ gawˬ cu gawˬ pehˆ hpeh‸ la tuˬ yoˬ. Oˇ htaˇ, ngaˬ Gʼuiˬsha hpeh‸ ve hta‸ nawˬ shiˍ la tuˬ yoˬ.
Niˍlaˆ iˉ kaˆ lawˬ lehˬ nawˬ te taˍ ve mawˇ hpeh‸ ve yoˬ teh‸ nawˬ kʼoˆ ve pa taw, 10ngaˬ lehˬ nawˬ ve canˇ paˍ leh nawˬ ve Niˍlaˆ iˉ kaˆ lawˬ ve canˇ paˍ hpeh‸ ve yoˬ. Ngaˬlehˬ awˬ na hpawˇ lo cawˬ ve Miˆgaˍdawˇlaˆ venˇ hta‸ te leh awˬ hawˉ hpawˇ lo cawˬ ve Aˍsaˍ vanˍ venˇ leh Suˍdanˍ miˬ tcuhˉ lo hkʼa gaˬ, Eˇjiˇtu‸ mvuhˇmiˬ hkʼa peu-eˬ ve hta‸ gawˬ cu gawˬ pehˆ hpeh‸ la piˇ tuˬ yoˬ. 11Chaw yaˇ maˇ kʼoˆ, ceˇ caˬ maˇ kʼoˆ, oˇ kaˬ lo te toˇ tuˬ ve maˇ heˆ. Awˇ chi hkʼaw‸ hkʼa gaˬ oˇ kaˬ lo te‸ chiˉ chehˇ tuˬ ve maˇ heˆ. 12Ngaˬ lehˬ Eˇjiˇtu‸ mvuhˇmiˬ hta‸ awˬ nu ve mvuhˇmiˬ a‸ kehˉ leuˉ leh gawˬ cu gawˬ pehˆ hpeh‸ la piˇ tuˬˬ yoˬ. Awˇ chi hkʼaw‸ hkʼa gaˬ Eˇjiˇtu‸ mvuhˇmiˬ hkʼaw cawˬ ve venˇ teˇ hpaˍ lehˬ awˬ nu ve venˇ teˇ hpaˍ a‸ kehˉ leuˉ leh luˬ kʼai sheˆ kʼai tuˬ yoˬ. Ngaˬ lehˬ Eˇjiˇtu‸ chaw hui hta‸ chaw hpaw hkʼoˇ hpeh‸ la piˇ tuˬ yoˬ. Yawˇ hui lehˬ teˇ mvuhˇmiˬ le le lo hpaw-e leh awˬ nu ve chaw teˇ hpaˍ geh gʼa ca chehˇ tuˬ yoˬ, teh‸ Gʼuiˬsha kʼoˆ ve yoˬ.
13Gʼuiˬsha kʼoˆ ve, 40 hkʼaw‸ ponˬ peuˬ hkʼaw‸ nawˉ kʼo, awˬ nu ve mvuhˇmiˬ teˇ hpaˍ hkʼaw lo ngaˬ hpaˆ da‸ kʼai piˇ taˍ ve Eˇjiˇtu‸ chaw hui hta‸ ngaˬ kʼaw‸ shiˍ hkʼaw‸ veu laˇ piˇ leh, 14yawˇ hui ve chehˇ kuiˬ hpeh‸ ve Eˇjiˇtu‸mvuhˇmiˬ awˬ hawˉ hpawˇ teˇ tawn lo kʼaw‸ chehˇ piˇ tuˬ yoˬ. Yawˇ hui lehˬ gʼaˇ nuˇ ve mvuhˇmiˬ hpeh‸ la tuˬ yoˬ. 15Yawˇ hui lehˬ shu a‸ kehˉ gʼaˇ nuˇ jaˇ ve mvuhˇmiˬ hpeh‸ leh, awˬ nu ve mvuhˇmiˬ teˇ hpaˍ hta‸ gʼa kʼaw‸ uˉ peunˍ tuˬ ve maˇ heˆ. Ngaˬ yawˇ hui hta‸ awˬ lawn maˇ uiˍ ve chaw ceuˬ hpeh‸ la piˇ leh, yawˇ hui lehˬ awˬ nu ve chaw ceuˬ teˇ hpaˍ hta‸ yawˇ hui ve awˬ ceˬ te tcuh gʼa tuˬ ve maˇ heˆ. 16Iˉsaˍreˍlaˆ lehˬ yawˇ hta‸ ca kʼaw‸ peun tuˬ ve maˇ heˆ. Eˇjiˇtu‸ chaw oˇ hkʼe luˬ kʼai ve pa taw, yawˇ hui hta‸ gʼaˇ ca va ve hkʼaˬ ma ya‸ jaˇ peuˬ ve hta‸ Iˉsaˍreˍlaˆ chaw hui shaˍ ti‸ gʼa tuˬ yoˬ. Oˇ htaˇ, ngaˬ Gʼuiˬsha hpeh‸ ve hta‸ Iˉsaˍreˍlaˆ chaw hui shiˍ la tuˬ yoˬ, teh‸ Gʼuiˬsha kʼoˆ ve yoˬ.
