Tawˆ kʼai ve li‸ 15

Moˉseˍ ve kʼa muiˬ hkawˇ

1Oˇ htaˇ, Moˉseˍ leh Iˉsaˍreˍlaˆ chaw hui Gʼuiˬsha hta‸ kʼa muiˬ chiˇ mvuh leh kʼoˆ ve,

Gʼuiˬsha lehˬ gʼaˇ shehˍ hpaˇ hpeh‸ leh, iˉ mvuhˇ leh iˉ mvuhˇ ciˇ shehˍ hpaˇ hui hta‸ laˇ tsuhˇ gʼuiˬ hkʼaw yuˬ baˬ peuˬ ve pa taw,

yawˇ hta‸ kʼa muiˬ chiˇ mvuh tuˬ yoˬ.

2Gʼuiˬsha lehˬ ngaˬ ve gʼaˇ va kuiˬ hpeh‸ leh,

ngaˬ hta‸ ponˬ laˇ shehˍ hpaˇ hpeh‸ ve yoˬ.

Yawˇ lehˬ ngaˬ ve Gʼuiˬsha hpeh‸ leh, ngaˬ yawˇ hta‸ chiˇ uiˍ chiˇ mvuh piˇ tuˬ yoˬ.

Yawˇ lehˬ ngaˬ pa ve Gʼuiˬsha hpeh‸ leh, yawˇ uiˍ jaˇ mvuh jaˇ ve hta‸ ngaˬ kʼa muiˬ tuˬ yoˬ.

3Gʼuiˬsha lehˬ ma‸ poˍ lonˉ hpeh‸ leh,

yawˇ ve awˬ meh lehˬ, Jawˇmawˇ Gʼuiˬsha hpeh‸ ve yoˬ.

4Yawˇ lehˬ, Eˇjiˇtu‸ ma‸ moˍ ma‸ cuˇ leh yawˇ hui ve iˉ mvuhˇ lawˬ teˇ hpaˍ hta‸

laˇ tsuhˇ gʼuiˬ hkʼaw lo yuˬ baˬ peuˬ.

5Laˇ tsuhˇ gʼuiˬ yawˇ hui hta‸ hoˆ beh taˍ leh,

yawˇ hui lehˬ haˉ pui shiˍ hkʼa shuˍ laˇ tsuhˇ gʼuiˬ tawˬ lo ya‸-e ve yoˬ.

6Jawˇmawˇ-o‸, nawˬ ve la‸sha paˉ la‸ sheh lehˬ

kanˇ paˆ uiˍ jaˇ leh, canˇ paˍ teˇ hpaˍ hta‸ tzuh‸ suhˍ piˇ ve yoˬ.

7Nawˬ lehˬ gʼaˇ shehˍ hpaˇ hpeh‸ leh, nawˬ ve canˇ paˍ teˇ hpaˍ hta‸ yuˬ baˬ piˇ ve yoˬ.

Nawˬ ve nyi ma zuhˆ ve teˇ ceuˬ yawˇ hui hta‸ chi gʼawˇ hkʼa shuˍ to‸ baˬ piˇ lawˬ ve yoˬ.

8Nawˬ laˇ tsuhˇ gʼuiˬ hta‸ meuˆ leh

iˉ kaˆ teˇ hpaˍ gʼo‸ pa hkʼa shuˍ cawˍ tu la ve yoˬ.

Naˉ jaˇ ve laˇ tsuhˇ gʼuiˬ hta‸ htawˇ heh la piˇ ve yoˬ.

9Canˇ paˍ kʼoˆ ve, Ngaˬ yawˇ hui hta‸ gʼa‸ yuˬ leh yawˇ hui hta‸ hpeh yuˬ tuˬ yoˬ.

Yawˇ hui ve mawˇ jeˬ teˇ hpaˍ hta‸ ngaˬ hiˉ yuˬ leh, heuˆ gaˇ ve teˇ hpaˍ hta‸ yuˬ kʼai tuˬ yoˬ.

Ngaˬ ve aˉhtaw hta‸ gʼawˬ tawˆ leh, yawˇ hui ve mawˇ hkʼa peu-eˬ hta‸ yuˬ kʼai tuˬ yoˬ, teh‸ kʼoˆ ve yoˬ.

10Ya‸ hkʼaˇ Gʼuiˬsha-oˬ, nawˬ ve shaˉ teˇ peu-eˍ hta‸ pa taw,

Eˇjiˇtu‸ chaw hui laˇ tsuhˇ gʼuiˬ hkʼaw kʼa suh peuˬ sheˬ ve yoˬ.

