RUD 3
3
Rud na äaale Bowase
1Ti wurpo Nawmi, wii kaa äe Rud ga, May äi, daga ndi mo kië ngeel hayle go mo, nen maga ndo mo hay de fruygi. 2Do maga ndo kon mbo no so no, Bowas se maga men ndo joñ joñre wer mayre gebere äen wo mono, aà diñ je ma mbañ de werpiiri naan wo. AÀ wo yañ go äum coore ble äe ma ti yaagen law la. 3Do sen yog go, ni ndo jwed trusa see äo jwede, hee oçoçbe äo ma de woren see äo. See, wo ti ngeel maga aà de äum coore ble äen ni mono, ama ni ndo naa nen see äo go tañgu maga aà bay reege wo de jooge mo wa. 4De maga aà suu we no, er ngeel maga aà suu ni mono, blam äe ni ndo see, hoo jag oçoçbe ma äaale äe no, ni ndo suu ni. AÀ wii ndo yañ ti fen maga ndo nen joñge äe mono. 5Rud raw fer waçaçre ne kaa äe ga: Fen maga ndo wii me ti äe mono ndi joñn yañe.
6AÀ ëii gi wo ma woge ti yaagen so. AÀ wo mokay la joñ fen maga kaa äe hay ngaän ne hen mo äuy no. 7Bowas ree go ree, raw jooge wer äe lay, blam äe äil äe raw joñge go fehhe. AÀ raw ya'ge wo go suugi ti jeñ yaagen ti'i. Rud kal nduugi ya' suugi äaale äe eñña. 8Wo dayge ti gisiëgi suñ mono, Bowas raw urgi go ciñ bodaçy de temge, aà wo jel see äe no kay kona waçy po de suuli äaale äe la ti'i. 9AÀ raw wiigi äe ga: AÀ diñ ndo wo se äa? Waçyn raw fer waçaçre ne hen ga, AÀ diñ ndi Rud, maygebe äo no, ëaw me do äo werga faage ti äo ma hoo mege. 10Bowas raw wiigi äe ga: Daga Manwur mo kañ bosa' mo ti, may äi. Fen maga ndo joñ sen mo pa no, diñ mo ma kañ nen ga ndo yaçaç jag kaa äo ti feele mani äe no. Ama maga ndo joñ sen mokay dañ ma tañgun pa so yaw, werga koëa, ndo da diñ weere joçoçre ma decoo noga de eegre wo gaè. 11Patala de ele, ëig wa so hase. Ndi joñ fen maga ndo de saçy äe ti yañ mo, werga jar äuy go de koge ga ndo diñ manwaçy po ma de ele. 12AÀ mbe cwaçy kidolgi do sen nono, ga ndi diñ kaw ma mbañ ma hoo moge, ama je ma mbañ ma tigriñ de dañ mege yañ go. 13Patala joñ mbo nen nage la ti'i, ngeel tee we go toñ no, naa ko waçaçre sen yañe. Hayga aà ëig we ga se oo yañ ti ngeel oole se, se hoo ndo yañ, ni aà mo hoo mbe. Day hayga aà waçaç we ga waçaçre sen la joñ do se gaa lay no, ma äin Manwur yañe, ndi yaçaç mo yañ see äi. Patala suu mbo ti' ëa so, ngeel mo tee go ëa.
14Rud raw mbe nage äaale äe ni ti' so, haçaç ngeel tee go. AÀ raw urgi go ciñ de maga ngeel busum busum ga jobo hay bay nen ko keçeç caw wa ëa mono, werga Bowas hay ëig ga daga jobo mo ko ga aà hay nduu we la wa. 15Day pa aà wiin ga, naa oçoçbe ma kluu ma ti äon le go ni ndo blarn wo go. Rud raw blarge äe wo go, se raw ngaä coore ble ne hen ni kelew hwal ti dwee, raw mañ ti äe de mañ, blam sen Rud kal mbe rawge liñ so.
16Rud wo da' kaa äe, day kaa äe wiin ga: Na ndo mbo may äi? Rud raw bag blam fen maga Bowas joñn ne hen mo äuy. 17Day wiin ga: AÀ ngaä coore ble le me do mokay no ga fer liñ da' kaa äo do koë wa. 18Nawmi wii kaa äen ga: Hay mbo eñ may äi, waçaçre sen la taw tawge ne, ndo kon yañ mbo. Werga blon mo caw hay ge wara ye' gaa, de maga waçaçre sen mo ta'la bay go de le' jag wa ëa mono.
Le Bible en Tupurri © Alliance Biblique du Cameroun 2006