2 Peˍtruˆ li‸ 3

Jawˇmawˇ Yeˍsuˆ kʼaw‸ ya‸ la tuˬ ve awˬ lawn

1Ha‸ ve chaw teˇ hpaˍ-oˬ, ngaˬ nawˬ hui hta‸ bvuh‸ laˇ ve li‸ chi lehˬ, nyiˇ kʼoˆ teˇ kʼoˆ yoˬ. Li‸ chi ve nyiˇ kʼoˆ kʼoˆ awˬ hkʼaw lo, nawˬ hui hteˇ lehˍ cawˇ lehˍ dawˇ nyi puiˉ tuˬ, ngaˬ nawˬ hui hta‸ dawˇ nawˇ laˇ ve yoˬ. 2Ponˬ laˬ htaˇ Gʼuiˬsha ve da‸ kehˬ ve tcuh kaˍ paˍ hui kʼoˆ ve tawˇ hkawˇ teˇ hpaˍ nawˬ hui hta‸ dawˇ nawˇ laˇ ve yoˬ. Jawˇmawˇ Htaiˍ hkʼaw‸ paˍ lehˬ, nawˬ hui ve tcuh yaˇ hui hta‸ cuˇ leh piˇ taˍ ve tawˇ hkawˇ teˇ hpaˍ htawˇ nawˬ hui hta‸ dawˇ nawˇ laˇ ve yoˬ. 3Awˉ lawˉ shiˍ cawˇ ve teˇ ceuˬ lehˬ chi hkʼe yoˬ. Awˬ leh meuˇ ve awˬ yanˇ awˬ hkʼaw lo, awˬ suhˍ awˬ shaˍ a loˍ awˬ hkʼaˇ suh kʼai leh, kʼoˆ guiˇ gʼuiˬ guiˇ ve chaw teˇ hpaˍ tawˆ la tuˬ yoˬ. 4Yawˇ hui chi hkʼe kʼoˆ tuˬ yoˬ. Jawˇmawˇ Yeˍsuˆ kʼaw‸ ya‸ la tuˬ ve teh‸ kʼoˆ taˍ ve ka ti‸ tawˇ hkawˇ hkʼaˬ hkʼe kʼai le. Awˬ puˍ awˬ pi hui ka‸ suh peuˬ. Ya‸ hkʼaˇ, miˬguiˬ te hpanˍ htaˇ ka‸ tanˬ leh ya‸ nyi hkʼa gaˬ, hkʼa peu-eˬ hkʼa shuˍ shuˍ hpeh‸ chehˇ ve maˇ heˆ laˇ teh‸ kʼoˆ tuˬ yoˬ. 5Aˬ sho-eˬ htaˇ ka‸ Gʼuiˬsha ve tawˇ hkawˇ hta‸ pa taw mvuhˇ naw ma cawˬ la ve hta‸ yawˇ hui maˇ dawˇ nawˇ gaˇ. Chi hkʼoˆ ka‸, Gʼuiˬsha ve tawˇ hkawˇ hta‸ pa taw, iˉ kaˆ awˬ hkʼaw lo miˬguiˬ tawˆ la leh, iˉ kaˆ hta‸ pa taw miˬguiˬ hpeh‸ la ve hta‸ ka‸ yawˇ hui maˇ shiˍ gaˇ ve yoˬ. 6Oˇ htaˇ, miˬguiˬ hta‸ iˉ kaˆ htonˍ piˇ leh, chaw yaˇ hui hta‸ te luˬ te sheˆ piˇ ve yoˬ. 7Gʼuiˬsha ve tawˇ hkawˇ oˇ ve lehˬ, chi beuˬ cawˬ taˍ ve mvuhˇ naw ma leh miˬguiˬ hta‸ aˬ miˍ tuˉ baˬ tuˬ ve awˬ pon leh, Gʼuiˬsha hta‸ maˇ yawˆ maˇ yan ve chaw teˇ hpaˍ hta‸ suhˉ jehˬ leh te luˬ ve teˇ nyi hkʼa gaˬ, mvuhˇ naw ma leh miˬguiˬ hta‸ yawˇ ve tawˇ hkawˇ ha‸ shaˉ chehˇ taˍ ve yoˬ.

8Ha‸ ve chaw teˇ hpaˍ-oˬ, Jawˇmawˇ Gʼuiˬsha lehˬ teˇ nyi hta‸ teˇ hinˉ hkʼaw‸ hkʼe shawˍ leh, teˇ hinˉ hkʼaw‸ hta‸ teˇ nyi hkʼe shawˍ ve hta‸ nawˬ hui taˇ leunˇ. 9Jawˇmawˇ Gʼuiˬsha ka ti‸ te taˍ ve hkʼe biˇ la tuˬ yawˇ naiˇ jaˇ law teh‸ chaw teˇ hpaˍ hpaˍ dawˇ ve yoˬ. Ya‸ hkʼaˇ, ka ti‸ biˇ la tuˬ yawˇ naiˇ ve maˇ heˆ. Chaw hkʼa peu-eˬ venˇ baˆ hta‸ dawˇ hpfuhˆ leh teˇ gʼaˇ ka‸ maˇ gʼa luˬ kʼai tuˬ yawˇ heuˆ gaˇ ve pa taw, yawˇ nawˬ hui hta‸ yeunˇ hkanˍ chehˇ ve teˇ ceuˬ yoˬ.

