Tcuh yaˇ li‸ 5

Aˍnaˍniˆ leh Saˍhpiˉra‸ awˬ lawn

1Aˍnaˍniˆ meh ve chaw teˇ gʼaˇ leh yawˇ ve awˬ miˇ ma Saˍhpiˉra‸, yawˇ huiˉ maˬ ka‸ miˬguiˬ teˇ peˆ hawˇ ve yoˬ. 2Yawˇ huiˉ maˬ awˬ hpawˇ awˬ miˇ nyi ma hawˍ da‸ leh, awˬ hpfuhˇ oˇ ve awˬ hkʼaw lo teˇ pun yuˬ teh taˉ leh teˇ pun ceh tiˉ tcuh yaˇ hui ve hkui paˇ lo laˬ taˍ ve yoˬ. 3Peˍtruˆ kʼoˆ ve, Aˍnaˍniˆ-oˬ, da‸ ve kehˬ ve Awˬ ha hpu hta‸ heˍ piˇ tuˬ maˇ kʼoˆ, miˬguiˬ awˬ hpfuhˇ teˇ pun yuˬ teh taˉ tuˬ maˇ kʼoˆ, nawˬ chi hkʼe te gaˇ ve nyi ma hkʼa biˇ cawˬ la tuˬ aˬ hto‸ ma te Saˍtanˍ nawˬ hta‸ dawˇ tawˆ piˇ lawˬ ve le. 4Miˬguiˬ oˇ ve maˇ hawˇ sheˍ htaˇ, nawˬ ve maˇ heˆ laˇ. Hawˇ leh gʼa ve awˬ hpfuhˇ htawˇ, nawˬ ve mawˇ hpeh‸ ve maˇ heˆ laˇ. Aˬ hto‸ ma pa taw chi hkʼe te tuˬ nawˬ ve nyi ma hkʼaw ca dawˇ ve le. Nawˬ chaw yaˇ hta‸ heˍ ve maˇ heˆ, Gʼuiˬsha hta‸ heˍ ve yoˬ teh‸ kʼoˆ piˇ ve yoˬ. 5Tawˇ hkawˇ oˇ ve hta‸ gʼa kaˇ htaˇ, Aˍnaˍniˆ paiˍ leh suh-e ve yoˬ. Awˬ lawn oˇ ve hta‸ gʼa kaˇ ve chaw hkʼa peu-eˬ kawˆ jaˇ ve yoˬ. 6Oˇ htaˇ, chaw haˉ paˍ hui tu la leh, yawˇ hta‸ htiˆ leh ca taˆ tuˍ ve yoˬ.

7Awˬ hkʼaw‸ nawˉ shehˆ naˍ riˍ hkʼe gaˬ htaˇ, yawˇ ve awˬ miˇ ma lo‸ la ve yoˬ. Hkʼaˬ hkʼe hpeh‸ la peuˬ ve awˬ lawn hta‸ yawˇ maˇ shiˍ. 8Peˍtruˆ kʼoˆ ve, Nawˬ huiˉ maˬ miˬguiˬ hawˇ ve awˬ hpfuhˇ chi ma tiˉ gʼa ve yoˬ laˇ teh‸ yawˇ hta‸ na nyi htaˇ,

Yoˬ, chi ma tiˉ gʼa ve yoˬ teh‸ yawˇ kʼaw‸ kʼoˆ piˇ ve yoˬ.

