1 Makabe 1
1
Laamu Zuulgarnayni
1Zuulgarnayni ɓii laamiiɗo Filip ummi diga wuro mum Makedoniya, dilli ngam waɗgo konu. Non o jaalori Dariyus, laamiiɗo Persiya'en e Mediya'en. O jaɓti mo tawon laamu ngu o mari dow Yunaniŋke'en.
2O waɗi kaɓe ɗuuɗɗe, o nyaami gure cemmbiɗɗe e o mbari laamiiɓe gure man.
3Konu man yahri mo haa keerol duniyaaru e o jaɓti jawle ummaatooje ɗuuɗɗe. Nde lesdi heɓi jam nder laamu maako, o warti o mawnitiiɗo e o ŋallomaajo boo.
4Nde o mooɓti sooje'en ɗuuɗɓe e semmbiɗɓe, o leesni gure, lesɗe e laamiiɓe o dooli ɓe yoɓango mo garaama.
5Ɓaawoɗon, o nyawi e o faami o maayan.
6Nden kadi, o ewni mawɓe ardiiɓe sooje'en, saraaki'en tedduɓe mawnididɓe bee maako diga nderkaaku, o senndani ɓe lesdi maako caka maɓɓe hiddeko o maaya.
7Zuulgarnayni maayi ɓaawo laamaago duuɓi sappo e ɗiɗi.
8Mawɓe ardiiɓe sooje'en maako laami koo moy haa taƴre lesdi nde ɓe ta'ani ɗum.
9Ɓe fuu ɓe ndokki ko'e maɓɓe innde laamiiɗo. Ruutu maɓɓe waɗi bana non duuɓi ɗuuɗɗi, ɗum nastini duniyaaru fuu nder bone.
Yahuudu'en feere kooci al'aadaaji Yunaniŋke'en
10Leggal marŋgal dajje fuɗi caka ɓiɓɓe maɓɓe: Kaŋgal wi'ete Antiyokus Epifan ɓii laamiiɗo Antiyokus. Ɓaawo naŋngeeki maako haa lesdi Roma, o laati laamiiɗo haa lesdi Siriya nder hitaande 137.
11Yaake man, udumre halluɓe waŋgi haa Isra'iila. Ɓe keɓi no ɓe cargira yimɓe ɗuuɗɓe bee wi'go: “Ndillen, narren bee ummaatooje heefeerɓe taariiɗe en. Masiibooji ɗuuɗɗi kippi en diga en cali yeeɗgo bana maɓɓe.”
12Yimɓe boo ngiɗi nango irin haalaaji bana ni'i.
13Yimɓe seɗɗa caka jama'aare njaawi yahgo haa laamiiɗo: O hokki ɓe duŋayeere tokkaago al'aadaaji yimɓe man.
14Nden ɓe nyiɓi babal fijirde haa Urusaliima fodde al'aada heefeerɓe;
15Ɓe cuuɗi hollugo ɓe juulniiɓe, ɓe acci alkawal ceniiŋgal, ɓe tokki heefeerɓe. Ɓe ceyori waɗgo kalluɗum.
Laamiiɗo Antiyokus hippi Misra
16Nde Antiyokus annditi lesdi maako semmbiɗi, o nufi jaalaago Misra haa o warta laamiiɗo lesɗe man ɗiɗi fuu.
17O dilli Misra bee mooɓre sooje'en ɗuuɗɓe e semmbiɗɓe, mootaaji haɓre, nyiibi e koommbooje ɗuuɗɗe.
18O hippi Potolome, laamiiɗo Misra, laamiiɗo oo lusini, doggi. Sooje'en ɗuuɗɓe mbaraama.
19Antiyokus jaɓti gure cemmbiɗinaaɗe e o luuwi ɗe.
20Ɓaawo jaalaago Misra nder hitaande 143, Antiyokus lorti ɓaawo, tiiti Isra'iila haa o yotti Urusaliima bee mooɓre sooje'en maako semmbiɗnde.
