Tawˆ kʼai ve li‸ 32
32
Shi nuˇ shaˉ ho‸
1Moˉseˍ hkʼaw hkʼoˆ chehˇ taˍ ve maw jaˇ peuˬ ve hta‸ Iˉsaˍreˍlaˆ chaw hui gʼa mawˬ ve teˇ yanˇ, yawˇ hui Aˍronˍ geh laˬ leh, Ngaˬ hui hta‸ shiˍ kʼai laˇ tuˬ gʼuiˬsha teˇ gʼaˇ te laˇ-oˆ. Awˬ lawn kʼo, ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ shehˍ hpaˇ Moˉseˍ hkʼaˬ hkʼe hpeh‸ kʼai peuˬ ve hta‸ ngaˬ hui maˇ shiˍ, teh‸ Aˍronˍ hta‸ kʼoˆ piˇ ve yoˬ.
2Oˇ htaˇ Aˍronˍ lehˬ, Hkʼe te kʼo, nawˬ hui ve miˇ yaˇ teˇ hpaˍ ve shi naˍ vawˇ teˇ hpaˍ ngaˬ geh yuˬ veu laˇ-oˆ, teh‸ yawˇ hui hta‸ kʼoˆ piˇ ve yoˬ. 3Hkʼe te leh, chaw oˇ ve teˇ hpaˍ lehˬ a shu yawˇ ve shi naˍ vawˇ teˇ hpaˍ Aˍronˍ geh yuˬ laˬ ve yoˬ. 4Aˍronˍ lehˬ, naˍ vawˇ oˇ ve teˇ hpaˍ hta‸ aˬ miˍ hkʼaw lawˍ peuˬ hkʼaw‸ nawˉ, shi nuˇ shaˉ ho‸ teˇ maˬ te ve yoˬ.
Oˇ htaˇ Iˉsaˍreˍlaˆ chaw teˇ hpaˍ lehˬ, Chi ve ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ shehˍ hpaˇ gʼuiˬsha hpeh‸ ve yoˬ, teh‸ kʼoˆ ve yoˬ.
5Aˍronˍ lehˬ shi nuˇ oˇ ve gʼuˇ suhˍ lo tuˉ tanˇ kuiˬ teˇ maˬ te leh, Shawˉ pawˍ lehˬ Gʼuiˬsha hta‸ oˉ kʼoˍ pui tuˬ ve awˬ nyi hpeh‸ ve yoˬ, teh‸ chaw chi ma ve hta‸ kʼoˆ piˇ ve yoˬ. 6Shawˉ pawˍ mvuhˇ shawˉ teˇ na‸ yawˇ hui tu leh, Gʼuiˬsha hta‸ tuˉ tanˇ tuˬ ve to nuˇ to shaˆ teˇ hpaˍ yuˬ laˬ ve yoˬ. Oˇ ve hkʼaw‸ nawˉ, yawˇ hui hti caˇ hti dawˬ leh ha lehˬ ha kʼa te chehˇ ve yoˬ.
7Oˇ htaˇ Gʼuiˬsha Moˉseˍ hta‸ kʼoˆ piˇ ve, Nawˬ haˆ haˆ kʼo‸-e loˬ. Nawˬ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve Iˉsaˍreˍlaˆ chaw teˇ hpaˍ, venˇbaˆ te leh ngaˬ hta‸ baˬ taˉ peuˬ. 8Yawˇ hui lehˬ ngaˬ kʼoˆ piˇ taˍ ve tawˇ teˇ hpaˍ hta‸ baˬ taˉ peuˬ. Yawˇ hui shi nuˇ shaˉ ho‸ teˇ maˬ te leh, oˉ kʼoˍ pui leh tuˉ tanˇ piˇ chehˇ ve yoˬ. Chi lehˬ, ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ shehˍ hpaˇ ngaˬ hui ve gʼuiˬsha hpeh‸ve yoˬ, teh‸ kʼoˆ chehˇ ve yoˬ. 9Chaw chi teˇ hpaˍ nyi ma hkʼaˬ ma heh ve hta‸ ngaˬ gʼa shiˍ peuˬ. 10Ngaˬ hta‸ taˇ tawˍ taˍ laˇ-oˆ. Ngaˬ yawˇ hui hta‸ nyi ma zuhˆ leh, yawˇ hui hta‸ te luˬ te sheˆ piˇ tuˬ yoˬ. Ya‸ hkʼaˇ, nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ chaw ceuˬ lonˉ teˇ ceuˬ hpeh‸ la piˇ tuˬ yoˬ, teh‸ Moˉseˍ hta‸ kʼoˆ piˇ ve yoˬ.