9Peˍtruˆ yawˇ hta‸ kʼoˆ piˇ ve, Nawˬ huiˉ maˬ lehˬ, aˬ hto‸ ma te nyi ma teˇ shiˍ tiˉ taˍ leh Jawˇmawˇ Gʼuiˬsha ve Awˬ ha hpu hta‸ lawˇ nyi ve le. Nyi loˬ. Nawˬ ve awˬ hpawˇ hta‸ ca tuˍ ve chaw hui lehˬ, yehˬmiˉhpe‸ lo kʼaw‸ gaˬ la peuˬ. Nawˬ hta‸ htawˇ yawˇ hui taˆ kʼai tuˬ yoˬ teh‸ kʼoˇ piˇ ve yoˬ. 10Teˇ cawˬ haˉ yaˇ miˇ oˇ ve Peˍtruˆ ve hkui paˇ lo paiˍ leh suh-e ve yoˬ. Chaw haˉ paˍ teˇ hpaˍ lo‸ la leh, yaˇ miˇ suh taˍ ve hta‸ gʼa mawˬ ve yoˬ. Yawˇ hta‸ htawˇ yawˇ hui taˆ veu leh, awˬ hpawˇ awˬ paˇ lo ca tuˍ ve yoˬ. 11Hkri‸ yaˇ awˬ moˍ awˬ hkʼaw chehˇ ve chaw hkʼa peu-eˬ leh awˬ lawn chi ve hta‸ gʼa kaˇ ve chaw hkʼa peu-eˬ kawˆ jaˇ ve yoˬ.

Tcuh yaˇ hui awˬ heˆ leh anˇ tuˬ maˇ maˇ te ve

12Tcuh yaˇ hui lehˬ chaw chi ma ve mehˆ gʼuˇ suhˍ awˬ heˆ leh anˇ tuˬ maˇ maˇ te ve yoˬ. Yawˇ hui hkʼa peu-eˬ nyi ma teˇ shiˍ tiˉ taˍ leh Sawˉla‸monˍ ve koˇ caˉ lo hpawnˬ chehˇ taˍ ve yoˬ. 13Awˬ kaˍ awˬ nu chaw teˇ gʼaˇ ka‸ yawˇ hui hta‸ ca pawnˇ da‸ maˇ haˆ htawˇ, chaw chi ma ve yawˇ hui hta‸ yawˆ yan leh taˍ uiˍ ve yoˬ. 14Yonˍ ve chaw, hawˉ hkʼaˆ yaˇ miˇ awˬ moˍ lonˉ teˇ hpaˍ, Jawˇmawˇ Gʼuiˬsha hta‸ pawnˇ da‸ la ve yoˬ. 15Peˍtruˆ ya‸ kʼaw kʼai htaˇ, yawˇ ve aˉ gʼuiˬ ha chaw naˬ teˇ gʼaˇ gʼaˇ hta‸ baˬ piˇ tuˬ, chaw naˬ teˇ hpaˍ hta‸ shu taˆ leh, ya‸ kʼaw paˇ lo zuh‸ hpui leh ku-iˍ teˇ hpaˍ awˬ hkʼoˆ lo teh taˍ ve yoˬ. 16Yeˍruˆsaˍlehnˍ venˇ awˬ paˇ awˬ kui lo cawˬ ve venˇ hkʼaˆ teˇ hpaˍ awˬ hkʼaw lo chehˇ ve chaw maˇ maˇ hpawnˬ laˬ ve yoˬ. Chaw naˬ teˇ hpaˍ leh neˇ cha‸ chiˆ geh ve chaw teˇ hpaˍ hta‸ shiˍ veu laˇ leh yawˇ hui hkʼa peu-eˬ hta‸ gu na-e piˇ ve yoˬ.

Peˍtruˆ leh Yoˇhanˬ fawˉmehˍ ve hta‸ gʼa hkanˍ ve

17Oˇ htaˇ, paw hkuˇ lonˉ leh yawˇ ve chaw Saˍduˆkehˇ awˬ moˍ awˬ hkʼaw chehˇ ve chaw teˇ hpaˍ hkawehˉ ve nyi ma hkʼa biˇ cawˬ ve awˬ hkʼaw lo, teˇ geh tu la leh, 18tcuh yaˇ hui hta‸ hpeh yuˬ leh htawnˍ hkʼaw keu taˍ ve yoˬ. 19Ya‸ hkʼaˇ, tanˇ hkuinˇ htaˇ, Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ lehˬ, htawnˍ yehˬ miˉ teˇ hpaˍ hta‸ hpaw sheˬ leh, yawˇ hui hta‸ shiˍ tawˆ-e leh kʼoˆ piˇ ve, 20Nawˬ hui kʼai loˬ. Bon yehˬ lonˉ hkʼaw huˉ leh, co ha te‸ ve chi hta‸ caˉ da‸ ve tawˇ hkawˇ hkʼa peu-eˬ chaw chi ma ve hta‸ maˍ piˇ-oˆ teh‸ kʼoˆ piˇ ve yoˬ. 21Tawˇ chi hta‸ gʼa kaˇ htaˇ, mvuhˇ shawˉ teˇ na‸ bon yehˬ lonˉ hkʼaw yawˇ hui lo‸-e leh maˍ piˇ ve yoˬ.

