ROMA 6

Nə́ pfʉ ba nə́ vɔ̀k po Yeso Kristo

1A po'o bɑ da'tə́ gɑ kɑ? Pɑ gɔ wuŋ pɑ nthʉm mhɔ tə gho' yɔm a? 2Gɛ̌! Cwə yə a bɑ pɑ̌ pfʉ́ nə mhɔ a, pɑ̌ gɔ piŋ vɔk nthʉm mhɔ m gɑ́ kɑ? 3Kɑ pǒ bɑwə dʉɔnyə gɑ guŋ yɔk pɑ̌ awɛ pyə́ pɑ lə kwishyə m̀ nə Yeso Kristo a, pɑ lə ŋkwishyə po'o nə vʉ́ é? 4A shyə m nə kwishyə, nə vʉ e, bɑ pú lé nthə̀ŋ wɔk pa pú, po'o gɑ́ pa' Kristo lə yǎm nə vʉ̌ a, nə́ nə ghu' Tá a, ba wɔk pɑ̀ yɔk pɑ̀ vɔ́k m nə vɔ̀k sə́. 5Nə pa' a pɑ gɑ pɑ lě nthamtə nə e nthʉm vʉ́ é, bɑ pa pú gɔ sɔ' piŋ tamtə pɑ́ po'o nthʉm nə yam nə vʉ́ e. 6Pɑ cəŋtə ju' nwə yə̌ŋ: A bɑ pu lə ŋkham e pu a bvo mo yə a bɑ nə pɑ̀ a thə́ bɛnyəpɛnyə po'o gɑ nɑ́ mhɔ yɔk pɑ̀ sa'tə, tə́ pɑ lə piŋ bɑ ŋkwɔ mhɔ pɑ̀. 7Nə pa' mo yə ě pfʉ́ a tə́ jɑ ŋkwɔ mhɔ̀ pɑ̀. 8Tə́ a bi a pɑ bɑ pa Kristo pəmtə npfʉ́ bɑ pɑ̌ biŋ gɑ ba pa pu gɔ sɔ' pəmtə vɔk. 9Pɑ bɑ̀ pɑ̌ cəŋtə jyə gɑ́ Yeso yam nə vʉ̌, e lə ghɔ tə́ piŋ pfʉ́ pɑ́; nə pa' vʉ̌ ka piŋ gə sɔm gʉ' nə e. 10Nə pa' e nə pfʉ̌ po'o, pfʉ́ m nə mhɔ ŋkwi cʉ̌m; biŋ bvɔk cwəlɔ bɑ bvɔk m nə Si. 11Ba wɔ yɔ po sɛ gɑ̀ po lě pfʉ́ nə mhɔ, biŋ bvɔk m nə Si shyə m nə Yeso Kristo.

12Pa' ǎ pɑ po'o a, ka mhɔ piŋ sa' nɑ tsɔ tsyə a bɑ̀ nɑ vʉ̌ a, gə po pɑ̀ ju'nyə bi e nə tsə ghi'nyə tsyə. 13Ka po piŋ hɑ bú mɔ bi mhɔ pa' tsə shù msɔkmsɔk mnwə myə a; po hɑ bú mɔ nə gə tsə shù nwə dəŋdəŋ, bɑ fa' bi Si pa' pɔ pyə wap yam nə vʉ̌, bvɔk a. 14Nə pa' mhɔ tə gɔ sɔ' kwi' ghə sɔm gʉ' nə po pɑ̀, nə kɑlɑ́ po tə́ jɑ m nə nwə mco' pɑ, po bɑ m nə gho'.

Ŋkwɔ nwə dəŋdəŋ

15Tə́ kɑ́? Tə jyə gɑ́ pɑ gɔ hɔnwə pa' pɑ tə́ jɑ m nə nwə mco' a lə́? Pa' pɑ bɑ m nə gho' a lə́? Gɛ̌! 16Po ka zhyə gɑ po piŋ bi mo gɑ po gɔ fa' bi e pa' ŋkwɔ a, pɑ yu'nyə e, bɑ po bɑ mkwɔ mo yə́ po ju'nyə e a, kɑ mkwɔ mhɔ myə a dɑ mo gɔ nə vʉ̌ a, kɑ nə yu'nyə yə a dɑ mo gɔ nə nwə dəŋdəŋ a? 17Pɑ hɑ gho'tə Si: Po lə́ bɑ mkwɔ bi mhɔ, da' gɑ po lě ju'nyə nə guŋ tʉm tsɔ awɛ nə́ ywə yə pu lə zhi'tə wɔ, nthak wɔ nə a. 18Po lě nthəm ŋkwɔ bi mhɔ, ji ŋkwɔ nwə dəŋdəŋ. 19Gɑ bɑwə gɔm pɑ ghɔm monəŋthə́ bi po, nə pa' a bɑ pǒ pwa. Dəŋdəŋ pa' a bɑ po lě hɑ bú mɔ pa' mkwɔ a bi nwə cwəpuŋ ba nə paknyə yə a gə pu tʉɔthə́ bi Si a, cwəlɔ po hɑ bú mɔ pa' mkwɔ a nə nə fa' fà' dəŋdəŋ yə a dɔnyə mo a. 20Cwə yə po lə bɑ mkwɔ bi mhɔ a, nwə dəŋdəŋ pɑ bɑ a ka ghə sɔm shɛ nə́ po. 21Po lě jám ma nthi nthɔ̌m? So bɑwə tyɛ' ɔ ŋkhú wɔ nə, nə pa' a gɔ miŋ nə vʉ̌. 22Tə́ cwəlɔ yə a bɑ po təm ŋkwɔ bi mhɔ biŋ shʉ' mkwɔ bi Si a, pǒ jam nthɔm myə a gɔ m nə nə lɔnyə mo a, myə a gɔ miŋ nə vɔk mama a. 23Nə pa' mcwɔ'fa' mhɔ bɑ vʉ́; tə ywə yə Si hɑ bi mo pɑ́ néné a a bɑ vɔk mama shyə m nə Yeso Kristo Cyəpɔ yɔk pɑ̀.

Currently Selected:

ROMA 6: NTGomala

Highlight

Copy