11Oˇ htaˇ Moˉseˍ Gʼuiˬsha hta‸ lawˬ hkawˉ leh kʼoˆ ve, Gʼuiˬsha-oˬ, nawˬ ve kanˇ paˆ hta‸ yehˇ leh Eˇjiˇtu‸ mvuhˇmiˬ hkʼaw shiˍ tawˆ la taˍ ve nawˬ ve chaw teˇ hpaˍ hta‸ aˬ hto‸ ma pa taw nyi ma zuhˆ ve le. 12Nawˬ oˇ hkʼe te piˇ ve kʼo, Eˇjiˇtu‸ chaw teˇ hpaˍ chi hkʼe kʼoˆ tuˬ yoˬ. Gʼuiˬsha lehˬ Iˉsaˍreˍ laˆ chaw hui hta‸ hkʼaw hkʼoˆ lo tiˇ pehˍ leh te luˬ piˇ tuˬ yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ-e piˇ ve yoˬ, teh‸ kʼoˆ tuˬ yoˬ. Nawˬ nyi ma zuhˆ ve hta‸ mehˉ kʼai piˇ-oˆ. Nawˬ ve nyi ma kʼaw‸ pa leh yawˇ hui hta‸ taˇ ciˍ yanˍ piˇ-oˆ. 13Nawˬ lehˬ, Aˍbraˍhanˍ, Iˉcaˆ, Yaˍkoˆ hui ve awˬ ceuˬ awˬ hkʼaˇ teˇ hpaˍ hta‸ meu‸ keu shiˍ hkʼa shuˍ maˇ la piˇ tuˬ ka ti‸ te taˍ peuˬ ve hta‸ maˇ kʼoˆ, mvuhˇmiˬ oˇ ve hkʼa peu-eˬ yawˇ hui hta‸ co co taiˍ taiˍ chiˇ a‸ piˇ tuˬ ka ti‸ te taˍ peuˬ ve hta‸ maˇ kʼoˆ, a ciˉ dawˇ nawˇ sheˍ, teh‸ Gʼuiˬsha hta‸ kʼoˆ piˇ ve yoˬ. 14Oˇ htaˇ Gʼuiˬsha nyi ma kʼaw‸ pa leh, yawˇ ve chaw teˇ hpaˍ hta‸ maˇ kʼaw‸ te luˬ piˇ ve yoˬ.
15Oˇ ve hkʼaw‸ nawˉ, Moˉseˍ lehˬ awˬliˇtawˇhkawˇ bvuh‸ taˍ ve haˉ pui baˉ oˇ ve nyiˇ maˬ hta‸ yuˬ veu leh, hkʼaw hkʼoˆ lo ya‸-e ve yoˬ. Haˉ pui baˉ oˇ ve nyiˇ hpawˇ hpawˇ lo awˬliˇtawˇhkawˇ hkʼa biˇ bvuh‸ taˍ ve yoˬ. 16Haˉ pui baˉ oˇ ve teˇ hpaˍ hta‸ Gʼuiˬsha te taˍ leh, oˇ ve awˬ hkʼoˆ lo Gʼuiˬsha ve li‸ mehˆ htawˆ bvuh‸ taˍ ve yoˬ.
17Yawˇsuˆ lehˬ, chaw yaˇ teˇ hpaˍ duiˆ-ehˍ shaˇ-ehˍ te chehˇ ve awˬ hkawˇ gʼa kaˇ ve teˇ yanˇ, Fa la hkʼaw lo ma‸ bawˆ chehˇ ve awˬ hkawˇ hta‸ ngaˬ gʼa kaˇ ve yoˬ, teh‸ Moˉseˍ hta‸ kʼoˆ piˇ ve yoˬ.
18Ya‸ hkʼaˇ Moˉseˍ kʼoˆ ve, Chi lehˬ ma‸ bawˆ gʼaˇ ve chaw kuˬ heuˉ chehˇ ve awˬ hkawˇ maˇ heˆ. Ma‸ bawˆ shonˇ leh chaw kuˬ hawˬ chehˇ ve awˬ hkawˇ ka‸ maˇ heˆ. Oˇ ve lehˬ, chaw yaˇ teˇ hpaˍ kʼa muiˬ hkawˇ kʼa chehˇ ve awˬ hkawˇ hpeh‸ ve yoˬ, teh‸ kʼoˆ ve yoˬ.
