Tawˆ kʼai ve li‸ 8
8
Paˍ hkʼa biˇ tawˆ la ve
1Oˇ ve hkʼaw‸ nawˉ, Gʼuiˬsha Moˉseˍ hta‸ jawˇmawˇ geh kʼai peu leh, chi hkʼe ca kʼaw‸ kʼoˆ piˇ tcuh ve yoˬ. Gʼuiˬsha kʼoˆ ve, Ngaˬ ve chaw teˇ hpaˍ ngaˬ hta‸ oˉ kʼoˍ ca pui hpeh‸ tuˬ yawˇ hui hta‸ hpehˇpiˇ-oˆ. 2Nawˬ yawˇ hui hta‸ maˇ hpehˇ piˇ ve kʼo, nawˬ ve mvuhˇmiˬ hkʼaw ngaˬ paˍ hkʼa biˇ tawˆ la piˇ tuˬ yoˬ. 3Niˍlaˆ iˉ kaˆ lawˬ hkʼaw lo paˍ hkʼa biˇ tawˆ la leh nawˬ ve hawˉ yehˬ, nawˬ ve zuh‸ bawehˇ leh zuh‸ hpui hkʼoˆ lo maˇ kʼoˆ, nawˬ ve a ma‸ lonˉ leh nawˬ ve chaw teˇ hpaˍ ve yehˬ hkʼaw lo maˇ kʼoˆ, nawˬ ve mu‸ hkʼu, hkehˇ teˇ hpaˍ awˬ hkʼaw lo maˇ kʼoˆ, lo‸ la tuˬ yoˬ. 4Paˍ oˇ ve teˇ hpaˍ lehˬ, nawˬ ve awˬ to, nawˬ ve a ma‸ lonˉ leh nawˬ ve chaw teˇ hpaˍ awˬ hkʼoˆ lo taˆ la tuˬ yoˬ, teh‸ ca kʼoˆ piˇ tcuh ve yoˬ.
5Oˇ ve hkʼaw‸ nawˉ Gʼuiˬsha kʼaw‸ kʼoˆ ve, Eˇjiˇtu‸ mvuhˇmiˬ hkʼa peu-eˬ awˬ hkʼoˆ lo, paˍ hkʼa biˇ tawˆ la piˇ tuˬ, Aˍronˍ yawˇ ve juˇ fuiˍ taˬ hta‸ iˉ kaˆ lawˬ teˇ hpaˍ, iˉ kaˆ gʼuiˬ hkʼaˇ teˇ hpaˍ, leh iˉ kaˆ gʼuiˬ po teˇ hpaˍ hkʼoˆ lo che peu tuˬ Aˍronˍ hta‸ kʼoˆ piˇ-oˆ, teh‸ Moˉseˍ hta‸ kʼoˆ piˇ ve yoˬ. 6Hkʼe te leh, Aˍronˍ lehˬ Eˇjiˇtu‸ mvuhˇmiˬ hkʼaw cawˬ ve iˉ kaˆ teˇ hpaˍ awˬ hkʼoˆ lo yawˇ ve juˇ fuiˍ taˬ hta‸ che peu leh, mvuhˇmiˬ oˇ ve hkʼaw paˍ hkʼa biˇ tawˆ la ve yoˬ. 7Faˍ te puiˉ paˍ teˇ hpaˍ htawˇ, paˍ teˇ hpaˍ hta‸ tawˆ la piˇ ve yoˬ.
8Oˇ htaˇ jawˇmawˇ lehˬ, Moˉseˍ leh Aˍronˍ hta‸ kuˬ yuˬ leh kʼoˆ piˇ ve, Paˍ chi teˇ hpaˍ hta‸ yuˬ baˬ laˇ tuˬ, Gʼuiˬsha geh bon lawˬ-o‸. Oˇ hkʼe te laˇ ve kʼo, nawˬ ve chaw chi teˇ hpaˍ Gʼuiˬsha hta‸ oˉ kʼoˍ ca pui tuˬ ngaˬ hpehˇ laˇ tuˬ yoˬ, teh‸ yawˇ huiˉ maˬ hta‸ kʼoˆ piˇ ve yoˬ.
