2 Makabe 14
14
Limanjo mawɗo bi'eteeɗo Alkime haadani Yahuuda
1Duuɓi tati ɓaawoɗon, Yahuuda e yimɓe mum keɓi habaru no Demetiriyus ɓii Selewkus jippori haa daande maayo haa Tiripoli bee sooje'en mum e koommbooje mum. 2O honi lesdi man e o mbari Antiyokus bee Lisiyas fuu, mawninoowo laamiiɗo. 3Woodi goɗɗo bi'eteeɗo Alkime, limanjo mawɗo aran, ammaa o soɓno bee ɗowtanaago al'aadaaji Yunaniŋke'en, yaake tuurtol Yahuudu'en. O faami walaa tammunde joonde maako, Yahuudu'en boo, ɗalataa mo fahin o ɓadito hirsirde seniinde. 4Ngam daliila man, o tawoyi laamiiɗo Demetiriyus haa hitaande 151, o waddani mo meetaleewol kaŋŋeeri e lisal dibinoohi, bee lice leɗɗe jaytunje ɗe haykaliiru. Nyalde man o jeeɗi, o wi'aay ko waddi mo. 5Ammaa o heɓi dabare haa o humta anniya maako kalluka: Nde Demetiriyus ewni mo haa faama anniyaaji Yahuudu'en, kanyum e faada mum. Alkime jaabi mo bana nii: 6“Woodi caka Yahuudu'en yeɓre yimɓe wi'eteeɓe Hasidi'en nde Yahuuda Makabe ardani, tum ɓe ɗon taaski konu malla boo tuurtol, ngam taa laamu de'a. 7Daliila maɓɓe mi haɗaama huuwgo kuugal am tedduŋgal ngal ndonmi, waato limanjo mawɗo. Kanjum waɗi ngarmi haa ɗo. 8Min, ko suklata yam fuu, ɗum ko nafata laamiiɗo, ammaa mi ɗon neɗɗini mbooɗeeŋga yimɓe lesdi am, ngam sooynde hakkiilo yimɓe ɓe mbolwanmi ɗo, ɗon nastina jama'aare men nder ɓilla caatuka. 9Mi ɗon ƴama laamiiɗo linya haala man booɗɗum, o suklano ɓaawoɗon lesdi men e jama'aare men ɓillaande, o waŋgina mbooɗeeŋga e feecaare maako haa koo moy fuu. 10To Yahuuda ɗon bee yoŋki fuu laamu heɓataa jam.”
11Nde Alkime timmini bolle mum, “soobiraaɓe laamiiɗo”, wanyɓe Yahuuda, njaawɗi ummingo tikkere Demetiriyus. 12Law o suɓi Nikanor, ardiiɗo yeɓre marnde nyiibi konu, ngam o laato ngomnaajo haa Yahudiya, o neli mo ton. 13O umri mo mbargo Yahuuda, o saŋkita yimɓe maako e o jo'itina Alkime nder kuugal limanjo mawɗo haa haykaliiru ɓuranndu teddugo nder duniyaaru. 14Heefeerɓe wonɓe nder Yahudiya, doggunooɓe yeeso Yahuuda kawtani sooje'en Nikanor. Ɓe ɗon tammi ɓe naftorto masiibooji ukkantooɗi Yahuudu'en.
Yerduye Nikanor heedi Yahuuda
15Yahuudu'en nani Nikanor tiiti dow maɓɓe e heefeerɓe lesdi ɗon ngarda bee maako. Nden ɓe ndufi ndoondi dow ko'e maɓɓe, ɓe tori Allah cuɓɗo ɓe bana jama'aare mum haa foroy, o accaay boo wallugo yimɓe maako bee kuuɗe baŋguɗe. 16Ɓaawoɗon, ardiiɗo maɓɓe Yahuuda hokki umroore dillugo. Ɓe naŋngi laawol law e ɓe kaɓi bee sooje'en konne'en les wuro wi'eteeŋgo Hadasa. 17Simon, deerɗiraawo Yahuuda foondino haɓgo bee sooje'en Nikanor, ammaa konne'en njuhi mo, nden o jaalaama jaalorgal pamaral. 18Ammaa nde Nikanor faami cuusal Yahuuda e sooje'en mum, tiinaare nde ɓe kaɓirta ngam lesdi maɓɓe, o seki o waawataa jaaloraago bee balmi. 19Ngam maajum o neli Posidoniyus, Tewdot e Matatiyas ɓe tefa sulhu bee Yahuuda.
