Sirasid 47
47
Annabi Natan e laamiiɗo Daawuda.
1Ɓaawo Samuyila, Natan laati annabiijo wakkati Daawuda.
2Saa'i kirseteendi ngam kawtal Allah bee yimɓe, ɓe ittan ɓellere, geɗal booɗŋgal. Bana nii ɓe koo'i Daawuda caka Isra'iila'en.
3Haɓgo bee barooɗe e paaɗaaji laati ngam maako fijirde hoynde bana naŋngugo njawdiri malla jawgel pamarel.
4Yaake o derkeejo tawon, o mbari goɗɗo maapinndiijo, bana nii o waatori kuudi ɗi Filisti'en kuɗino jama'aare Isra'iila. O waɗi piwlol maako bee hayre, o mbari Goliyat, maapinndiijo mawnitiiɗo.
5O torino Jawmiraawo Ɓaŋiiɗo, mo semmbiɗini juŋngo maako nyaamo ngam mbargo konoowo e ngam semmbiɗingo jama'aare maako.
6Ngam maajum ɓe teddini mo, ɓe mbi'i o mbarino konne'en ujineeje. Ɓe maŋgti mo. Ɓe ngetti Jawmiraawo e ɓe ndokki mo meetaleewol laamu
7ngam o nattini konne'en haa bakkeeje fuu, o meeriɗini Filisti'en konne'en maako, o yewi baawɗe maɓɓe haa foroy.
8Nder ko o waɗi fuu, Daawuda maŋgti Allah Ceniiɗo, Ɓaŋiiɗo, o anndini tedduŋgal maako. O sukli hoore maako ngam hawtugo jabuura e yiɗgo Tagɗo mo.
9O jo'ini mooɓre yimooɓe ngam yimɓe fuu nana gime belɗe yeeso hirsirde.
10O samɗini juulɗe e wakkatiiji marɗi saman ngam maŋgtugo innde Jawmiraawo seniinde diga fajira cub, nder suudu seniindu, ɓe nana gime belɗe.
11Jawmiraawo wili aybeeji Daawuda, o semmbiɗini laamu maako haa foroy. O hokki mo baawɗe laamiiɓe, o semmbiɗini laamu maako haa Urusaliima.
Suleymaanu
12Ɓaawo Daawuda, ɓiŋngel maako marɗo anndal jamum hooci pellel maako. Barka Daawuda, Allah hokki mo salaaman e jam.
13Salaaman ɗonno wakkati laamu Suleymaanu. Jawmiraawo hokki mo de'eende haa keeri lesdi maako fuu. Suleymaanu mahani Jawmiraawo haykaliiru seniindu, o taaskani mo nokkuure seniinde haa foroy.
14Suleymaanu, a hikmaajo diga nderkaaku maaɗa! A keewɗo anndal bana maayo paccuŋgo.
15Anndal ma heewi duniyaaru fuu e bolle ma lugguɗe meemi kuuje fuu.
16A laatino tedduɗo koo haa duuɗe daayiiɗe, ɓe ngiɗno ma ngam jam salaaman ngadduɗa.
17Duniyaaru fuu yerdi gime, balndi, kiitaaji e jaawaabuuji ma fuu.
18Ɓe ndokki ma innde fodde innde Allah teddunde mo seni Isra'iila. Koyɗum a mooɓtiri kaŋŋeeri bana mooɓtugo njamndi ndaneeri, koyɗum a mooɓtiri cardi bana mooɓtugo njamndi mboɗeeri.
19Ammaa a hokki hoore ma haa rewɓe, bee maajum a laati maccuɗo maɓɓe.
20A waɗi wuneere dow tedduŋgal ma, nden a tunwi ngal ɓiɓɓe maaɗa boo bee waddugo tikkere Jawmiraawo dow maɓɓe. Ɓe micciti nginnaaku ma masin!
21Laamu ma senndaama ɗiɗi: Laamu wooru tuurtiindu iwi gal lenyol Efrayim.
22Ammaa Jawmiraawo wudinaay mbooɗeeŋga muuɗum, o accaay bolle maako kalka sam. O ɗalaay lenyol cuɓaaɗo maako wila, o yerdaaki asŋgol giɗaaɗo maako halka. Bana no o ɗali yeeɗɓe caka jama'aare Yaakubu, non boo o hokki Daawuda tokkiiɓe iwɓe danygol maako.
Robo'am e Yerobo'am
23Nde Suleymaanu maayi, o tawtoyi kaakiraaɓe maako nder yenaande. O acci ɓaawo maako gooto caka ɓiɓɓe maako keewɗo faataare e cooyɗo faamu: Robo'am mo tuurtini jama'aare maako. Yerobo'am, ɓii Nebat, kaŋko boo daayni le'i woyla lesdi diga laawol booɗŋgol, o yerɓi yimɓe laamu Efrayim nder laawol aybe.
24Yimɓe ɓe'e mbaɗi aybeeji ɗuuɗɗi haa ɓe ndahaama diga lesdi maɓɓe.
25Ɓe nasti huuwgo kuuɗe kalluɗe haa ɗe pooɗani ko'e maɓɓe torra.
Currently Selected:
Sirasid 47: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.