Farillaaji Lewi'en 25

Hitaande siwtorde

(Tooktaaki Tawreeta 15:1-11)

1Jawmiraawo umri Muusa dow hooseere Sina, 2o wi'a Isra'iila'en ni'i: “To on nasti lesdi ndi Jawmiraawo tammi hokkugo on, nden kam lesdi boo heɓa siwtaare. 3Sey on aawa gese mon, on calta inabooje mon, on mooɓta ko lesdi fuɗnanta on duuɓi joweego. 4Ammaa hitaande joweeɗiɗawre, ɗum siwtorde ngam lesdi. Hitaande man Jawmiraawo jeyi. Taa on aawa gese mon, taa on calta inabooje mon. 5Taa on mooɓta alkamaari gariiri#25:5 Alkamaari gariiri ɗum alkamaari ndi aawaakaa, ndi fuɗi non., taa on teɓa ɓiɓɓe inabooje mon boo. Ɗum hitaande siwtorde ngam lesdi. 6Saa'i lesdi ɗon siwto, ndi fuɗnanan on nyaamdu, onon bee maccuɓe mon e horɓe mon e huuwooɓe mon e jananɓe wonduɓe bee mooɗon, 7non boo ngam dabbaaji mon e kuuje ladde nder lesdi mon#Gurt 23:10-11..”

Hitaande yaafuye

8“Lime duuɓi joweeɗiɗi nde joweeɗiɗi, waato duuɓi cappanɗe nayi e joweenayi. 9Nyannde sappoore nder lewru joweeɗiɗaɓru, waato nyalaade ittuki hakkeeji, sey on umra fuufugo luwal nder lesdi mon fuu. 10Cene hitaande cappanɗe jowaɓre nde'e, ngooyne dimɗinki ngam yimɓe lesdi fuu. Nde laatano on hitaande dimɗineeki. Koo moy soorri maral mum, heɓtan ngal. Mo laati maccuɗo malla korɗo boo, wartan haa lenyol mum. 11Hitaande cappanɗe jowaɓre nde'e laatano on hitaande dimɗineeki. Taa on aawa gese mon, taa on mooɓta alkamaari gariiri, taa on teɓa ɓiɓɓe inabooje mon boo. 12Hitaande man fuu laatano on hitaande dimɗineeki, on nyaama ko fuɗata haa gese tan.

13Nder hitaande dimɗineeki nde'e, koo moy mon heɓtan maral mum. 14Ngam man, to a soorri Isra'iilaajo ngesa malla to a soodi ngesa haa maako, taa mbaɗindire rikici. 15To on ɗon ta'a saman maaka, lime duuɓi caaliiɗi ɓaawo hitaande dimɗineeki e duuɓi dimanɗi nyaamdu luttuɗi haa hitaande man yaalto. 16To limgal duuɓi man ɗuuɗi, saman ngesa ɓesdoto, to ngal famɗi, saman maaka ustoto, ngam on coodan limgal duuɓi dimanɗi nyaamdu. 17Taa goɗɗo waɗa keeddiɗɗum rikici. Kule Allah mooɗon, ngam min woni Jawmiraawo, Allah mooɗon.”

Nyaamdu nder hitaande siwtorde

18“Ɗowtane farillaaji e kiitaaji Jawmiraawo fuu, ngam haa on njooɗo jam nder lesdi mon. 19Lesdi riman ƴaamle ngam on nyaama, on kaara, on njooɗo ton bee hoolaare. 20Teema goɗɗo ƴaman: Ɗume en nyaamata nder hitaande joweeɗiɗawre? Ndaa, en aawataa, en mooɓtataa ƴaamle gese. 21Nane kadi, Jawmiraawo barkiɗinan lesdi nder hitaande joweego'oore, haa ndi rima nyaamdu he'anndu deydey duuɓi tati. 22To on aawi nder hitaande joweetataɓre, on tokkoto nyaamugo ko keɓɗon nder hitaande joweego'oore. Nyaamdu he'an haa hitaande joweenayaɓre fuɗɗa.”

Coottuki maral

23“On potaay soorrugo lesdi taynde, ngam Jawmiraawo mari ndi, onon boo on hoɗɓe, on jananɓe haa maako.

24To on coorri gese, marnooɗo ɗe, to yiɗi soottan ɗe. 25To Isra'iilaajo talkiɗi, soorri gese mum, sey banndiiko ɓurɗo ɓadaago sootta ɗe. 26To o walaa coottoowo, teema o heɓan ceede soottugo ɗe fahin bee hoore maako. 27Nden kam o yoɓa coodnooɗo gese man fodde duuɓi luttanɗi haa hitaande dimɗineeki yaalta. Bana non o heɓtirta gese maako. 28Ammaa to o heɓaay ceede soottugo ɗe, nden kam coodnooɗo gese naftorto ɗe haa hitaande dimɗineeki yaalta. Hitaande nde'e o hokkita ɗe marnooɗo ɗe meere.