19Moˉseˍ fa la awˬ paˇ lo gaˬ la leh, shi nuˇ shaˉ ho‸ hta‸ maˇ kʼoˆ, chaw yaˇ teˇ hpaˍ kʼaˍ hkʼeˆ chehˇ ve hta‸ maˇ kʼoˆ, yawˇ gʼa mawˬ ve teˇ yanˇ nyi ma zuhˆ jaˇ leh, haˉ pui baˉ oˇ ve nyiˇ maˬ hta‸ miˬ chaˇ hkʼoˆ lo chiˇ baˬ leh hkoˇ sheˬ ve yoˬ. 20Oˇ ve hkʼaw‸ nawˉ, yawˇ hui te taˍ ve nuˇ ehˉ hta‸ yuˬ leh, aˬ miˍ hkʼaw kʼaw‸ lawˍ ve yoˬ. Oˇ ve hta‸ meuˉ-ehˍ te geuˆ peuˬ hkʼaw‸ nawˉ, iˉ kaˆ hkʼaw ngeuˍ keu leh Iˉsaˍreˍlaˆ chaw hui hta‸ taw piˇ ve yoˬ. 21Oˇ ve hkʼaw‸ nawˉ, Moˉseˍ Aˍronˍ hta‸ kʼoˆ piˇ ve, Chaw chi teˇ hpaˍ nawˬ hta‸ aˬ hto‸ ma te laˇ ve pa taw, chi taw taw kawˆ tuˬ uiˍ ve venˇbaˆ nawˬ yawˇ hui hta‸ te tcuh ve le, teh‸ yawˇ hta‸ kʼoˆ piˇ ve yoˬ.
22Oˇ htaˇ Aˍronˍ kʼoˆ ve, Ngaˬ hta‸ nyi ma a ciˉ taˇ zuhˆ laˇ sheˍ. Chaw chi teˇ hpaˍ lehˬ, cha‸ chiˆ ve kanˉ hta‸ te gaˇ jaˇ ve nyi ma cawˬ ve hta‸ nawˬ shiˍ taˍ ve yoˬ. 23Yawˇ hui ngaˬ geh laˬ leh, Ngaˬ hui hta‸ sheh kʼai laˇ tuˬ gʼuiˬsha teˇ gʼaˇ te laˇ-oˆ. Awˬ lawn kʼo, ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ shehˍ hpaˇ Moˉseˍ hkʼaˬ hkʼe hpeh‸ kʼai peuˬ ve hta‸ ngaˬ hui maˇ shiˍ, teh‸ ngaˬ hta‸ kʼoˆ laˇ ve yoˬ. 24Hkʼe te leh, ngaˬ yawˇ hui hta‸ shi hkʼa cawˬ ve yuˬ tawˆ la tuˬ kʼoˆ piˇ leh, yawˇ hui ngaˬ geh lo shi yuˬ veu laˇ ve yoˬ. Ngaˬ lehˬ, shi oˇ ve teˇ hpaˍ hta‸ aˬ miˍ hkʼaw baˬ keu leh nuˇ ehˉ chi tawˆ la ve yoˬ, teh‸ Moˉseˍ hta‸ kʼoˆ piˇ ve yoˬ.
25Aˍronˍ lehˬ, Iˉsaˍreˍlaˆ chaw hta‸ ya‸ kʼaw sheh ya‸ leh, yawˇ hui hta‸ ha‸ shaˉ maˇ gʼa law‸ law‸ hpeh‸ la chehˇ ve hta‸ maˇ kʼoˆ, yawˇ hui ve canˇ paˍ teˇ hpaˍ mehˆ gʼuˇ suhˍ lo shu kʼoˆ guiˇ gʼuiˬ guiˇ tuˬ hpeh‸ la peuˬ ve hta‸ maˇ kʼoˆ, Moˉ seˍ gʼa mawˬ ve yoˬ. 26Hkʼe te leh Moˉseˍ lehˬ, aˉ po kʼo yehˬmiˉhpe‸ lo huˉ taˍ leh, Gʼuiˬsha hpawˇ chehˇ tuˬ ve chaw choˬ kaˬ lo laˬ-o‸, teh‸ kʼoˆ ve yoˬ. Hkʼe te leh, Leˍviˆ awˬ ceuˬ awˬ hkʼaˇ hkʼa peu-eˬ yawˇ paˇ lo jiˆ kʼai ve yoˬ. 27Oˇ htaˇ Moˉseˍ yawˇ hui hta‸ kʼoˆ piˇ ve, Iˉsaˍreˍlaˆ ve Gʼuiˬsha chi hkʼe kʼoˆ ve yoˬ. Nawˬ hui teˇ gʼaˇ le le a shu yawˇ ve aˉhtaw pfuhˇ leh, aˉ po kʼo teˇ maˬ le le hkʼaw ca lo‸ nyi-o. Nawˬ hui ve awˬ viˉ awˬ nyi, nawˬ hui ve awˬ chawˇ, leh nawˬ hui awˬ paˇ awˬ kui chehˇ ve chaw hta‸ gʼa tiˇ pehˍ ve yoˬ, teh‸ yawˇ hui hta‸ kʼoˆ piˇ ve yoˬ. 28Leˍviˆ chaw teˇ hpaˍ lehˬ Moˉseˍ kʼoˆ ve hkʼe te leh, oˇ ve teˇ nyi yawˇ hui chaw shehˆ hinˉ gʼaˇ hta‸ tiˇ pehˍ piˇ ve yoˬ. 29Oˇ ve hkʼaw‸ nawˉ Moˉseˍ kʼoˆ ve, Nawˬ hui lehˬ a shu yawˇ ve yaˇ, a shu yawˇ ve awˬ viˉ awˬ nyi teˇ hpaˍ hta‸ tiˇ pehˍ peuˬ ve pa taw, ya‸ nyi nawˬ hui lehˬ Gʼuiˬsha ve paw hkuˇ hpeh‸ la tuˬ, a shu yawˇ ve awˬ to hta‸ chiˇ a‸ piˇ taˍ peuˬ. Gʼuiˬsha lehˬ, ya‸ nyi nawˬ hui hta‸ awˬ bon na‸ laˇ taˍ peuˬ, teh‸ Leˍviˆ chaw hui hta‸ kʼoˆ piˇ ve yoˬ.
