2 Kawˇrenˍhtuˆ li‸ 13

1Chi teˇ pawˆ ngaˬ nawˬ hui geh laˬ tuˬ ve lehˬ, shehˆ pawˆ teˇ pawˆ yoˬ. Nawˬ hui hkʼa kʼoˆ tuˬ ve awˬ lawn teˇ ceuˬ le le awˬ ti cawˬ hpeh‸ tuˬ, shaˉ hkiˆ hkanˍ shehˍ hpaˇ nyiˇ gʼaˇ maˇ heˆ kʼo shehˆ gʼaˇ gʼaˇ cawˬ tuˬ yoˬ.#13:1 Bon 19:15 2Ngaˬ nawˬ hui geh nyiˇ pawˆ teˇ pawˆ ca guiˇ la htaˇ ngaˬ kʼoˆ laˇ taˍ ve hkʼe, chi beu‸ nawˬ hui geh maˇ chehˇ ve awˬ yanˇ awˬ hkʼaw lo htawˇ ngaˬ kʼaw‸ kʼoˆ laˇ ve yoˬ. Ponˬ laˬ htaˇ venˇbaˆ te ve chaw hta‸ maˇ kʼoˆ, te ya‸ chehˇ ve awˬ kaˍ awˬ nu chaw hkʼa peu-eˬ hta‸ maˇ kʼoˆ, ngaˬ teˇ pawˆ kʼaw‸ gaˬ la ve kʼo, ngaˬ yawˇ hui hta‸ ponˬ piˇ tuˬ ve maˇ heˆ. 3Hkri‸ ngaˬ hta‸ cuˇ leh tawˇ yaw chehˇ ve leh naˍ teh‸, nawˬ hui hkʼa deh‸ shiˍ gaˇ ve pa taw, ngaˬ yawˇ hui hta‸ maˇ ponˬ piˇ. Nawˬ hui hta‸ caˉ da‸ ve teˇ hpaˍ te tuˬ, Hkri‸ awˬ gʼaˇ nuˇ ve maˇ heˆ. Nawˬ hui ve awˬ moˍ awˬ hkʼaw lo yawˇ kanˇ paˆ uiˍ ve yoˬ. 4Awˬ lawn kʼo, Hkri‸ lehˬ awˬ gʼaˇ nuˇ ve awˬ hkʼaw lo la‸ ka hkʼoˆ lo gʼa hkanˍ suh ve htawˇ, Gʼuiˬsha ve kanˇ paˆ hta‸ pa taw yawˇ te‸ chehˇ ve yoˬ. Ngaˬ hui htawˇ, Hkri‸ awˬ hkʼaw lo awˬ gʼaˇ nuˇ ve ka‸, Gʼuiˬsha ve kanˇ paˆ hta‸ pa taw nawˬ hui awˬ pon ngaˬ hui Hkri‸ geh teˇ geh te‸ chehˇ tuˬ yoˬ.

