Markus 6

Yimɓe Nasaratu cali nuɗɗingo Yeesu

(Matta 13:53-58; Luka 4:16-30)

1Yeesu ummi nokkuure maajum, o lorti haa berniwol ngol o mawni, pukara'en maako tokki mo. 2Nde nyannde siwtorde waɗi, o fuɗɗi ekkitingo nder suudu dewal Yahuudu'en. Nanɓe mo ɗuuɗɓe kayɗini masin. Ɓe ɗon mbi'a: “Haa toy o heɓi ɗum? Moy hokki mo hikma ka e baawɗe waɗugo kaayeefiiji ɗi'i? 3Naa kaŋko woni cehoowo? Naa o ɓii Mariyama e deerɗiraawo Yaakuba e Yoses e Yahuuda e Simon? Naa deerɗiraaɓe maako rewɓe boo ɗon ngondi bee meeɗen haa ɗo?” Ngam maajum ɓe cali nuɗɗingo mo. 4Nden Yeesu wi'i ɓe: “Yimɓe ɗon teddina annabiijo koo toy, ammaa nder wuro ngo o danya e caka banndiraaɓe maako e yimɓe saare maako o walaa tedduŋgal.” 5Yeesu waawaay waɗugo kaayeefiwol koo ngole ton, sey o yowi juuɗe maako dow nyawɓe woɗɓe, o yamɗitini ɓe. 6O hayɗini ngam sooynde nuɗɗinki maɓɓe.

Yeesu neli pukara'en sappo e ɗiɗo

(Matta 10:5-15; Luka 9:1-6)

Ɓaawo maajum Yeesu yiiloyi haa gure lesdi man fuu, o ekkitini yimɓe. 7O ewni pukara'en maako sappo e ɗiɗo, o hokki ɓe baawɗe dow ruuhuuji coɓɗi, nden o neli ɓe ɗiɗo ɗiɗo. 8O hokki ɓe umroore nde'e: “Taa njoge koo ɗume ngam jahaaŋgal, koo nyaamdu, koo booro njooɓaari, koo ceede seɗɗa, sey sawru tan. 9Koo'e paɗe, ammaa taa ɓorne limce ɗiɗi.” 10Fahin o wi'i ɓe: “To on nasti wuro woɗŋgo, njooɗe haa saare nde ɓe njaɓɓi on, haa saa'iire nde on ngurtoto wuro man. 11To on ngari haa wuro ngo ɓe cali jaɓɓaago on malla nanango on, ngurte ngo, piɗɗe collaaje kosɗe mooɗon, ɗum laato ngam reentingo#Lk 10:4-11; KN 13:51.#6:11 Reentingo malla barraago. ɓe.” 12Pukara'en ndilli, ngaazoyi yimɓe ngam ɓe tuuba, ɓe acca hakkeeji maɓɓe. 13Ɓe ndiiwi ruuhuuji coɓɗi ɗuuɗɗi, ɓe nguji nyawɓe ɗuuɗɓe bee nebbam, ɓe njamɗitini ɓe#Yaak 5:14..

Maayde Yuhanna baɗoowo baptisma

(Matta 14:1-12; Luka 9:7-9)

14Ammaa laamiiɗo Hirudus nani habaru Yeesu, ngam koo toy fuu yimɓe mani innde Yeesu. Woɗɓe ɗon mbi'a: “Yuhanna baɗoowo baptisma ummitake diga maayde. Ngam maajum o ɗon bee baawɗe waɗugo kaayeefiiji.” 15Ammaa woɗɓe mbi'i: “Ɗum Eliya.” Woɗɓe boo mbi'i: “Ɗum annabiijo bana gooto annabi'en ɓooyma#Mat 16:14; Mk 8:28; Lk 9:19..”

