Markus 15

Yeesu yeeso Pilaatu

(Matta 27:1-2,11-14; Luka 23:1-5; Yuhanna 18:28-38)

1Fajiri cub, mawɓe liman'en kawti bee ndotti'en e moodiɓɓe tawreeta e hiitooɓe nder dawriinde fuu, ɓe carwootiri. Ɓe kaɓɓi Yeesu, ɓe njahri mo, ɓe ndokki mo haa juuɗe Pilaatu#15:1 Pilaatu woni hooreejo Roma'en nder Yahuuda.. 2Kaŋko boo o ƴami mo: “An woni laamiiɗo Yahuudu'en na?” Yeesu jaabi mo: “Nonnon bana mbi'ɗa.” 3Mawɓe liman'en ngullori Yeesu kuuje ɗuuɗɗe. 4Nden Pilaatu ƴami mo fahin: “A jaabataako koo ɗume na? Laar no ɓe ngullori ma gullaali ɗuuɗɗi.” 5Ammaa Yeesu sali wolwugo, haa Pilaatu hayɗini.

Ɓe kiiti Yeesu kiita maayde

(Matta 27:15-26; Luka 23:13-25; Yuhanna 18:39-40; 19:1-16)

6Nde juulde Paska waɗi fuu, Pilaatu woowi yoofango yimɓe kaɓɓaaɗo gooto mo ɓe ƴami. 7Wakkati maajum goɗɗo bi'eteeɗo Barabbas ɗon haa suudu fursina#15:7 Suudu fursina malla suudu yaŋgada. bee woɗɓe, ɓe mbaɗino fitina, ɓe mbarno goɗɗo nder fitina ka'a. 8Nden yimɓe mooɓre ndilli haa saare Pilaatu, ɓe mbi'i mo o waɗana ɓe ko o woowi waɗango ɓe. 9Pilaatu ƴami ɓe: “On ngiɗi mi yoofana on laamiiɗo Yahuudu'en na?” 10Ngam o anndi, mawɓe liman'en njahrani mo Yeesu ngam kaajal. 11Ammaa mawɓe liman'en tiɗɗini yimɓe ɓe mbi'a mo ndikka o yoofana ɓe Barabbas. 12Fahin Pilaatu wolwani yimɓe: “Mo on mbi'ata laamiiɗo Yahuudu'en, mi waɗa mo ɗume kadi?” 13Ɓe kooli fahin, ɓe mbi'i: “Ɓil mo haa leggal gaafaaŋgal!” 14Pilaatu ƴami: “Kadi halleende ndeye o waɗi?” Ammaa ɓe ɓesdi wookugo bee sawtu, ɓe mbi'i: “Ɓil mo haa leggal gaafaaŋgal!” 15Pilaatu yiɗi fottango mooɓre. Ngam maajum o yoofani ɓe Barabbas. Nden o umri sooje'en, ɓe ɓocci Yeesu, o hokki mo haa juuɗe maɓɓe ngam ɓe ɓila mo haa leggal gaafaaŋgal.

Sooje'en njanci Yeesu

(Matta 27:27-31; Yuhanna 19:2-3)

16Sooje'en njahri Yeesu haa daldal laamorde, ɓe mooɓti sooje'en wonɓe nder yeɓre woore fuu. 17Ɓe ɓorni mo mojaare woɗeere, ɓe mbaɗi meetaleewol gi'e, ɓe njo'ini ngol dow hoore maako. 18Nden ɓe koofni mo: “Allah woonane, an laamiiɗo Yahuudu'en.” 19Ɓe piyi mo bee sawru dow hoore, ɓe tuuti mo tuuɗe, ɓe tuggi koppi ɓe cujidani mo. 20Nde ɓe timmini jancugo mo, ɓe ɓorti mo mojaare woɗeere go, ɓe ɓorni mo limce maako. Nden ɓe njahri mo yaasi berniwol ngam ɓe ɓila mo dow leggal gaafaaŋgal.

Gaafeeki Yeesu

(Matta 27:32-44; Luka 23:26-43; Yuhanna 19:17-27)

21Haa laawol ɓe potti bee goɗɗo Sirene, bi'eteeɗo Simon, baaba Aleksandire e Rufus, o ɗon warta ngesa. Sooje'en ndooli mo roondaago leggal gaafaaŋgal Yeesu#Rm 16:13.. 22Ɓe njahri Yeesu haa nokkuure nde ɓe mbi'ata Golgota bana wi'ugo: nokkuure Gumbal-hoore. 23Ton ɓe ngiɗi yarnugo mo inaboojam ɓennduɗam jillaaɗam bee ɗacce, ammaa Yeesu sali yarugo.