20Nde ɓe linyi nufayeeje ɗe ɓe keɓi, Yahuuda lornani ɗum sooje'en mum, ɓe fuu ɓe njaɓi waɗgo alkawal sulhu man. 21Ɓe ta'i sarti ardiiɓe man kawtata. Yeɓre fuu yerɓi moota konu ngoota, ɓe njo'ini koromje tedduɗe. 22Yahuuda kam jo'inno haa nokkuuje ɓoociiɗe sooje'en maako marɓe balmi, taaskitiiɓe haɓgo to konne'en faasikorake mo. Ammaa carwootiral ardiiɓe ɗiɗo saali jam saliiman. 23Ɓaawoɗon, Nikanor faɓɓi seɗɗa haa Urusaliima bilaa waɗgo koo ɗume. O yerɓi sooje'en iwɓe lesɗe goɗɗe, tokkiiɓe mo haa Yahudiya. 24O ɗon jooɗi tum bee Yahuuda ngam o yerdi soobiraaku maako. 25Nikanor sarwi mo o ɓaŋga e o heɓa ɓikkoy. Yahuuda te'i e o fuɗɗi seyoraago ngeendam bee de'ere.
Hakkiilo Nikanor dow Yahuuda sannji
26Alkime heɓi habaru narral booɗŋgal gonŋgal hakkunde Nikanor e Yahuuda. Nden o heɓi bataakewol ngol ɓe mbinndi, o yehi bee maagol haa Demetiriyus. O holli laamiiɗo siyaasa ka Nikanor tokki ɗon luuta ka lesdi maɓɓe ngam o suɓi Yahuuda, konneejo laamu, ngam o jooɗo haa koromwal laamu ɓaawo maako. 27Tufle kalluɗo oo, mettini ɓernde laamiiɗo dow Yahuuda. Nder ɓernuki maako, o winndani Nikanor, o wi'i mo o wondaay bee maako nder alkawal ngal o haɓɓi, o umri mo o naŋnga Yahuuda Makabe, o nelda mo haa Antakiya. 28Nde Nikanor heɓi bataakewol man, ɗum mettini mo ɓernde. O tawi o waawataa yewgo alkawal bee goɗɗo mo walaa aybe koo peetel. 29Nden boo, o anndi o waawataa salaago umroore laamiiɗo. Ngam maajum o reenni wakkati no o huuwra ko laamiiɗo umri mo bee ƴoƴre. 30Yahuuda boo faami Nikanor daayti mo e ɗon jaɓɓo mo bilaa feecaare bana ko woowa. O mooɓti yimɓe maako ɗuuɗɓe, o dilli o suuɗoyi ngam o hisa Nikanor.
31Nde Nikanor faami no Yahuuda ƴoƴrori mo bana o ƴoyruno mo, o dilli haa haykaliiru ɓuranndu teddugo e senaago haa duniyaaru, saa'i wakkati liman'en lii'oto kirseteeɗi, o umri ɓe ndokka mo Yahuuda. 32Ammaa liman'en kuni ɓe anndaa haa innu mo o ɗaɓɓititta woni. 33Nden Nikanor forti juŋngo haa haykaliiru, o huni, o wi'i: “To on ndokkitittaa yam Yahuuda naŋngaaɗo, mi wilan haykaliiru Allah ndu'u, mi sampitan hirsirde nde'e e haa babal man mi nyiɓan suudu lawru wi'eteendu Diyonisos.”
34Nde o wi'i bana nii, o dilli. Liman'en ɓaŋgti do'a haa asama e ɓe tori kisnoowo jama'aare maɓɓe. Ɓe mbi'i mo: 35“Yaa Jawmiraawo, walaa ko marɗa haaje. Bee man fuu, a jo'ini haykaliiru ndu'u ngam tabitingo joonde ma caka amin. 36Yaa Jawmiraawo ceniiɗo, neeɓaay min laɓɓini suudu ma, useni haɗ taa ndu soɓne fahin.”
