Isaias 34
34
Silotan sa Dios ang Iyang mga Kaaway
1Duol kamo, mga kanasoran, ug pamati pag-ayo.
Ang tibuok kalibotan,
ug ang tanang anaa niini kinahanglang mamati.
2Kay nasuko ang Ginoo sa tanang nasod.
Napungot siya sa ilang mga sundalo.
Busa laglagon niya sila sa hingpit.#34:2 laglagon niya sila sa hingpit: ang Hebreo nga pulong nga gigamit dinhi nagkahulogan sa mga butang nga gihalad sa Ginoo pinaagi sa paghalad o paglaglag niini.
3Pasagdan nga dili malubong ang ilang mga patayng lawas,
ug magbanaw ang dugo sa mga bukid.
Busa mangalisbo ang mga baho niini.
4Matunaw ang tanang butang nga anaa sa kalangitan,
ug ang kalangitan mawala nga daw kasulatan nga gilukot.
Mangahulog ang mga bitoon sama sa laya nga mga dahon
sa ubas o igos nga nangatagak.
5Human ug gamit sa Ginoo ang iyang espada didto sa kalangitan,
itigbas niya kini sa Edom,
ang katawhan nga iyang gihukman nga silotan.
6Ang espada sa Ginoo mabulit sa dugo ug tambok,
nga daw gigamit sa pag-ihaw sa mga halad nga kanding ug karnero.
Kini tungod kay pamatyon sa Ginoo ang mga tawo sa Bozra ingon nga halad.
Daghan ang iyang pamatyon sa uban pang mga siyudad sa Edom.
7Pamatyon usab ang ilang mga pangulo nga daw sa mga torong baka nga kusgan.
Ang ilang yuta mapuno sa dugo ug tambok.
8Kay adunay gitagana nga panahon ang Ginoo alang sa pagpanimalos
sa iyang mga kaaway tungod sa gibuhat niini ngadto sa Zion.#34:8 Zion: mao usab ang Jerusalem.
9Ang mga sapa sa Edom mahimong aspalto ug ang yuta mahimong asupre.
Ang tibuok nasod mahimong aspalto nga nagdilaab.
10Dili kini mapalong adlaw ug gabii.
Ang aso niini mag-ulbo sa walay kataposan.
Wala nay mopuyo ug moagi sa Edom hangtod sa hangtod.
11Puy-an kini sa mga kuwago ug mga uwak.#34:11 mga kuwago ug mga uwak: dili klaro sa Hebreo kon unsa gayod kining mga mananapa.
Nagplano na ang Ginoo nga himuon niya kining walay porma ug haw-ang.
12Pagtawgon kini nga “Walay Pulos nga Gingharian.”
Mangahanaw ang tanan niyang mga pangulo.
13Manubo ang tunokon nga mga tanom
sa ilang pinarilan nga mga lungsod
ug sa lig-ong mga bahin niini.
Ug mamuyo didto ang mga kuwago
ug ihalas nga mga iro.#34:13 ihalas nga mga iro: sa English, “jackals”.
14Ang ihalas nga mga mananap apil ang ihalas
nga mga iro#34:14 ihalas nga mga iro: sa English, “hyenas”. magtagbo didto.
Ang ihalas nga mga kanding manawag
sa ilang mga kauban,
ug ang mga mananap nga gabii lang
manggawas moadto didto aron sa pagpahulay.
15Ang mga kuwago magsalag didto,
mangitlog, mamusa, ug panalipdan nila
ang ilang mga piso ilalom sa ilang mga pako.
Moadto usab didto ang mga uwak
nga magparis-paris.
16Tan-awa ninyo ang libro sa Ginoo ug basaha.
Walay bisan usa sa akong gipanulti nga dili matuman.
Walay usa niining mga mananapa ang mawala,
ug walay usa kanila nga walay pares.
Kay pagbuot kini sa Ginoo,
ug siya mismo#34:16 siya mismo: o ang iyang Espiritu. mao ang motigom kanila.
17Gitagana na niya ang yuta ug gibahin ngadto sa mga mananap.
Panag-iyahon nila kini hangtod sa hangtod,
ug didto na sila mamuyo sa walay kataposan.
Currently Selected:
Isaias 34: APD
Highlight
Share
Copy
Want to have your highlights saved across all your devices? Sign up or sign in
Cebuano Contemporary Bible™, APD™ | © 2009, 2010, 2014, 2024 by Biblica, Inc. | Used with permission. All rights reserved worldwide.
