2 Makabe 10
10
Cenki haykaliiru
(1 Makabe 4:36-61)
1Barka Jawmiraawo, Yahuuda Makabe e yimɓe mum njaɓti haykaliiru e berniwol Urusaliima fuu. 2Ɓe campiti kirsirɗe ɗe jananɓe mahno caka wuro, bee nokkuuje haa heefeerɓe ndewata labbi. 3Ɓe laɓɓini haykaliiru, ɓe mahi hirsirde hesre. Nden ɓe tappindiri kaa'e kuɓɓanɗe yiite ngam ɓe kuɓɓa yiite dow hirsirde, ɓe lii'i kirseteeŋga arana ɓaawo duuɓi ɗiɗi caaliiɗi. Ɓe cuurni uurdi, ɓe kuɓɓi pittirlaaji e ɓe njo'ini tamseeje ɗe ɓe lii'ani Allah. 4Nde ɓe ngaɗi ɗum, ɓe ndo'i ɓe kippi geese maɓɓe haa lesdi, ngam ɓe toro Jawmiraawo taa torra ɓe bee masiibooji irin ɗi'i. Koo to laati ɓe toonyi mo fahin, o elto ɓe bee hakkiilo e taa o ɗala ɓe haa laamu heefeerɓe njancanɓe mo.
5Ɓe laɓɓini haykaliiru nder nyalaade nde jananɓe coɓnino ndu, waato nder balɗe noogas e jowaɓre nder lewru Kislew. 6Ɓe ngaɗi juulde man bee seyo, deydey balɗe joweetati bana juulde bukkaaji. Yahuuda e yimɓe mum ciftori neeɓaay ɓe ngaɗno juulde bukkaaji yaake ɓe ɗonno njooɗi dow kooseeje e nder lowi dabbaaji ladde. 7Kanjum waɗi jonta ɓe ɗon njogi haakooji dibinooje e lice maaje, ɓe ɗonno ɓaŋgta gime gettooje heedi dokkuɗo ɓe daliila no ɓe laɓɓina haykaliiru mum. 8Ndaa anniya ka ɓe koo'i: “Umroore hokkaama haa ummaatoore Yahuudu'en waɗgo juulde nde'e nde hitaande yaali fuu.” Jama'aare boo yerdi ɗum.
Antiyokus Epator roni baaba mum
9Ndaa nii Antiyokus bi'eteeɗo Epifan maayri. 10Jonta min mbolwan dow Antiyokus Epator ɓii gedduɗo Allah oo. Min kollan sarru maako bana konuuji ɗi o waɗi nder dammuɗum man.
11Nde Epator laami, o suɓi goɗɗo feere bi'eteeɗo Lisiyas, o laatini mo wakiiliijo e ngomnaajo lesdi Siriya maŋngo e Finisiya 12haa babal Potolome bi'eteeɗo “juuta hoore”. kaŋko laatino ngomnaajo aartuɗo jogoriiɗo Yahuudu'en nder adilaaku ɓaawo boneeji ɗi ɓe ngiidi. O tabitini joonde jam bee maɓɓe. 13Ngam daliila man “soobiraaɓe laamiiɗo” ngulli mo haa Epator. Ko saalino boo, o haadanaama nde ɗuuɗɗum o faasikiijo. Laamiiɗo Filometor mo Misra halfinno mo Kiprus, ammaa o acci duunde man, o dilli haa Antiyokus Epifan. Nde o waawaay ɓaŋgtugo daraja kuugal maako, o safti o mbarti bee yargo dajje.
Yahuuda hippi cuuɗi Idume cemmbiɗɗi
14Yaake Gorgiyas laati ngomnaajo lesdi Idume, o soodi sooje'en jananɓe, o tefi dabareeji fuu no o hipporo Yahuudu'en. 15Accu non boo, yimɓe Idume wonɓe nder cuuɗi cemmbiɗɗi kanyum'en boo ɓillani Yahuudu'en. Ɓe njaɓɓino yimɓe fartaaɓe diga Urusaliima e ɓe anniyino waɗgo haɓre.
16Yahuuda e yimɓe mum ɓaŋgti do'a haa Allah, ɓe ɗon toro mo o heeda gal maɓɓe. Nden ɓe ummi, ɓe tiitoyi cuuɗi Idume cemmbiɗɗi. 17Ɓe kippi ɗi kippol caatuŋgol, ɓe parti aynooɓe mahi maaji e jooɗiiɓe ton. Ɓe mbari yimɓe ɓe ɓe tawi fuu, ɓe mbari baakin yimɓe ujine noogas.
