1 Jawˇmawˇ li‸ 2
2
Daˍviˆ Sawˉla‸monˍ hta‸ awˬ leh teˇ pawˆ maˍ piˇ ve
1Daˍviˆ suh la paˇ neˇ htaˇ, yawˇ ve yaˇ paˍ Sawˉla‸monˍ hta‸ kuˬ yuˬ leh, yawˇ hta‸ awˬ leh meuˇ teˇ pawˆchi hkʼe maˍ piˇ taˉ ve yoˬ. 2Ngaˬ gʼa suh tuˬ ve awˬ yanˇ gaˬ la peuˬ. Chi hta‸ pa taw, nawˬ lehˬ awˬ gʼaˇ uiˍ leh kanˉ te puiˉ ve jawˇmawˇ hpeh‸ tuˬ ve hta‸ ngaˬ dawˇ law ve yoˬ. 3Nawˬ ve Gʼuiˬsha nawˬ hta‸ te tcuh laˇ ve hkʼe hkʼa deh‸ te-o. Nawˬ te ve kanˉ hkʼa peu-eˬ uiˍ la da‸ la tuˬ, Moˉseˍ ve awˬliˇtawˇhkawˇ li‸ daw hkʼaw bvuh‸ taˍ ve hkʼe, Gʼuiˬsha ve awˬliˇtawˇhkawˇ hkʼa peu-eˬ ve hta‸ na yuˬ-o‸. 4Nawˬ lehˬ yawˇ ve tawˇ hta‸ na yuˬ ve kʼo, yawˇ ngaˬ hta‸ ka ti‸ te laˇ taˍ peuˬ ve hkʼe, teˇ co peuˬ teˇ co ngaˬ ve awˬ ceuˬ awˬ hkʼaˇ teˇ gʼaˇ peuˬ teˇ gʼaˇ jawˇmawˇ gʼa te kʼai tuˬ yoˬ.
5Teˇ ceuˬ nawˬ hta‸ chi hkʼe kʼoˆ taˉ laˇ gaˇ sheˍ ve yoˬ. Yaˍbaˆ ngaˬ hta‸ hkʼaˬ hkʼe te laˇ ve nawˬ htawˇ dawˇ nawˇ chehˇ tuˬ yoˬ. Yawˇ lehˬ Iˉsaˍreˍlaˆ chaw hui ve ma‸ poˍ lonˉ Neˍraˆ ve yaˇ Aˍbaˍnaˍ leh, Yeˍtaˍ ve yaˇ Aˍmaˍsaˍ hui hta‸ tiˇ pehˍ piˇ ve yoˬ. Mvuhˇmiˬ sho‸ sha‸ ve awˬ yanˇ hkʼaw yawˇ huiˉ maˬ shu hta‸ tiˇ pehˍ piˇ ve hta‸ yawˇ chaˆ taˍ leh, mvuhˇmiˬ kʼaw‸ gawˬ la htaˇ, yawˇ yawˇ huiˉ maˬ hta‸ tiˇ pehˍ piˇ ve yoˬ. Yawˇ lehˬ te‸ chiˉ venˇbaˆ maˇ cawˬ ve chaw hui hta‸ tiˇ pehˍ piˇ ve yoˬ. Yawˇ chi hkʼe te ve pa taw, chi beu‸ ngaˬ gʼa hkanˍ chehˇ ve yoˬ. 6Chi hta‸ pa taw, nawˬ yawˇ hta‸ hkʼaˬ hkʼe te piˇ cawˇ ve hta‸ nawˬ shiˍ taˍ ve yoˬ. Yawˇ hta‸ gawˬ lehˍ taˇ te suh-e tcuh.
7Ya‸ hkʼaˇ, Giˇlaˆ venˇ hkʼaw chehˇ ve Baˍziˆlehˇ ve yaˇ teˇ hpaˍ hta‸ ha kʼaˉ piˇ leh hkʼa deh‸ ga piˇ-oˆ. Awˬ lawn kʼo, nawˬ viˉ paˍ Aˍbaˆsaˍlonˍ ve la‸ sheh hkʼaw gʼa ponˬ tuˬ, ngaˬ hpaw toˇ chehˇ ve teˇ yanˇ, yawˇ hui ngaˬ hta‸ ha‸ shaˉ laˇ ve yoˬ.
