Yeˍsaˍkeˍlaˆ li‸ 27
27
Tuˇruˆ awˬ pon dawˇ haˍ ve kʼa muiˬ hkawˇ
1Gʼuiˬsha ngaˬ hta‸ chi hkʼe kʼoˆlaˇ ve yoˬ. 2Tuˇruˆ awˬ pon dawˇ haˍ ve kʼa muiˬ hkawˇ teˇ puˆ kʼa-o. 3Venˇ oˇ ve lehˬ laˇ tsuhˇ gʼuiˬ pfuhˍ lo cawˬ leh, awˬ nu ve laˇ tsuhˇ gʼuiˬ pfuhˍ lo chehˇ ve chaw hui hta‸ tanˇ kaˬ te da‸ chehˇve yoˬ. Gʼuiˬsha kʼoˆ chehˇ ve tawˇ chi teˇ hpaˍ yawˇ hta‸ kʼoˆ maˍ piˇ-oˆ.
Tuˇruˆ venˇ-oˬ, nawˬ awˬ hkiˇ awˬ naˬ da‸ ve hta‸ naw nyi ma uiˍ chehˇ ve yoˬ. Nawˬ ve yehˬ lehˬ laˇ tsuhˇ gʼuiˬ hpeh‸ ve yoˬ.
4Nawˬ hta‸ te shehˍ hpaˇ teˇ hpaˍ lehˬ,
nawˬ hta‸ nyi sha jaˇ ve haw lo‸ kʼoˍ hkʼa shuˍ te taˍ ve yoˬ.
5Yawˇ hui lehˬ Heˍraˍmonˍ hkʼaw hkʼoˆ lo cawˬ ve htawˇ cehˬ hta‸ suhˆ baˉ gʼeu‸ yuˬ leh,
Leˍ baˍnonˍ hkʼaw hkʼoˆ lo cawˬ ve yawnˉ cehˬ hta‸ yuˬ leh, haw lo‸ kʼoˍ hkʼaw ve yehˬ hkuiˉ daw te taˍ ve yoˬ.
6Baˍshanˍ mvuhˇmiˬ hkʼaw cawˬ ve maˉ kuˇ cehˬ hta‸ yawˇ hui yuˬ leh taˉ behˆ lonˉ te ve yoˬ.
Kuˇpaˍruˆ conˇ lo cawˬ ve htawˇ cehˬ hta‸ yawˇ hui gʼeu‸ yuˬ leh, haw lo‸ kʼoˍ awˬ hawˉ hkʼawˇ tuˬ te ve yoˬ.
Oˇ hkʼe te peuˬ hkʼaw‸ nawˉ, awˬ hkʼaw hpawˇ lo haw ciˬ htawˆ keu taˍ ve yoˬ.
7Haw lo‸ kʼoˍ hkʼaw hpeh chiˇ tuˬ ve hpa hta‸
Eˇjiˇtu‸ mvuhˇmiˬ hkʼaw tawˆ ve hpa yuˬ te taˍ leh,
vuiˇ kuiˬ lo chehˇ nyi ve ka‸ shiˍ sha jaˇ ve yoˬ.
Yehˬ miˉ ehˉ hkʼaw keu tuˬ ve hpa teˇ hpaˍ hta‸
Kuˇpaˍruˆ conˇ lo laˬ ve nyi naˆ meuˉ-ehˍ ve da‸ jaˇ ve hpa yuˬ te taˍ ve yoˬ.
8Nawˬ ve haw lo‸ kʼoˍ gʼawˆ shehˍ hpaˇ teˇ hpaˍ lehˬ, Siˉdonˍ leh Aˍvaˆ venˇ hkʼaw laˬ taˍ ve chaw teˇ hpaˍ hpeh‸ ve yoˬ.
Haw lo‸ kʼoˍ hkʼaw kanˉ te paˍ teˇ hpaˍ lehˬ, cheuˬ jaˇ ve nawˬ ve chaw teˇ hpaˍ hpeh‸ ve yoˬ.
9Haw lo‸ kʼoˍ hta‸ te shehˍ hpaˇ teˇ hpaˍ lehˬ,
Baˍbuˍlonˍ mvuhˇmiˬ lo laˬ taˍ ve puiˉ jaˇ ve la‸shaˉmaˉ teˇ hpaˍ hpeh‸ ve yoˬ.