Maayde Razis
37Caka ndotti'en Urusaliima, woodi goɗɗo bi'eteeɗo Razis. O suklani ɓiɓɓe wuro maako booɗɗum, yimɓe fuu ngerdi mo jamum. Ɓe ɗon ewna mo “baaba Yahuudu'en” ngam mbooɗeeŋga maako heedi maɓɓe. Nden boo, ɓe tufli mo haa Nikanor. 38Yaake tuurtol aranol, ɓe kaadani mo o accaay tokkaago al'aadaaji Yahuudu'en. Bee dartaare mawnde o soorri yoŋki maako ngam faddaago ɗi. 39Nikanor neldi sooje'en ko ɓurata teemeɗɗe njowo ngam naŋngugo mo, ngam o holla Yahuudu'en noy o wanyiri ɓe. 40Nii kam, o tammino o torran ɓe to o naŋngi goɗɗo oo.
41Nde sooje'en ɓadake hippaago nokkuure nde Razis woni, ɓe ɗonno nasta zawleeru e ɓe keɓi umroore ɓe ngula dammuɗe man. Razis laari walaa no o daɗra, sey o diwi o mbarti bee kaafahi maako: 42o yerdi maaygo bee daraja dow naŋngeego nder juuɗe halluɓe e yiidugo bee torraaji derfanɗi daraja innu.
43Ammaa nde o ɗonno yaawa, o heɓaay o mbarti. Wakkati sooje'en njaawa nastugo nder saare man, o doggi haa dow mahol saare man, o diwi haa lesdi. Sooje'en wonɓe haa les 44lori ɓaawo, ɗali babal haa Razis do'i. 45Bee non fuu o maayaay, o ummi fahin bee semmbe, o fuu o ƴiiƴam, bee naawnanɗe maako fuu, o saali caka sooje'en, o wa'i dow tapaare townde. 46Nde ƴiiƴam maako fuu rufdi, o wurtini teteki maako, o jogi ɗi juuɗe ɗiɗi, o sakkini ɗi dow sooje'en. Nden o tori Jawmiraawo, marɗo ngeendam e poofɗe, lornitana mo ɗi nyalde wonnde. Bana nii Razis maayri.
Currently Selected:
2 Makabe 14: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.
2 Makabe 14
14
Limanjo mawɗo bi'eteeɗo Alkime haadani Yahuuda
1Duuɓi tati ɓaawoɗon, Yahuuda e yimɓe mum keɓi habaru no Demetiriyus ɓii Selewkus jippori haa daande maayo haa Tiripoli bee sooje'en mum e koommbooje mum. 2O honi lesdi man e o mbari Antiyokus bee Lisiyas fuu, mawninoowo laamiiɗo. 3Woodi goɗɗo bi'eteeɗo Alkime, limanjo mawɗo aran, ammaa o soɓno bee ɗowtanaago al'aadaaji Yunaniŋke'en, yaake tuurtol Yahuudu'en. O faami walaa tammunde joonde maako, Yahuudu'en boo, ɗalataa mo fahin o ɓadito hirsirde seniinde. 4Ngam daliila man, o tawoyi laamiiɗo Demetiriyus haa hitaande 151, o waddani mo meetaleewol kaŋŋeeri e lisal dibinoohi, bee lice leɗɗe jaytunje ɗe haykaliiru. Nyalde man o jeeɗi, o wi'aay ko waddi mo. 5Ammaa o heɓi dabare haa o humta anniya maako kalluka: Nde Demetiriyus ewni mo haa faama anniyaaji Yahuudu'en, kanyum e faada mum. Alkime jaabi mo bana nii: 6“Woodi caka Yahuudu'en yeɓre yimɓe wi'eteeɓe Hasidi'en nde Yahuuda Makabe ardani, tum ɓe ɗon taaski konu malla boo tuurtol, ngam taa laamu de'a. 7Daliila maɓɓe mi haɗaama huuwgo kuugal am tedduŋgal ngal ndonmi, waato limanjo mawɗo. Kanjum waɗi ngarmi haa ɗo. 8Min, ko suklata yam fuu, ɗum ko nafata laamiiɗo, ammaa mi ɗon neɗɗini mbooɗeeŋga yimɓe lesdi am, ngam sooynde hakkiilo yimɓe ɓe mbolwanmi ɗo, ɗon nastina jama'aare men nder ɓilla caatuka. 9Mi ɗon ƴama laamiiɗo linya haala man booɗɗum, o suklano ɓaawoɗon lesdi men e jama'aare men ɓillaande, o waŋgina mbooɗeeŋga e feecaare maako haa koo moy fuu. 10To Yahuuda ɗon bee yoŋki fuu laamu heɓataa jam.”