8Chi hkʼoˆ ka‸, Beˍyaˍmenˍ mvuhˇmiˬ Baˍhuˆrenˍ venˇ hkʼaw chehˇ ve Geˍraˆ ve yaˇ Sheˍmiˆ htawˇ cawˬ sheˍ ve yoˬ. Ngaˬ Baˍhuˆrenˍ venˇ lo kʼai chehˇ htaˇ, yawˇ ngaˬ hta‸ hkeu laˇ ve yoˬ. Ya‸ hkʼaˇ, Yawˇdanˍ iˉ kaˆ lawˬ paˇ lo ngaˬ yawˇ hta‸ kʼaw‸ hpuˇ da‸ htaˇ, yawˇ hta‸ ngaˬ maˇ tiˇ pehˍ taˬ, teh‸ Gʼuiˬsha ve awˬ meh hkʼaw ka ti‸ te piˇ taˍ ve yoˬ. 9Ya‸ hkʼaˇ, nawˬ yawˇ hta‸ hkʼe leˇ taˇ ponˬ piˇ. Nawˬ yawˇ hta‸ hkʼaˬ hkʼe gʼa te piˇ cawˇ ve nawˬ shiˍ taˍ ve yoˬ. Yawˇ hta‸ tiˇ pehˍ piˇ-oˆ, teh‸ Sawˉlaˆmonˍ hta‸ kʼoˆ piˇ ve yoˬ.
Daˍviˆ suh-e ve
10Oˇ ve hkʼaw‸ nawˉ Daˍviˆ suh-e leh, yawˇ hta‸ Daˍviˆ ve venˇ hkʼaw tuˍ piˇ ve yoˬ. 11Yawˇ lehˬ Iˉsaˍreˍlaˆ chaw hta‸ 40 hkʼaw‸ uˉ peunˍ Heˍbronˍ venˇ hkʼaw 7 hkʼaw‸ uˉ peunˍ leh, Yeˍruˆsaˍlehnˍ venˇ hkʼaw 33 hkʼaw‸ uˉ peunˍ ve yoˬ. 12Sawˉlaˆmonˍlehˬ, yawˇ awˬ pa awˬ tan jawˇmawˇ kʼaw‸ te leh, yawˇ ve mvuhˇmiˬ kʼaw‸ uiˍ la da‸ la ve yoˬ.
Aˍdawˇniˇyaˆ suh-e ve
13Oˇ ve hkʼaw‸ nawˉ, Haˍgiˆ ve yaˇ Aˍdawˇniˇyaˆ lehˬ, Sawˉla‸monˍ ve awˬ e Baˍtaˍsheˍbaˆ geh kʼai ve yoˬ. Nawˬ ca guiˇ la ve laˇ, teh‸ Baˍtaˍsheˍbaˆ yawˇ hta‸ na nyi ve yoˬ.
Yoˬ, ngaˬ ca guiˇ la ve yoˬ. 14Ngaˬ nawˬ hta‸ teˇ ceuˬ na nyi gaˇ ve yoˬ, teh‸ Aˍdawˇniˇyaˆ yawˇ hta‸ kʼoˆ piˇ ve yoˬ.
Aˬ hto‸ ma na nyi gaˇ le, teh‸ Baˍtaˍsheˍbaˆ yawˇ hta‸ kʼoˆ piˇ ve yoˬ
15Oˇ htaˇ Aˍdawˇniˇyaˆ kʼoˆ ve, Ngaˬ jawˇmawˇ hpeh‸ la cawˇ ve nawˬ ka‸ shiˍ taˍ ve yoˬ. Iˉsaˍreˍlaˆ chaw hkʼa peu-eˬ ka‸ chi hkʼe hpeh‸ la tuˬ dawˇ chehˇ ve yoˬ. Ya‸ hkʼaˇ, dawˇ taˍ ve hkʼe maˇ hpeh‸ la law. Gʼuiˬsha a loˍ cawˇ ve hkʼe, ngaˬ nyi paˍ lehˬ jawˇmawˇ kʼaw‸ hpeh‸ la ve yoˬ. 16Chi beu‸ ngaˬ teˇ ceuˬ lawˬ gaˇ ve yoˬ. Nawˬ a ciˉ ga laˇ-oˆ, teh‸ Baˍtaˍsheˍbaˆ hta‸ kʼoˆ piˇ ve yoˬ. Aˬ hto‸ ma lawˬ gaˇ ve le, teh‸ Baˍtaˍsheˍbaˆ yawˇ hta‸ kʼaw‸ na nyi ve yoˬ.