9Moˉseˍ kʼoˆ ve, Ngaˬ lehˬ nawˬ awˬ pon, nawˬ ve a ma‸ lonˉ teˇ hpaˍ awˬ pon leh nawˬ ve chaw teˇ hpaˍ awˬ pon bon lawˬ ve teˇ yanˇ, paˍ chi hkʼa peu-eˬ mehˉ kʼai leh Niˍlaˆ iˉ kaˆ lawˬ hkʼaw ca kʼaw‸ hpoˆ chehˇ kʼai tuˬ yoˬ. Hkʼaˬ ve teˇ yanˇ paˍ chi teˇ hpaˍ hta‸ nawˬ mehˉ kʼai piˇ lawˬ gaˇ ve le, teh‸ na nyi ve yoˬ.
10Jawˇmawˇ lehˬ, Shawˉ pawˍ kʼo te laˇ-oˆ, teh‸ kʼoˆ piˇ ve yoˬ.
Oˇ htaˇ Moˉseˍ lehˬ, Nawˬ kʼoˆ ve hkʼe ngaˬ te laˇ tuˬ yoˬ. Ngaˬ hui ve Gʼuiˬsha hta‸ shuˍ da‸ ve awˬ kaˍ awˬ nu gʼuiˬsha teˇ gʼaˇ ka‸ maˇ cawˬ ve hta‸ nawˬ gʼa shiˍ tuˬ yoˬ. 11Paˍ chi teˇ hpaˍ nawˬ awˬ to leh nawˬ ve hawˉ yehˬ hkʼaw maˇ kʼoˆ, nawˬ ve a ma‸ lonˉ leh nawˬ ve chaw teˇ hpaˍ geh maˇ kʼoˆ, tawˆ kʼai leh Niˍlaˆ iˉ kaˆ lawˬ hkʼaw ca kʼaw‸ chehˇ kʼai tuˬ yoˬ, teh‸ yawˇ hta‸ kʼoˆ piˇ ve yoˬ. 12Oˇ ve hkʼaw‸ nawˉ, Moˉseˍ leh Aˍronˍ jawˇmawˇ geh tawˆ kʼai leh jawˇmawˇ hta‸ sho‸ sha‸ piˇ chehˇ ve paˍ oˇ ve teˇ hpaˍ mehˉ kʼai tuˬ Gʼuiˬsha geh bon lawˬ ve yoˬ. 13Moˉseˍ ve bon lawˬ hkawˇ hta‸ Gʼuiˬsha na yuˬ leh, yehˬ hkʼaw, hawˉ yehˬ hkʼaw leh ti mi hkʼaw hkʼa chehˇ taˍ ve paˍ hkʼa peu-eˬ suh-e ve yoˬ. 14Eˇjiˇtu‸ chaw teˇ hpaˍ lehˬ, paˍ oˇ ve teˇ hpaˍ hta‸ gʼawˆ hpoˆ taˍ leh mvuhˇmiˬ oˇ ve hkʼaw kuiˇ nuˬ jaˇ ve yoˬ. 15Ya‸ hkʼaˇ, jawˇmawˇ lehˬ paˍ oˇ ve teˇ hpaˍ mehˉ kʼai peuˬ ve hta‸ gʼa mawˬ ve teˇ yanˇ, Gʼuiˬsha hta‸ kʼoˆ taˍ ve hkʼe yawˇ ve nyi ma kʼaw‸ heh la leh, Moˉseˍ leh Aˍronˍ hui ve tawˇ hta‸ maˇ kʼaw‸ na yuˬ.
