1 Peˍtruˆ li‸ 5
5
Gʼuiˬsha ve yawˬ awˬ moˍ hta‸ ha‸ shaˉ ve awˬ lawn
1Nawˬ hui awˬ hoˉ chaw mawˇ teˇ hpaˍ hta‸ ngaˬ lawˬ hkawˉ gaˇ ve yoˬ. Ngaˬ htawˇ nawˬ hui hkʼe awˬ hoˉ chaw mawˇ hpeh‸ leh, Hkri‸ gʼa tu‸ gʼa hkanˍ ve hta‸ ngaˬ awˬ to gʼa mawˬ ve yoˬ. Tawˆ la tuˬ ve awˬ me‸ awˬ hponˇ hta‸ htawˇ ngaˬ gʼa tuˬ yoˬ. 2Nawˬ hui geh cawˬ ve Gʼuiˬsha ve yawˬ awˬ moˍ hta‸ hkʼa deh‸ ha‸ shaˉ-oˆ. Shu hkawˇ leuˉ maˇ gʼa leh te ve teˇ ceuˬ taˇ hpeh‸ piˇ. Ha lehˬ ha kʼa te-o. Hpu gʼa gaˇ leh te ve ka‸ taˇ hpeh‸ piˇ. Nyi ma pfuhˇ leh te-o. 3Nawˬ ve yawˬ awˬ moˍ awˬ hkʼoˆ jawˇ mawˇ hkʼe taˇ te. Ya‸ hkʼaˇ, yawˬ awˬ moˍ mehˆ gʼuˇ suhˍ henˇ kuiˬ jawˬ kuiˬ hpeh‸ piˇ-oˆ. 4Chi hkʼe te ve kʼo, Yawˬ hawˉ shehˍ hpaˇ awˬ hoˉ teˇ gʼaˇ kʼaw‸ tawˆ la ve teˇ yanˇ, maˇ nawˍ kʼai puiˉ ve, awˬ me‸ awˬ hponˇ cawˬ ve shi uˉ tcuhˍ hta‸ nawˬ hui gʼa tuˬ yoˬ.
5Oˇ ve hkʼa shuˍ shuˍ yaˇ nehˬ teˇ hpaˍ-oˬ, awˬ hoˉ chaw mawˇ teˇ hpaˍ awˬ hawˉ lo chehˇ-oˆ. Chi hkʼoˆ ka‸, nawˬ hui hkʼa peu-eˬ teˇ gʼaˇ leh teˇ gʼaˇ awˬ ceˬ hkʼe nyi ma nehˬ lehˍ taˍ-o‸. Awˬ lawn kʼo, Gʼuiˬsha lehˬ nyi ma uiˍ ve chaw teˇ hpaˍ hta‸ tawˍ taˍ ve yoˬ. Ya‸ hkʼaˇ, nyi ma nuˇ nehˬ ve chaw teˇ hpaˍ hta‸ awˬ bon piˇ ve yoˬ.#Isy 57:15 6Hkʼe te leh, Gʼuiˬsha ve uiˍ jaˇ ve kanˇ paˆ awˬ hawˉ lo nyi ma nehˬ lehˍ taˍ-o‸. Awˬ yanˇ cawˇ ve teˇ yanˇ htaˇ, yawˇ nawˬ hui hta‸ taˍ uiˍ taˍ mvuh laˇ tuˬ yoˬ. 7Gʼuiˬsha nawˬ hui awˬ pon dawˇ nyi puiˉ ve pa taw, nawˬ hui ve dawˇ haˍ dawˇ hkiˉ tuˬ hkʼa peu-eˬ yawˇ hta‸ chiˇ a‸ piˇ-oˆ.
8Shaˍ ti‸ te leh hkʼa deh‸ shaw taˍ-o‸. Nawˬ hui ve canˇ paˍ neˇhaiˬ lehˬ, kuˬ chehˇ ve laˇ caˬ shiˉ hkʼa shuˍ shuˍ, shu hta‸ che‸ caˇ tuˬ ca caw nyi toˇ chehˇ ve yoˬ. 9Yonˍ yeˬ ve awˬ hkʼaw lo neˇhaiˬ hta‸ tawˍ taˍ-o‸. Miˬguiˬ hkʼoˆ chehˇ ve nawˬ hui ve awˬ viˉ awˬ nyi teˇ hpaˍ htawˇ, chi hkʼa shuˍ shuˍ gʼa tu‸ gʼa hkanˍ chehˇ ve hta‸ nawˬ hui shiˍ ve yoˬ. 10Nawˬ hui teˇ hkui teˇ yanˇ gʼa tu‸ gʼa hkanˍ peuˬ hkʼaw‸ nawˉ, awˬ bon hkʼa biˇ cawˬ ve Gʼuiˬsha lehˬ, nawˬ hui hta‸ biˇ la piˇ, yeˬ la piˇ leh awˬ gʼaˇ cawˬ la piˇ tuˬ yoˬ. Co co taiˍ taiˍ yawˇ ve awˬ me‸ awˬ hponˇ hta‸ nawˬ hui gʼa tuˬ, Gʼuiˬsha lehˬ Hkri‸ hta‸ cuˇ leh nawˬ hui hta‸ kuˬ taˍ ve yoˬ. 11Gʼuiˬsha hta‸ co co taiˍ taiˍ awˬ me‸ awˬ hponˇ leh kanˇ paˆ cawˬ piˇ-oˆ. A menˬ.
Awˬ leh meuˇ ve tawˇ hkawˇ
12Ka ti‸ yeˬ ve teh‸ ngaˬ shawˍ taˍ ve awˬ viˉ awˬ nyi Siˍlaˍnuˆ hta‸ ngaˬ cuˇ leh nawˬ hui hta‸ ngeh ve li‸ chi teˇ kʼoˆ bvuh‸ laˇ ve yoˬ. Nawˬ hui hta‸ awˬ gʼaˇ pe‸ laˇ leh, Gʼuiˬsha ve awˬ tehˬ awˬ na ve awˬ bon awˬ lawn hta‸ shaˉ hkiˆ hkanˍ tuˬ, li‸ chi bvuh‸ laˇ ve yoˬ. Gʼuiˬsha ve awˬ bon chi awˬ hkʼaw lo nawˬ hui yeˬ chaweh chehˇ taˍ-o‸.
13Baˍbuˍlonˍ venˇ awˬ hkʼaw chehˇ ve, nawˬ hui hkʼa shuˍ shuˍ leuˆ yuˬ taˍ ve awˬ moˍ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Ngaˬ ve yaˇ Maˍkuˆ ka‸, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 14Nawˬ hui teˇ gʼaˇ leh teˇ gʼaˇ ha‸ pehnˇ ve awˬ hkʼaw lo boˆ nu da‸ leh la‸ sheh caˉ da‸-o‸.
Hkri‸ awˬ hkʼaw lo chehˇ ve nawˬ hui hkʼa peu-eˬ awˬ hkʼoˆ dawˇ sha gaˇ sha tuˬ cawˬ piˇ-oˆ.
Currently Selected:
1 Peˍtruˆ li‸ 5: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.