Kawˇlawˇsehˇ li‸ 2
2
1Awˬ lawn kʼo, nawˬ hui awˬ pon maˇ kʼoˆ, Lawˍdiˍkiˆ venˇ yaˇ teˇ hpaˍ awˬ pon maˇ kʼoˆ, ngaˬ ve mehˆ hpfuhˇ hta‸ maˇ mawˬ jaw ve chaw hkʼa peu-eˬ awˬ pon maˇ kʼoˆ, ngaˬ hkʼaˬ ma coˇ caˇ ve hta‸ nawˬ hui shiˍ tuˬ ngaˬ heuˆ gaˇ ve yoˬ. 2Aˬ hto‸ ma pa taw le teh‸ kʼoˆ ve kʼo, Hkri‸ hta‸ caˇ da‸ ve Gʼuiˬsha ve tcuhˉ kuiˬ naˉ jaˇ ve awˬ lawn hta‸ yawˇ hui hkʼa deh‸ na gʼa leh shiˍ puiˉ ve cuˇ yiˍ hkʼa biˇ cawˬ tuˬ maˇ kʼoˆ, ha‸ pehnˇ ve cawˬ leh teˇ gʼaˇ leh teˇ gʼaˇ hkʼa deh‸ caˉ da‸ ve awˬ hkʼaw lo yawˇ hui nyi ma awˬ gʼaˇ gʼa hpeh‸ tuˬ awˬ pon maˇ kʼoˆ, ngaˬ te ve yoˬ. 3Awˬ hpfuhˇ hkʼaˆ ve cuˇ yiˍ maˍ yiˍ leh shiˍ puiˉ ve awˬ ceuˬ hkʼa peu-eˬ Hkri‸ awˬ hkʼaw lo faˉ taˍ ve yoˬ.
4A shu teˇ gʼaˇ maˇ kʼoˆ, na sha ve tawˇ hkawˇ hta‸ yehˇ leh nawˬ hui hta‸ maˇ gʼa heˍ yuˬ beˬ yuˬ tuˬ, ngaˬ chi hkʼe kʼoˆ laˇ ve yoˬ. 5Awˬ lawn kʼo, ngaˬ awˬ to nawˬ hui geh maˇ chehˇ ve htawˇ, ngaˬ ve nyi ma nawˬ hui geh cawˬ leh, awˬ liˇ awˬ hkʼaˇ cawˬ ve hkʼe nawˬ hui hkʼa deh‸ te chehˇ ve hta‸ maˇ kʼoˆ, Hkri‸ awˬ hkʼaw lo nawˬ hui yonˍ yeˬ jaˇ ve teˇ ceuˬ hta‸ maˇ kʼoˆ, ngaˬ gʼa mawˬ ve pa taw ha lehˬ ve yoˬ.
6Hkʼe te leh, Jawˇmawˇ Yeˍsuˆ Hkri‸ hta‸ nawˬ hui ha‸ yuˬ peuˬ ve hkʼe, yawˇ awˬ hkʼaw lo kʼai chehˇ-oˆ. 7Yawˇ awˬ hkʼaw lo nawˬ hui awˬ geu gʼa tcuhˉ naw‸ taˍ leh gʼa uiˍ la yeˬ la chehˇ ve yoˬ. Nawˬ hui gʼa henˇ taˍ ve hkʼe, yonˍ ve teˇ ceuˬ awˬ hkʼaw lo nawˬ hui yeˬ chaweh chehˇ taˍ leh, oˇ ve hta‸ pa taw chiˇ mvuh ve teˇ ceuˬ gʼaˇ hte‸ te chehˇ-oˆ.