Neˍbuˍhkaˍneˍzaˍ Eˇjiˇtu‸ hta‸ bawˆ yuˬ ve
17Ngaˬ hui shu mvuhˇmiˬ hkʼaw chehˇ taˍ ve nyiˇ chi suhˍ hkʼaw‸ teˇ hkʼaw‸, awˉ lawˉ peuˇ ve teˇ nyi htaˇ, Gʼuiˬsha ngaˬ hta‸ chi hkʼe kʼoˆ laˇ ve yoˬ. 18Chaw yaˇ-oˬ, Baˍbuˍlonˍ jawˇmawˇ Neˍbuˍhkaˍneˍzaˍ lehˬ, Tuˉruˆ venˇ hta‸ ca bawˆ la tuˬ yoˬ. Yawˇ lehˬ, yawˇ ve ma‸ yaˇ teˇ hpaˍ hta‸ hawˇ ve mawˇ pfuhˇ tcuh ve pa taw, yawˇ hui ve oˉ kʼoˍ leh la‸ hpeh kʼaˉ kʼeh‸ kʼai peuˬ ve yoˬ. Ya‸ hkʼaˇ, yawˇ hui oˇ hkʼe hpeh‸ taˍ peuˬ ve htawˇ, jawˇmawˇ maˇ kʼoˆ, yawˇ ve ma‸ yaˇ teˇ hpaˍ maˇ kʼoˆ, te‸ chiˉ maˇ gʼa. 19Chi hta‸ pa taw, chi beu‸ ngaˬ Gʼuiˬsha chi hkʼe kʼoˆ chehˇ ve yoˬ. Ngaˬ lehˬ Eˇjiˇtu‸ mvuhˇmiˬ chi jawˇmawˇ Neˍbuˍhkaˍneˍzaˍ hta‸ piˇ tuˬ yoˬ. Yawˇ lehˬ Eˇjiˇtu‸ mvuhˇmiˬ hkʼaw cawˬ ve hpu shi mawˇ jeˬ hkʼa peu-eˬ hta‸ yuˬ kʼai leh, yawˇ ve ma‸ yaˇ teˇ hpaˍ hta‸ gʼaˇ hpfuhˇ piˇ tuˬ yoˬ. 20Yawˇ ve ma‸yaˇ teˇ hpaˍ lehˬ, ngaˬ awˬ pon kanˉ te laˇ chehˇ ve pa taw, yawˇ hui te laˇ chehˇ ve kanˉ awˬ pon, Eˇjiˇtu‸ mvuhˇmiˬ chi ngaˬ yawˇ hta‸ piˇ tuˬ yoˬ. Ngaˬ Gʼuiˬsha chi hkʼe kʼoˆ taˍ peuˬ ve yoˬ.
21Oˇ hkʼe hpeh‸ la ve teˇ yanˇ, ngaˬ lehˬ Iˉsaˍreˍlaˆ chaw hta‸ awˬ gʼaˇ kʼaw‸ uiˍ la piˇ leh ngaˬ Gʼuiˬsha hpeh‸ ve hta‸ yawˇ hui gʼa shiˍ tuˬ, chaw teˇ gʼaˇ le le kaˇ hpeh‸ ve chehˇ kuiˬ lo Yeˍsaˍkeˍlaˆ nawˬ hta‸ ngaˬ tawˇ yaw tcuh laˇ tuˬ yoˬ, teh‸ Gʼuiˬsha ngaˬ hta‸ kʼoˆ laˇ ve yoˬ.
Currently Selected:
Yeˍsaˍkeˍlaˆ li‸ 29: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
