Sirac 44
44
An Kamurawayan nin Dios sa Kasaysayan
1Kaya ngunyan, omawon ta an mga bantog na kalalakihan,
an satong mga ginikanan kan mga nakaaging henerasyon,
2mga lalaking tinawan nin Kagurangnan nin dakulang kamurawayan,
na sa sainda nahiling an saiyang kadakulaan
magpoon sa kapinonan nin panahon.
3Igwa nin nagkapirang namayo nin mga kahadean,
asin nagkapirang nabantog huli kan saindang kapangyarihan.
An nagkapira sainda mga madonong na parahatol,
asin an nagkapira, nagpropesiya.
4Igwang mga pamayo nin mga nasyon na an saindang mga dekreto iyo an nagpalakaw kan saindang namamanwaan,
mga pamayo na nagpaluwas nin mga dekreto,#44:4 Probableng teksto sa Hebreyo mga pamayo na nagpaluwas nin mga dekreto; sa Griyego bako ining malinaw.
mga madonong sa pagtaram nin mga katukdoan,#44:4 Sa Hebreyo mga madonong…katukdoan; sa Griyego bako ining malinaw.
asin idtong naggagamit nin hararom na mga talinhaga,#44:4 Sa Hebreyo asin idtong…talinhaga; sa Griyego, mayo kan mga tataramon na ini.
5mga paratula, asin mga paragibo nin mga awit,
6mga mayaman saka mapangyaring mga tawo na namumuhay sa katoninongan sa saindang harong.
7Gabos sinda inomaw sa sadiri nindang henerasyon,
asin bantog sa sadiri nindang panahon.
8An nagkapira nagwalat nin dangog
asin sagkod ngunyan inoomaw sinda nin mga banwaan.
9Igwa man nin iba na dai na ginigiromdom,
na garo baga dai sinda nabuhay,
na nagadan dangan nalingawan,
sinda, asin an saindang kaakian pakatapos ninda.
10Alagad oomawon ta an mga diosnon na tawong ini,
na an mga gibong katanosan dai nanggad nalingawan.
11An saindang marahay na dangog mapapaduman sa saindang mga kapagarakian,
asin iyo iyan an saindang magigin pamana.#44:11 Sa Griyego, an bersikulo 11 bakong malinaw.
12An saindang mga kapagarakian padagos na nag-ootob kan tipan
asin danay na mag-ootob huli kan ginibo kan saindang mga ginikanan.
13Magpapadagos sagkod lamang an saindang pamilya,
asin an saindang kabantogan dai nanggad malilingawan.
14An saindang mga bangkay ilinubong sa katoninongan,
alagad buhay sagkod pa man an saindang ngaran.
15Ipapahayag nin mga banwaan an saindang kadonongan,
asin oomawon sinda sa katiriponan.
Si Enoc
16Si Enoc nawilihan nin Kagurangnan asin dinara siya sa langit. Siya an nagin aarogan nin pagsolsol para sa gabos na panahon.
Si Noe
17Si Noe sarong matanos asin maimbod na tawo. Pakatapos na umabot an paggaba, tinawan niya nin bagong kapinonan an katawohan.#44:17 Sa Hebreyo tinawan…an katawohan; sa Griyego kinua siya bilang kasalihid para sa katawohan. Huli saiya, igwang mga tawo na natada sa daga pakatapos kan baha. 18An Kagurangnan guminibo saiya nin mayong tapos na tipan, nanunuga na dai na nanggad niya paparaon an tawo huli sa baha.
Si Abraham
19Si Abraham iyo an dakulang ginikanan kan dakul na nasyon, asin mayo nin siisay man na makakaarog sa saiya sa kabantogan. 20Inotob niya an Katogonan kan Kahorohalangkawe, asin nakipagtipan siya saiya, sarong tipan na makukua sa saiyang hawak. Kan baloon siya, nahiling siyang maimbod. 21Kaya naggibo nin banal na panuga an Kagurangnan na an saiyang mga kapagarakian magigin sarong bendisyon sa kinaban; na an saindang bilang magigin siring sa alpog kan kinaban; na gagalangan sinda orog pa ki sa arin man na banwaan sa daga; na an saindang daga magigin mahiwas, magpoon sa Eufrates sagkod sa mga poro kan daga.
Si Isaac asin si Jacob
22-23Itinao man nin Kagurangnan ki Isaac an parehong panuga huli na sana ki Abraham na saiyang ama, dangan ki Jacob. Itinaram niya giraray an saiyang panuga na an mga kapagarakian ni Abraham magigin sarong bendisyon sa gabos na tawo. Tinaraman nin Kagurangnan si Jacob na bebendisyonan niya ini; itinao niya saiya an daga na mapapasaiya, saka binaranga idto sa doseng kabtang, saro para sa lambang tribu.
Currently Selected:
Sirac 44: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.