Eˇfeˇsu‸ li‸ 6

1Yaˇ ehˉ teˇ hpaˍ-oˬ, Jawˇmawˇ Yeˍsuˆ awˬ hkʼaw lo nawˬ hui ve awˬ pa awˬ e ve tawˇ hkawˇ hta‸ na yuˬ-o‸. Awˬ lawn kʼo, chi hkʼe te cawˇ ve yoˬ. 2Teˇ ceuˬ le le nawˬ awˬ pon da‸ leh, miˬguiˬ hkʼoˆ lo co zuhˬ ha zuhˬ cawˬ tuˬ, nawˬ ve awˬ pa awˬ e hta‸ yawˆ yawˆ yan yan te-o.#Taw 20:12 3(Awˬliˇtawˇhkawˇ teˇ hpaˍ awˬ hkʼaw lo, tawˇ chi teˇ hkawˇ lehˬ, ka ti‸ piˇ taˍ ve tawˇ awˉ lawˉ teˇ hkawˇ hpeh‸ ve yoˬ.)

4Awˬ pa teˇ hpaˍ-oˬ, a shu yawˇ ve yaˇ teˇ hpaˍ hta‸ nyi ma zuhˆ tuˬ taˇ te. Nawˬ hui yaˇ hu duˬ hu ve awˬ hkʼaw lo Jawˇmawˇ Yeˍsuˆ maˍ laˇ ve hkʼe yawˇ hui hta‸ hkʼa deh‸ maˍ piˇ leh sheh kʼai-o.

5Vuiˬ taˍ ve awˬ ceˬ hpeh‸ ve chaw teˇ hpaˍ-oˬ, Hkri‸ ve tawˇ hkawˇ hta‸ na yuˬ ve hkʼe, miˬguiˬ hkʼoˆ chehˇ ve nawˬ hui ve awˬ shehˍ hpaˇ ve tawˇ hkawˇ hta‸ kawˆ cheˇ leh nyi ma teˇ hkʼaˇ tiˉ taˍ ve awˬ hkʼaw lo na yuˬ-o‸. 6Shu mehˆ mawˬ kuiˬ ceh te ve leh, chaw yaˇ nyi hkʼaˇ suh tuˬ ceh te ve teˇ ceuˬ taˇ hpeh‸ piˇ. Hkri‸ ve awˬ ceˬ hpeh‸ ve hkʼe, nyi ma pfuhˇ ve awˬ hkʼaw lo Gʼuiˬ sha ve a loˍ hta‸ te-o. 7Chaw yaˇ awˬ pon ceh te ve maˇ heˆ. Jawˇmawˇ Yeˍsuˆ awˬ pon te ve hkʼe, ha lehˬ, ha kʼa te-o. 8Chaw teˇ gʼaˇ gʼaˇ, da‸ ve hkʼaˬ ve teˇ ceuˬ hta‸ te ve maˇ kʼoˆ, Jawˇmawˇ Yeˍsuˆ lehˬ oˇ ve teˇ ceuˬ yawˇ hta‸ kʼaw‸ hkʼaw‸ piˇ tuˬ yoˬ. Yawˇ lehˬ, shu vuiˬ taˍ ve awˬ ceˬ hpeh‸ ve maˇ kʼoˆ, ponˬ ve chaw hpeh‸ ve maˇ kʼoˆ, Yeˍsuˆ yawˇ hta‸ chi hkʼe kʼaw‸ hkʼaw‸ piˇ tuˬ yoˬ teh‸ shiˍ chehˇ-oˆ.

9Awˬ shehˍ hpaˇ teˇ hpaˍ-oˬ, nawˬ hui htawˇ oˇ ve hkʼa shuˍ shuˍ yawˇ hui hta‸ te piˇ-oˆ. Yawˇ hui kawˆ tuˬ taˇ te. Yawˇ hui ve Awˬ shehˍ hpaˇ leh nawˬ hui ve Awˬ shehˍ hpaˇ teˇ gʼaˇ tiˉ hpeh‸ leh, yawˇ mvuhˇ naw ma hkʼoˆ lo chehˇ taˍ ve yoˬ. Yawˇ lehˬ, shu ve mehˆ hpfuhˇ hta‸ maˇ nyi ve teh‸ shiˍ chehˇ-oˆ.

