Aˍmoˆ li‸ 9
9
Gʼuiˬsha suhˉ jehˬ tuˬ
1Gʼuiˬsha lehˬ, tuˉ tanˇ kuiˬ awˬ paˇ lo huˉ chehˇ taˍ ve hta‸ ngaˬ gʼa mawˬ ve yoˬ. Yawˇ kʼoˆ ve, Bon yehˬ teˇ maˬ hkʼa peu-eˬ hiˆ hiˆ naˇ naˇ hpeh‸ la tuˬ, yehˬ hkuiˉ daw hta‸ dawˆ-oˆ. Oˇ ve teˇ hpaˍ hta‸ dawˆ paˆ leh, chaw yaˇ teˇ hpaˍ ve oˉ kʼoˍ hkʼoˆ ce la piˇ-oˆ. Cawˬ taˍ sheˍ ve chaw teˇ hpaˍ hta‸ ma‸ bawˆ kuiˬ lo ngaˬ tiˇ pehˍ piˇ tuˬ yoˬ. Chaw teˇ gʼaˇ ka‸ gʼuiˇ hpaw-e leh ponˬ tuˬ ve maˇ heˆ. 2Yawˇ hui lehˬ, suh mvuhˇmiˬ lo miˬ kʼoˍ duˇ ya‸-e chehˇ ve htawˇ, ngaˬ yawˇ hui hta‸ hpeh yuˬ tuˬ yoˬ. Yawˇ hui mvuhˇ naw ma hkʼoˆ lo taˆ-e chehˇ ve htawˇ, ngaˬ yawˇ hui hta‸ yuˬ ya‸ la piˇ tuˬ yoˬ. 3Kaˍmeˍlaˆ hkʼaw hkʼoˆ lo yawˇ hui ca va‸ taˍ ve htawˇ, ngaˬ yawˇ hui hta‸ gʼa‸ ca leh hpeh yuˬ tuˬ yoˬ. Yawˇ hui ngaˬ mehˆ gʼuˇ suhˍ lo hpaw-e leh, laˇ tsuhˇ gʼuiˬ tawˬ lo ca va‸ taˍ ve htawˇ, yawˇ hui hta‸ hehˆ dawˬ piˇ tuˬ ngaˇ lonˉ teˇ hpaˍ hta‸ ngaˬ tawˇ piˇ tuˬ yoˬ. 4Canˇ paˍ teˇ hpaˍ yawˇ hui hta‸ hpeh kʼai chehˇ ve teˇ yanˇ, yawˇ hui hta‸ tiˇ pehˍ piˇ tuˬ ngaˬ tawˇ piˇ tuˬ yoˬ. Yawˇ hui hta‸ te luˬ te sheˆ piˇ tuˬ, ngaˬ dawˇ cheˆ taˍ peuˬ. Ngaˬ yawˇ hui hta‸ ga piˇ tuˬ ve maˇ heˆ, teh‸ Gʼuiˬsha kʼoˆ ve yoˬ.
5Kanˇ paˆ uiˍ jaˇ ve Jawˇmawˇ Gʼuiˬsha miˬguiˬ hta‸ htawˇ leh, miˬ hiˆ la ve yoˬ.
Oˇ kaˬ lo chehˇ ve chaw hkʼa peu-eˬ,
dawˇ haˍ leh hkʼanˇ chehˇ ve yoˬ.
Miˬguiˬ hkʼa peu-eˬ, Niˍlaˆ iˉ kaˆ lawˬ hkʼa shuˍ uiˍ taˆ la taˉ leh kʼaw‸ yaw kʼai ve yoˬ.
6Gʼuiˬsha lehˬ mvuhˇ naw ma hkʼoˆ lo yawˇ ve yehˬ hta‸ te taˍ leh,
mvuhˇ naw ma hta‸ miˬguiˬ hkʼoˆ lo teh taˍ ve yoˬ.
Yawˇ lehˬ laˇ tsuhˇ gʼuiˬ hkʼaw cawˬ ve iˉ kaˆ hta‸ kuˬ yuˬ leh,
miˬguiˬ hkʼoˆ lo ngeuˍ baˬ ve yoˬ.
Yawˇ ve awˬ meh lehˬ, Jawˇmawˇ Gʼuiˬsha hpeh‸ ve yoˬ.
7Gʼuiˬsha kʼoˆ ve, Iˉsaˍreˍlaˆ chaw teˇ hpaˍ-oˬ, nawˬ hui ve awˬ lawn hta‸ ngaˬ dawˇ nyi ve hkʼa shuˍ, Suˍdanˍ chaw hui ve awˬ lawn hta‸ htawˇ ngaˬ dawˇ nyi chehˇ ve yoˬ. Nawˬ hui hta‸ Eˇjiˇtu‸ mvuhˇmiˬ hkʼaw ngaˬ shiˍ tawˆ la piˇ taˍ ve hkʼe, Hpiˇliˇtiˆ chaw hui hta‸ Kaˍreˍteˍ conˉ hkʼaw lo maˇ kʼoˆ, Suˇriˆ chaw hui hta‸ Kiˇraˆ mvuhˇmiˬ hkʼaw lo maˇ kʼoˆ, ngaˬ shiˍ tawˆ la piˇ taˍ ve yoˬ. 8Venˇbaˆ uiˍ jaˇ ve Iˉsaˍreˍlaˆ chaw hui ve mvuhˇmiˬ hta‸ ngaˬ nyi tcuhˉ taˍ leh, mvuhˇmiˬ oˇ ve hta‸ miˬguiˬ hkʼoˆ lo ngaˬ te luˬ te sheˆ piˇ tuˬ yoˬ. Ya‸ hkʼaˇ, Yaˍkoˆ ve awˬ ceuˬ awˬ hkʼaˇ hkʼa peu-eˬ ve hta‸ ngaˬ te luˬ te sheˆ piˇ tuˬ ve maˇ heˆ.