Paw hkuˇ lonˉ leh yawˇ ve awˬ chawˇ teˇ hpaˍ laˬ leh, jehˬ da‸ shehˍ hpaˇ awˬ moˍ leh, Iˉsaˍreˍlaˆ awˬ hkʼaw lo chaw mawˇ chaw kehˉ teˇ hpaˍ hta‸ kuˬ hpawnˬ peuˬ hkʼaw‸ nawˉ, tcuh yaˇ hui hta‸ ca shiˍ laˬ tuˬ, bon yehˬ ma‸ yaˇ teˇ hpaˍ hta‸ htawnˍ hkʼaw lo kʼai tcuh ve yoˬ. 22Ya‸ hkʼaˇ yawˇ hui htawnˍ hkʼaw lo gaˬ htaˇ, tcuh yaˇ teˇ hpaˍ hta‸ maˇ mawˬ. Yawˇ hui kʼo‸-e leh kʼoˆ ve, 23Htawnˍ yehˬ miˉ teˇ hpaˍ hkʼa deh‸ hoˆ taˍ leh, shaw shehˍ hpaˇ teˇ hpaˍ htawˇ yehˬ miˉ awˬ baˬ lo shaw chehˇ ve hta‸ ngaˬ hui gʼa mawˬ ve yoˬ. Ya‸ hkʼaˇ, ngaˬ hui yehˬ miˉ hta‸ hpaw htaˇ, awˬ hkʼaw lo chaw teˇ gʼaˇ hta‸ ka‸ maˇ mawˬ teh‸ hto piˇ ve yoˬ. 24Bon yehˬ lonˉ ve ma‸ poˍ leh paw hkuˇ lonˉ teˇ hpaˍ tawˇ chi hta‸ gʼa kaˇ htaˇ, hkʼaˬ hkʼe hpeh‸ la tuˬ leh naˍ, yawˇ hui dawˇ maˇ tawˆ ve yoˬ. 25Oˇ htaˇ, chaw teˇ gʼaˇ lo‸ la leh kʼoˆ ve, Htawnˍ hkʼaw lo nawˬ hui haw taˍ ve chaw hui lehˬ, bon yehˬ lonˉ hkʼaw lo huˉ taˍ leh chaw chi ma ve hta‸ maˍ piˇ chehˇ ve yoˬ teh‸, yawˇ hui hta‸ hto piˇ ve yoˬ. 26Oˇ htaˇ, bon yehˬ lonˉ ve ma‸ poˍ leh yawˇ ve ma‸ yaˇ teˇ hpaˍ teˇ geh kʼai leh, tcuh yaˇ hui hta‸ ca shiˍ veu laˇ ve yoˬ. Ya‸ hkʼaˇ, chaw chi ma ve yawˇ hui hta‸ haˉ pui baˬ la puiˉ-aˆ teh‸ yawˇ hui kawˆ ve pa taw, tcuh yaˇ hui hta‸ hehnˇ chaweh maˇ te.

