An Kadonongan ni Solomon 10
10
Iningatan nin Kadonongan si Adan
1Iningatan nin Kadonongan an ama kan kinaban, an enot na lalaking hinaman, kan siya pa sana an linalang. Ilinigtas siya nin Kadonongan sa saiyang kasalan, 2asin tinawan nin kosog tanganing paghadean an gabos na bagay sa daga.
Binayaan ni Cain an Kadonongan
3Alagad igwa nin tawong bakong matanos, na nagbaya sa Kadonongan; rinaot niya an sadiri niyang buhay huli sa paggadan kan saiyang tugang sa saiyang kaanggotan.
Iningatan nin Kadonongan si Noe
4Huli kan kasalan na idto, binaha an daga, alagad ilinigtas giraray iyan nin Kadonongan. Giniyahan niya an sarong matanos na tawo na nakalunad sa matapo na arkong kahoy.
Tinabangan nin Kadonongan si Abraham
5Siring man, kan dai naotob an maraot na plano kan mga nasyon, pinili nin Kadonongan an sarong matanos na lalaki, asin pinadanay na daing digta sa atubang nin Dios. Tinawan niya nin kosog an lalaki tanganing maotob an kabotan nin Dios, maski namotan kan lalaking ini an saiyang aking lalaki.
Ilinigtas nin Kadonongan si Lot
6Ilinigtas nin Kadonongan an sarong matanos na lalaki mantang naghihingagdan an bakong diosnon na mga tawo. Nakadulag an lalaking idto sa kalayo na nagtunaw kan Limang Syudad. 7Nahihiling pa an tanda kan saindang kasombikalan. Alang asin danay na nag-aaso an daga duman. An mga kahoy namumunga alagad dai man nahihinog; sarong hariging asin an nagtitindog bilang sarong monumento nin sarong tawong dai nagtubod. 8An mga tawo sa mga syudad na idto dai nagpahalaga sa Kadonongan asin dai ninda aram an tama sa sala. Bako sana iyan, kundi an mga natada nindang mga naraot na syudad nagpapagiromdom pa sato kan saindang kalolongan, kaya dai nanggad malilingawan an saindang karatan. 9Alagad ilinigtas nin kadonongan sa kapahamakan an saiyang mga sorogoon.
Iningatan nin Kadonongan si Jacob
10Kan an sarong matanos na lalaki magdulag sa kaanggotan kan saiyang tugang na lalaki, giniyahan siya nin Kadonongan sa tamang agihan. Ipinahiling saiya nin Kadonongan an kahadean nin Dios asin itinao saiya an pakasabot kan mga banal na bagay.#10:10 mga banal na bagay; o mga anghel. An lalaki ginibo niyang magin mauswag sa saiyang pamumuhay. 11Kan an ibang tawo nagmawot na makua an pagsadiri kan lalaki, an Kadonongan nagdanay sa kaibahan niya asin pinayaman siya. 12Iningatan siya nin Kadonongan sa saiyang mga kaiwal, na naghipa sa pagsalakay saiya. Pinapanggana siya nin Kadonongan sa sarong masakit na laban, tanganing manodan niya na an paglingkod sa Dios orog na nagpapakosog sa sarong tawo ki sa anoman na bagay.
Ilinigtas nin Kadonongan si Jose
13Kan an sarong matanos na lalaki ipabakal bilang oripon, dai siya pinabayaan nin Kadonongan, kundi ilinikay sa kasalan. Inibahan siya nin Kadonongan sa bilanggoan 14asin dai binayaan sagkod na matawan niya nin kapangyarihan na mamayo sa sarong imperyo, dangan ginibo siyang pamayo kan banwaan na dating nag-api saiya. Ipinahiling nin Kadonongan na mayo nin katotoohan an sumbong laban saiya, asin tinawan siya nin daing kataposan na kaomawan.
An mga Israelita Ilinuwas nin Kadonongan sa Egipto
15Ilinigtas kaidto nin Kadonongan an sarong banal saka daing digtang banwaan sa sarong nasyon na nag-oripon sainda. 16Naglaog siya sa kalag kan saro sa mga sorogoon nin Dios, asin inatubang an natatakotan na mga hade huli sa paggibo nin mga ngangalasan saka mga tanda. 17Binalosan niya an banwaan nin Dios huli kan saindang tinios na mga kasakitan. Giniyahan niya sinda sa sarong makangangalas na pagbaklay. Tinawan niya sinda nin limpoy kun aldaw asin liwanag kan bitoon kun banggi. 18Inibahan niya sinda sagkod sa kairaroman kan Dagat na Pula, 19alagad linamos niya an saindang mga kaiwal, dangan an saindang mga bangkay idinagsa niya sa baybayon kan dagat. 20Kaya an bakong diosnon na mga tawo sinamsaman kan mga matanos. Inawit ninda an kamurawayan kan saimong banal na ngaran, O Kagurangnan; sarabay ka nindang inomaw huli ta ilinigtas mo sinda. 21An mga pola pinapagtaram kan Kadonongan; maski an mga saradit pang mga aki pinapagtaram niya nin malinaw.
Currently Selected:
An Kadonongan ni Solomon 10: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.