9Caˬ hkʼa hta‸ ha keu hkʼaw keu leh hkeunˉ ve hkʼe, Iˉsaˍreˍlaˆ chaw hui hta‸ ngaˬ hkeunˉ baˬ tuˬ yoˬ. Te‸ chiˉ awˬ bon maˇ cawˬ ve chaw hui hta‸ yuˬ baˬ tuˬ, Iˉsaˍreˍlaˆ chaw hui hta‸ awˬ nu ve chaw ceuˬ teˇ hpaˍ geh teˇ geh ngaˬ keu leh hkeunˉ baˬ piˇ tuˬ yoˬ. 10Gʼuiˬsha lehˬ, ngaˬ hui awˬ hkʼoˆ lo dawˇ haˍ tuˬ awˬ ceuˬ gaˬ la piˇ tuˬ ve maˇ heˆ, teh‸ kʼoˆ chehˇ ve ngaˬ ve chaw teˇ hpaˍ awˬ hkʼaw lo venˇbaˆ uiˍ ve chaw teˇ hpaˍ lehˬ, ma‸ bawˆ kuiˬ lo gʼa suh-e tuˬ yoˬ, teh‸ Gʼuiˬsha kʼoˆ ve yoˬ.
Awˬ hkʼaw‸ nawˉ Iˉsaˍreˍlaˆ hta‸ kʼaw‸ da‸ la piˇ tuˬ
11Gʼuiˬsha kʼoˆ ve, Luˬ kʼai sheˆ kʼai peuˬ ve yehˬ teˇ yehˬ hta‸ shuˍ ve Daˍviˆ ve mvuhˇmiˬ hta‸, ngaˬ kʼaw‸ gu te piˇ tuˬ awˬ nyi gaˬ la chehˇ ve yoˬ. Mvuhˇmiˬ oˇ ve hta‸ ngaˬ kʼaw‸ gu te leh, lanˇ venˇ teˇ hpaˍ hta‸ htawˇ awˬ suhˉ teˇ pawˆ kʼaw‸ gu te tuˬ yoˬ. Aˬ sho-eˬ htaˇ hkʼe kʼaw‸ hpeh‸ la tuˬ, mvuhˇmiˬ oˇ ve hta‸ ngaˬ kʼaw‸ gu te tuˬ yoˬ. 12Oˇ ve hkʼaw‸ nawˉ, Eˇdonˍ mvuhˇmiˬ hkʼaw cawˬ taˍ ve chaw teˇ hpaˍ leh, teˇ pawˆ htaˇ ngaˬ ve chaw ceuˬ hpeh‸ jaw ve chaw teˇ hpaˍ hta‸ Iˉsaˍreˍlaˆ chaw hui bawˆ gʼaˇ tuˬ yoˬ, teh‸ Gʼuiˬsha kʼoˆ taˍ ve yoˬ. Gʼuiˬsha lehˬ yawˇ kʼoˆ taˍ ve hkʼe awˬ tehˬ awˬ na biˇ la piˇ tuˬ yoˬ.
13Gʼuiˬsha kʼoˆ ve, Caˬ ti ve awˬ yanˇ leh caˬ gʼeu‸ ve awˬ yanˇ teˇ yanˇ tiˉ hpeh‸ la leh,
a pehˉ meuˇ cehˬ ti ve awˬ yanˇ leh a pehˉ meuˇ gʼuiˬ nyiˉ ve awˬ yanˇ teˇ yanˇ tiˉ hpeh‸ la tuˬ ve awˬ yanˇ gaˬ la chehˇ ve yoˬ.
Hkʼaw pui teˇ hpaˍ awˬ hkʼoˆ lo,
mehˬ jaˇ ve a pehˉ meuˇ gʼuiˬ yoˬ ya‸ la chehˇ leh,
hkʼaw ehˉ teˇ hpaˍ lehˬ a pehˉ meuˇ gʼuiˬ geh teˇ geh yoˬ ya‸-e tuˬ yoˬ.
14Ngaˬ ve chaw teˇ hpaˍ hta‸ yawˇ hui ve mvuhˇmiˬ lo kʼaw‸ shiˍ hkʼaw‸ veu laˇ tuˬ yoˬ.
Yawˇ hui lehˬ, luˬ peuˬ sheˆ peuˬ ve yawˇ hui ve venˇ teˇ hpaˍ hta‸ kʼaw‸ gu te leh, oˇ kaˬ lo chehˇ tuˬ yoˬ.
Yawˇ hui lehˬ a pehˉ meuˇ cehˬ ti leh, a pehˉ meuˇ gʼuiˬ gʼa dawˬ tuˬ yoˬ.
Yawˇ hui hko te leh, hko hkʼaw tawˆ ve awˬ shiˍ awˬ nu teˇ hpaˍ hta‸ gʼa caˇ tuˬ yoˬ.
15Ngaˬ piˇ taˍ ve mvuhˇmiˬ hkʼaw lo, ngaˬ ve chaw teˇ hpaˍ hta‸ ngaˬ ti leh,
yawˇ hui lehˬ teˇ pawˆ ka‸ gʼawˬ baˬ ve hta‸ gʼa kʼaw‸ hkanˍ tuˬ ve maˇ heˆ, teh‸
nawˬ hui ve Jawˇmawˇ Gʼuiˬsha chi hkʼe kʼoˆ taˍ ve yoˬ.
Currently Selected:
Aˍmoˆ li‸ 9: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.