11Nde Alkime timmini bolle mum, “soobiraaɓe laamiiɗo”, wanyɓe Yahuuda, njaawɗi ummingo tikkere Demetiriyus. 12Law o suɓi Nikanor, ardiiɗo yeɓre marnde nyiibi konu, ngam o laato ngomnaajo haa Yahudiya, o neli mo ton. 13O umri mo mbargo Yahuuda, o saŋkita yimɓe maako e o jo'itina Alkime nder kuugal limanjo mawɗo haa haykaliiru ɓuranndu teddugo nder duniyaaru. 14Heefeerɓe wonɓe nder Yahudiya, doggunooɓe yeeso Yahuuda kawtani sooje'en Nikanor. Ɓe ɗon tammi ɓe naftorto masiibooji ukkantooɗi Yahuudu'en.
Yerduye Nikanor heedi Yahuuda
15Yahuudu'en nani Nikanor tiiti dow maɓɓe e heefeerɓe lesdi ɗon ngarda bee maako. Nden ɓe ndufi ndoondi dow ko'e maɓɓe, ɓe tori Allah cuɓɗo ɓe bana jama'aare mum haa foroy, o accaay boo wallugo yimɓe maako bee kuuɗe baŋguɗe. 16Ɓaawoɗon, ardiiɗo maɓɓe Yahuuda hokki umroore dillugo. Ɓe naŋngi laawol law e ɓe kaɓi bee sooje'en konne'en les wuro wi'eteeŋgo Hadasa. 17Simon, deerɗiraawo Yahuuda foondino haɓgo bee sooje'en Nikanor, ammaa konne'en njuhi mo, nden o jaalaama jaalorgal pamaral. 18Ammaa nde Nikanor faami cuusal Yahuuda e sooje'en mum, tiinaare nde ɓe kaɓirta ngam lesdi maɓɓe, o seki o waawataa jaaloraago bee balmi. 19Ngam maajum o neli Posidoniyus, Tewdot e Matatiyas ɓe tefa sulhu bee Yahuuda.
20Nde ɓe linyi nufayeeje ɗe ɓe keɓi, Yahuuda lornani ɗum sooje'en mum, ɓe fuu ɓe njaɓi waɗgo alkawal sulhu man. 21Ɓe ta'i sarti ardiiɓe man kawtata. Yeɓre fuu yerɓi moota konu ngoota, ɓe njo'ini koromje tedduɗe. 22Yahuuda kam jo'inno haa nokkuuje ɓoociiɗe sooje'en maako marɓe balmi, taaskitiiɓe haɓgo to konne'en faasikorake mo. Ammaa carwootiral ardiiɓe ɗiɗo saali jam saliiman. 23Ɓaawoɗon, Nikanor faɓɓi seɗɗa haa Urusaliima bilaa waɗgo koo ɗume. O yerɓi sooje'en iwɓe lesɗe goɗɗe, tokkiiɓe mo haa Yahudiya. 24O ɗon jooɗi tum bee Yahuuda ngam o yerdi soobiraaku maako. 25Nikanor sarwi mo o ɓaŋga e o heɓa ɓikkoy. Yahuuda te'i e o fuɗɗi seyoraago ngeendam bee de'ere.