Laˇ tsuhˇ gʼuiˬ hkʼaw te toˇ ve haw lo‸ kʼoˍ hkʼaw kanˉ te paˍ teˇ hpaˍ lehˬ,
nawˬ ve sainˍ lo tanˇ kaˬ ca te da‸ la ve yoˬ.
10Paˇshaˇ mvuhˇmiˬ, Luˇdaˆ mvuhˇmiˬ leh Liˆbiˇ-aˇ mvuhˇmiˬhkʼaw chehˇ ve ma‸ yaˇ teˇ hpaˍ lehˬ nawˬ ve ma‸ yaˇ ca te la ve yoˬ. Yawˇ hui lehˬ a shu yawˇ ve htanˬ tuˬ leh uˉ tcuhˍ teˇ hpaˍ nawˬ ve ta‸ yehˬ hkʼaw kʼuˉ taˍ ve yoˬ. Yawˇ hui lehˬ, nawˬ hta‸ awˬ me‸ awˬ hponˇ cawˬ la tuˬ te laˇ shehˍ hpaˇ teˇ hpaˍ hpeh‸ ve yoˬ. 11Aˍvaˆ venˇ hkʼaw chehˇ ve ma‸ yaˇ teˇ hpaˍ lehˬ nawˬ ve lanˇ venˇ hta‸ shaw chehˇ leh, Gaˍ maˆ venˇ hkʼaw chehˇ ve chaw teˇ hpaˍ lehˬ, nawˬ ve ta‸ yehˬ hta‸ shaw chehˇ ve yoˬ. Yawˇ hui lehˬ, a shu yawˇ ve htanˬ tuˬ teˇ hpaˍ hta‸ nawˬ ve lanˇ venˇ hkʼoˆ kʼuˉ taˍ ve yoˬ. Yawˇ hui lehˬ nawˬ hta‸ nyi sha la tuˬ te laˇ shehˍ hpaˇ teˇ hpaˍ hpeh‸ ve yoˬ.
12Nawˬ lehˬ Saˍpenˍ mvuhˇmiˬ hta‸ tanˇ kaˬ te da‸ leh, hpu, sho, tawnˇ leh geu‸ law teˇ hpa hta‸ nawˬ geh tawˆ ve mawˇ yuˬ pa da‸ chehˇ ve yoˬ. 13Nawˬ lehˬ Heˍlaˍsaˆ mvuhˇmiˬ, Tuˇbaˍlaˆ mvuhˇmiˬ leh Meˍshehˆ mvuhˇmiˬ chi teˇ hpaˍ hta‸ htawˇ tanˇ kaˬ te da‸ leh, awˬ ceˬ teˇ hpaˍ leh kuiˇ yuˬ te taˍ ve mawˇ te hpaˍ hta‸ nawˬ ve mawˇ yuˬ pa piˇ chehˇ ve yoˬ. 14Nawˬ lehˬ nawˬ ve mawˇ teˇ hpaˍ hta‸ hawˇ leh, taˆ caˇ tuˬ ve iˉ mvuhˇ leh ma‸ hkʼaw yehˇ tuˬ ve iˉmvuhˇ teˇ hpaˍ hta‸ vuiˬ yuˬ ve yoˬ. Behˆtawˍgaˍmaˆ venˇ hkʼaw ve piˉ laˬ teˇ hpaˍ hta‸ htawˇ, nawˬ vuiˬ yuˬ ve yoˬ. 15Roˇdeˍ venˇ yaˇ teˇ hpaˍ htawˇ, nawˬ hta‸ tanˇ kaˬ te da‸ chehˇ ve yoˬ. Laˇ tsuhˇ gʼuiˬ pfuhˍ lo chehˇ ve chaw maˇ maˇ haw ciˬ leh da‸ jaˇ ve suhˆ teˇ hpaˍ yuˬ laˬ leh, nawˬ ve mawˇ hta‸ ca pa la chehˇ ve yoˬ. 16Yawˇ hui lehˬ, shehnˉ shiˍ, nyi naˆ meuˉ lehˍ ve hpa, awˬ sheuˉ laiˉ ceuˬ cawˬ ve hpa, da‸ ve hpa, leh awˬ nu ve shehnˉ shiˍ laiˉ ceuˬ yuˬ laˬ leh nawˬ ve mawˇ hta‸ ca pa la ve yoˬ. 17Yuˇda‸ leh Iˉsaˍreˍlaˆ lehˬ nawˬ ve mawˇ awˬ pon junˍ, pehˇ gʼuiˬ, shaˍlonˍ chu leh hkʼeu hawnˉ teˇ hpaˍ yuˬ la piˇ chehˇ ve yoˬ. 18Daˍmaˍsehˆ venˇ yaˇ teˇ hpaˍ lehˬ, Heˍlaˍbonˍ a pehˉ meuˇ gʼuiˬ leh, Saˍhaˍraˆ yawˬ mvuh teˇ hpaˍ yuˬ veu laˇ leh nawˬ ve mawˇ hta‸ ca pa la chehˇ ve yoˬ. 19Yawˇ hui lehˬ, sho leh hkʼeu hawnˉ teˇ hpaˍ hta‸ htawˇ yuˬ laˬ leh nawˬ ve mawˇ hta‸ ca pa la ve yoˬ. 20Deˍdanˍ venˇ yaˇ teˇ hpaˍ lehˬ, iˉ mvuhˇ awˬ an te tuˬ ve hpa yuˬ veu laˇ leh, nawˬ ve mawˇ hta‸ ca pa la chehˇ ve yoˬ. 21Aˍraˆ chaw leh Keˍdaˍ jawˇmawˇ teˇ hpaˍ htawˇ, yawˬ ehˉ, yawˬ leh aˉ che‸ teˇ hpaˍ yuˬ laˬ leh nawˬ ve mawˇ hta‸ ca pa la chehˇ ve yoˬ. 22Sheˍbaˆ leh Raˍmaˆ venˇ hkʼaw chehˇ ve tanˇ kaˬ paˍ teˇ hpaˍ lehˬ, shehnˉ shiˍ, shi, leh da‸ jaˇ ve hkʼeu hawnˉ teˇ hpaˍ yuˬ veu laˇ leh, nawˬ ve mawˇ hta‸ ca pa la chehˇ ve yoˬ. 23Haˍranˍ venˇ, Kaˍnehˆ venˇ, Eˍdenˍ venˇ, Aˍsuˇraˆ venˇ leh Hkeˍlaˍmaˆ venˇ hkʼaw chehˇ ve tanˇ kaˬ paˍ teˇ hpaˍ htawˇ, nawˬ hta‸ tanˇ kaˬ te da‸ chehˇ ve toˬ. 24Yawˇ hui nawˬ hta‸ da‸ jaˇ ve hpa, nyi naˆ meuˇ lehˍ ve hpa, awˬ sheuˉ laiˉ ceuˬ cawˬ ve hpa, awˬ sheuˉ laiˉ ceuˬ cawˬ ve hkʼawˇ tuˬ, gʼo‸ hkeh, leh aˉ caˆ hkeh teˇ hpaˍ ca hawˇ keu la chehˇ ve yoˬ. 25Nawˬ ve mawˇ teˇ hpaˍ hta‸ haw lo‸ kʼoˍ lonˉ teˇ hpaˍ hkʼaw keu leh taˆ kʼo‸-e chehˇ ve yoˬ.
Nawˬ lehˬ laˇ tsuhˇ gʼuiˬ hkʼaw cawˬ ve
mawˇ hkʼa biˇ doˆ taˍ ve haw lo‸ kʼoˍ hkʼe hpeh‸ ve yoˬ.
26Nawˬ ve haw lo‸ kʼoˍ gʼawˆ shehˍ hpaˇ teˇ hpaˍ nawˬ hta‸ laˇ tsuhˇ gʼuiˬ hkʼaw gʼawˆ kʼai laˇ ve teˇ yanˇ,
mvuhˇ nyi tawˆ hpawˇ ve mvuhˇ haw nawˬ hta‸ te luˬ leh, miˬguiˬ hta‸ vuiˇ kuiˬ lo kʼai piˇ lawˬ ve yoˬ.
27Nawˬ ve mawˇ hkʼa peu-eˬ, haw lo‸ kʼoˍ hkʼaw kanˉ te chehˇ ve chaw hkʼa peu-eˬ,
nawˬ ve haw lo‸ kʼoˍ te paˍ la‸shaˉmaˉ hkʼa peu-eˬ,
nawˬ ve tanˇ kaˬ paˍ teˇ hpaˍ,
nawˬ ve haw lo‸ kʼoˍ hkʼaw ciˇ taˍ ve ma‸ yaˇ hkʼa peu-eˬ,
nawˬ ve haw lo‸ kʼoˍ luˬ kʼai htaˇ,
laˇ tsuhˇ gʼuiˬ hkʼaw mehˉ kʼai ve yoˬ.