17Aˍdawˇniˇyaˆ kʼoˆ ve, Jawˇmawˇ Sawˉla‸monˍ geh kʼai leh, Shuˆnenˍ venˇ hkʼaw chehˇ ve yaˇ miˇ haˉ Aˍbiˆshehˇ ngaˬ hta‸ pe‸ laˇ tuˬ ca lawˬ laˇ-oˆ. Yawˇ nawˬ hta‸ tawˍ taˍ laˇ tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.
18Oˇ htaˇ Baˍtaˍsheˍbaˆ lehˬ, Ngaˬ jawˇmawˇ geh kʼai leh ca lawˬ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.
19Hkʼe te leh, Baˍtaˍsheˍbaˆ lehˬ awˬ lawn oˇ ve jawˇmawˇ hta‸ ca kʼoˆ piˇ tuˬ kʼai ve yoˬ. Yawˇ ve awˬ e laˬ chehˇ ve hta‸ jawˇmawˇ gʼa mawˬ htaˇ, yawˆ yan ve hkʼaw tu huˉ leh ha‸ yuˬ piˇ ve yoˬ. Yawˇ ve awˬ e awˬ pon kʼaw jaw teˇ maˬ hta‸ yuˬ veu laˇ tcuh leh, yawˇ ve kʼaw jaw la‸ sha paˉ hpawˇ lo teh piˇ ve yoˬ. 20Oˇ htaˇ yawˇ ve awˬ e lehˬ, Ngaˬ nawˬ hta‸ teˇ ceuˬ lawˬ gaˇ ve yoˬ. A ciˉ te laˇ-oˆ, teh‸ jawˇmawˇ hta‸ kʼoˆ piˇ ve yoˬ.
Aˬ hto‸ ma le. Ngaˬ te laˇ tuˬ yoˬ, teh‸ yawˇ ve awˬ e hta‸ kʼaw‸ yaw hkʼaw‸ piˇ ve yoˬ.
21Aˍbiˆshehˇ nawˬ viˉ paˍ Aˍdawˇniˇyaˆ hta‸ heuˆ tcuh piˇ-oˆ, teh‸ jawˇmawˇ hta‸ kʼoˆ piˇ ve yoˬ.
22Oˇ htaˇ jawˇmawˇ kʼoˆ ve, Aˬ hto‸ ma pa taw Aˍbiˆshehˇ yawˇ hta‸ heuˆ tcuh tuˬ nawˬ ca lawˬ la ve le. Ngaˬ ve kʼaw jaw htawˇ, nawˬ yawˇ hta‸ piˇ tcuh gaˇ ve laˇ. Yawˇ lehˬ ngaˬ viˉ paˍ hpeh‸ leh, paw hkuˇ Aˍbyaˍtaˍ leh Yaˍbaˆ yawˇ hta‸ nyi ma cawˇ chehˇ ve yoˬ, teh‸ kʼoˆ ve yoˬ. 23Oˇ ve hkʼaw‸ nawˉ, Sawˉla‸monˍ Gʼuiˬsha ve awˬ meh hkʼaw ka ti‸ te leh kʼoˆ ve, Aˍdawˇ niˇyaˆ ngaˬ geh chi hkʼe ca lawˬ la ve pa taw, ngaˬ yawˇ hta‸ maˇ tiˇ pehˍ ve kʼo, Gʼuiˬsha ngaˬ hta‸ tiˇ pehˍ laˇ piˇ-oˆ. 24Gʼuiˬsha lehˬ ngaˬ hta‸ ngaˬ pa ve kʼaw jaw hkʼoˆ lo mui tcuh laˇ taˍ peuˬ ve yoˬ. Yawˇ ka ti‸ cawˬ taˍ peuˬ ve hkʼe, mvuhˇmiˬ chi ve yawˇ ngaˬ hta‸ leh ngaˬ ve awˬ ceuˬ awˬ hkʼaˇ teˇ hpaˍ hta‸ piˇ laˇ taˍ peuˬ. Aˍdawˇniˇyaˆ lehˬ ya‸ nyi gʼa suh tuˬve yoˬ, teh‸ te‸ chehˇ ve Gʼuiˬsha ve awˬ meh hkʼaw ngaˬ hkanˍ ve yoˬ, teh‸ kʼoˆ ve yoˬ.