Hkri‸ awˬ hkʼaw lo biˇ la ve
8Chaw teˇ gʼaˇ ka‸ cuˇ yiˍ maˍ yiˍ tawˇ hkawˇ leh tcuhˉ kuiˬ maˇ cawˬ ve heˍ ve tawˇ hkawˇ hta‸ yehˇ leh nawˬ hui hta‸ maˇ gʼa hpeh yuˬ veu tuˬ, shaˍ ti‸ taˍ-o‸. Tawˇ hkawˇ oˇ ve teˇ hpaˍ Hkri‸ hta‸ caˉ da‸ ve maˇ heˆ. Chaw yaˇ teˇ caˉ peuˬ teˇ caˉ piˇ taˍ ve tawˇ hkawˇ leh, miˬguiˬ hta‸ caˉ da‸ ve dawˇ hkʼaˇ ceh hpeh‸ ve yoˬ. 9Awˬ lawn kʼo, Gʼuiˬsha ve biˇ ve awˬ ceuˬ Hkri‸ ve awˬ to awˬ hkʼaw lo hkʼa biˇ cawˬ taˍ ve yoˬ. 10Yawˇ awˬ hkʼaw lo nawˬ hui biˇ la peuˬ. Yawˇ lehˬ, uˉ peunˍ shehˍ hpaˇ leh kanˇ paˆ cawˬ shehˍ hpaˇ hkʼa peu-eˬ ve oˉ kʼoˍ hpeh‸ ve yoˬ.
11Yawˇ awˬ hkʼaw lo nawˬ hui awˬ guiˬ meuˇ shoˍ ve hta‸ gʼa hkanˍ peuˬ. Awˬ guiˬ meuˇ shoˍ ve oˇ ve lehˬ, la‸ sheh te ve teˇ ceuˬ hpeh‸ ve maˇ heˆ. Hkri‸ ve awˬ guiˬ meuˇ shoˍ ve teh‸ kʼoˆ ve, awˬ suhˍ awˬ shaˍ a loˍ hta‸ baˬ taˉ ve teˇ ceuˬ hpeh‸ ve yoˬ. 12Nawˬ hui baˆtiˆsaˬ hkanˍ ve teˇ yanˇ, yawˇ geh teˇ geh tuˍ taˍ ve yoˬ. Yawˇ hta‸ suh kuiˬ lo kʼaw‸ te‸ tu la piˇ shehˍ hpaˇ Gʼuiˬsha te taˍ ve hta‸ nawˬ hui yonˍ ve pa taw, baˆtiˆsaˬ hkanˍ ve oˇ ve awˬ hkʼaw lo yawˇ geh teˇ geh nawˬ hui kʼaw‸ te‸ tu la ve yoˬ. 13Nawˬ hui lehˬ, te ya‸ ve teˇ hpaˍ awˬ hkʼaw lo maˇ kʼoˆ, awˬ suhˍ awˬ shaˍ awˬ guiˬ meuˇ maˇ shoˍ ve awˬ hkʼaw lo maˇ kʼoˆ, suh taˍ ve chaw teˇ hpaˍ hpeh‸ ve htawˇ, yawˇ lehˬ nawˬ hui hta‸ Hkri‸ geh teˇ geh kʼaw‸ te‸ tu la piˇ leh, ngaˬ hui te ya‸ ve hkʼa peu-eˬ hta‸ hpehˇ hkʼa laˇ peuˬ. 14Awˬliˇtawˇhkawˇ hta‸ cuˇ leh ngaˬ hui awˬ hkʼoˆ venˇbaˆ taˍ ve la‸ ma‸ oˇ ve teˇ maˬ hta‸ yawˇ hkʼaˇ pehˍ ve yoˬ. Oˇ ve hta‸ la‸ ka hkʼoˆ lo hta‸ keu ve awˬ hkʼaw lo yawˇ yuˬ baˬ ve yoˬ. 15Uˉ peunˍ ve awˬ ceuˬ leh kanˇ paˆ cawˬ ve awˬ ceuˬ teˇ hpaˍ ve la‸ caˉ hta‸ yawˇ yuˬ baˬ sheˬ leh, oˇ ve nyiˇ ceuˬ hta‸ shu gʼa mawˬ gʼa shiˍ tuˬ hkʼa tawˍ lehˆ hpeu‸ tawˆ la ve yoˬ. La‸ ka hta‸ pa taw awˬ ceuˬ oˇ ve teˇ hpaˍ hta‸ yawˇ gʼaˇ ve yoˬ.
