Kawˇlawˇsehˇ li‸ 4
4
1Awˬ shehˍ hpaˇ teˇ hpaˍ-oˬ, nawˬ hui htawˇ mvuhˇ naw ma hkʼoˆ lo Awˬ shehˍ hpaˇ cawˬ ve hta‸ shiˍ chehˇ ve awˬ hkʼaw lo, nawˬ hui ve awˬ ceˬ teˇ hpaˍ hta‸ hteˇ ve cawˇ ve leh keunˍ da‸ cawˇ da‸ ve hkʼe ceh te piˇ-oˆ.
2Hkʼaˬ htaˆ ka‸ bon lawˬ chehˇ-oˆ. Bon lawˬ ve awˬ hkʼaw lo shaw chehˇ leh, chiˇ mvuh chehˇ-oˆ. 3Hkri‸ ve tcuhˉ kuiˬ naˉ ve tawˇ hkawˇ ngaˬ hui gʼa kʼaoˍ maˍ piˇ tuˬ ve, Gʼuiˬsha ngaˬ hui pon yehˬ miˉ hpaw laˇ tuˬ, ngaˬ hui awˬ pon htawˇ bon lawˬ laˇ-oˆ. Tcuhˉ kuiˬ naˉ ve tawˇ hkawˇ oˇ ve awˬ pon ngaˬ htawnˍ hkʼaw lo gʼa chehˇ taˍ ve yoˬ. 4Tawˇ hkawˇ oˇ ve hta‸ ngaˬ kʼoˆ keunˍ ve hkʼe ngaˬ hkʼa tawˍ lehˆ kʼoˆ maˍ piˇ hpeh‸ tuˬ ve awˬ pon ka‸ bon lawˬ laˇ-oˆ.
5Hkri‸ yaˇ awˬ moˍ awˬ hkʼaw lo maˇ chehˇ ve chaw teˇ hpaˍ mehˆ gʼuˇ suhˍ, cuˇ yiˍ cawˬ ve awˬ hkʼaw lo hkʼa deh‸ dawˇ nyi leh te-o. Awˬ yanˇ hta‸ vuiˬ hkʼaw‸ leh hkʼa deh‸ yehˇ-oˆ. 6Chaw teˇ gʼaˇ le le hta‸ nawˬ hui hkʼaˬ hkʼe gʼa yaw hkʼaw‸ cawˇ ve hta‸ shiˍ tuˬ, nawˬ hui tawˇ yaw ve teˇ hpaˍ lehˬ, hkʼaˬ htaˆ ka‸ shu awˬ pon cawˇ da‸ leh na sha ve tawˇ hkawˇ hta‸ yaw leh, aˉ leh‸ hkaw‸ taˍ ve hkʼe hpeh‸ piˇ-oˆ.
Awˬ leh meuˇ ve tawˇ hkawˇ
7Ngaˬ ha‸ ve awˬ viˉ awˬ nyi Tuˇhkiˆ lehˬ, ngaˬ ve awˬ lawn hkʼa peu-eˬ nawˬ hui hta‸ hto maˍ laˇ tuˬ yoˬ. Yawˇ lehˬ, ka ti‸ yeˬ ve kanˉ te shehˍ hpaˇ hpeh‸ leh, ngaˬ geh teˇ geh Jawˇmawˇ Yeˍsuˆ ve kanˉ hta‸ te ve chaw teˇ gʼaˇ hpeh‸ ve yoˬ. 8Chi hta‸ pa taw ngaˬ hui hkʼaˬ hkʼe hpeh‸ chehˇ ve hta‸ nawˬ hui shiˍ leh, yawˇ nawˬ hui ve nyi ma hta‸ awˬ gʼaˇ cawˬ la piˇ tuˬ, ngaˬ yawˇ hta‸ nawˬ hui geh peu laˇ ve yoˬ. 9Chi hkʼoˆ ka‸, nawˬ hui chehˇ kuiˬ lo laˬ ve, ka ti‸ yeˬ leh ngaˬ hui ha‸ ve awˬ viˉ awˬ nyi Awˍneˍsiˍmuˆ hta‸ htawˇ, yawˇ geh teˇ geh peu laˇ ve yoˬ. Yawˇ huiˉ maˬ lehˬ, choˬ kaˬ lo hkʼa hpeh‸ la ve awˬ lawn hkʼa peu-eˬ nawˬ hui hta‸ kʼaoˍ maˍ laˇ tuˬ yoˬ.
