Tawˆ kʼai ve li‸ 12
12
Paˍsaˍhkaˍ pawehˇ caˇ ve awˬ lawn
1Gʼuiˬsha lehˬ, Eˇjiˇtu‸ mvuhˇmiˬ hkʼaw Moˉseˍ leh Aˍronˍ hta‸ chi hkʼe kʼoˆ piˇ ve yoˬ. 2Ha pa chi ve teˇ maˬ lehˬ, teˇ hkʼaw‸ awˬ hkʼaw lo ve awˬ hkuiˉ puiˍ teˇ ha pa teh‸ nawˬ hui gʼa shawˍ taˍ tuˬ yoˬ. 3Iˉsaˍreˍlaˆ chaw hui hta‸ chi hkʼe te tuˬ kʼoˆ piˇ-oˆ. Ha pa chi teˇ chi nyi gaˬ htaˇ, yehˬ shehˍ hpaˇ teˇ gʼaˇ le le, a shu yawˇ ve yehˬ yaˇ kʼa yaˇ awˬ pon yawˬ ehˉ teˇ hkeh gʼa ca taˍ ve yoˬ. 4Ya‸ hkʼaˇ, yehˬ kʼa teˇ maˬ maˬ lehˬ chaw maˇ maˇ leh yawˬ ehˉ teˇ hkeh caˇ maˇ peuˬ ve kʼo, yawˇ lehˬ awˬ nu ve yehˬ kʼa teˇ maˬ hta‸ pawnˇ da‸ leh a shu yawˇ ve yehˬ yaˇ kʼa yaˇ caˇ peuˬ law‸ ve yawˬ ehˉ teˇ hkeh gʼa ca taˍ ve yoˬ. 5Yawˬ ehˉ oˇ ve lehˬ, te‸ chiˉ awˬ kuiˉ awˬ haiˇ maˇ cawˬ leh, teˇ hkʼaw‸ biˇ peuˬ ve yawˬ ehˉ gʼa hpeh‸ piˇ ve yoˬ. Yawˬ ehˉ maˇ cawˬ ve kʼo, a ˉ che‸ hta‸ ka‸ yehˇ hpeh‸ ve yoˬ. 6Iˉsaˍreˍlaˆ chaw teˇ hpaˍ lehˬ, ha pa chi teˇ chi awˇ nyi mvuhˇ hpeu‸ htaˇ a shu yawˇ ve yawˬ ehˉ hta‸ gʼa tiˇ pehˍ ve yoˬ. 7Yawˬ ehˉ awˬ shaˍ hkʼa te caˇ ve yehˬ teˇ maˬ le le ve yehˬmiˉhpe‸ hkʼoˆ lo, yawˬ ehˉ awˬ suhˍ gʼa shehˆ taˍ ve yoˬ. 8Oˇ ve teˇ haˉ, yawˇ hui lehˬ piˬ taˍ ve yawˬ ehˉ awˬ shaˍ hta‸ diˇ maˇ keu ve hkaoˍmonˇ leh, hkʼaˇ ve gʼawˇ hpa‸ mvuhˬ naweh geh teˇ geh gʼa caˇ ve yoˬ. 9Nawˬ hui lehˬ, shaˍ oˇ ve awˬ tcuhˇ maˇ gʼa caˇ. Caˉ caˇ ve ka‸ maˇ gʼa te. Oˇ kʼoˍ, hkui sheh, leh awˬ hkʼaw ve teˇ hpaˍ hta‸ htawˇ gʼa piˬ caˇ ve yoˬ. 10Awˬ shaˍ oˇ ve teˇ hpaˍ hta‸ mvuhˇ htiˇ la htaˇ hkʼa gaˬ maˇ gʼa teh taˍ. Leuˉ taˍ sheˍ ve shaˍ hta‸ aˬ miˍ gʼa tuˉ baˬ ve yoˬ. 11Nawˬ hui chi hkʼe gʼa te caˇ tuˬ yoˬ. Haˍ pi tsuh‸, hkuiˉ nuˆ tcuhˉ, juˇ fuiˍ yuˬ taˍ leh haˆ haˆ gʼa caˇ ve yoˬ. Awˬ lawn kʼo, chi ve lehˬ Gʼuiˬsha ve Paˍsaˍhkaˍ pawehˇ hpeh‸ ve yoˬ.
