1 Kawˇrenˍhtuˆ li‸ 11
11
1Hkri‸ te ve hkʼa shuˍ shuˍ ngaˬ te ve hkʼe, nawˬ hui htawˇ ngaˬ te ve hkʼa shuˍ shuˍ te-o.
Yaˇ miˇ teˇ hpaˍ oˉ kʼoˍ hta‸ beh ve awˬ lawn
2Nawˬ hui lehˬ, teˇ ceuˬ le le awˬ hkʼaw lo ngaˬ hta‸ dawˇ nawˇ leh, ngaˬ nawˬ hui hta‸ awˬ liˇ awˬ hkʼaˇ maˍ laˇ ve hkʼe nawˬ hui na yuˬ leh te kʼai ve pa taw, ngaˬ nawˬ hui hta‸ chiˇ mvuh ve yoˬ. 3Ya‸ hkʼaˇ, ngaˬ nawˬ hui hta‸ chi hkʼe shiˍ tcuh gaˇ ve yoˬ. Hawˉ hkʼaˆ teˇ gʼaˇ le le ve oˉ kʼoˍ lehˬ Hkri‸ yoˬ. Yaˇ miˇ ve oˉ kʼoˍ lehˬ hawˉ hkʼaˆ yoˬ. Hkri‸ ve oˉ kʼoˍ lehˬ Gʼuiˬsha yoˬ. 4Hawˉ hkʼaˆ teˇ gʼaˇ gʼaˇ, bon lawˬ htaˇ maˇ kʼoˆ, bon maˍ htaˇ maˇ kʼoˆ, oˉ kʼoˍ hta‸ beh ve kʼo, a shu yawˇ ve oˉ kʼoˍ hta‸ awˬ me‸ awˬ hponˇ te luˬ ve yoˬ. 5Ya‸ hkʼaˇ, yaˇ miˇ teˇ gʼaˇ gʼaˇ bon lawˬ htaˇ maˇ kʼoˆ, bon maˍ htaˇ maˇ kʼoˆ, oˉ kʼoˍ hta‸ maˇ beh ve kʼo, a shu yawˇ ve oˉ kʼoˍ hta‸ awˬ me‸ awˬ hponˇ te luˬ ve yoˬ. Yawˇ ve oˉ kʼoˍ hta‸ maˇ beh ve kʼo, yawˇ ve oˉ kʼoˍ chiˇ baˬ taˍ ve hkʼe yoˬ. 6Awˬ lawn kʼo, yaˇ miˇ lehˬ oˉ kʼoˍ hta‸ maˇ beh ve kʼo, uˉ hkeh mvuh nuˆ baˬ cawˇ ve yoˬ. Ya‸ hkʼaˇ, uˉ hkeh mvuh nuˆ baˬ ve maˇ kʼoˆ, oˉ kʼoˍ chiˇ baˬ ve maˇ kʼoˆ, yaˇ miˇ awˬ pon ya‸ taw tuˬ hpeh‸ ve kʼo, yawˇ ve oˉ kʼoˍ hta‸ beh taˍ piˇ lawˬ-o‸. 7Hawˉ hkʼaˆ lehˬ, Gʼuiˬsha ve awˬ ho‸ awˬ han leh awˬ me‸ awˬ hponˇ hpeh‸ ve pa taw, oˉ kʼoˍ hta‸ beh maˇ cawˇ ve yoˬ. Yaˇ miˇ lehˬ, hawˉ hkʼaˆ ve awˬ me‸ awˬ hponˇ hpeh‸ ve yoˬ. 8Awˬ lawn kʼo, hawˉ hkʼaˆ hta‸ yaˇ miˇ lo yuˬ te taˍ ve maˇ heˆ. Yaˇ miˇ hta‸ hawˉ hkʼaˆ lo yuˬ te taˍ ve yoˬ. 9Chi hkʼoˆ ka‸, hawˉ hkʼaˆ lehˬ yaˇ miˇ awˬ pon hpanˍ taˍ ve maˇ heˆ. Yaˇ miˇ lehˬ hawˉ hkʼaˆ awˬ pon hpanˍ taˍ ve yoˬ. 10Hkʼe te leh mvuhˇ naw ma tcuh yaˇ hui hta‸ pa taw, yaˇ miˇ lehˬ a shu yawˇ ve oˉ kʼoˍ hta‸ beh taˍ cawˇ ve yoˬ. 11Ya‸ hkʼaˇ, Jawˇmawˇ Yeˍsuˆ awˬ hkʼaw lo yaˇ miˇ lehˬ hawˉ hkʼaˆ hta‸ loˍ leh, hawˉ hkʼaˆ htawˇ yaˇ miˇ hta‸ loˍ ve yoˬ. 12Awˬ lawn kʼo, yaˇ miˇ lehˬ hawˉ hkʼaˆ lo hpeh‸ la ve hkʼe, hawˉ hkʼaˆ htawˇ yaˇ miˇ awˬ hkʼaw lo paw la ve yoˬ. Chi hkʼoˆ ka‸, awˬ ceuˬ hkʼa peu-eˬ ve lehˬ, Gʼuiˬsha lo hpeh‸ la ve yoˬ.
13Yaˇ miˇ lehˬ, oˉ kʼoˍ hta‸ maˇ beh leh Gʼuiˬ sha hta‸ bon lawˬ keunˍ maˇ keunˍ ve hta‸ nawˬ hui hkʼaˇ nawˬ hui dawˇ nyi-o. 14Hawˉ hkʼaˆ lehˬ, uˉ hkeh mvuh hu ve kʼo, yawˇ awˬ pon ya‸ taw tuˬ hpeh‸ ve teh‸, awˬ suhˍ awˬ shaˍ hpawˇ ve awˬ liˇ ka‸ nawˬ hui hta‸ maˍ laˇ ve maˇ heˆ laˇ. 15Ya‸ hkʼaˇ, yaˇ miˇ lehˬ uˉ hkeh mvuh hu ve kʼo, yawˇ ve awˬ me‸ awˬ hponˇ hpeh‸ ve yoˬ. Awˬ lawn kʼo, yawˇ ve uˉ hkeh mvuh lehˬ, yawˇ hta‸ beh tuˬ awˬ pon piˇ taˍ ve yoˬ. 16Ya‸ hkʼaˇ, chaw teˇ gʼaˇ gʼaˇ tawˇ gʼawˬ da‸ gaˇ ve kʼo, ngaˬ hui maˇ kʼoˆ, Gʼuiˬsha ve Hkri‸ yaˇ awˬ moˍ teˇ hpaˍ maˇ kʼoˆ, awˬ kaˍ awˬ nu awˬ liˇ maˇ cawˬ.
Jawˇmawˇ Yeˍsuˆ ve pawehˇ caˇ htaˇ te maˇ cawˇ ve teˇ hpaˍ awˬ lawn
17Ya‸ hkʼaˇ nawˬ hui hpawnˬ da‸ ve teˇ yanˇ, leuˉ leh da‸ la tuˬ awˬ pon hpawnˬ da‸ ve maˇ heˆ. Leuˉ leh luˬ kʼai tuˬ awˬ pon hpawnˬ da‸ ve pa taw, tawˇ piˇ laˇ tuˬ ve chi teˇ hpaˍ awˬ hkʼaw lo ngaˬ nawˬ hui hta‸ chiˇ mvuh ve maˇ heˆ. 18Awˉ lawˉ peuˇ ve teˇ ceuˬ lehˬ, nawˬ hui Hkri‸ yaˇ awˬ moˍ hpawnˬ da‸ ve awˬ hkʼaw lo, nawˬ hui awˬ moˍ shawˍ da‸ pehˬ da‸ chehˇ ve hta‸ ngaˬ gʼa kaˇ ve yoˬ. Ngaˬ kaˇ ve hkʼe cawˇ ve yoˬ hehˉ teh‸ ngaˬ yonˍ ve yoˬ. 19Awˬ lawn kʼo, nawˬ hui awˬ hkʼaw lo da‸ ve chaw teˇ hpaˍ hkʼa tawˍ lehˆ tawˆ la tuˬ, awˬ moˍ fuiˍ da‸ pehˬ da‸ ve teˇ ceuˬ gʼa cawˬ ve yoˬ. 20Nawˬ hui hpawnˬ da‸ ve teˇ yanˇ, Jawˇmawˇ Yeˍsuˆ ve pawehˇ hta‸ caˇ tuˬ awˬ pon hpawnˬ da‸ ve maˇ heˆ. 21Awˬ lawn kʼo, nawˬ hui teˇ gʼaˇ peuˬ teˇ gʼaˇ, a shu yawˇ ve caˇ tuˬ hta‸ a shu yawˇ hkʼaˇ yawˇ awˉ lawˉ caˇ sheˬ ve yoˬ. Hkʼe te leh, teˇ gʼaˇ kʼo awˍ meu‸ leh, teˇ gʼaˇ kʼo a pehˉ meuˇ gʼuiˬ dawˬ bvuhˆ ve yoˬ. 22Hkʼaˬ hkʼe le. Nawˬ hui caˇ kuiˬ dawˬ kuiˬ awˬ pon a shu yawˇ ve yehˬ maˇ cawˬ leh laˇ. Maˇ heˆ kʼo, nawˬ hui Gʼuiˬ sha ve Hkri‸ yaˇ awˬ moˍ hta‸ maˇ shawˍ maˇ caˆ te leh, haˍ ve gʼawˇ ve chaw hui hta‸ ya‸ taw piˇ lawˬ ve laˇ. Ngaˬ nawˬ hui hta‸ hkʼaˬ hkʼe gʼa kʼoˆ tuˬ ve le. Chi hkʼe te ve awˬ hkʼaw lo ngaˬ nawˬ hui hta‸ chiˇ mvuh tuˬ ve laˇ. Ngaˬ nawˬ hui hta‸ chiˇ mvuh laˇ tuˬ maˇ heˆ.
Jawˇmawˇ Yeˍsuˆ ve pawehˇ caˇ ve awˬ liˇ hta‸ Yeˍsuˆ piˇ ve awˬ lawn
23Awˬ lawn kʼo, nawˬ hui hta‸ ngaˬ maˍ laˇ peuˬ ve teˇ hpaˍ lehˬ, ngaˬ Jawˇmawˇ Yeˍsuˆ geh gʼa taˍ ve yoˬ. Jawˇmawˇ Yeˍsuˆ lehˬ, shu yawˇ hta‸ chiˇ a‸ piˇ ve teˇ haˉ htaˇ, hkaoˍmonˇ hta‸ yuˬ leh, 24awˬ bon hta‸ chiˇ mvuh peuˬ hkʼaw‸ nawˉ, yawˇ hkaoˍmonˇ hta‸ hkʼeh‸ leh kʼoˆ ve, Chi lehˬ nawˬ hui awˬ pon ngaˬ ve awˬ to hpeh‸ ve yoˬ. Ngaˬ hta‸ dawˇ nawˇ tuˬ chi hta‸ te-o teh‸ kʼoˆ ve yoˬ. 25Yawˇ hui mvuhˇ haˉ awˍ caˇ peuˬ hkʼaw‸ nawˉ, chi hkʼa shuˍ shuˍ yawˇ kawˆ hta‸ yuˬ leh kʼoˆ ve, Kawˆ chi lehˬ, ngaˬ ve awˬ suhˍ awˬ hkʼaw lo ka ti‸ shaˉ caˆ awˬ suhˉ hpeh‸ ve yoˬ. Nawˬ hui dawˬ ve teˇ pawˆ le le ngaˬ hta‸ dawˇ nawˇ tuˬ te-o teh‸ kʼoˆ piˇ ve yoˬ.