Hakkiilo Nikanor dow Yahuuda sannji
26Alkime heɓi habaru narral booɗŋgal gonŋgal hakkunde Nikanor e Yahuuda. Nden o heɓi bataakewol ngol ɓe mbinndi, o yehi bee maagol haa Demetiriyus. O holli laamiiɗo siyaasa ka Nikanor tokki ɗon luuta ka lesdi maɓɓe ngam o suɓi Yahuuda, konneejo laamu, ngam o jooɗo haa koromwal laamu ɓaawo maako. 27Tufle kalluɗo oo, mettini ɓernde laamiiɗo dow Yahuuda. Nder ɓernuki maako, o winndani Nikanor, o wi'i mo o wondaay bee maako nder alkawal ngal o haɓɓi, o umri mo o naŋnga Yahuuda Makabe, o nelda mo haa Antakiya. 28Nde Nikanor heɓi bataakewol man, ɗum mettini mo ɓernde. O tawi o waawataa yewgo alkawal bee goɗɗo mo walaa aybe koo peetel. 29Nden boo, o anndi o waawataa salaago umroore laamiiɗo. Ngam maajum o reenni wakkati no o huuwra ko laamiiɗo umri mo bee ƴoƴre. 30Yahuuda boo faami Nikanor daayti mo e ɗon jaɓɓo mo bilaa feecaare bana ko woowa. O mooɓti yimɓe maako ɗuuɗɓe, o dilli o suuɗoyi ngam o hisa Nikanor.
31Nde Nikanor faami no Yahuuda ƴoƴrori mo bana o ƴoyruno mo, o dilli haa haykaliiru ɓuranndu teddugo e senaago haa duniyaaru, saa'i wakkati liman'en lii'oto kirseteeɗi, o umri ɓe ndokka mo Yahuuda. 32Ammaa liman'en kuni ɓe anndaa haa innu mo o ɗaɓɓititta woni. 33Nden Nikanor forti juŋngo haa haykaliiru, o huni, o wi'i: “To on ndokkitittaa yam Yahuuda naŋngaaɗo, mi wilan haykaliiru Allah ndu'u, mi sampitan hirsirde nde'e e haa babal man mi nyiɓan suudu lawru wi'eteendu Diyonisos.”
34Nde o wi'i bana nii, o dilli. Liman'en ɓaŋgti do'a haa asama e ɓe tori kisnoowo jama'aare maɓɓe. Ɓe mbi'i mo: 35“Yaa Jawmiraawo, walaa ko marɗa haaje. Bee man fuu, a jo'ini haykaliiru ndu'u ngam tabitingo joonde ma caka amin. 36Yaa Jawmiraawo ceniiɗo, neeɓaay min laɓɓini suudu ma, useni haɗ taa ndu soɓne fahin.”
Maayde Razis
37Caka ndotti'en Urusaliima, woodi goɗɗo bi'eteeɗo Razis. O suklani ɓiɓɓe wuro maako booɗɗum, yimɓe fuu ngerdi mo jamum. Ɓe ɗon ewna mo “baaba Yahuudu'en” ngam mbooɗeeŋga maako heedi maɓɓe. Nden boo, ɓe tufli mo haa Nikanor. 38Yaake tuurtol aranol, ɓe kaadani mo o accaay tokkaago al'aadaaji Yahuudu'en. Bee dartaare mawnde o soorri yoŋki maako ngam faddaago ɗi. 39Nikanor neldi sooje'en ko ɓurata teemeɗɗe njowo ngam naŋngugo mo, ngam o holla Yahuudu'en noy o wanyiri ɓe. 40Nii kam, o tammino o torran ɓe to o naŋngi goɗɗo oo.
41Nde sooje'en ɓadake hippaago nokkuure nde Razis woni, ɓe ɗonno nasta zawleeru e ɓe keɓi umroore ɓe ngula dammuɗe man. Razis laari walaa no o daɗra, sey o diwi o mbarti bee kaafahi maako: 42o yerdi maaygo bee daraja dow naŋngeego nder juuɗe halluɓe e yiidugo bee torraaji derfanɗi daraja innu.
43Ammaa nde o ɗonno yaawa, o heɓaay o mbarti. Wakkati sooje'en njaawa nastugo nder saare man, o doggi haa dow mahol saare man, o diwi haa lesdi. Sooje'en wonɓe haa les 44lori ɓaawo, ɗali babal haa Razis do'i. 45Bee non fuu o maayaay, o ummi fahin bee semmbe, o fuu o ƴiiƴam, bee naawnanɗe maako fuu, o saali caka sooje'en, o wa'i dow tapaare townde. 46Nde ƴiiƴam maako fuu rufdi, o wurtini teteki maako, o jogi ɗi juuɗe ɗiɗi, o sakkini ɗi dow sooje'en. Nden o tori Jawmiraawo, marɗo ngeendam e poofɗe, lornitana mo ɗi nyalde wonnde. Bana nii Razis maayri.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.