30Shawˉ pawˍ teˇ nyi Moˉseˍ chaw moˍ lonˉ hta‸ kʼoˆ piˇ ve, Nawˬ hui uiˍ jaˇ ve venˇbaˆ te peuˬ. Ya‸ hkʼaˇ, chi beu‸ ngaˬ hkʼaw hkʼoˆ lo Gʼuiˬsha geh taˆ-e tuˬ yoˬ. Nawˬ hui venˇbaˆ gʼa ponˬ tuˬ ngaˬ lawˬ hkawˉ laˇ hpeh‸ tuˬ naˍ maˇ shiˍ, teh‸ yawˇ hui hta‸ kʼoˆ piˇ ve yoˬ. 31Oˇ ve hkʼaw‸ nawˉ, Moˉseˍ Gʼuiˬsha geh kʼaw‸ kʼai leh kʼoˆ ve, Chaw chi teˇ hpaˍ lehˬ kawˆ tuˬ uiˍ ve venˇbaˆ hta‸ gʼa te taˍ peuˬ. Yawˇ hui shi shaˉ ho‸ te leh, oˉ kʼoˍ pui taˍ peuˬ. 32Awˬ bon te leh yawˇ hui ve venˇbaˆ hta‸ a ciˉ hpehˇ piˇ-oˆ. Oˇ hkʼe maˇ te laˇ ve kʼo, nawˬ ve li‸ daw awˬ hkʼaw bvuh‸ keu taˍ ve ngaˬ ve awˬ meh hta‸ a ciˉ shiˆ baˬ laˇ-oˆ, teh‸ Gʼuiˬsha hta‸ kʼoˆ piˇ ve yoˬ.
33Oˇ htaˇ Gʼuiˬsha kʼoˆ ve, Ngaˬ hta‸ te ya‸ ve chaw teˇ hpaˍ ve awˬ meh hta‸ ceh tiˉ ngaˬ ve li‸ daw hkʼaw shiˆ baˬ tuˬ yoˬ. 34Nawˬ chi beu‸ kʼaw‸ kʼo‸-e leh, ngaˬ nawˬ hta‸ kʼoˆ piˇ taˍ ve chehˇ kuiˬ lo chaw oˇ ve teˇ hpaˍ hta‸ shiˍ kʼai piˇ-oˆ. Ngaˬ ve mvuhˇ naw tcuh yaˇ teˇ gʼaˇ nawˬ hui hta‸ ha‸ shaˉ laˇ tuˬ yoˬ. Yawˇ hui hta‸ ciˍ yanˍ piˇ tuˬ ve awˬ yanˇ gaˬ la ve teˇ yanˇ, yawˇ hui ve venˇbaˆ awˬ pon ngaˬ yawˇ hui hta‸ ciˍ yanˍ piˇ tuˬ yoˬ, teh‸ Moˉseˍ hta‸ kʼoˆ piˇ ve yoˬ.
35Yawˇ hui lehˬ, Aˍronˍ hta‸ nuˇ shaˉ ho‸ nyiˉ te tcuh ve pa taw, Gʼuiˬsha yawˇ hui awˬ hkʼoˆ naˬ beuˬ gaˬ la piˇ ve yoˬ.
Currently Selected:
Tawˆ kʼai ve li‸ 32: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