27Yawˇ hui hta‸ shiˍ veu laˇ leh, jehˬ da‸ shehˍ hpaˇ awˬ moˍ mehˆ gʼuˇ suhˍ teh taˍ ve yoˬ. Oˇ htaˇ, paw hkuˇ lonˉ yawˇ hui hta‸ na nyi ve, 28Awˬ meh chi hta‸ cuˇ ve awˬ hkʼaw lo nawˬ hui maˇ gʼa maˍ maˇ gʼa hto tuˬ ngaˬ hui nawˬ hui hta‸ hehnˇ chaweh tawˇ piˇ taˍ peuˬ ve maˇ heˆ laˇ, Ya‸ hkʼaˇ, nawˬ hui maˍ piˇ ve teˇ hpaˍ Yeˍruˆsaˍlehnˍ venˇ awˬ hkʼaw lo nawˬ hui hkʼa biˇ biˇ la piˇ peuˬ. Chaw oˇ ve hpaˇ ve awˬ suhˍ ngaˬ hui awˬ hkʼoˆ gaˬ la piˇ tuˬ nawˬ hui dawˇ taˍ ve yoˬ teh‸ kʼoˆ piˇ ve yoˬ.

29Peˍtruˆ leh tcuh yaˇ hui kʼaw‸ kʼoˆ ve, Chaw yaˇ ve tawˇ hkawˇ a‸ kehˉ Gʼuiˬsha ve tawˇ hkawˇ hta‸ ngaˬ hui gʼa na yuˬ ve yoˬ. 30Ngaˬ hui ve awˬ puˍ awˬ pi hui ve Gʼuiˬsha lehˬ, nawˬ hui suhˆ hkuiˉ daw hkʼoˆ lo hta‸ pehˍ ve Yeˍsuˆ hta‸ kʼaw‸ te‸ tu la piˇ peuˬ. 31Iˉsaˍreˍlaˆ chaw hui venˇbaˆ dawˇ hpfuhˆ leh venˇbaˆ hpehˇ hkʼa gʼa tuˬ awˬ pon, Gʼuiˬsha lehˬ yawˇ hta‸ Uˉ peunˍ shehˍ hpaˇ leh Htaiˍ hkʼaw‸ shehˍ hpaˇ hpeh‸ piˇ lawˬ leh, yawˇ ve la‸ sha paˉ lo yawˇ hta‸ chiˇ taˆ-e peuˬ ve yoˬ. 32Ngaˬ hui lehˬ, awˬ lawn chi teˇ hpaˍ hta‸ shaˉ hkiˆ hkanˍ shehˍ hpaˇ hpeh‸ ve yoˬ. Yawˇ ve tawˇ hkawˇ hta‸ na yuˬ ve chaw hui hta‸ Gʼuiˬsha piˇ taˍ ve da‸ ve kehˬ ve Awˬ ha hpu htawˇ, shaˉ hkiˆ hkanˍ shehˍ hpaˇ hpeh‸ ve yoˬ teh‸ kʼoˆ piˇ ve yoˬ.

