2 Hteˇsaˍlawˇniˆ li‸ 3
3
Gʼuiˬsha ve tawˇ hkawˇ bvuhˬ kʼai tuˬ bon lawˬ ve
1Awˬ viˉ awˬ nyi teˇ hpaˍ-oˬ, awˬ leh meuˇ ve tawˇ teˇ hkawˇ lehˬ chi hkʼe yoˬ. Jawˇmawˇ Yeˍsuˆ ve tawˇ hkawˇ lehˬ, nawˬ hui awˬ hkʼaw lo haˆ haˆ bvuhˬ kʼai leh awˬ me‸ awˬ hponˇ gʼa ve hkʼe, teˇ kaˬ peuˬ teˇ kaˬ lo oˇ ve hkʼa shuˍ shuˍ hpeh‸ la tuˬ ngaˬ hui awˬ pon bon lawˬ-o‸. 2Te ponˬ te leuˉ ve chaw leh haiˬ ve chaw teˇ hpaˍ ve la‸ hkʼaw lo ngaˬ hui gʼa ponˬ tuˬ htawˇ bon lawˬ-o‸. Awˬ lawn kʼo, chaw hkʼa peu-eˬ yonˍ ve maˇ heˆ.
3Ya‸ hkʼaˇ, Jawˇmawˇ Yeˍsuˆ lehˬ, ka ti‸ yeˬ ve yoˬ. Yawˇ lehˬ, nawˬ hui hta‸ yeˬ la piˇ lawˬ leh, haiˬ ve teˇ ceuˬ hta‸ nawˬ hui gʼa ponˬ tuˬ, yawˇ ha‸ shaˉ laˇ tuˬ yoˬ. 4Ngaˬ hui nawˬ hui hta‸ tawˇ piˇ taˍ ve teˇ hpaˍ hta‸ nawˬ hui te chehˇ ve awˬ hkʼoˆ, awˬ gʼuˇ suhˍ hpawˇ htawˇ nawˬ hui te tuˬ yoˬ teh‸, Jawˇmawˇ Yeˍsuˆ hta‸ pa taw ngaˬ hui hkʼa deh‸ yonˍ ve yoˬ.
5Nawˬ hui ve nyi ma lehˬ, Gʼuiˬsha ve ha‸ pehnˇ ve teˇ ceuˬ leh Hkri‸ ve nyi ma yeˬ ve teˇ ceuˬ awˬ hkʼaw lo lo‸-e tuˬ, Jawˇmawˇ Yeˍsuˆ nawˬ hui hta‸ sheh kʼai piˇ-oˆ.
Kanˉ maˇ te ve chaw hui hta‸ deˇ maˍ piˇ ve
6Awˬ viˉ awˬ nyi teˇ hpaˍ-oˬ, ngaˬ hui ve Jawˇmawˇ Yeˍsuˆ Hkri‸ ve awˬ meh awˬ hawˉ lo ngaˬ hui nawˬ hui hta‸ chi hkʼe tawˇ piˇ ve yoˬ. Ngaˬ hui geh nawˬ hui gʼa henˇ taˍ peuˬ ve awˬ liˇ awˬ hkʼaˇ teˇ hpaˍ awˬ hkʼaˇ suh maˇ kʼai leh te‸ chiˉ kanˉ maˇ te ve awˬ viˉ awˬ nyi hkʼa peu-eˬ hta‸ awˬ chawˇ taˇ te. 7Awˬ lawn kʼo, ngaˬ hui te ve hta‸ nawˬ hui henˇ yuˬ leh te cawˇ ve yoˬ teh‸, nawˬ hui shiˍ chehˇ ve yoˬ. Ngaˬ hui nawˬ hui geh chehˇ ve teˇ yanˇ, ngaˬ hui kanˉ maˇ te leh hkʼe leˇ chehˇ taˍ ve maˇ heˆ. 8A shu teˇ gʼaˇ ve caˇ tuˬ hta‸ maˇ kʼoˆ, awˬ hpfuhˇ maˇ piˇ leh ngaˬ hui caˇ ve maˇ heˆ. Nawˬ hui teˇ gʼaˇ ka‸ maˇ gʼa hkeu‸ tuˬ, ngaˬ hui lehˬ tanˇ hkuinˇ tanˇ vanˇ kanˉ gʼaˇ hte‸ te ve yoˬ. 9Shu caˍ laˇ ve caˇ tuˬ hta‸ ngaˬ hui gʼa caˇ tuˬ a hkaw-anˬ maˇ cawˬ ve pa taw ngaˬ hui chi hkʼe te ve maˇ heˆ. Nawˬ hui ngaˬ hui hta‸ henˇ yuˬ tuˬ, nawˬ hui awˬ pon ngaˬ hui awˬ hkʼaˇ chi hkʼe te teh taˍ ve yoˬ. 10Ngaˬ hui nawˬ hui geh chehˇ ve teˇ yanˇ, ngaˬ hui nawˬ hui hta‸ chi hkʼe tawˇ piˇ taˍ peuˬ. Chaw teˇ gʼaˇ gʼaˇ kanˉ maˇ te gaˇ ve kʼo, awˍ taˇ caˍ piˇ teh‸ kʼoˆ taˍ ve yoˬ.#Ahkp 3:19
11Nawˬ hui awˬ hkʼaw lo chaw teˇ hpaˍ hpaˍ lehˬ, bawˬ jaˇ leh, shu ve kanˉ hta‸ ca sho‸ sha‸ piˇ leh, a shu yawˇ awˬ to kanˉ te‸ chiˉ maˇ te ve hta‸ ngaˬ hui gʼa kaˇ ve yoˬ. 12Chi hkʼe ve chaw teˇ hpaˍ hta‸ Jawˇ mawˇ Yeˍsuˆ Hkri‸ awˬ hkʼaw lo ngaˬ hui chi hkʼe tawˇ piˇ leh awˬ gʼaˇ pe‸ laˇ ve yoˬ. Gawˬ lehˍ chehˇ ve awˬ hkʼaw lo a shu yawˇ ve kanˉ hta‸ te leh, a shu yawˇ ve caˇ tuˬ hta‸ caˇ-oˆ.
13Awˬ viˉ awˬ nyi teˇ hpaˍ-oˬ, da‸ ve hta‸ te ve awˬ hkʼaw lo awˬ gʼaˇ taˇ nuˇ piˇ. 14Li‸ chi awˬ hkʼaw lo ngaˬ hui bvuh‸ taˍ ve tawˇ hkawˇ hta‸ chaw teˇ gʼaˇ gʼaˇ maˇ na yuˬ ve kʼo, yawˇ hta‸ tawnˇ taˍ-o‸. Yawˇ gʼa ya‸ taw tuˬ yawˇ hta‸ awˬ chawˇ taˇ te. 15Ya‸ hkʼaˇ, canˇ paˍ hkʼa shuˍ shuˍ yawˇ hta‸ taˇ shawˍ taˍ. Awˬ viˉ awˬ nyi hkʼa shuˍ shuˍ shawˍ taˍ leh, yawˇ hta‸ shaˍ ti‸ piˇ-oˆ.
Bon na‸ piˇ ve hkawˇ
16Dawˇ sha piˇ shehˍ hpaˇ lehˬ, nawˬ hui hta‸ teˇ ceuˬ le le awˬ hkʼaw lo hkʼaˬ htaˆ ka‸ dawˇ sha gaˇ sha tuˬ cawˬ piˇ lawˬ-o‸. Jawˇmawˇ Yeˍsuˆ nawˬ hui hkʼa peu-eˬ geh chehˇ piˇ-oˆ.
17Ngaˬ Pawˇlu‸ lehˬ, nawˬ hui hta‸ dawˇ nawˇ ve awˬ hkʼaw lo tawˇ chi teˇ hkawˇ ngaˬ awˬ to nawˬ hui hta‸ bvuh‸ laˇ ve yoˬ. Ngaˬ bvuh‸ ve li‸ teˇ kʼoˆ le le awˬ hkʼaw lo nawˬ hui shiˍ hpeh‸ tuˬ, chi hkʼe cawˬ ve yoˬ. Ngaˬ bvuh‸ ve la‸ meuˇ lehˬ, chi hkʼe cawˬ ve yoˬ teh‸ shiˍ-o‸.
18Ngaˬ hui ve Jawˇmawˇ Yeˍsuˆ Hkri‸ ve awˬ bon awˬ shinˉ nawˬ hui hkʼa peu-eˬ geh cawˬ piˇ-oˆ.
Currently Selected:
2 Hteˇsaˍlawˇniˆ li‸ 3: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