16Nde Hirudus nani ɗum, o wi'i: “Ɗum Yuhanna baɗoowo baptisma! Mi ta'ino hoore maako, ammaa o ummitake.” 17Naane Hirudus bee hoore muuɗum umrino, ɓe naŋnga Yuhanna, ɓe kaɓɓa mo haa suudu fursina#6:17 Suudu fursina malla suudu yaŋgada.. O waɗi ɗum ngam daliila Hirudiya, debbo Filip deerɗiiko, mo Hirudus te'ino. 18Ngam Yuhanna wi'no Hirudus: “Haanaay a te'a debbo deerɗa#Lk 3:19-20..”

19Ngam maajum Hirudiya wanyi Yuhanna, yiɗi mbarugo mo. Ammaa o waawaay, 20ngam Hirudus huli Yuhanna, ngam o anndi o gooŋgaajo, o cenaaɗo. O ayni mo booɗɗum. Ammaa nde o nani mo fuu, o wemmboto masin, bee non fuu, o yiɗi nanugo haala maako.

21Nde nyalaade siftinorde danyeeki Hirudus yotti, nde laati nyalaade fottunde ngam Hirudiya. Hirudus waɗi nyaamduuji ngam mawɓe lesdi muuɗum e ardiiɓe dow sooje'en ujineeje e ardiiɓe lesdi Galiili fuu. 22Ɓii Hirudiya debbo nasti, wami, seyni Hirudus e ewnaaɓe muuɗum. Laamiiɗo wi'i paanyo debbo: “Ƴamam ko a yiɗi, mi hokkete ɗum.” 23E o hunani mo hunayeere nde'e: “Mi hokkete ko a ƴami, koo reeta laamu am.” 24Paanyo wurti, wi'i daada muuɗum: “Ɗume mi ƴamata mo?” O jaabi: “Hoore Yuhanna baɗoowo baptisma.” 25Law paanyo lori haa laamiiɗo, wi'i mo: “Mi yiɗi a hokkammi hoore Yuhanna baɗoowo baptisma jonta nder le'al.” 26Ɗum suni laamiiɗo, ammaa o yiɗaa salanaago mo, ngam daliila kunayeeje ɗe o hunino yeeso ewnaaɓe maako. 27Nden o neli gooto nder sooje'en aynanɓe mo, o umri mo o wadda hoore Yuhanna. Soojeejo dilli haa suudu fursina#6:27 Suudu fursina malla suudu yaŋgada., o ta'i hoore Yuhanna. 28Nden o waddi nde nder le'al, o hokki nde paanyo debbo. Kaŋko boo o hokki nde daada maako. 29Nde pukara'en Yuhanna nani ɗum, ɓe ngari, ɓe kooci ɓanndu Yuhanna, ɓe uwi ndu.

Yeesu nyaamni yimɓe ujine njowo

(Matta 14:13-21; Luka 9:10-17; Yuhanna 6:1-14)

30Nelaaɓe go lorti, kawti haa Yeesu. Ɓe ngecci mo ko ɓe mbaɗi e ko ɓe ekkitini fuu. 31Ammaa, yimɓe ɗuuɗɓe ɗon ngara, ɗon ndilla, haa Yeesu e pukara'en muuɗum keɓaay wakkati nyaamugo. Ngam maajum o wi'i ɓe: “Ngare ndillen haa nokkuure ferwunde haa on ciwto seɗɗa.” 32Nden ɓe nasti koommbowal,#6:32 Koommbowal malla laanawal. ɓe ndilli feere maɓɓe, haa nokkuure ferwunde.