12Oˇ ve teˇ haˉ ngaˬ Eˇjiˇtu‸ mvuhˇmiˬ hkʼaw hpanˍ kʼai leh, awˉ lawˉ peuˇ paw la ve yaˇ teˇ hpaˍ leh to nuˇ to shaˆ teˇ hpaˍ hta‸ tiˇ pehˍ piˇ tuˬ yoˬ. Oˇ hkʼe te ve hkʼaw, ngaˬ lehˬ Eˇjiˇtu‸ mvuhˇmiˬ ve gʼuiˬsha teˇ hpaˍ hta‸ ciˍ yanˍ piˇ tuˬ yoˬ. Ngaˬ lehˬ Gʼuiˬsha hpeh‸ ve yoˬ. 13Ya‸ hkʼaˇ, nawˬ hui ve yehˬ hkʼoˆ lo shehˆ taˍ ve awˬ suhˍ lehˬ awˬ heˆ hpeh‸ leh, awˬ suhˍ oˇ ve hta‸ ngaˬ mawˬ ve teˇ yanˇ, nawˬ hui hta‸ ponˬ laˇ tuˬ yoˬ. Ngaˬ Eˇjiˇtu‸ mvuhˇmiˬ hta‸ ciˍ yanˍ piˇ ve teˇ yanˇ, luˬ ve sheˆ ve awˬ ceuˬ nawˬ hui awˬ hkʼoˆ lo gaˬ la tuˬ ve maˇ heˆ. 14Nawˬ hui lehˬ awˬ nyi chi ve teˇ nyi hta‸ hkʼa htaˆ ka‸ gʼa dawˇ nawˇ taˍ leh, nawˬ hui ve awˬ yaˇ awˬ duˬ teˇ co peuˬ teˇ co Gʼuiˬsha ve pawehˇ chi hta‸ gʼa te tcuhˉ taˍ tuˬ yoˬ, teh‸ yawˇ huiˉ maˬ hta‸ kʼoˆ piˇ ve yoˬ.
Diˇ maˇ keu ve hkaoˍmonˇ caˇ ve
15Gʼuiˬsha kʼoˆ ve, Suhˍ nyi hkʼa gaˬ nawˬ hui diˇ maˇ keu ve hkaoˍmonˇ hta‸ gʼa caˇ ve yoˬ. Awˉ lawˉ peuˇ tanˬ te ve teˇ nyi htaˇ, nawˬ hui ve yehˬ hkʼaw cawˬ ve diˇ hkʼa peu-eˬ hta‸ gʼa yuˬ baˬ ve yoˬ. Awˬ lawn kʼo, awˬ nyi chi ve suhˍ nyi awˬ hkʼaw lo, diˇ keu ve hkaoˍmonˇ hta‸ caˇ ve chaw hta‸ ngaˬ ve chaw teh‸ kʼaw‸ shawˍ piˇ tuˬ ve maˇ heˆ. 16Awˉ lawˉ peuˇ ve teˇ nyi leh suhˍ nyi teˇ nyi htaˇ, nawˬ hui hpawnˬ da‸ leh oˉ kʼoˍ gʼa pui ve yoˬ. Awˬ nyi chi ve nyiˇ nyi awˬ hkʼaw lo, te caˇ te dawˬ ve maˇ heˆ kʼo, chaw teˇ gʼaˇ ka‸ kanˉ maˇ gʼa te. 17Nawˬ hui lehˬ, pawehˇ chi hta‸ gʼa te tcuhˉ taˍ ve yoˬ. Awˬ lawn kʼo, awˬ nyi chi teˇ nyi htaˇ, ngaˬ nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la taˍ ve pa taw yoˬ. 18Nawˬ hui lehˬ, awˉ lawˉ peuˇ ve teˇ ha paˍ 14 nyi mvuhˇ hpeu‸ hta‸ te leh nyiˇ chi teˇ nyi mvuhˇ hpeu‸ hkʼa gaˬ, diˇ keu ve hkaoˍmonˇ hta‸ maˇ gʼa caˇ. 19Awˬ nyi chi ve suhˍ nyi awˬ hkʼaw lo, nawˬ hui ve yehˬ kʼa hkʼaw diˇ maˇ gʼa cawˬ piˇ. 20Awˬ lawn kʼo, diˇ keu taˍ ve hkaoˍmonˇ hta‸ caˇ ve hkehˉ chaw hta‸ maˇ kʼoˆ, mvuhˇmiˬ yaˇ hta‸ maˇ kʼoˆ, ngaˬ ve chaw teh‸ kʼaw‸ shawˍ piˇ tuˬ ve maˇ heˆ, teh‸ Gʼuiˬsha kʼoˆ ve yoˬ.