10Ngaˬ geh teˇ geh htawnˍ hkʼaw gʼa chehˇ ve Aˍriˍtaˍhkuˆ lehˬ, nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. Baˍnaˍbaˆ ve awˬ viˉ awˬ nyi Maˍku htawˇ, nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. (Maˍkuˆ awˬ lawn ngaˬ nawˬ hui hta‸ tawˇ shanˍ feu laˇ peuˬ. Yawˇ nawˬ hui geh gaˬ la ve kʼo, yawˇ hta‸ ha‸ yuˬ-o‸.) 11Yuˇtuˆ meh ve Yeˍsuˆ teˇ gʼaˇ htawˇ nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. Yuˇda‸ chaw hui awˬ hkʼaw lo ngaˬ geh teˇ geh Gʼuiˬsha ve mvuhˇmiˬ awˬ pon kanˉ te chehˇ ve lehˬ, chaw chi teˇ hpaˍ ceh tiˉ cawˬ ve yoˬ. Yawˇ hui hta‸ pa taw ngaˬ maˇ maˇ dawˇ sha la ve yoˬ.
12Nawˬ hui ve awˬ moˍ awˬ hkʼaw lo chehˇ leh, Yeˍsuˆ Hkri‸ ve awˬ ceˬ hpeh‸ ve Eˇpaˍhpaˍraˆ htawˇ, nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. Nawˬ hui lehˬ, Gʼuiˬsha ve a loˍ hkʼa peu-eˬ awˬ hkʼaw lo uiˍ la leh hkʼa deh‸ yeˬ chehˇ hpeh‸ tuˬ, yawˇ nawˬ hui awˬ pon hkʼaˬ htaˆ ka‸ bon lawˬ chehˇ ve yoˬ. 13Awˬ lawn kʼo, yawˇ lehˬ, nawˬ hui awˬ pon maˇ kʼoˆ, Lawˍdiˍkiˆ venˇ leh Heˍraˍpawˇliˆ venˇ awˬ hkʼaw lo chehˇ ve chaw teˇ hpaˍ awˬ pon maˇ kʼoˆ, hkʼaˬ ma coˇ caˇ leh te ve awˬ lawn ngaˬ yawˇ awˬ pon shaˉ hkiˆ hkanˍ ve yoˬ. 14Ngaˬ hui ha‸ jaˇ ve saˍ la‸ gʼonˍ Luˉka‸ leh Deˍmaˆ nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ.
15Lawˍdiˍkiˆ venˇ hkʼaw lo chehˇ ve awˬ viˉ awˬ nyi teˇ hpaˍ hta‸ maˇ kʼoˆ, Noˍhpaˆ leh yawˇ ve yehˬ hkʼaw lo hpawnˬ da‸ ve Hkri‸ yaˇ awˬ moˍ hta‸ maˇ kʼoˆ, ngaˬ dawˇ nawˇ chehˇ ve yoˬ teh‸ hto piˇ-oˆ. 16Li‸ chi hta‸ nawˬ hui gʼaw peuˬ kʼo, Lawˍdiˍkiˆ Hkri‸ yaˇ awˬ moˍ hta‸ gʼaw tcuh-o. Lawˍdiˍkiˆ chaw hui gʼa ve li‸ hta‸ htawˇ nawˬ hui gʼaw-o. 17Aˍhkiˇpuˆ hta‸ htawˇ, Jawˇmawˇ Yeˍsuˆ geh nawˬ gʼa taˍ ve kanˉ hta‸ peuˬ htaˇ hkʼa gaˬ te tuˬ shaˍ ti‸ te-o teh‸ kʼoˆ piˇ-oˆ.
18Ngaˬ Pawˇlu‸ lehˬ, nawˬ hui hta‸ dawˇ nawˇ ve awˬ hkʼaw lo tawˇ chi teˇ hkawˇ ngaˬ awˬ to nawˬ hui hta‸ bvuh‸ laˇ ve yoˬ. Ngaˬ htawnˍ hkʼaw gʼa hkanˍ chehˇ ve hta‸ dawˇ nawˇ-oˆ.
Nawˬ hui geh awˬ bon awˬ shinˉ cawˬ piˇ-oˆ.
Currently Selected:
Kawˇlawˇsehˇ li‸ 4: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.