Laamiiɗo Antiyokus luuwi haykaliiru
21O nasti nder haykaliiru bee mawnitaare. O ɗoofi hirsirde kaŋŋeeri, jo'inirɗum pittirlaaji e ko woni dow fuu,
22taabal tamseeje dokkaaɗe Allah, paalon ngam sadaka njaram inaboojam, taasahon ngam wiccugo ndiyam, njardukoy kaŋŋeeri, laabuleeji, kifineeje jamɗe, o itti ko woni pawne kaŋŋeeri haa mahol haykaliiru.
23O hooci ceede boo, kaŋŋeeri e ko mari saman fuu. O heɓti ndesaari cigaandi fuu e o ɓofti ɗum fuu.
24Nde o hoocidi ɗum fuu, o huuci lesdi maako. O rufi ƴiiƴam yoŋkiiji ɗuuɗɗi e o wolwi boliiɗe mawnitiiɗe.
25Haa gure lesdi fuu, ɓe njurmini ngam masiibo kippuŋgo Isra'iila.
26Ardiiɓe e ndotti'en uumi, ɓiɓɓe worɓe e rewɓe ɗon njooɗi ngalaa baawɗe, rewɓe ngalaa ŋarol fahin.
27Ɓaŋgɓe hesɓe kawti nder suno man. Nder cuuɗi maɓɓe ɓaŋgaaɓe ɗon nder mettamɓeram.
28Daliila masiibooji ukkooɗi dow yimɓe Isra'iila, lesdi dimmbi, yimɓe wuro fuu keewi semteende.
Nyiɓgo mahi Urusaliima cemmbiɗɗi
29Duuɓi ɗiɗi ɓaawoɗon, laamiiɗo neli haa gure Yahudiya fuu, wakiiliijo maako cuklaniiɗo mooɓtugo garaama: O yehi haa Urusaliima bee mooɓre sooje'en.
30O wolwi boliiɗe ɗe jam nder faasikaare, yimɓe wuro fuu kooli mo. Nden o yerɓi sooje'en kippo wuro, o ukki dow maago bee caatal. O mbari Isra'iila'en ɗuuɗɓe.
31O luuwi wuro, o huɓɓi yiite haa calaaje e haa mahi.
32Sooje'en ndahi rewɓe e ɓikkoy maɓɓe, ɓe cenndi dabbaaji boo.
33Ɓe mbo'itini wuro Daawuda, ɓe taarni ngo bee mahol towŋgol e caatuŋgol, ɓe ngaɗi soorowol cemmbiɗŋgol.
34Ɓe njo'ini yimɓe halluɓe, buuɗaaje ton, nden ɓe cuuɗi sera.
35Ɓe cigi balmi e nyaamduuji, ɓe mooɓti jawle ɗe ɓe keɓi haa Urusaliima e ɓe kulni Isra'iila.
36Ɗum masiibo dow haykaliiru e ɗum barriya caatuka dow Isra'iila ngam foroy.
37Ɓe ndufi ƴiiƴam yimɓe ɓe ngalaa aybe haa les babal ceniiŋgal, non ɓe coɓniri ngal.
38Ɓe ndooli yimɓe Urusaliima ndogga wuro man, wuro man warti beerle hoɗɓe. Yimɓe maago ngarti hoɗɓe nder maago, cafti eggi ngo.
39Haykaliiru maago sampitaama haa warti harde. Nyalɗe juulde wuro man ngarti nyalɗe suno e bojji, nyalɗe ciwtorɗe ngarti jalnoore e tedduŋgal maago warti yawaare.
40Bana tedduŋgal maago mawnino non toskaare maago jonta boo, maŋngu maago warti suno.