Awˉ lawˉ peuˇ ve Paˍsaˍhkaˍ pawehˇ
21Oˇ htaˇ, Moˉseˍ Iˉsaˍreˍlaˆ chaw awˬ hoˉ awˬ naˬ hkʼa peu-eˬ hta‸ kuˬ hpawnˬ leh kʼoˆ piˇ ve, Paˍsaˍhkaˍ pawehˇ caˇ tuˬ nawˬ hui ve yehˬ kʼa teˇ hpaˍ awˬ pon yawˬ ehˉ hta‸ haˆ ca taˍ-o‸. 22Peuˬ hkʼaw‸ nawˉ, huˆsoˆ teh‸ kʼoˆ ve suhˆ hpa‸ hta‸ yuˬleh awˬ suhˍ hkʼaw tuˍ peuˬ hkʼaw‸ nawˉ, yehˬmiˉhpe‸ hkʼoˆ lo shehˆ taˍ-o‸. Mvuhˇ htiˇ la htaˇ hkʼa gaˬ, chaw teˇ gʼaˇ ka‸ a shu yawˇ ve yehˬ hkʼaw maˇ gʼa tawˆ kʼai. 23Gʼuiˬsha lehˬ, Eˇjiˇtu‸ mvuhˇmiˬ hkʼaw hpanˍ kʼai leh yawˇ hui hta‸ tiˇ pehˍ tuˬ yoˬ. Ya‸ hkʼaˇ, Gʼuiˬsha lehˬ yehˬmiˉhpe‸ hkʼoˆ lo shehˆ taˍ ve awˬ suhˍ hta‸ gʼa mawˬ ve kʼo, yehˬ oˇ ve hkʼaw te luˬ shehˍ hpaˇ mvuhˇ naw tcuh yaˇ hta‸ lo‸-e tcuh tuˬ ve maˇ heˆ. 24Nawˬ hui leh nawˬ hui ve awˬ yaˇ awˬ duˬ teˇ hpaˍ awˬ liˇ chi hta‸ hkʼaˬ htaˆ ka‸ gʼa na yuˬ ve yoˬ. 25Gʼuiˬsha nawˬ hui hta‸ piˇ laˇ tuˬ ka ti‸ te taˍ ve mvuhˇmiˬ hkʼaw gaˬ ve teˇ yanˇ, nawˬ hui lehˬ pawehˇ chi hta‸ dawˇ nawˇ leh gʼa te tcuhˉ taˍ tuˬ yoˬ. 26Oˇ htaˇ, nawˬ hui ve yaˇ teˇ hpaˍ lehˬ, Pawehˇ chi te ve tcuhˉ kuiˬ aˬ hto‸ ma le, teh‸ nawˬ hui hta‸ na nyi laˇ tuˬ yoˬ. 27Chi ve lehˬ, Gʼuiˬsha ve Paˍsaˍhkaˍ pawehˇ hpeh‸ ve yoˬ. Awˬ lawn kʼo, Gʼuiˬsha Eˇjiˇtu‸ chaw hui hta‸ ciˍ yanˍ piˇ ve teˇ yanˇ, yawˇ lehˬ ngaˬ hui Iˉsaˍreˍlaˆ chaw teˇ hpaˍ hta‸ ponˬ laˇ ve yoˬ, teh‸ yawˇ hui hta‸ gʼa kʼoˆ maˍ piˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.
Iˉsaˍreˍlaˆ chaw teˇ hpaˍ hkui tcuhˉ teh leh Gʼuiˬsha hta‸ oˉ kʼoˍ pui ve yoˬ. 28Gʼuiˬsha Moˉseˍ leh Aˍronˍ hta‸ kʼoˆ piˇ ve tawˇ hkʼa peu-eˬ hta‸ yawˇ hui na yuˬ leh te ve yoˬ.