Yawˇ hui lehˬ, geu‸ law hkʼa shuˍ iˉ kaˆ hkʼaw tuˍ lo‸-e ve yoˬ.

11Gʼuiˬsha-oˬ, gʼuiˬsha teˇ hpaˍ awˬ hkʼaw lo nawˬ hta‸ shuˍ da‸ ve a shu cawˬ le.

Nawˬ hkʼa shuˍ da‸ kehˬ jaˇ ve a shu cawˬ le.

Nawˬ hkʼa shuˍ anˇ tuˬ te puiˉ ve a shu cawˬ le.

12Nawˬ ve la‸ sha paˉ la‸ sheh che ve teˇ yanˇ,

miˬguiˬ lehˬ ngaˬ hui ve canˇ paˍ teˇ hpaˍ hta‸ hehˆ dawˬ ve yoˬ.

13Nawˬ lehˬ ka ti‸ yeˬ ve hkʼaw nawˬ htaiˍ hkʼaw‸ piˇ taˍ ve chaw hui hta‸ shiˍ kʼai piˇ chehˇ ve yoˬ.

Nawˬ ve awˬ gʼaˇ awˬ shaˉ hta‸ yehˇ leh, yawˇ hui hta‸ nawˬ ve da‸ kehˬ ve mvuhˇmiˬ lo shiˍ kʼai piˇ chehˇ ve yoˬ.

14Chaw ceuˬ teˇ hpaˍ lehˬ, nawˬ ve awˬ lawn gʼa kaˇ leh kawˆ jaˇ chehˇ ve yoˬ.

Hpiˇliˇtiˆ chaw teˇ hpaˍ htawˇ kawˆ jehˇ chehˇ ve yoˬ.

15Eˇdonˍ mvuhˇmiˬ ve awˬ hoˉ awˬ naˬ teˇ hpaˍ kawˆ jaˇ leh,

Mawˇbaˆ mvuhˇmiˬ ve awˬ hoˉ awˬ naˬ teˇ hpaˍ htawˇ kawˆ cheˇ chehˇ ve yoˬ.

Hkaˍnanˍ mvuhˇmiˬ yaˇ teˇ hpaˍ htawˇ nyi ma luˬ chehˇ ve yoˬ.

16Yawˇ hui hkʼa peu-eˬ kawˆ jehˇ chehˇ ve yoˬ.

Gʼuiˬsha-oˬ, yawˇ hui lehˬ nawˬ ve awˬ gʼaˇ awˬ shaˉ hta‸ gʼa mawˬ peuˬ.

Shu ceˬ te chehˇ kuiˬ lo nawˬ ponˬ piˇ taˍ ve nawˬ ve chaw teˇ hpaˍ,

yawˇ hui geh tawˆ kʼai htaˇ hkʼa gaˬ yawˇ hui

dawˇ maˇ tawˆ leh kawˆ cheˇ chehˇ ve yoˬ.

17Gʼuiˬsha-oˬ, nawˬ yawˇ hui hta‸ shiˍ laˬ leh nawˬ ve bon yehˬ cawˬ kuiˬ,

nawˬ leuˆ yuˬ taˍ ve hkʼaw pui hkʼoˆ lo ti taˍ ve yoˬ.

18Gʼuiˬsha-oˬ, nawˬ lehˬ co co taiˍ taiˍ Jawˇmawˇ hpeh‸ ve yoˬ, teh‸ kʼoˆ ve yoˬ.

Meˍriˆanˍ ve kʼa muiˬ hkawˇ

19Iˉsaˍreˍlaˆ chaw hui lehˬ, laˇ tsuhˇ gʼuiˬ hkʼaw goˇ lehˍ ve miˬguiˬ hkʼoˆ juˇ kʼai ve yoˬ. Ya‸ hkʼaˇ, Eˇjiˇtu‸ chaw hui ve iˉ mvuhˇ lawˬ leh iˉ mvuhˇ ciˇ ve ma‸ yaˇ hkʼa peu-eˬ, laˇ tsuhˇ gʼuiˬ hkʼaw lo‸-e ve teˇ yanˇ, Gʼuiˬsha lehˬ iˉ kaˆ hta‸ kʼaw‸ hoˆ beh piˇ lawˬ ve yoˬ.