26Awˬ lawn kʼo, nawˬ hui hkaoˍmonˇ chi hta‸ caˇ leh, kawˆ chi hta‸ dawˬ ve teˇ pawˆ le le, Jawˇmawˇ Yeˍsuˆ kʼaw‸ ya‸ la htaˇ hkʼa gaˬ, yawˇ suh ve teˇ ceuˬ hta‸ nawˬ hui hpeu‸ maˍ piˇ ve yoˬ.
Maˇ keunˍ ve awˬ hkʼaw lo Jawˇmawˇ Yeˍsuˆ ve pawehˇ caˇ ve awˬ lawn
27Hkʼe te leh, chaw hkʼaˬ ve teˇ gʼaˇ maˇ kʼoˆ, maˇ keunˍ ve awˬ hkʼaw lo hkaoˍmonˇ hta‸ caˇ leh Jawˇ mawˇ Yeˍsuˆ ve kawˆ hta‸ dawˬ ve kʼo, Jawˇmawˇ Yeˍsuˆ ve awˬ to leh awˬ suhˍ hta‸ yawˇ te ya‸ ve yoˬ. 28Chaw teˇ gʼaˇ le le, a shu yawˇ awˬ to hta‸ lawˇ nyi peuˬ hkʼaw‸ nawˉ, hkaoˍmonˇ hta‸ caˇ leh kawˆ hta‸ dawˬ cawˇ ve yoˬ. 29Awˬ lawn kʼo, hkʼaˬ ve teˇ gʼaˇ maˇ kʼoˆ, Jawˇmawˇ Yeˍsuˆ ve awˬ to hta‸ maˇ pehˬ maˇ fuiˍ gʼa leh caˇ ve dawˬ ve kʼo, a shu yawˇ awˬ to awˬ hkʼoˆ ciˍ yanˍ ve gaˬ la tuˬ yawˇ caˇ ve dawˬ ve yoˬ. 30Chi hta‸ pa taw, nawˬ hui awˬ hkʼaw lo chaw maˇ maˇ awˬ gʼaˇ nuˇ leh naˬ chehˇ ve yoˬ. Chaw laiˉ gʼaˇ htawˇ suh peuˬ ve yoˬ. 31Ngaˬ hui lehˬ, a shu yawˇ awˬ to hta‸ hkʼa deh‸ lawˇ nyi ve kʼo, ciˍ yanˍ ve hta‸ maˇ gʼa hkanˍ. 32Jawˇmawˇ Yeˍsuˆ ngaˬ hui hta‸ suhˉ jehˬ laˇ ve teˇ yanˇ, miˬguiˬ yaˇ hui geh teˇ geh ciˍ yanˍ ve hta‸ maˇ gʼa hkanˍ tuˬ, yawˇ ngaˬ hui hta‸ jaw‸ maˍ laˇ ve yoˬ.
33Hkʼe te leh, ngaˬ ve awˬ viˉ awˬ nyi teˇ hpaˍ-oˬ, caˇ ve dawˬ ve awˬ pon nawˬ hui teˇ geh hpawnˬ la ve teˇ yanˇ, teˇ gʼaˇ leh teˇ gʼaˇ hkʼa deh‸ law da‸-o‸. 34Chaw teˇ gʼaˇ gʼaˇ awˍ meu‸ ve kʼo, yawˇ ve aˉ hkʼaw lo caˇ cawˇ ve yoˬ. Maˇ heˆ kʼo, nawˬ hui hpawnˬ da‸ ve lehˬ, ciˍ yanˍ ve hta‸ gʼa hkanˍ tuˬ awˬ pon hpeh‸ tuˬ yoˬ. Awˬ kaˍ awˬ nu ve awˬ lawn teˇ hpaˍ lehˬ, ngaˬ nawˬ hui geh laˬ htaˇ hkʼa deh‸ maˍ laˇ gu laˇ tuˬ yoˬ.
Currently Selected:
1 Kawˇrenˍhtuˆ li‸ 11: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.