Yaˇ paˍ uiˍ teˇ hpaˍ suh-e ve
29Oˇ ve teˇ haˉ shehˍ kʼaw hkui gaˬ htaˇ, Gʼuiˬsha lehˬ jawˇmawˇ ve yaˇ paˍ uiˍ hta‸ te leh htawnˍ hkʼaw chehˇ taˍ ve chaw hui ve yaˇ paˍ uiˍ htaˇ hkʼa gaˬ, Eˇjiˇ tu‸ mvuhˇmiˬ hkʼaw awˉ lawˉ peuˇ paw la ve yaˇ paˍ uiˍ leh, awˉ lawˉ peuˇ paw la ve to nuˇ to shaˆ hkʼa peu-eˬ hta‸ tiˇ pehˍ piˇ ve yoˬ. 30Oˇ ve teˇ haˉ jawˇmawˇ awˬ to, yawˇ ve a ma‸ lonˉ teˇ hpaˍ leh Eˇjiˇtu‸ chaw hkʼa peu-eˬ tu la leh gʼaˇ hte‸ kuˬ hawˬ ve yoˬ. Awˬ lawn kʼo, Eˇjiˇtu‸ mvuhˇmiˬ hkʼaw chaw maˇ suh ve yehˬ teˇ yehˬ ka‸ maˇ cawˬ. 31Oˇ htaˇ jawˇmawˇ lehˬ, Moˉseˍ leh Aˍronˍ hta‸ kuˬ leh, Nawˬ huiˉ maˬ leh Iˉsaˍreˍlaˆ chaw hkʼa peu-eˬ, ngaˬ hui geh tawˆ kʼai loˬ. Nawˬ huiˉ maˬ kʼoˆ ve hkʼe, Gʼuiˬsha hta‸ oˉ kʼoˍ ca pui-o. 32Nawˬ hui ve ceˇ teˇ hpaˍ hta‸ htawˇ shiˍ kʼai-o. Ngaˬ awˬ pon ka‸ Gʼuiˬsha geh bon lawˬ laˇ-oˆ, teh‸ kʼoˆ piˇ ve yoˬ.
33Eˇjiˇtu‸ chaw teˇ hpaˍ htawˇ, Ngaˬ hui hkʼa peu-eˬ ka‸ suh-e tuˬ yoˬ, teh‸ kʼoˆ leh Iˉsaˍreˍlaˆ chaw hui hta‸ yawˇ hui ve mvuhˇmiˬ hkʼaw haˆ haˆ tawˆ kʼai tcuh ve yoˬ. 34Hkʼe te leh, chaw oˇ ve teˇ hpaˍ lehˬ diˇ maˇ keu ve hkaoˍmonˇ hta‸ mu‸ hkʼu hkʼaw keu leh, aˉ boˆ yuˬ hawˆ peuˬ hkʼaw‸ nawˉ taˆ kʼai ve yoˬ. 35Moˉseˍ kʼoˆ piˇ taˍ ve hkʼe, Iˉsaˍreˍlaˆ chaw teˇ hpaˍ lehˬ, Eˇjiˇtu‸ chaw hui geh hpu hkʼeun shi hkʼeun leh veu‸ kʼaˇ teˇ hpaˍ ca lawˬ yuˬ ve yoˬ. 36Gʼuiˬsha lehˬ, Eˇjiˇtu‸ chaw hui hta‸ kawˆ jaˇ piˇ lawˬ leh, yawˇ hui lawˬ ve hkʼe piˇ gaˇ ve nyi ma cawˬ la piˇ ve yoˬ. Chi hkʼe te leh, yawˇ hui lehˬ Eˇjiˇtu‸ chaw hui ve mawˇ jeˬ hta‸ yuˬ kʼai ve yoˬ.
Eˇjiˇtu‸ mvuhˇmiˬ hkʼaw tawˆ kʼai ve
37Iˉsaˍreˍlaˆ chaw hui lehˬ, Raˍmaˍseˍ venˇ hkʼaw tu leh Suˇkoˆ venˇ lo kʼai ve yoˬ. Yaˇ miˇ yaˇ nehˬ hta‸ maˇ shawˍ ve hawˉ hkʼaˆ paˍ ceh tiˉ hkaw‸ shehnˉ gʼaˇ cawˬ ve yoˬ. 38Awˬ nu ve chaw ceuˬ teˇ hpaˍ htawˇ, a shu yawˇ ve ceˇ caˬ awˬ moˍ lonˉ gʼa‸ leh yawˇ hui geh tawˆ kʼai ve yoˬ. 39Eˇjiˇtu‸ mvuhˇmiˬ hkʼaw yawˇ hui yuˬ veu laˇ taˍ ve diˇ maˇ keu ve hkaoˍmonˇ awˬ tcuhˇ teˇ hpaˍ chiˆ caˇ ve yoˬ. Awˬ lawn kʼo, yawˇ hui hta‸ Eˇjiˇtu‸ mvuhˇmiˬ hkʼaw la‸ haˉ gʼa‸ kʼoˬ piˇ ve pa taw, yawˇ hui caˇ tuˬ gu tuˬ ve awˬ yanˇ maˇ cawˬ.