29To goɗɗo soorri suudu nder berniwol, to o yiɗi o soottan ndu nder hitaande coggu man. Wakkati coottuki man neeɓan hitaande woore. 30Ammaa to o soottaay ndu hitaande man, nden kam o heɓataa soottugo ndu haa foroy, ndu laatoto maral coodnooɗo ndu e danygol mum. Ndu soottataake koo nder hitaande dimɗineeki boo. 31Ammaa nder gure ɗe ngalaa mahol taariiŋgol ɗum, sey on nanndina cuuɗi bee gese. Marnooɗo suudu to yiɗi, soottan ndu. To o soottaay, o heɓtan ndu nder hitaande dimɗineeki. 32Bee non fuu, Lewi'en to ngiɗi, coottan cuuɗi muuɗum'en nder berniiji Lewi'en koo ndeye. 33To goɗɗo Lewiijo soorri suudu mum nder berniwol, waawaay soottugo ndu, nden kam o heɓtan ndu nder hitaande dimɗineeki. Ngam cuuɗi Lewi'en nder berniiji laati maral maɓɓe caka Isra'iila'en haa foroy. 34Ammaa durduɗe taariiɗe berniiji Lewi'en coorrataake sam, ɗe laati maral maɓɓe haa foroy.”

Nyamaale ngam talaka'en

35“To Isra'iilaajo jooɗiiɗo baŋnge maaɗa talkiɗi, waawataa wuurnugo hoore mum, sey a wallita ɗum bana mballirta koɗo malla jananno, ngam o tokko jooɗaago baŋnge maaɗa#TT 15:7-8.. 36Taa hokkir mo nyamaande bee ndiyam, taa ɗaɓɓu riba haa maako. Ammaa hul Allah, accu keeddiɗɗa jooɗo baŋnge maaɗa. 37To a hokki mo nyamaande, taa yowan mo ndiyam. Taa soorru mo nyaamdu ngam heɓugo riba boo#Gurt 22:24; TT 23:20-21.. 38Kanjum woni umroore Jawmiraawo Allah mon mo wurtini on lesdi Misra, ngam o hokka on lesdi Kanaana, o laato Allah mon boo.”

Dimɗinki jeyaaɓe

39“To Isra'iilaajo jooɗiiɗo baŋnge maaɗa talkiɗi, soorri ma hoore mum, nden kam taa huuwnu mo bana maccuɗo. 40O wonda bee maaɗa bana kuuwanoowo ngeenaari malla jananno, o huuwane haa hitaande dimɗineeki yaalta. 41Saa'i man o rimɗan, kaŋko e ɓikkoy maako, o loro haa lenyol maako e maral kaakiraaɓe maako. 42Ngam Isra'iila'en ɓe jeyaaɓe Jawmiraawo, kaŋko o wurtini ɓe lesdi Misra. Ngam man taa goɗɗo soorra ɓe bana ɓe coorrirta maccuɓe. 43Taa kolle ɓe ɓural, kule Allah mon. 44To on ngoodi haaje maccuɓe e horɓe, coode ɓe haa ummaatooje taariiɗe on. 45On coodan ɓiɓɓe jananɓe jooɗiiɓe caka mooɗon boo. Irin maɓɓe, danyaaɓe nder lesdi mon, on maran ɓe. 46On ndonnan ɓiɓɓe mon jeyaaɓe ɓe'e, ɓe laatoto maccuɓe mon haa foroy. Ammaa taa on kolla Isra'iilaajo ɓural#Gurt 21:2-6; TT 15:12-18..

47To goɗɗo jananno jooɗiiɗo baŋnge maaɗa malla koɗo riski, ammaa keeddiɗɗa Isra'iilaajo talkiɗi, soorri hoore mum haa koɗo malla haa jananno jooɗiiɗo baŋnge maaɗa malla haa goɗɗo danygol jananno, 48nden kam soottugo mo heɓoto. Sey gooto caka deerɗiiko'en sootta mo 49malla bappa maako malla ɓii bappa maako malla banndiiko goɗɗo sootta mo. Malla o sootta hoore maako, to o waawi. 50Nden kam o narra bee coodnooɗo mo. Ɓe lima duuɓi diga wakkati coggu haa hitaande dimɗineeki yaalta, ɓe mbaɗa coottaari fodde limgal duuɓi e fodde ngeenaari kuuwoowo. 51-52Sey o yoɓa mo geɗal saman coggu fodde limgal duuɓi luttanɗi haa hitaande dimɗineeki yaalta, koo duuɓi ɗuuɗɗi, koo ɗi ɗuuɗaay boo, 53bana to o laatino kuuwanoowo ngeenaari hitaande hitaande. Taa jawmiiko holla mo ɓural. 54To o heɓtaay ndimu bee laawol coottuki koo ngole, nden kam o rimɗan nder hitaande dimɗineeki, kaŋko e ɓikkoy maako fuu. 55Ɗowtane umrooje ɗe'e, ngam Isra'iila'en ɓe jeyaaɓe Jawmiraawo, kaŋko o wurtini ɓe lesdi Misra, kaŋko woni Jawmiraawo Allah maɓɓe.”

Currently Selected:

Farillaaji Lewi'en 25: FB

Highlight

Copy

Compare