Puiˉ suhˆ naˆ hkʼa biˇ tawˆ la ve
16Oˇ ve hkʼaw‸ nawˉ, Gʼuiˬsha Moˉseˍ hta‸ chi hkʼe kʼaw‸ kʼoˆ piˇ ve yoˬ. Eˇjiˇtu‸ mvuhˇmiˬ hkʼaw cawˬ ve je‸ meu-e teˇ hpaˍ hta‸ puiˉ suhˆ naˆ hpeh‸ la piˇ tuˬ, juˇ fuiˍ taˬ hta‸ yuˬ leh je‸ meu-e hkʼaw dawˆ keu tuˬ Aˍronˍ hta‸ kʼoˆ piˇ-oˆ, teh‸ Moˉseˍ hta‸ kʼoˆ piˇ ve yoˬ. 17Hkʼe te leh, Aˍronˍ lehˬ yawˇ ve juˇ fuiˍ taˬ hta‸ je‸ meu-e hkʼaw dawˆ keu ve yoˬ. Oˇ htaˇ je‸ meu-e oˇ ve teˇ hpaˍ puiˉ suhˆ naˆ hpeh‸ la leh, chaw yaˇ leh to nuˇ to shaˆ teˇ hpaˍ hta‸ che‸ ve yoˬ. 18Faˍ te puiˉ paˍ teˇ hpaˍ htawˇ, puiˉ suhˆ naˆ tawˆ la tuˬ te ve yoˬ. Ya‸ hkʼaˇ, yawˇ hui te maˇ gʼa. 19Oˇ htaˇ, faˍ te puiˉ paˍ teˇ hpaˍ jawˇ mawˇ geh laˬ leh, Chi ve lehˬ Gʼuiˬsha te ve kanˉ hpeh‸ ve yoˬ, teh‸ yawˇ hta‸ kʼoˆ piˇ ve yoˬ. Ya‸ hkʼaˇ, jawˇmawˇ lehˬ Gʼuiˬsha kʼoˆ taˍ ve hkʼe nyi ma heh jaˇ chehˇ sheˍ leh, Moˉseˍ leh Aˍronˍ ve tawˇ hta‸ maˇ na yuˬ.
Puiˉ ma hkʼa biˇ tawˆ la ve
20Oˇ ve hkʼaw‸ nawˉ, Gʼuiˬsha Moˉseˍ hta‸ kʼoˆ piˇ ve, Shawˉ pawˍ mvuhˇ shawˉ teˇ na‸ jawˇmawˇ hta‸ hpuˇ da‸ tuˬ iˉ kaˆ lawˬ lo kʼai leh, yawˇ hta‸ chi hkʼe kʼoˆ piˇ-oˆ. Ngaˬ ve chaw teˇ hpaˍ, ngaˬ hta‸ oˉ kʼoˍ gʼa ca pui tuˬ yawˇ hui hta‸ hpehˇ piˇ-oˆ. 21Nawˬ oˇ hkʼe maˇ te ve kʼo, nawˬ awˬ to, nawˬ ve a ma‸ lonˉ, nawˬ ve chaw teˇ hpaˍ leh nawˬ ve mvuhˇmiˬ chi awˬ hkʼoˆ lo puiˉ ma hkʼa biˇ ngaˬ tawˆ la piˇ tuˬ yoˬ. 22Ya‸ hkʼaˇ, ngaˬ ve chaw teˇ hpaˍ chehˇ taˍ kuiˬ Gawˍshenˍ mvuhˇmiˬ hkʼaw lehˬ, puiˉ ma cawˬ tuˬ ve maˇ heˆ. Chi hkʼe te ve hkʼaw, ngaˬ Gʼuiˬsha lehˬ mvuhˇmiˬ chi hkʼaw kanˉ te chehˇ ve hta‸ nawˬ gʼa shiˍ tuˬ yoˬ. 23Nawˬ ve chaw leh ngaˬ ve chaw hta‸ ngaˬ pehˬ da‸ tuˬ yoˬ. Awˬ heˆ chi shawˉ pawˍ kʼo hpeh‸ la tuˬ yoˬ, teh‸ kʼoˆ piˇ-oˆ, teh‸ Moˉseˍ hta‸ kʼoˆ piˇ ve yoˬ. 24Gʼuiˬsha lehˬ jawˇ maw ve hawˉ yehˬ leh yawˇ ve a ma‸ lonˉ teˇ hpaˍ ve yehˬ hkʼaw lo puiˉ ma hkʼa biˇ lo‸ la piˇ lawˬ ve yoˬ. Eˇjiˇtu‸ mvuhˇmiˬ hkʼaˬ ti chi ti lo htawˇ, puiˉ ma hkʼa biˇ tawˆ la leh mvuhˇmiˬ hta‸ te luˬ te sheˆ piˇ ve yoˬ.