28Iˉ kaˆ kʼa chehˇ ve haw lo‸ kʼoˍ hkʼaw kanˉ te paˍ teˇ hpaˍ ve kuˬ hkawˇ,
gʼuiˬ pfuhˍ lo tawˆ la chehˇ ve yoˬ.
29Haw lo‸ kʼoˍ teˇ maˬ le le hta‸ shu baˬ taˉ peuˬ.
Haw lo‸ kʼoˍ hkʼaw kanˉ te paˍ hkʼa peu-eˬ gʼuiˬ pfuhˍ lo kʼai peuˬ.
30Yawˇ hui hkʼa peu-eˬ nawˬ awˬ pon dawˇ haˍ leh hkʼanˇ chehˇ ve yoˬ.
Yawˇ hui lehˬ a shu yawˇ ve oˉ kʼoˍ hkʼoˆ lo je‸ meu-e hkaˆ pfuhˍleh, hkʼaw‸ laˉ hkʼaw zuh‸ taˍ ve yoˬ.
31Yawˇ hui lehˬ nawˬ awˬ pon a shu yawˇ ve uˉ hkeh mvuh hta‸ chiˇ baˬ leh,
meh htuˉ pui hpa veu‸ deh taˍ ve yoˬ.
Yawˇ hui hawˬ chehˇ htaˇ, yawˇ hui ve nyi ma hkʼaw hkʼanˇ chehˇ ve yoˬ.
32Yawˇ hui nawˬ awˬ pon dawˇ haˍ ve kʼa muiˬ hkawˇ kʼa leh kʼoˆ ve,
Chi beu‸ laˇ tsuhˇ gʼuiˬ hkʼaw lo gawˬ kʼai peuˬ ve
Tuˇruˆ venˇ hta‸ a shu teˇ gʼaˇ tehˆ da‸ gʼa le.
33Nawˬ ve tanˇ kaˬ paˍ teˇ hpaˍ laˇ tsuhˇ gʼuiˬ hkʼaw tawˆ kʼai chehˇ ve teˇ yanˇ,
nawˬ lehˬ awˬ nu ve mvuhˇmiˬ yaˇ teˇ hpaˍ loˍ ve mawˇ hta‸ biˇ la piˇ ve yoˬ.
Nawˬ ve mawˇ teˇ hpaˍ hta‸ pa taw,
jawˇmawˇ teˇ hpaˍ paw sha la peuˬ.
34Chi beu‸ nawˬ lehˬ laˇ tsuhˇ gʼuiˬ hkʼaw lo luˬ kʼai taˍ peuˬ.
Nawˬ lehˬ laˇ tsuhˇ gʼuiˬ tawˬ lo tuˍ lo‸-e taˍ peuˬ.
Nawˬ ve mawˇ leh nawˬ awˬ pon kanˉ te chehˇ ve chaw teˇ hpaˍ,
nawˬ geh teˇ geh laˇ tsuhˇ gʼuiˬ hkʼaw lo mehˉ kʼai peuˬ, teh‸ kʼoˆ ve yoˬ.
35Laˇ tsuhˇ gʼuiˬ pfuhˍ lo chehˇ ve chaw hkʼa peu-eˬ nawˬ gʼa hkanˍ chehˇ ve awˬ ceuˬ hta‸ mawˬ leh, anˇ jaˇ kawˆ jaˇ ve yoˬ. Yawˇ hui ve jawˇmawˇ teˇ hpaˍ hkʼa gaˬ kawˆ jaˇ leh, yawˇ hui ve mehˆ hpfuhˇ hkʼoˆ lo kawˆ ve awˬ heˆ tawˆ la ve yoˬ. 36Nawˬ lehˬ mehˉ kʼai peuˬ. Co co taiˍ taiˍ mehˉ kʼai peuˬ. Miˬguiˬ teˇ kaˬ le le lo chehˇ ve tanˇ kaˬ paˍ hkʼa peu-eˬ kawˆ jaˇ leh, nawˬ hkanˍ ve hkʼe gʼa hkanˍ la ve hta‸ kawˆ jaˇ ve yoˬ, teh‸ Gʼuiˬsha kʼoˆ ve yoˬ.
Currently Selected:
Yeˍsaˍkeˍlaˆ li‸ 27: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