Laamiiɗo Antiyokus haɗi diina Yahuudu'en
41Nden laamiiɗo Antiyokus winndi, umri haa yimɓe wuro maako fuu, ɓe kawta, ɓe laato jama'aare woore
42e ɓe acca al'aadaaji maɓɓe. Heefeerɓe tokki umroore laamiiɗo man
43e ɗuuɗɓe nder Isra'iila'en ceyori nastugo diina maako. Ɓe lii'ani kirseteeɗi maɓɓe haa labbi e ɓe acci samɗingo nyalaade siwtorde.
44Fahin, laamiiɗo neli nelaaɓe mum njahra bataakeeji haa Urusaliima e gure Yahudiya. O umri ɓe tokko yeeso kam al'aadaaji jananni haa lesdi maɓɓe.
45O haɗi Yahuudu'en lii'aago guleteeɗi malla goɗɗi malla dokke kuroori malla inaboojam nder haykaliiru. O dooli ɓe taa ɓe kakkilana nyalaade siwtorde malla nyalɗe juulɗe
46e ɓe coɓna haykaliiru non boo kuuje ceniiɗe.
47Fahin, sey Yahuudu'en nyiɓana labbi kirsirɗe, cuuɗi ngam waɗgo do'a e cuuɗi labbi, sey ɓe lii'a dokke gaduuji e dabbaaji coɓɗi.
48Ɓe potaay juulnugo ɓikkoy maɓɓe. Sey ɓe coɓna ko'e maɓɓe bee ko nyiddi fuu.
49Sey ɓe ngejjita Tawreeta Muusa e ɓe cannja al'aadaaji maɓɓe fuu.
50Caliiɗo umrooje laamiiɗo fuu hiitete kiita mbareeki.
51Laamiiɗo winndi, hokki umrooje mum haa yimɓe laamu mum fuu, o suɓi wakiili'en ngam aynugo jama'aare Yahuudu'en. O umri boo ɓe lii'ana labbi kirseteeɗi haa gure Yahudiya fuu.
52Ɗuuɗɓe caka Yahuudu'en acci Tawreeta Muusa, ɓe kawtani wakiili'en laamiiɗo, ɓe ngaɗi bononnda ɗuuɗŋga nder lesdi
53haa ɓe ndooli Isra'iila'en hoolaaɓe, ɓe cuuɗo haa ɓe keɓata suuɗgo fuu.
54Nyannde sappo e jowaɓre nder lewru Kislew nder hitaande 145, laamiiɗo nyiɓi dow hayre hirsirde nde haykaliiru Kuuŋga coɓŋga e ɓe nyiɓi kirsirɗe haa gure Yahudiya fuu.
55Ɓe ɗon ngula uurle yeeso dammuɗe calaaje e haa babe.
56Ɓe ceeki defte Tawreeta ɗe ɓe tawi fuu, ɓe cakkini ɗe nder yiite.
57Fodde umroore laamiiɗo, to ɓe tawi goɗɗo mari deftere seniinde malla ɗon tokki Tawreeta Muusa fuu, o mbare.
58Lewru fuu, yimɓe laamiiɗo marno baawɗe waɗgo Isra'iila'en hoolaaɓe ko ɓe ngiɗi fuu.
59Nyannde noogas e jowaɓre lewru fuu, ɓe ɗon lii'ana labbi kirseteeɗi dow hirsirde haykaliiru.
60Ɓe ɗon mbara boo fodde umroore laamiiɗo, rewɓe juulnuɓe ɓikkoy mum'en,
61ɓe ɗon mbarda ɓe bee ɓikkoy maɓɓe ɓilakoy dow daaɗe maɓɓe, ɓe ɗon mbara asŋgol maɓɓe fuu e ɓen juulnuɓe boo.
62Ammaa ɗuuɗɓe nder yimɓe Isra'iila keɓi cuusal salaago nyaamgo nyaamduuji coɓɗi.
63Ɓe ngeli maayugo dow nyaamgo nyaamdu soɓndu e yewgo alkawal ceniiŋgal. Nden, ɓe mbari ɓe.
64Tikkere Allah saatunde ɗonno dow Isra'iila.
Currently Selected:
1 Makabe 1: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.