24Nden ɓe ɓili mo haa leggal gaafaaŋgal, ɓe cenndi limce maako bee waɗugo kur'u ngam ɓe keɓta ko koo moy maɓɓe hoo'ata#Jab 22:19.. 25Ɗum ɗonno saa'a joweenayi fajiri, ɓe ɓili mo dow leggal gaafaaŋgal. 26Ɓe mbinndi daliila kiita maako dow alluha bana ni'i: “Laamiiɗo Yahuudu'en.”

27Ɓe ɓildi fasooɓe ɗiɗo bee Yeesu haa leɗɗe gaafaaɗe, gooto haa nyaamo maako, gooto boo haa nano maako. 28[Bana nii ko deftere wi'i gooŋɗiri, nde wi'i: “Ɓe limi mo nder huuwooɓe zunuuba#Esa 23:12..”]

29Saalotooɓe ton ndimmbini ko'e muuɗum'en, kuɗi mo, ɓe mbi'i: “Hey! A wi'no a yibbinan haykaliiru, a mahtoto ndu nder nyalɗe tati#Jab 22:8; 109:25; Mk 14:58; Yuh 2:19.. 30Jippa leggal gaafaaŋgal kadi, hisnu hoore ma!” 31Bana non boo mawɓe liman'en e moodiɓɓe tawreeta njanci Yeesu, ɓe mbolwi hakkunde maɓɓe ɓe mbi'i: O hisni woɗɓe, ammaa o waawataa hisnugo hoore maako. 32Sey en ngi'a Almasiihu, laamiiɗo Isra'iila jippo leggal gaafaaŋgal jonta, ngam haa en nuɗɗina mo. Koo ɓildaaɓe bee maako go boo kallini mo.

Maayde Yeesu

(Matta 27:45-56; Luka 23:44-49; Yuhanna 19:28-30)

33Caka naaŋge nyiɓre suddi lesdi fuu haa yotti saa'a tati asiri. 34Saa'a tati Yeesu hooli bee sawtu: “Elohi, Elohi, lema sabaktani?” Bana wi'go: “Yaa Allah am, yaa Allah am, ngam ɗume a wudini yam#Jab 69:22.?” 35Woɗɓe dariiɓe ton nani ɗum, ɓe mbi'i: “Ndaa o ɗon ewno Eliya.” 36Gooto maɓɓe yaawi suuwi sooso nder lammuɗam, taari ɗum dow loosol, nden o ɓaŋgti ɗum ngam yarnugo Yeesu, o wi'i: “Sey en ndeena e en ndaara to Eliya waran jippina mo diga leggal gaafaaŋgal.” 37Ammaa Yeesu hooli bee semmbe, o maayi.

38Wiirndallo nder haykaliiru seeki caka cak diga dow haa les#Gurt 26:31-33.. 39Nde ardiiɗo dow sooje'en Roma teemerre dariiɗo les leggal gaafaaŋgal yi'i no Yeesu maayri, o wi'i: “Fakat, goɗɗo oo o Ɓiɗɗo Allah.”

40Woodi boo rewɓe ton, ɓe ɗon ndaara diga daayiiɗum. Nder maɓɓe Mariyama mo wuro Magdala e Mariyama daada Yaakuba pamaro e Yoses e Salome. 41Ɓe tokkino Yeesu, ɓe njagganino mo nde o ɗonno haa Galiili. Woodi boo rewɓe feere ɗuuɗɓe, ɓe ngarduno bee Yeesu haa Urusaliima#Lk 8:2-3..

Uweeki Yeesu

(Matta 27:57-61; Luka 23:50-56; Yuhanna 19:38-42)

42Nde ɗum nyalaade taaskara, bana wi'go nyalaade nde aartata nyannde siwtorde, nde hiiri, 43Yusufu mo wuro Arimatiya wari. O mawɗo tedduɗo caka dawrooɓe. O ɗon reeni garki laamu Allah boo. Kaŋko o tiɗɗini ɓernde maako, o yehi haa Pilaatu, o tori mo ɓanndu Yeesu. 44Pilaatu hayɗini nanugo Yeesu maayi law bana nii. O ewni mawɗo sooje'en go, o ƴami mo: “Neeɓi o maayi na?” 45Ɓaawo mawɗo sooje'en Roma anndini mo habaru man, o duŋani Yusufu hoosugo ɓanndu Yeesu. 46Yusufu soodi kasa ɗigguka, o jippini ɓanndu Yeesu, o hasni ndu, o wallini ndu nder yenaande wasaande nder tapaare. Nden o talli hayre mawnde, o maɓɓi nastirde yenaande. 47Mariyama mo Magdala e Mariyama daada Yoses ndaari haa ɓe mballini ɓanndu Yeesu.

Currently Selected:

Markus 15: FBDC

Highlight

Copy