25Hkʼe te leh, jawˇmawˇ Sawˉla‸monˍ lehˬ, Aˍdawˇniˇyaˆ hta‸ ca tiˇ pehˍ piˇ tuˬ, Beˍnaˍyaˆ hta‸ tawˇ piˇ ve yoˬ. Oˇ htaˇ, Beˍnaˍyaˆ tawˆ kʼai leh Aˍdawˇniˇyaˆ hta‸ ca tiˇ pehˍ ve yoˬ.
Aˍbyaˍtaˍ hta‸ gʼa‸ kʼoˬ piˇ ve
26Oˇ ve hkʼaw‸ nawˉ, jawˇmawˇ Sawˉla‸monˍ paw hkuˇ Aˍbyaˍtaˍ hta‸ chi hkʼe kʼoˆ piˇ ve yoˬ. Nawˬ chi beu‸ nawˬ ve chehˇ kuiˬ Aˍnaˍtoˆ venˇ lo kʼo‸-e loˬ. Nawˬ htawˇ suh keunˍ ve yoˬ. Ya‸ hkʼaˇ, ngaˬ chi beu‸ nawˬ hta‸ maˇ tiˇ pehˍ laˇ gaˇ sheˍ. Awˬ lawn kʼo, nawˬ lehˬ ngaˬ pa Daˍviˆ geh chehˇ taˍ ve awˬ yanˇ hkʼaw, Gʼuiˬsha ve ka ti‸ shaˉ caˆ ta kʼoˍ hta‸ ha‸ shaˉ leh, yawˇ geh teˇ geh tu‸ hkanˍ haˍ gʼawˇ ve hta‸ gʼa hkanˍ peuˬ ve pa taw yoˬ, teh‸ yawˇ hta‸ kʼoˆ piˇ ve yoˬ. 27Yawˇ oˇ hkʼe kʼoˆ piˇ peuˬ hkʼaw‸ nawˉ, Aˍbyaˍtaˍ hta‸ paw hkuˇ maˇ kʼaw‸ te tcuh ve yoˬ. Hkʼe te leh, yawˇ lehˬ Eˇliˆ leh yawˇ ve awˬ ceuˬ awˬ hkʼaˇ teˇ hpaˍ awˬ lawn Gʼuiˬsha Shiˉlonˍ venˇ hkʼaw kʼoˆ taˍ ve tawˇ hta‸ te biˇ la piˇ ve yoˬ.
28Hpeh‸ la peuˬ ve awˬ lawn chi hkʼa peu-eˬ hta‸ Yaˍbaˆ gʼa kaˇ ve yoˬ. (Yawˇ lehˬ Aˍdawˇniˇ yaˆ hpawˇ chehˇ ve yoˬ. Aˍbaˆsaˍlonˍ hpawˇ maˇ chehˇ) Hkʼe te leh, yawˇ Gʼuiˬsha ve bon yehˬ lo kʼai leh, tuˉ tanˇ kuiˬ hta‸ ca kʼuˉ tiˍ taˍ ve yoˬ. 29Yawˇ oˇ hkʼe te chehˇ ve awˬ hkawˇ hta‸ jawˇmawˇ Sawˉla‸monˍ gʼa kaˇ ve teˇ yanˇ, aˬ hto‸ ma pa taw yawˇ oˇ hkʼe te chehˇ ve awˬ lawn jawˇmawˇ ca na nyi tcuh ve yoˬ. Jawˇmawˇ Sawˉla‸monˍ hta‸ kawˆ ve pa taw, yawˇ oˇ hkʼe te chehˇ ve awˬ lawn Yaˍbaˆ kʼaw‸ yaw hkʼaw‸ piˇ ve yoˬ. Hkʼe te leh, jawˇmawˇ Sawˉ la‸monˍ lehˬ Yaˍbaˆ hta‸ ca tiˇ pehˍ piˇ tuˬ, Beˍnaˍyaˆ hta‸ tawˇ piˇ ve yoˬ. 30Beˍnaˍyaˆ bon yehˬ lo kʼai leh, Nawˬ bon yehˬ hkʼaw tawˆ la tuˬ jawˇmawˇ tawˇ pe‸ laˇ ve yoˬ, teh‸ Yaˍbaˆ hta‸ kʼoˆ piˇ ve yoˬ.