18Bee man fuu, ko dillani yimɓe ujine njoweenayo ndoggi, nyukkino nder cuuɗi ɗiɗi ɓurɗi semmbiɗineego, marɗi kuuje haɓtaago koo to haɓre man neeɓi. 19Yahuuda Makabe ɗali haa yeeso maaji Simon e Yusufu e Jakayus e sooje'en ɗuuɗɓe, ngam ɓe taaro e ɓe kippo ɗi. kaŋko bee hoore maako boo, o dilli haa nokkuure nde ɓe mari haaje maako bee ko yaawi. 20Ammaa sooje'en Simon yiɗɓe ceede ɗali yimɓe feere wonɓe nder cuuɗi ɗiɗi go, ngurti, ndoggi, ngam ɓe njaɓi ceede ko waɗata suleyje cardi ujine cappanɗe joweeɗiɗi. 21Nde Yahuuda heɓi habaru man, o mooɓti ardiiɓe mooɓe man, o haadani ɓe bee wi'go ɓe coorri deerɗiraaɓe maɓɓe: Ngam ceede, ɓe njoofi konne'en maɓɓe, taaskaniiɓe haɓgo bee maɓɓe! 22Yahuuda mbari faasiki'en ɓe'e, ɓaawoɗon o jaɓti cuuɗi cemmbiɗɗi man fuu. 23O jaali konuuji ɗi o waɗi fuu, bana nii non o wurtini e o jaali ko dillani sooje'en ujine noogas nder cuuɗi cemmbiɗɗi ɗiɗi go.
Yahuuda heɓi jaalorgal maŋngal haa Gezer
24Ammaa Timote mo Yahuudu'en njaalino aran, soodi sooje'en jananɓe ɗuuɗɓe, o waddi diga lesdi Asiya wa'ooɓe pucci. Nden o ummi bee mooɓe sooje'en maako ngam hippoyaago Yahudiya. 25Nde o ɗon ɓadito, Yahuuda Makabe e yimɓe mum ɓaŋgti do'a haa Allah bee rufgo mbulwuldi dow ko'e muuɗum'en, ɓe taadi keeci maɓɓe bee leppi buhuuje. 26Ɓe turi haa lesdi yeeso hirsirde, ɓe ƴami Allah mo'ana ɓe, o laato “konneejo konne'en maɓɓe, ganyo wanyɓe maɓɓe” bana o wi'i nder Tawreeta.
27Nde ɓe timmini do'a maɓɓe, ɓe kooci balmi maɓɓe, ɓe ngurti Urusaliima, ɓe njehi daayiiɗum, nde ɓe ɓaditi konne'en maɓɓe, ɓe ndari. 28Jaŋngo maajum nde naaŋge fuɗi, mooɓe ɗiɗi tiitotiri, puɗɗi haɓre. Haa ɓe njaalo, Yahuudu'en marsori cuusal muuɗum'en e ko ɓurata boo ɓe marsori Jawmiraawo mo ɓe kooli, luttuɓe boo ko fooɗata ɓe fuu nder haɓre, ɗum haa'inaare. 29Haa caka haɓre ton, konne'en maɓɓe ngi'i wa'iiɓe pucci njowo jalbitanɓe mbaŋgi diga asama, ɓe ɗon mba'i pucci marɗi pawne kaŋŋeeri, ɓe ardani Yahuudu'en. 30Ɓe ndarni Yahuuda caka ɗiɗo maɓɓe, ɓe ɗonno padda mo bee balmi maɓɓe taa ɓe naawna mo. Ɓe ɗonno cakkina ma'e bana kuri dow konne'en Yahuudu'en, haa ɓe laati bana wumɓe, ɓe kultori, ɓe caŋkiti nder jiiɓotiral maŋngal. 31Yimɓe baakin ujine noogas e teemeɗɗe njowo fuu mbaraama, onon boo wa'iiɓe pucci teemeɗɗe njoweego.
32Timote bee hoore mum suuɗoyi haa babal koolɗiniiŋgal haa Gezer ngal Kereyas ardi. 33Yahuuda e sooje'en mum kippi babal man balɗe nayi fuu. 34Hippaaɓe boo ɗon kooli babal muuɗum'en cemmbiɗŋgal haa ɓe njanci Allah e Yahuudu'en, ɓe ɗonno mbolwa laakiiri dow hippuɓe ɓe. 35Subaha nyannde jowaɓre, sukaaɓe noogas caka sooje'en Yahuuda, haarɓe mone bee laakiiri ndi'i, tuurti kippoyi mahi cemmbiɗɗi bee cuusal maŋngal. Bee haa'inaare ndabbaawa tuurtuŋga, ɓe mbari mo ɓe tawi fuu. 36Woɗɓe fahin tokki ɓe, taari suudu semmbiɗndu go, ngam hippaago wonɓe nder maaru gal nokkuure feere. Ɓe nguli cuuɗi aynorɗi e ɓe nguli boo jancooɓe Allah. Woɗɓe maɓɓe pusi mahol e maɓɓitani luttuɓe laawol nastugo nder wuro man. Wuro man jaalaama bee ko yaawi. 37Timote suuɗi nder sigordu ndiyam, ammaa nde ɓe keɓti mo, ɓe mbari mo, kaŋko bee deerɗiiko'en Kereyas e Apollofan.
38Nde jaalorgal maɓɓe tabiti, Yahuudu'en ɓaŋgti gime ngam yettugo Jawmiraawo, ɓe ngetti Allah ngam mo'e ɗe o mo'ani Isra'iila e ngam o hokki ɓe jaalorgal.
Currently Selected:
2 Makabe 10: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.