20Aˍronˍ ve awˬ viˉ ma Meˍriˆanˍ lehˬ, Gʼuiˬsha ve tcuh kaˍ ma hpeh‸ ve yoˬ. Yawˇ tinˍ hteˆ leh kʼaˍ hkʼeˆ ve yoˬ. Awˬ nu ve yaˇ miˇ hkʼa peu-eˬ htawˇ, a shu yawˇ ve tinˍ hteˆ leh Meˍriˆanˍ geh teˇ geh kʼaˍ hkʼeˆ ve yoˬ. 21Oˇ htaˇ, Meˍriˆanˍ kʼa mui hkawˇ kʼa leh kʼoˆ ve,

Gʼuiˬsha gʼaˇ shehˍ hpaˇ hpeh‸ ve pa taw, yawˇ hta‸ kʼa muiˬ chiˇ mvuh-o.

Awˬ lawn kʼo, yawˇ lehˬ iˉ mvuhˇ leh iˉ mvuhˇ ciˇ shehˍ hpaˇ hui hta‸ laˇ tsuhˇ gʼuiˬ hkʼaw baˬ keu peuˬ, teh‸ kʼoˆ ve yoˬ.

Hkʼaˇ ve iˉ kaˆ

22Moˉseˍ lehˬ, Iˉsaˍreˍlaˆ chaw hui hta‸ oˇ kaˬ lo shiˍ tawˆ-e leh, Shuˇraˆ teh‸ kʼoˆ ve heh puiˉ hkʼaw lo shiˍ kʼai ve yoˬ. Yawˇ hui shehˆ nyi hkʼa gaˬ heh puiˉ hkʼaw lo te toˇ leh, iˉ kaˆ ca maˇ mawˬ. 23Oˇ ve hkʼaw‸ nawˉ, yawˇ hui Maˍraˆ teh‸ kʼoˆ ve chehˇ kuiˬ lo gaˬ la ve yoˬ. Oˇ kaˬ lo tawˆ ve iˉ kaˆ lehˬ hkʼaˇ jaˇ ve pa taw, yawˇ hui dawˬ maˇ hpeh‸ ve yoˬ. Hkʼe te leh, chehˇ kuiˬ oˇ ve hta‸ Maˍraˆ teh‸ meh piˇ ve yoˬ. 24Oˇ htaˇ chaw oˇ ve teˇ hpaˍ Moˉseˍ hta‸ hkʼanˇ maˍ piˇ leh, Ngaˬ hui aˬ hto‸ ma gʼa dawˬ tuˬ le, teh‸ yawˇ hta‸ kʼoˆ piˇ ve yoˬ. 25Moˉseˍ Gʼuiˬsha geh bon lawˬ leh, Gʼuiˬsha yawˇ hta‸ suhˆ cehˬ teˇ cehˬ maˍ piˇ ve yoˬ. Hkʼe te leh, yawˇ suhˆ cehˬ oˇ ve hta‸ iˉ kaˆ hkʼaw htu keu leh, iˉ kaˆ oˇ ve kʼaw‸ mehˬ la ve yoˬ.

Chehˇ kuiˬ oˇ ve hkʼaw, Gʼuiˬsha yawˇ hui hta‸ awˬliˇtawˇhkawˇ teˇ hpaˍ piˇ leh, yawˇ hui hta‸ lawˇ nyi ve yoˬ. 26Yawˇ kʼoˆ ve, Nawˬ hui ngaˬ ve tawˇ hta‸ na yuˬ leh ngaˬ mehˆ gʼuˇ suhˍ hteˇ ve cawˇ ve kanˉ hta‸ tiˉ te ve kʼo, Eˇjiˇtu‸ chaw hui hta‸ ngaˬ ciˍ yanˍ piˇ ve awˬ ceuˬ oˇ ve teˇ hpaˍ nawˬ hui awˬ hkʼoˆ gaˬ la tuˬ ve maˇ heˆ. Ngaˬ lehˬ Gʼuiˬsha hpeh‸ leh nawˬ hui hta‸ gu na-e laˇ shehˍ hpaˇ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

27Oˇ ve hkʼaw‸ nawˉ, yawˇ hui Eˍlinˍ teh‸ kʼoˆ ve chehˇ kuiˬ lo gaˬ la ve yoˬ. Oˇ kaˬ iˉ kaˆ gʼuiˬ tuˇ 12 maˬ cawˬ leh tcuhˉ pui cehˬ 70 cehˬ cawˬ ve yoˬ. Hkʼe te leh, yawˇ hui oˇ kaˬ lo jehˇ chehˇ taˍ ve yoˬ.

Currently Selected:

Tawˆ kʼai ve li‸ 15: LHBE

Highlight

Copy

Compare