25Oˇ htaˇ jawˇmawˇ lehˬ Moˉseˍ leh Aˍronˍ hta‸ kuˬ yuˬ leh, Nawˬ hui ve Gʼuiˬsha hta‸ oˉ kʼoˍ pui tuˬ tawˆ kʼai loˬ. Ya‸ hkʼaˇ, vuiˇ vuiˇ taˇ kʼai, teh‸ yawˇ huiˉ maˬ hta‸ kʼoˆ piˇ ve yoˬ.
26Yawˇ huiˉ maˬ kʼaw‸ kʼoˆ ve, Nawˬ oˇ hkʼe kʼoˆ ve lehˬ maˇ cawˇ. Awˬ lawn kʼo, ngaˬ hui Gʼuiˬsha hta‸ tuˉ tanˇ piˇ tuˬ ve awˬ ceuˬ lehˬ, Eˇjiˇtu‸ chaw hui cha‸ chiˆ ve awˬ ceuˬ teh‸ shawˍ taˍ ve to nuˇ to shaˆ teˇ hpaˍ hpeh‸ ve yoˬ. Ngaˬ hui to nuˇ to shaˆ oˇ ve teˇ hpaˍ hta‸ yuˬ leh, tuˉ tanˇ chehˇ ve hta‸ Eˇjiˇtu‸ chaw hui gʼa mawˬ ve kʼo, yawˇ hui ngaˬ hui hta‸ haˉ pui baˬ pehˍ laˇ tuˬ yoˬ. 27Gʼuiˬsha kʼoˆ laˇ taˍ ve hkʼe, ngaˬ hui lehˬ shehˆ nyi vuiˇ ve heh puiˉ hkʼaw lo kʼai leh, oˇ kaˬ lo yawˇ hta‸ gʼa ca tuˉ tanˇ piˇ tuˬ yoˬ, teh‸ jawˇmawˇ hta‸ kʼoˆ piˇ ve yoˬ.
28Oˇ htaˇ jawˇmawˇ kʼaw‸ kʼoˆ ve, Heh puiˉ hkʼaw lo nawˬ hui ve Gʼuiˬsha hta‸ ca tuˉ tanˇ piˇ tuˬ, ngaˬ nawˬ hui hta‸ hpehˇ laˇ ve yoˬ. Ya‸ hkʼaˇ, vuiˇ vuiˇ taˇ kʼai. Ngaˬ awˬ pon htawˇ bon lawˬ laˇ-oˆ, teh‸ kʼoˆ piˇ ve yoˬ.
29Moˉseˍ kʼoˆ ve, Ngaˬ hui tawˆ kʼai chehˇ ve teˇ hkui ngaˬ Gʼuiˬsha geh bon lawˬ tuˬ yoˬ. Shawˉ pawˍ mvuhˇ shawˉ gaˬ ve kʼo, puiˉ ma chi teˇ hpaˍ nawˬ leh nawˬ ve a ma‸ lonˉ teˇ hpaˍ geh tawˆ kʼai tuˬ yoˬ. Ya‸ hkʼaˇ, ngaˬ hui Gʼuiˬsha hta‸ gʼa ca tuˉ tanˇ tuˬ, nawˬ taˇ kʼaw‸ tawˍ taˍ laˇ mehˍ, teh‸ kʼoˆ piˇ ve yoˬ.
30Oˇ ve hkʼaw‸ nawˉ, Moˉseˍ jawˇmawˇ geh tawˆ kʼai leh Gʼuiˬsha geh bon lawˬ ve yoˬ. 31Moˉseˍ lawˬ ve hkʼe Gʼuiˬsha na yuˬ leh te ve yoˬ. Puiˉ ma teˇ hpaˍ jawˇmawˇ leh yawˇ ve a ma‸ lonˉ teˇ hpaˍ leh, yawˇ ve chaw teˇ hpaˍ geh tawˆ kʼai ve yoˬ. Oˇ kaˬ lo puiˉ ma teˇ hkeh ka‸ maˇ kʼaw‸ cawˬ taˉ ve yoˬ. 32Ya‸ hkʼaˇ, jawˇmawˇ nyi ma teˇ pawˆ kʼaw‸ heh la leh, Iˉsaˍreˍlaˆ chaw hui hta‸ maˇ hpehˇ piˇ.
Currently Selected:
Tawˆ kʼai ve li‸ 8: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