10Chaw hkʼawˇ chaw naˆ laˬ ve hkʼe, Jawˇmawˇ Yeˍsuˆ ve awˬ nyi gaˬ la tuˬ yoˬ. Oˇ ve teˇ nyi awˬ hkʼaw lo, mvuhˇ naw ma lehˬ awˬ hkawˇ bvuhˬ chaweh te leh mehˉ kʼai tuˬ yoˬ. Awˬ ceuˬ hkʼa peu-eˬ ve aˬ miˍ chiˆ jaˇ leh kuiˬ kʼai tuˬ yoˬ. Miˬguiˬ leh miˬguiˬ awˬ hkʼoˆ hkʼa te taˍ ve kanˉ hkʼa peu-eˬ hta‸ aˬ miˍ to‸ baˬ tuˬ yoˬ. 11Chi hkʼa peu-eˬ kuiˬ kʼai tuˬ ve hta‸ pa taw, nawˬ hui lehˬ da‸ kehˬ ve awˬ liˇ awˬ hkʼaˇ hta‸ tiˉ te leh, Gʼuiˬsha hta‸ yawˆ yan ve chaw hpeh‸ keunˍ hpeh‸ cawˇ ve maˇ heˆ laˇ. 12Nawˬ hui lehˬ Gʼuiˬsha ve awˬ nyi hta‸ law taˍ leh dawˇ law chehˇ ve yoˬ. Awˬ nyi oˇ ve hta‸ pa taw, mvuhˇ naw ma hta‸ aˬ miˍ to‸ baˬ leh, awˬ ceuˬ hkʼa peu-eˬ ve aˬ miˍ chiˆ jaˇ leh kuiˬ kʼai tuˬ yoˬ. 13Ya‸ hkʼaˇ, Gʼuiˬsha yawˇ ka ti‸ cawˬ taˍ ve hkʼe, mvuhˇ naw ma awˬ suhˉ leh miˬguiˬ awˬ suhˉ cawˬ la tuˬ ve hta‸ ngaˬ hui dawˇ law chehˇ ve yoˬ. Oˇ kaˬ lo hteˇ ve cawˇ ve awˬ ceuˬ ceh tiˉ cawˬ tuˬ yoˬ.

14Hkʼe te leh ha‸ ve chaw teˇ hpaˍ-oˬ, nawˬ hui chi teˇ hpaˍ hta‸ dawˇ law chehˇ ve hta‸ pa taw, yawˇ mehˆ gʼuˇ suhˍ cha‸ chiˆ ve leh awˬ kuiˉ awˬ haiˇ maˇ gʼa cawˬ tuˬ leh, dawˇ sha gaˇ sha ve nyi ma gʼa cawˬ tuˬ, coˇ caˇ leh te-o. 15Ngaˬ hui ve Jawˇmawˇ Yeˍsuˆ yeunˇ hkanˍ chehˇ ve lehˬ, chaw yaˇ htaiˍ hkʼaw‸ gʼa tuˬ ve awˬ pon yeunˇ hkanˍ chehˇ ve teh‸ dawˇ-oˆ. Ngaˬ hui ha‸ ve awˬ viˉ awˬ nyi Pawˇlu‸ htawˇ, yawˇ cuˇ yiˍ gʼa ve hkʼe, awˬ lawn chi teˇ hpaˍ nawˬ hui hta‸ li‸ bvuh‸ laˇ ve yoˬ. 16Yawˇ ve li‸ hkʼa peu-eˬ awˬ hkʼaw lo awˬ lawn chi teˇ hpaˍ hta‸ yawˇ bvuh‸ taˍ ve yoˬ. Li‸ oˇ ve teˇ hpaˍ awˬ hkʼaw lo shiˍ haˍ jaˇ ve awˬ lawn teˇ hpaˍ hpaˍ htawˇ cawˬ ve yoˬ. Maˇ shiˍ puiˉ leh nyi ma maˇ yeˬ puiˉ ve chaw teˇ hpaˍ lehˬ, yawˇ ve tawˇ hkawˇ hta‸ maˇ kʼoˆ, awˬ kaˍ awˬ nu Li‸ hpu tawˇ hkawˇ teˇ hpaˍ hta‸ maˇ kʼoˆ, yuˬ hpfuhˆ ve yoˬ. Yawˇ hui chi hkʼe te ve hta‸ pa taw, gʼa luˬ gʼa sheˆ tuˬ yoˬ.

17Hkʼe te leh ha‸ ve chaw teˇ hpaˍ-oˬ, awˬ lawn chi ve hta‸ awˉ lawˉ htaˇ ka‸ nawˬ hui shiˍ taˍ peuˬ ve hta‸ pa taw, haiˬ ve chaw teˇ hpaˍ lehˬ yawˇ hui te ya‸ ve awˬ hkʼaˇ suh nawˬ hui hta‸ maˇ gʼa sheh kʼai tuˬ shaˍ ti‸ taˍ-o‸. Nawˬ hui shaˍ ti‸ maˇ taˍ kʼo, nawˬ hui nyi ma yeˬ taˍ ve teˇ ceuˬ lehˬ luˬ kʼai tuˬ yoˬ. 18Ngaˬ hui ve Jawˇmawˇ leh Htaiˍ hkʼaw‸ paˍ Yeˍsuˆ Hkri‸ ve awˬ bon awˬ hkʼaw lo leh yawˇ hta‸ shiˍ ve teˇ ceuˬ awˬ hkʼaw lo, nawˬ hui uiˍ la piˇ-oˆ. Chi beu‸ ka‸ te leh co co taiˍ taiˍ yawˇ hta‸ chiˇ uiˍ chiˇ mvuh piˇ-oˆ. A menˬ.

Currently Selected:

2 Peˍtruˆ li‸ 3: LHBE

Highlight

Copy