33Ammaa ɗuuɗɓe ngi'i ɓe ɗon ndilla e ɓe paami haa ɓe njahata, nden ɓe ngurti gure fuu, ɓe ndoggi bee kosɗe, ɓe aarti Yeesu e pukara'en muuɗum yottaago haa nokkuure man. 34Nde Yeesu jippi koommbowal, o yi'i mooɓre yimɓe ɗuuɗɓe. O yurmini ɓe, ngam ɓe nanndi bee baali ɗi ngalaa gaynaako. O fuɗɗi ekkitingo ɓe kuuje ɗuuɗɗe#Lim 27:17; 1 Laam 22:17; 2 HN 18:16; Ez 34:5; Zek 10:2; Mat 9:36.. 35Nde hiiri, pukara'en maako ngari haa maako, mbi'i mo: “Naaŋge hiiri, nokkuure nde'e boo nde ferwunde. 36Jaɓɓita yimɓe ɓe ndilla haa kawyeeji e gure ɓadiiɗe ɓe cooda ko ɓe nyaamata.” 37Yeesu jaabi ɓe: “Onon man ndokke ɓe ko ɓe nyaamata.” Pukara'en mbi'i mo: “A yiɗi min njaha, min majjina suleyje cardi teemeɗɗe ɗiɗi ngam soodugo tamseeje haa ɓe nyaama na?” 38Yeesu wi'i ɓe: “Tamseeje noy marɗon? Njehe, ndaare.” Nde ɓe kumpiti, ɓe mbi'i mo: “Min ngoodi tamseeje jowi e liɗɗi ɗiɗi.”

39Nden, Yeesu umri pukara'en ɓe njo'ina yimɓe fuu geɓe geɓe dow huɗo hecco. 40Ɓe njo'ini yimɓe teemerre teemerre, cappanɗe njowo cappanɗe njowo. 41Nden Yeesu hoo'i tamseeje jowi e liɗɗi ɗiɗi go, o tijji asama, o yetti Allah. Nden o yewi tamseeje, o hokki pukara'en ngam ɓe cenndana yimɓe. Bana non boo o senndani ɓe liɗɗi ɗiɗi go ɓe fuu. 42Ɓe fuu ɓe nyaami, ɓe kaari. 43Pukara'en mooɓti luttuɗum tamseeje e liɗɗi go, kebbini cilaaje sappo e ɗiɗi. 44Limgal nyaamɓe tamseeje man waɗi worɓe ujine njowo.

Yeesu waanci dow weendu

(Matta 14:22-33; Yuhanna 6:15-21)

45Ɓaawo man Yeesu dooli pukara'en muuɗum ɓe nasta koommbowal#6:45 Koommbowal malla laanawal., ɓe aarta mo yahugo Baytisayda haa fomoonde weendu gaɗaare, saa'i o ɗon jaɓɓito mooɓre. 46Ɓaawo o jaɓɓiti nde, o dilli hooseere ngam waɗugo do'a. 47Nde jemma waɗi, koommbowal boo ɗon caka weendu, Yeesu ɗon haa lesdi feere muuɗum. 48O yi'i pukara'en maako ɗon kaɓda laanyugo koommbowal, ngam ɓe ɗon tiitotira bee henndu, deydey subaha, o wari haa maɓɓe, o ɗon yaha dow mbeela bee kosɗe, bana o saaloto ɓe. 49Nde ɓe ngi'i mo o ɗon yaha dow ndiyam, ɓe tammi ɗum ginnawol, ɓe ngooki. 50Ngam ɓe fuu ɓe ngi'i mo, ɓe kuli. Ammaa law Yeesu wolwani ɓe, wi'i: “Tiɗɗine ɓerɗe mon, ɗum min, taa kultore!” 51Nden o nasti koommbowal, henndu de'iti. Pukara'en kayɗini masin. 52Ngam ɓe paamaay kaayeefiwol tamseeje go, ngam ɓerɗe maɓɓe caati.

Yeesu yamɗitini nyawɓe haa Genesaret

(Matta 14:34-36)

53Nde ɓe timmini eeraago weendu, ɓe njotti lesdi Genesaret, ɓe tiggi koommbowal maɓɓe haa fomoonde. 54Ɓe ngurti koommbowal, law yimɓe annditi Yeesu, 55ɓe ndoggoy koo toy nder lesdi man fuu, ɓe ngaddani mo nyawɓe waaliiɓe dow be'itte. 56Koo toy Yeesu yehi, nder gure malla berniiji malla kawyeeji, yimɓe ɗon mballina nyawɓe maɓɓe haa luuɓe, ɓe toro mo haa nyawɓe keɓa meemugo koo gawargal limce maako. Meemɓe ngal fuu njamɗiti.

Currently Selected:

Markus 6: FBDC

Highlight

Copy

Compare