Oˇ htaˇ Yaˍbaˆ lehˬ, Ngaˬ maˇ tawˆ la. Choˬ kaˬ lo suh tuˬ yoˬ, teh‸ Beˍnaˍyaˆ hta‸ kʼoˆ piˇ ve yoˬ.
Yaˍbaˆ kʼoˆ ve tawˇ oˇ ve teˇ hpaˍ, Beˍnaˍyaˆ jawˇmawˇ hta‸ ca kʼaw‸ hto piˇ ve yoˬ.
31Oˇ htaˇ jawˇmawˇ Sawˉla‸monˍ kʼoˆ ve, Yawˇ kʼoˆ ve hkʼe te-o. Yawˇ hta‸ tiˇ pehˍ leh ca tuˍ piˇ-oˆ. Oˇ hkʼe te ve kʼo, te‸ chiˉ venˇbaˆ maˇ cawˬ ve chaw hui hta‸ yawˇ tiˇ pehˍ piˇ taˍ ve venˇbaˆ chi, ngaˬ leh Daˍviˆ ve awˬ ceuˬ awˬ hkʼaˇ teˇ hpaˍ awˬ hkʼoˆ lo kʼaw‸ cawˬ taˍ tuˬ ve maˇ heˆ. 32Ngaˬ pa Daˍviˆ hta‸ maˇ shiˍ tcuh leh yawˇ hkʼawˇ te taˍ ve venˇbaˆ oˇ ve teˇ hpaˍ awˬ tan, Gʼuiˬsha yawˇ hta‸ ciˍ yanˍ piˇ tuˬ yoˬ. Yaˍbaˆ lehˬ te‸ chiˉ venˇbaˆ maˇ cawˬ leh yawˇ a‸ kehˉ cheuˬ ve Iˉsaˍreˍlaˆ chaw hui ve ma‸ poˍ lonˉ Aˍbaˍnaˍ leh Aˍmaˍsaˍ hui hta‸ tiˇ pehˍ piˇ taˍ peuˬ ve yoˬ. 33Yawˇ chi hkʼe te taˍ peuˬ ve pa taw, ciˍ yanˍ tuˬ awˬ ceuˬ yawˇ awˬ to leh yawˇ ve awˬ ceuˬ awˬ hkʼaˇ teˇ hpaˍ awˬ hkʼoˆ lo gaˬ la tuˬ yoˬ. Ya‸ hkʼaˇ, Gʼuiˬsha lehˬ Daˍviˆ ve kʼaw jaw hkʼoˆ mui chehˇ ve yawˇ ve awˬ ceuˬ awˬ hkʼaˇ teˇ hpaˍ hta‸ hkʼaˬ htaˆ ka‸ uiˍ la da‸ la piˇ tuˬ ve yoˬ, teh‸ kʼoˆ ve yoˬ.
34Hkʼe te leh, Beˍnaˍyaˆ Gʼuiˬsha ve bon yehˬ lo kʼai leh, Yaˍbaˆ hta‸ tiˇ pehˍ peuˬ hkʼaw‸ nawˉ, heh puiˉ hkʼaw lo cawˬ ve yawˇ ve yehˬ paˇ lo tuˍ piˇ ve yoˬ. 35Oˇ ve hkʼaw‸ nawˉ, jawˇmawˇ lehˬ Yaˍbaˆ awˬ tan Beˍnaˍyaˆ hta‸ ma‸ poˍ lonˉ te tcuh leh, Aˍbyaˍtaˍ awˬ tan Zaˍdoˆ hta‸ paw hkuˇ te tcuh ve yoˬ.
Sheˍmiˆ suh-e ve
36Oˇ ve hkʼaw‸ nawˉ, jawˇmawˇ lehˬ Sheˍmiˆ hta‸ ca kuˬ tcuh leh, yawˇ hta‸ chi hkʼe kʼoˆ piˇ ve yoˬ. Choˬ kaˬ Yeˍruˆsaˍlehnˍ venˇ hkʼaw yehˬ teˇ maˬ te leh chehˇ taˍ-oˬ. Venˇ awˬ baˬ hpawˇ lo taˇ tawˆ-e. 37Nawˬ lehˬ venˇ chi hkʼaw tawˆ-e leh, Kiˇdronˍ iˉ kaˆ lawˬ coˇ paˉ lo kʼai ve kʼo, nawˬ gʼa suh tuˬ yoˬ, teh‸ yawˇ hta‸ kʼoˆ piˇ ve yoˬ.