5Nawˬ hui yonˍ ve awˬ hkʼaw lo yeˬ chehˇ-aw laˇ, maˇ yeˬ chehˇ laˇ, a shu yawˇ awˬ to hta‸ hkʼa deh‸ tehˆ nyi lawˇ nyi sheˍ. Yeˍsuˆ Hkri‸ nawˬ hui awˬ hkʼaw lo chehˇ ve hta‸ nawˬ hui maˇ shiˍ laˇ. Ya‸ hkʼaˇ, lawˇ nyi ve hta‸ hkanˍ maˇ gʼa ve chaw hpeh‸ ve kʼo, Hkri‸ nawˬ hui awˬ hkʼaw lo maˇ chehˇ. 6Lawˇ nyi ve awˬ hkʼaw lo ngaˬ hui lehˬ hkanˍ gʼa ve chaw hpeh‸ ve yoˬ teh‸, nawˬ hui shiˍ tuˬ ve hta‸ ngaˬ hui dawˇ law ve yoˬ. 7Haiˬ ve hta‸ nawˬ hui maˇ gʼa te tuˬ, ngaˬ hui Gʼuiˬsha hta‸ bon lawˬ ve yoˬ. Lawˇ nyi ve hta‸ ngaˬ hui hkanˍ gʼa peuˬ ve teh‸ ngaˬ hui tawˆ la piˇ lawˬ gaˇ ve maˇ heˆ. ngaˬ hui hkanˍ maˇ gʼa ve chaw hta‸ shuˍ ve htawˇ, nawˬ hui lehˬ da‸ ve hta‸ te tuˬ awˬ pon ngaˬ hui bon lawˬ chehˇ ve yoˬ. 8Awˬ lawn kʼo, hteˇ ve cawˇ ve teˇ ceuˬ hta‸ tawˍ taˍ tuˬ ngaˬ hui te‸ chiˉ te maˇ hpeh‸. Hteˇ ve cawˇ ve teˇ ceuˬ awˬ pon ceh tiˉ ngaˬ hui te hpeh‸ ve yoˬ. 9Ngaˬ hui awˬ gʼaˇ nuˇ ve htawˇ, nawˬ hui awˬ gʼaˇ uiˍ ve pa taw ngaˬ hui ha lehˬ ve yoˬ. Nawˬ hui da‸ la biˇ la tuˬ awˬ pon ngaˬ hui bon lawˬ chehˇ ve yoˬ. 10Ngaˬ nawˬ hui geh gaˬ la ve teˇ yanˇ, Jawˇ mawˇ Yeˍsuˆ ngaˬ hta‸ pe‸ laˇ ve aˉ yaˇ hta‸ ngaˬ hehnˇ chaweh maˇ gʼa yehˇ tuˬ, ngaˬ nawˬ hui geh maˇ chehˇ ve teˇ yanˇ, awˬ ceuˬ chi teˇ hpaˍ ngaˬ li‸ bvuh‸ laˇ ve yoˬ. Yawˇ pe‸ laˇ ve aˉ yaˇ lehˬ, nawˬ hui hta‸ te luˬ tuˬ awˬ pon maˇ heˆ. Nawˬ hui hta‸ uiˍ la yeˬ la piˇ tuˬ awˬ pon yawˇ pe‸ laˇ ve yoˬ.

Awˬ leh meuˇ ve tawˇ teˇ hkawˇ

11Awˬ viˉ awˬ nyi teˇ hpaˍ-oˬ, awˬ leh ve tawˇ teˇ hkawˇ lehˬ chi hkʼe yoˬ. Ha lehˬ chehˇ-oˆ. Da‸ la biˇ la piˇ-oˆ. Dawˇ sha gaˇ sha cawˬ piˇ-oˆ. Nyi ma teˇ shiˍ tiˉ taˍ-o‸. Cawˇ da‸ hui da‸ ve awˬ hkʼaw lo chehˇ-oˆ. Chi hkʼe te ve kʼo, ha‸ pehnˇ ve nyi ma cawˬ leh cawˇ da‸ hawˍ da‸ piˇ shehˍ hpaˇ Gʼuiˬsha lehˬ nawˬ hui geh chehˇ tuˬ yoˬ.

12Nawˬ hui teˇ gʼaˇ leh teˇ gʼaˇ da‸ ve kehˬ ve awˬ hkʼaw lo boˆ nu da‸ leh la‸ sheh caˉ da‸-o‸.

13Hkri‸ yaˇ hui hkʼa peu-eˬ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Jawˇmawˇ Yeˍsuˆ Hkri‸ ve awˬ bon awˬ shinˉ, Gʼuiˬsha ve ha‸ ve pehnˇ ve leh, da‸ ve kehˬ ve Awˬ ha hpu hta‸ awˬ chawˇ te da‸ ve, chi teˇ hpaˍ nawˬ hui hkʼa peu-eˬ geh cawˬ piˇ-oˆ.

Currently Selected:

2 Kawˇrenˍhtuˆ li‸ 13: LHBE

Highlight

Copy

Compare