Gʼuiˬsha pe‸ laˇ ve la‸ caˉ teˇ hpaˍ awˬ lawn

10Awˬ leh meuˇ ve tawˇ teˇ hkawˇ lehˬ chi hkʼe yoˬ. Jawˇmawˇ Yeˍsuˆ awˬ hkʼaw lo maˇ kʼoˆ, yawˇ ve kanˇ paˆ hta‸ caˉ da‸ ve awˬ gʼaˇ awˬ shaˉ awˬ hkʼaw lo maˇ kʼoˆ, yeˬ chehˇ-oˆ. 11Neˇhaiˬ heˍ yuˬ beˬ yuˬ ve teˇ hpaˍ hta‸ nawˬ hui gʼaˇ hpeh‸ tuˬ, Gʼuiˬsha pe‸ laˇ ve la‸ caˉ hkʼa peu-eˬ hta‸ nawˬ hui veu‸ deh leh pfuhˇ taˍ-o‸, 12Awˬ lawn kʼo, ngaˬ hui lehˬ chaw yaˇ hta‸ gʼa tawˍ da‸ ve maˇ heˆ. Uˉ peunˍ shehˍ hpaˇ teˇ hpaˍ hta‸ maˇ kʼoˆ, kanˇ paˆ cawˬ shehˍ hpaˇ teˇ hpaˍ hta‸ maˇ kʼoˆ, chi beu‸ ve awˬ yanˇ awˬ hkʼaw lo miˬguiˬ hkʼoˆ naˆ ho‸ ve hta‸ uˉ peunˍ chehˇ ve teˇ hpaˍ hta‸ maˇ kʼoˆ, mvuhˇ hpe lo chehˇ ve haiˬ ve awˬ ha teˇ hpaˍ hta‸ maˇ kʼoˆ, gʼa tawˍ da‸ ve yoˬ. 13Hkʼe te leh, haiˬ ve awˬ nyi awˬ hkʼaw lo nawˬ hui yeˬ chehˇ hpeh‸ leh, hkʼa peu-eˬ hta‸ te peuˬ hkʼaw‸ nawˉ huˉ chehˇ hpeh‸ tuˬ, Gʼuiˬsha pe‸ laˇ ve la‸ caˉ hkʼa peu-eˬ hta‸ vawˆ taˍ-o‸.