33Tawˇ hkawˇ chi hta‸ gʼa kaˇ htaˇ, yawˇ hui nyi ma zuhˆ jaˇ leh, tcuh yaˇ hui hta‸ tiˇ pehˍ gaˇ ve yoˬ. 34Chaw hkʼa peu-eˬ yawˆ yan ve Gaˍmaˍleˍlaˆ meh ve Hpaˍriˍsehˇ teˇ gʼaˇ cawˬ ve yoˬ. Yawˇ lehˬ, awˬ liˇ tawˇ hkawˇ maˍ shehˍ hpaˇ hpeh‸ ve yoˬ. Jehˬ da‸ shehˍ hpaˇ awˬ moˍ awˬ hkʼaw lo yawˇ tu leh, tcuh yaˇ hui hta‸ teˇ hkui shiˍ tawˆ-e tuˬ tawˇ piˇ ve yoˬ. 35Oˇ htaˇ yawˇ kʼoˆ ve, Iˉsaˍreˍlaˆ chaw hui-oˬ, chaw chi teˇ hpaˍ hta‸ nawˬ hui hkʼaˬ hkʼe te tuˬ ve shaˍ ti‸ hkʼa deh‸ taˍ-o‸. 36Awˬ lawn kʼo, ponˬ laˬ htaˇ Htuˇda‸ meh ve chaw teˇ gʼaˇ tu la leh, yawˇ chaw uiˍ teˇ gʼaˇ hpeh‸ ve yoˬ teh‸ kʼoˆ ve yoˬ. Yawˇ awˬ hkʼaˇ suh kʼai ve chaw aˬ laˬ hkʼe awˇ ha gʼaˇ cawˬ ve yoˬ. Yawˇ hta‸ tiˇ pehˍ peuˬ hkʼaw‸ nawˉ, yawˇ ve tawˇ hkawˇ hta‸ na yuˬ ve chaw hkʼa peu-eˬ hpaˆ da‸ guiˇ da‸ leh luˬ kʼai mehˉ kʼai ve yoˬ. 37Yawˇ luˬ peuˬ hkʼaw‸ nawˉ, mvuhˇmiˬ yaˇ hui awˬ meh keu ve teˇ yanˇ, Yuˇda‸ meh ve Gaˍliˍlehˇ chaw teˇ gʼaˇ htawˇ tawˆ la leh, mvuhˇmiˬ yaˇ teˇ hpaˍ hpaˍ hta‸ yawˇ awˬ hkʼaˇ suh kʼai tuˬ beˬ yuˬ ve yoˬ. Yawˇ htawˇ, luˬ kʼai sheˆ kʼai leh, yawˇ ve tawˇ hkawˇ hta‸ na yuˬ ve chaw hkʼa peu-eˬ hpaˆ da‸ guiˇ da‸ kʼai ve yoˬ. 38Hkʼe te leh, chi beu‸ chaw chi teˇ hpaˍ hta‸ te‸ chiˉ taˇ te. Yawˇ hui hkʼaˇ yawˇ hui chehˇ piˇ. Yawˇ hui dawˇ ve leh yawˇ hui te ve chi teˇ hpaˍ, chaw yaˇ lo hpeh‸ la ve kʼo, luˬ kʼai sheˆ kʼai tuˬ yoˬ. 39Ya‸ hkʼaˇ, Gʼuiˬsha lo hpeh‸ la ve kʼo, nawˬ hui te luˬ gʼa tuˬ ve maˇ heˆ. Nawˬ hui lehˬ, Gʼuiˬsha hta‸ heh‸ hkehnˉ ve chaw htawˇ hpeh‸ la puiˉ-aˆ mehˍ teh‸, yawˇ yawˇ hui hta‸ kʼoˆ piˇ ve yoˬ.

40Yawˇ kʼoˆ ve tawˇ hta‸ yawˇ hui na yuˬ leh, tcuh yaˇ hui hta‸ kʼaw‸ kuˬ yuˬ ve yoˬ. Yawˇ hui hta‸ jaw‸ peuˬ hkʼaw‸ nawˉ, Yeˍsuˆ ve awˬ meh hta‸ cuˇ ve awˬ hkʼaw lo shu hta‸ maˇ gʼa maˍ piˇ tuˬ, yawˇ hui hta‸ tawˇ kʼaw‸ piˇ peuˬ leh hpehˇ peu ve yoˬ. 41Tcuh yaˇ hui lehˬ, awˬ meh oˇ ve hta‸ pa taw maˇ shawˍ maˇ caˆ te laˇ ve hta‸ hkanˍ keunˍ ve yoˬ teh‸ Gʼuiˬsha shawˍ taˍ ve pa taw, jehˬ da‸ shehˍ hpaˇ awˬ moˍ mehˆ gʼuˇ suhˍ yawˇ hui ha lehˬ ha kʼa tawˆ kʼai ve yoˬ. 42Yawˇ hui teˇ nyi le le bon yehˬ lonˉ hkʼaw lo maˇ kʼoˆ, yehˬ hkʼaw lo maˇ kʼoˆ, Yeˍsuˆ lehˬ Hkri‸ hpeh‸ ve yoˬ teh‸, hkʼaˬ htaˆ ka‸ maˍ piˇ leh bon maˍ tcuhˉ taˍ ve yoˬ.

Currently Selected:

Tcuh yaˇ li‸ 5: LHBE

Highlight

Copy

Compare