16Hkʼe te leh, caˇ tuˬ dawˬ tuˬ awˬ lawn maˇ kʼoˆ, pawehˇ te ve awˬ lawn maˇ kʼoˆ, ha pa cheˆ ve awˬ nyi awˬ lawn maˇ kʼoˆ, shinˉ nyi awˬ lawn maˇ kʼoˆ, shu nawˬ hui hta‸ venˇbaˆ taˍ ve hkawˇ hta‸ taˇ na. 17Awˬ ceuˬ oˇ ve teˇ hpaˍ lehˬ, gaˬ la tuˬ ve awˬ ceuˬ teˇ hpaˍ ve aˉ gʼuiˬ ha ceh tiˉ hpeh‸ ve yoˬ. Ya‸ hkʼaˇ, awˬ tehˬ awˬ na ve awˬ ceuˬ lehˬ, Hkri‸ awˬ hkʼaw lo cawˬ ve yoˬ. 18Chaw teˇ hpaˍ hpaˍ kʼoˆ ve, A shu yawˇ awˬ to hta‸ nehˬ lehˍ gʼa taˍ leh, mvuhˇ naw ma tcuh yaˇ hui hta‸ oˉ kʼoˍ gʼa pui ve yoˬ teh‸ kʼoˆ ve yoˬ. Yawˇ hui lehˬ, awˬ suhˍ awˬ shaˍ hpawˇ ceh tiˉ dawˇ nyi puiˉ ve pa taw, yawˇ hui te ve teˇ hpaˍ te‸ chiˉ awˬ bon maˇ cawˬ ve ka‸ nyi ma uiˍ chaweh te ve yoˬ. Awˬ ha awˬ hkʼaw lo yawˇ hui gʼa mawˬ ve awˬ ceuˬ teˇ hpaˍ hta‸ ceh tiˉ gʼaˇ va ve yoˬ. Chi hkʼe ve chaw teˇ gʼaˇ ka‸ nawˬ hui ve la‸ shawnˍ hta‸ maˇ gʼa lu yuˬ tuˬ shaˍ ti‸ taˍ-o‸. 19Yawˇ hui lehˬ, oˉ kʼoˍ hta‸ hkʼa deh‸ maˇ caˉ da‸. Oˉ kʼoˍ oˇ ve hta‸ pa taw awˬ to teˇ to hkʼa peu-eˬ uiˍ la chehˇ leh, uiˍ la ve oˇ ve lehˬ Gʼuiˬsha geh lo laˬ ve yoˬ. Awˬ to lehˬ, awˬ tcuhˉ awˬ caˆ teˇ hpaˍ hta‸ pa taw caˉ da‸ taˍ leh, awˬ gʼaˇ biˇ la chehˇ ve yoˬ.
20Nawˬ hui lehˬ, miˬguiˬ hta‸ caˉ da‸ ve awˬ ceuˬ teˇ hpaˍ Hkri‸ geh teˇ geh suh taˍ peuˬ ve kʼo, aˬ hto‸ ma te miˬguiˬ hta‸ caˉ da‸ ve chaw hkʼe nawˬ hui te chehˇ sheˍ ve le. 21Taˇ ca vawˆ, taˇ ca leh‸, taˇ ca htawˇ teh‸ kʼoˆ ve awˬ liˇ awˬ hkʼaˇ teˇ hpaˍ hta‸ aˬ hto‸ ma pa taw nawˬ hui te chehˇ sheˍ ve le. 22Awˬ ceuˬ oˇ ve teˇ hpaˍ hta‸ te ve teˇ yanˇ, luˬ kʼai sheˆ kʼai ve awˬ ceuˬ ceh tiˉ hpeh‸ ve yoˬ. Awˬ liˇ awˬ hkʼaˇ oˇ ve teˇ hpaˍ lehˬ, chaw yaˇ hui teh taˍ leh maˍ piˇ ve awˬ liˇ awˬ hkʼaˇ teˇ hpaˍ hpeh‸ ve yoˬ. 23A shu yawˇ hkʼaˇ yawˇ dawˇ tawˆ leh oˉ kʼoˍ pui ve teˇ ceuˬ maˇ kʼoˆ, nyi ma taˍ nehˬ ve teˇ ceuˬ maˇ kʼoˆ, awˬ to hta‸ fawˉ mehˍ ve teˇ ceuˬ maˇ kʼoˆ, chi teˇ hpaˍ cuˇ yiˍ cawˬ ve hkʼe hpeh‸ ve htawˇ, awˬ suhˍ awˬ shaˍ sheˉ lai ve teˇ hpaˍ hta‸ gʼaˇ tuˬ te‸ chiˉ awˬ bon maˇ cawˬ ve yoˬ.
Currently Selected:
Kawˇlawˇsehˇ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.