ROMA 3

Guŋ pɔ awɛ bɑ wap le hɔ mco'

1Yə Yudea bɑ e lɑ kɑ́ shyə pyə shɑ pɔ? Nə vo mò ŋkwitə nə kɑ ywə? 2Wap bɑ m dzə̀! Nə pa' pu lə dəŋdzə̀ hɑ nə ghə pu zhyə Si m bi pú. 3Po'o m gɑ́ kɑlə́? A pɑ gɑ́ shɑ pɔ nə pu lě tə pɑ nyənyɔ bɑ a gɔ kɔ nə pɑ nyənyɔ Si a? 4Gɛ̌! Pɑ gɔ zhyə gɑ Si bɑ nyənyɔ, guŋ pɔ awɛ pɑ mcwanwə dəŋdəŋ pa' a bɑ pu və gɑ:

A buŋ gɑ pu zhyə o pa' mo dəŋdəŋ a nə mghɔm mǔ,

bi a pu pɑ fyɛ' o o tsʉ́.

5Tə a bi a yɔk pɑ nwə nə cyətə pɑ dəŋdəŋ ká' nwə dəŋdəŋ Si hɑ thə, gɑ gɔ ghɔm gɑ kɑ̀? Si tə shyə́tə pɑ dəŋdəŋ nə pɑ̀ nə lɑ yɛluŋ é shwɔ wɔk pɑ a? Gɑ gɔm po'o m nə pa' monəŋthə́ nə jɔ a. 6Tə́ gɛ̌! Nə pa' a pɑ po'o bɑ Si gɔ sɔ' fyɛ' dzʉ́ m gɑ́ kɑ? 7Tə́ à cyə m̀ nə́ mcwanwə mə̌ nyənyɔ Si la'tə pa' e bɑ́ a nə ghu'tə é bɑ pu gɔ piŋ nyəŋ shɛ thə m pa' gɛ mhɔ a m gɑ́ kɑ? 8Tə nwə kɑ́ pɑ lə ghə nwə cwəpùŋ tə nwə pɑpuŋ təm pa' shɑ pɑ tɛmnɛ gɔm a? Nə nyəŋ shɛ thə pɔ bɔ bɑ ǎ ku' nə pú. 9Tə́ kɑ? Wɔk pɑ pɑ Yudea bɑ pɑ̌ pìŋ gə kɑ nə nə́ shyə pyə shɑ pɔ? Tə́ sɔmywə pɑ́! Nə pa' á bɑ pɑ tsə́ yɔ̌ gɑ́ guŋ pɑ Yudea awɛ pa' pɑ Grikia a bɑ pɑ mghɛ mhɔ. 10Dəŋdəŋ pa' a bɑ pu və gɑ́:

Sɔmmo dəŋdəŋ tə bɑwə pɑ́, bǎ ta' mo.

11Sɔm jyənwə tə̌ wə́ pɑ́,

bǎ ta' mo

nə cə́ŋ Si.

12Wap bɑ wap hɔ məjyə guŋ yap awɛ, bɑ

wap pɔptə awɛ.

Sɔmmo nə pu lə pɑ gə nwə pɑpuŋ

bǎ ta' mo.

13Nthʉm ghak yap bɑ pa' thəsì yə pu ghyɛ' a:

Wap dɑ tʉm yap dzə mfʉ̀m

jəŋ nɔk mtìŋ pɑ́ nə mkwɔptəshwə̀ map.

14Shwə yáp bɑ ǎ lo nə mdo pu a

nwə dzə́zə́.

15Mkwə map ŋkhʉdʉ́ nə pfyə mcyə;

16nə sim pu a ghəghʉɔ bɑ nə

məjyə yap.

17Bɑ wap ka zhyə tsap məjyə hwitə.

18Sɔm nə pwɔk Si tə bɑ dzə mnyə map pɑ́.

19A nəŋ nə pɑ̌ po'o bɑ pɑ zhyə́ gɑ ywə yə́ mco' gɔm a, a gɔm bi pɔ pyə wap bɑ nthʉm mco' a, po'o gɑ́ guŋ mshwə pɔ awɛ cɑ, tə pu zhyə gɑ guŋ dzʉ̌ awɛ bɑ ǎ hɔnwə dzə̌ Si. 20A ywə yə́ a gə tə sɔmmo lə ghɔ sɔ' pɑ dəŋdəŋ dzə e, cyə m nə mfa' mco' a; nə pa' mco' gə mo zhyə pɑ mhɔ.

Nwə dəŋdəŋ yə a fɑ nə mco' a

21Da' gɑ́ cwəlɔ, a bɑ pu zhyə nwə dəŋdəŋ Si, la' pu cyə ba m nə mco'; mco' pu a mghɔm ghɔm Si bɑ mkwǐnthɛ myə. 22A bɑ nwə dəŋdəŋ Si shyə m nə piŋnthʉm nə Yeso Kristo bi guŋ pɔ pyə wap biŋ a. Wap bɑ pɑ ta' ywə. 23Guŋ yap awɛ bɑ wap lě hɔnwə, la' ghu'tə Si yɑ bi pú. 24Da' gɑ bɑ a lé shyə m nə pa' Yeso Kristo lə kwi pɔ a pu lɑ wap gə pɔ dəŋdəŋ, tə wap hɑ sɔmywə, shyə m nə gho' Si. 25Si bɑ e lě dɑ e nuŋpwɔ' shyə m nə mcyə myə, shyə m nə piŋnthʉm, nə nə́ da'tə ywə yə nwə dəŋdəŋ lə bɑ ya a, pa' e lə tak mhɔnwə pɔ nəŋ tə nyəŋ shɛ thə pu nə cwə dzə, cwə yə e lə bɑ e tɔm tʉm tsyə a. 26E da'tə nwə dəŋdəŋ e cwəlɔ, po'o gɑ e pɑ dəŋdəŋ tə jap mo yə e bvɔk m nə piŋnthʉm nə Yeso Kristo a dəŋdəŋ. 27Tə bi a pɑ mo nə ŋa' nɑ e a? Gɛ̌, shyə m nə̀ kɑ? M nə mfa' lə? Gɛ̌, da' m nə piŋnthʉm. 28Pyə zhyə gɑ mo shyə m nə́ piŋnthʉm tə bɑ dəŋdəŋ. E tə shyə m nə fa' mco' pɑ. 29Kɑ Si bɑ pɑ da' Si pɑ Yudea? E tə́ bɑ ba Si pɑ tə pɑ pɑ́ Yudea a? Bɑkɔ! E bɑ ba Si pɑ tə pɑ́ pɑ Yudea 30nə pa' Si bɑ pɑ yɑmu' yə e dɑ pɔ pyə pu vo wap a ba pɔ pyə pu ka vo wap a nə gə pɔ dəŋdəŋ a. 31Tə pɑ dɑ piŋnthʉm nthé də̀ŋ nə mco' a? Gɛ̌, pɑ nyəŋ pɑ dəŋ nə mco'.

Currently Selected:

ROMA 3: NTGomala

Highlight

Copy