38Jawˇmawˇ-oˬ, nawˬ kʼoˆ ve hkʼe te tuˬ yoˬ, teh‸ Sheˍmiˆ yawˇ hta‸ kʼaw‸ yaw hkʼaw‸ piˇ ve yoˬ. Hkʼe te leh, yawˇ Yeˍruˆsaˍlehnˍ venˇ hkʼaw awˬ yanˇ maw chaweh chehˇ taˍ ve yoˬ.
39Ya‸ hkʼaˇ, awˬ hkʼaw‸ nawˉ shehˆ hkʼaw‸ hkʼe gaˬ leh, Sheˍmiˆ ve aw ceˬ paˍ nyiˇ gʼaˇ lehˬ, Gaˍtaˆ mvuhˇmiˬ hta‸ uˉ peunˍ chehˇ ve Maˍkaˍ ve yaˇ Aˍhkiˆ geh ca hpaw chehˇ kʼai ve yoˬ. Yawˇ huiˉ maˬ Gaˍtaˆ mvuhˇmiˬ hkʼaw chehˇ taˍ ve hta‸ Sheˍmiˆ gʼa kaˇ ve teˇ yanˇ, 40yawˇ ve piˉ laˬ hta‸ ciˇ leh jawˇmawˇ Aˍhkiˆ geh kʼai ve yoˬ. Yawˇ yawˇ huiˉ maˬ hta‸ gʼa mawˬ leh, aˉ hkʼaw lo kʼaw‸ shiˍ hkʼaw‸ veu laˇ ve yoˬ. 41Sheˍmiˆ venˇ hkʼaw tawˆ kʼai ve awˬ hkawˇ hta‸ jawˇmawˇ Sawˉla‸monˍ gʼa kaˇ ve teˇ yanˇ, 42yawˇ hta‸ ca kuˬ tcuh leh chi hkʼe kʼoˆ piˇ ve yoˬ. Yeˍruˆsaˍlehnˍ venˇ hkʼaw maˇ gʼa tawˆ-e tuˬ, ngaˬ nawˬ hta‸ Gʼuiˬsha ve awˬ meh hkʼaw hkanˍ tcuh taˍ peuˬ ve yoˬ. Nawˬ tawˆ-e ve kʼo gʼa suh tuˬ yoˬ, teh‸ ngaˬ nawˬ hta‸ shaˍ ti‸ piˇ taˍ peuˬ ve yoˬ. Ngaˬ kʼoˆ ve hkʼe nawˬ na yuˬ tuˬ yoˬ, teh‸ nawˬ hkanˍ taˍ ve maˇ heˆ laˇ. 43Hkʼe te kʼo, aˬ hto‸ ma pa taw nawˬ ngaˬ ve tawˇ hkawˇ hta‸ maˇ na yuˬ ve le. 44Ngaˬ pa Daˍviˆ hta‸ nawˬ hkʼaˬ hkʼe te ya‸ kuiˬ cawˬ taˍ ve hta‸ nawˬ shiˍ chehˇ ve yoˬ. Nawˬ oˇ hkʼe te ve pa taw, Gʼuiˬsha nawˬ hta‸ ciˍ yanˍ laˇ tuˬ yoˬ. 45Ya‸ hkʼaˇ, yawˇ lehˬ ngaˬ hta‸ awˬ bon na‸ laˇ leh, Daˍviˆ ve mvuhˇmiˬ hta‸ co co yeˬ chehˇ piˇ lawˬ tuˬ ve yoˬ, teh‸ yawˇ hta‸ kʼoˆ piˇ ve yoˬ.
46Yawˇ oˇ hkʼe kʼoˆ peuˬ hkʼaw‸ nawˉ, Sheˍmiˆ hta‸ tiˇ pehˍ tuˬ Beˍnaˍyaˆ hta‸ tawˇ piˇ ve yoˬ. Hkʼe te leh, Beˍnaˍyaˆ tawˆ kʼai leh Sheˍmiˆ hta‸ tiˇ pehˍ piˇ ve yoˬ. Chi teˇ pawˆ, jawˇmawˇ Sawˉla‸monˍlehˬ, mvuhˇmiˬ hta‸ hkʼa deh‸ uˉ peunˍ chehˇ taˍ ve yoˬ.
Currently Selected:
1 Jawˇmawˇ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.