Sirac 46
46
Si Josue
1Si Josue na aking lalaki ni Nun sarong dakulang soldados. Siya an nagsunod ki Moises bilang propeta. Sosog sa kahulogan kan saiyang ngaran, siya nagin sarong dakulang paraligtas kan piniling banwaan nin Kagurangnan. Dinaog niya an mga kaiwal na nagsalakay sainda, tanganing ikatao niya sa Israel an saindang daga. 2Mamuraway siya nin marahay kan iitaas niya an saiyang mga kamot dangan pangenotan niya an mga pagsalakay sa mga syudad! 3Mayo nin siisay man na nakatindog laban saiya;#46:3 Sa Hebreyo Mayo nin…laban saiya; sa Griyego Mayo na nin makakaarog saiya sa kaisogan. sarong banal na gera an saiyang ipinaglaban para sa Kagurangnan. 4Giromdoma kun paano niya pinugol an paghiro kan aldaw asin pinahalawig an sarong aldaw na magin siring sa duwang aldaw. 5Nag-apod siya sa Kahorohalangkawe, an Makakamhan, kan palibotan siya kan mga kaiwal. 6Nagsimbag saiya an dakulang Kagurangnan sa paagi nin mga gapong yelo. An mga gapong yelong ini itinapok niya sa mga kaiwal asin ginadan niya sinda sa paglugsot sa Bet-Horon, tanganing mamidbidan kan mga nasyon kun gurano kakosog si Josue, huli ta nakikilaban ini bilang sarong banal na parasunod nin Kagurangnan.
Si Caleb
7Nagin maimbod si Josue kan panahon ni Moises. Maimbod siya asin si Caleb na aking lalaki ni Jefunne. Nagtindog sinda laban sa bilog na katiriponan, pinugol an mga tawo sa pagkakasala asin pinaontok an maraot nindang paggurumod-gumod. 8An duwang ini iyo sana an natadang buhay hale sa seis syentos mil na mga Israelita na nagralakaw sa kalangtadan asin nakalaog sa mayaman saka matubang na daga na magigin pamana ninda. 9Pinakosog nin Kagurangnan si Caleb, asin kan gurang na siya, nakaduman pa siya sa mabulod na daga dangan sinakop idto para sa saiya asin para sa saiyang mga kapagarakian. 10Kaya nahiling kan bilog na Israel na marahay an magsunod sa Kagurangnan.
An mga Hukom
11Dangan yaon man an mga hukom, na an lambang saro nagin bantog, na dai nanggad nagsamba sa mga dios-dios asin dai nanggad nagtalikod sa Kagurangnan. 12Galangan logod an saindang giromdom! An mga tawong ini na satong ginagalangan magkaigwa logod nin bagong buhay sa paagi kan saindang mga kapagarakian!
Si Samuel
13Namotan nin Kagurangnan si Samuel. Bilang propeta nin Kagurangnan, pinakosog niya an kahadean asin nagbugtak siya nin mga pamayo para sa banwaan. 14Hinukoman niya an nasyon sosog sa Katogonan nin Kagurangnan, asin iningatan nin Kagurangnan an Israel. 15Huli kan kaimbodan ni Samuel, inako siya bilang sarong tunay na propeta. Nagsarig saiya an mga tawo bilang sarong parahula huli kan saiyang mga tataramon. 16Kan pinaghomaan siya kan saiyang mga kaiwal sa palibot niya, nag-apod siya sa Kagurangnan, an Makakamhan, asin nagdolot siya nin sarong pasusong kordero. 17Dangan nagdaguldol an Kagurangnan sa kalangitan, asin ipinadangog an saiyang makosog na tingog. 18Pinuho niya an mga pamayo kan mga taga Tiro saka Filistea. 19Kan naghihingagdan na si Samuel, nagtaram siya sa atubang nin Kagurangnan saka kan napiling hade na dai nanggad siya nagkua kan pagsadiri nin siisay man, maski sarong pades na sandalyas. Mayo nin nagsalungat saiya. 20Kan gadan na siya, nagpropesiya pa siya ki Hadeng Saul kun paano ini magagadan. Nagtaram siya bilang sarong propeta hale sa lulubngan, tanganing paraon an karatan kan saiyang banwaan.
Currently Selected:
Sirac 46: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.