14Hteˇ ve cawˇ ve teˇ ceuˬ nawˬ hui ve caw‸ cehˍ nyi hta‸ tsuh‸ taˍ leh, nyi ma hteˇ ve cawˇ ve teˇ ceuˬ nyi ma pui hta‸ htanˬ tuˬ veu‸ deh leh, 15cawˇ da‸ hawˍ da‸ tuˬ te hpeh‸ ve ha lehˬ ve bon hkawˇ hta‸ pa taw gu taˍ ve teˇ ceuˬ hkuiˉ nuˆ tcuhˉ ve hkʼe tcuhˉ leh huˉ taˍ-o‸. 16Chi hkʼoˆ ka‸, haiˬ ve awˬ shehˍ hpaˇ teˇ gʼaˇ bawˆ laˇ ve aˬ miˍ to‸ chehˇ ve hkaˆ ce teˇ hpaˍ hta‸ tiˇ pehˍ gʼa tuˬ, htanˬ tuˬ hta‸ pfuhˇ ve hkʼe, yonˍ ve teˇ ceuˬ hta‸ pfuhˇ taˍ-o‸. 17Htaiˍ hkʼaw‸ ve sho uˉ tcuhˍ hta‸ hkʼawˆ taˍ leh, Awˬ ha hpu ve aˉ htaw hta‸ pfuhˇ taˍ-o‸. Aˉ htaw oˇ ve lehˬ, Gʼuiˬsha ve tawˇ hkawˇ hpeh‸ ve yoˬ. 18Hkʼaˬ htaˆ ka‸ bon lawˬ ve leh lawˬ hkawˉ ve teˇ ceuˬ le le hta‸ te leh, Awˬ ha hpu awˬ hkʼaw lo bon lawˬ chehˇ-oˆ. Oˇ hkʼe bon lawˬ tuˬ awˬ gʼaˇ maˇ nuˇ leh, Hkri‸ yaˇ hui hkʼa peu-eˬ awˬ pon bon lawˬ leh shaw chehˇ-oˆ. 19Ha lehˬ ve bon hkawˇ hta‸ caˉ da‸ ve faˉ taˍ ve awˬ ceuˬ hta‸ nyi ma ha‸ hanˉ ve awˬ hkʼaw lo ngaˬ hkʼa tawˍ lehˆ kʼaoˍ maˍ piˇ hpeh‸ tuˬ, ngaˬ awˬ pon htawˇ bon lawˬ-o‸. 20Ha lehˬ ve bon hkawˇ oˇ ve awˬ pon ngaˬ lehˬ awˬ tan te shehˍ hpaˇ hpeh‸ leh, sho caˆ hpeh taˍ ve hta‸ ngaˬ gʼa hkanˍ chehˇ ve yoˬ. Ha lehˬ ve bon hkawˇ oˇ ve hta‸ ngaˬ maˍ piˇ keunˍ ve hkʼe, nyi ma ha‸ hanˉ ve awˬ hkʼaw lo maˍ piˇ hpeh‸ tuˬ ngaˬ awˬ pon bon lawˬ-o‸.

Awˬ leh meuˇ ve tawˇ hkawˇ

21Ngaˬ hkʼaˬ hkʼe hpeh‸ chehˇ leh hkʼaˬ hkʼe te chehˇ ve awˬ lawn nawˬ hui htawˇ gʼa shiˍ tuˬ, ngaˬ ha‸ ve awˬ viˉ awˬ nyi Tuˇhkiˆ lehˬ awˬ ceuˬ hkʼa peu-eˬ nawˬ hui hta‸ hto laˇ tuˬ yoˬ. Yawˇ lehˬ, Jawˇmawˇ Yeˍsuˆ awˬ hkʼaw lo ka ti‸ yeˬ ve kanˉ te shehˍ hpaˇ teˇ gʼaˇ hpeh‸ ve yoˬ. 22Chi hta‸ pa taw, ngaˬ hkʼaˬ hkʼe hpeh‸ chehˇ ve hta‸ nawˬ hui shiˍ tuˬ leh, yawˇ nawˬ hui ve nyi ma hta‸ awˬ gʼaˇ cawˬ la piˇ tuˬ, ngaˬ yawˇ hta‸ nawˬ hui geh peu laˇ ve yoˬ.

23Awˬ viˉ awˬ nyi teˇ hpaˍ awˬ hkʼaw lo dawˇ sha gaˇ sha tuˬ cawˬ piˇ-oˆ. Chi hkʼoˆ ka‸, Awˬ pa Gʼuiˬsha leh Jawˇmawˇ Yeˍsuˆ Hkri‸ pe‸ laˇ ve ha‸ pehnˇ ve teˇ ceuˬ leh yonˍ ve teˇ ceuˬ htawˇ cawˬ piˇ-oˆ. 24Ngaˬ hui ve Jawˇmawˇ Yeˍsuˆ Hkri‸ hta‸ awˬ tehˬ awˬ na ha‸ tcuhˉ taˍ ve chaw hkʼa peu-eˬ geh awˬ bon awˬ shinˉ cawˬ piˇ-oˆ.

Currently Selected:

Eˇfeˇsu‸ li‸ 6: LHBE

Highlight

Copy

Compare