40Iˉsaˍreˍlaˆ chaw hui lehˬ, Eˇjiˇtu‸ mvuhˇmiˬ hkʼaw lo 430 hkʼaw‸ chehˇ taˉ ve yoˬ. 41430 hkʼaw‸ biˇ ve teˇ nyi htaˇ, Gʼuiˬsha ve chaw chi teˇ hpaˍ Eˇjiˇtu‸ mvuhˇmiˬ hkʼaw tawˆ kʼai ve yoˬ. 42Oˇ ve teˇ haˉ lehˬ, Gʼuiˬsha yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ piˇ tuˬ law taˍ ve teˇ haˉ hpeh‸ ve yoˬ. Chi hta‸ pa taw, Iˉsaˍreˍlaˆ chaw teˇ co peuˬ teˇ co chi ve teˇ haˉ hta‸ Gʼuiˬsha ve awˬ haˉ teh‸ shawˍ taˍ ve yoˬ.
Paˍsaˍhkaˍ pawehˇ caˇ tuˬ awˬ liˇ awˬ hkʼaˇ
43Gʼuiˬsha Moˉseˍ leh Aˍronˍ hta‸ kʼoˆ piˇ ve, Paˍsaˍhkaˍ pawehˇ caˇ tuˬ awˬ hkʼaˇ lehˬ chi hkʼe cawˬ ve yoˬ. Awˬ nu ve chaw teˇ hpaˍ pawehˇ chi hkʼaw maˇ gʼa lo‸-e. 44Vuiˬ yuˬ taˍ ve awˬ ceˬ teˇ hpaˍ lehˬ awˬ guiˬ meuˇ shoˍ taˍ peuˬ ve kʼo, pawehˇ chi hkʼaw lo‸-e hpeh‸ ve yoˬ. 45Awˬ nu ve mvuhˇmiˬ hkʼaw laˬ taˍ ve hkehˉ chaw leh, gʼaˇ ga caˇ toˇ ve chaw teˇ hpaˍ, pawehˇ chi hkʼaw maˇ gʼa lo‸-e. 46Yawˬ ehˉ ve aw shaˍ hta‸ yehˬ hkʼaw lo gʼa teh caˇ ve yoˬ. Awˬ shaˍ hta‸ yehˬ baˬ hpawˇ lo maˇ gʼa yuˬ tawˆ-e. Awˬ mu‸ ku teˇ maˬ hta‸ ka‸ maˇ gʼa te hteh piˇ. 47Iˉsaˍreˍlaˆ chaw hkʼa peu-eˬ pawehˇ chi ve hta‸ gʼa te ve yoˬ. 48Nawˬ hui geh chehˇ taˍ ve hkehˉ chaw teˇ hpaˍ htawˇ, Gʼuiˬsha ve Paˍsaˍhkaˍ pawehˇ hta‸ caˇ gaˇ ve kʼo, hawˉ hkʼaˆ paˍ teˇ gʼaˇ le le hta‸ awˬ guiˬ meuˇ gʼa shoˍ piˇ ve yoˬ. Oˇ hkʼe te peuˬ htaˇ heh‸ caˇ hpeh‸ leh, yawˇ hta‸ Iˉsaˍreˍlaˆ chaw teh‸ shawˍ hpeh‸ ve yoˬ. Awˬ guiˬ meuˇ maˇ shoˍ ve chaw hkʼaˬ ve teˇ gʼaˇ hta‸ maˇ kʼoˆ, pawehˇ chi hkʼaw lo‸-e maˇ hpeh‸. 49Awˬ liˇ chi ve lehˬ, Iˉsaˍreˍlaˆ chaw awˬ pon maˇ kʼoˆ, nawˬ hui geh ca chehˇ la ve awˬ nu ve chaw ceuˬ teˇ hpaˍ awˬ pon maˇ kʼoˆ, hkʼa shuˍ shuˍ hpeh‸ ve yoˬ. 50Gʼuiˬsha Moˉseˍ leh Aˍronˍ hta‸ kʼoˆ piˇ ve tawˇ hkʼa peu-eˬ hta‸ Iˉsaˍreˍlaˆ chaw hui na yuˬ leh te ve yoˬ. 51Oˇ ve teˇ nyi Gʼuiˬsha lehˬ Iˉsaˍreˍlaˆ chaw hui hta‸ Eˇjiˇtu‸ mvuhˇmiˬ hkʼaw shiˍ tawˆ-e piˇ ve yoˬ.
Currently Selected:
Tawˆ kʼai ve li‸ 12: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
