Sirac 34
34
An mga Pangatorogan mayong Halaga
1An mga lolong na tawo nadadaya huli sa mayong halagang mga paglaom, asin natataranta sinda huli sa mga pangatorogan. 2An tawong nagpapahalaga sa mga pangatorogan nakakaagid sa tawong naghihingowang makadakop nin anino o sa tawong naglalamag kan doros. 3An nahihiling mo sa sarong pangatorogan bakong totoo arog kan lalawogon na nahihiling mo kun ika nananalming. 4An anoman na bakong totoo dai pwedeng magbunga nin totoo, siring na an sarong maati dai mabunga nin malinig. 5An mga pangatorogan, hula, saka mga tanda gabos mayo nin halaga. An mahihiling mo sa mga iyan iyo idtong boot mong mahiling.#34:5 Probableng teksto An mahihiling…mahiling; sa Griyego An isip igwa nin imahinasyon na arog sa sarong babaeng nangangaki. 6Sagkod na bako an Kahorohalangkawe an magpadara kan pangatorogan, dai mo pagtawan iyan nin halaga. 7Dakul nang tawo an nadaya huli sa mga pangatorogan; ibinugtak ninda an saindang pagsarig sa pangatorogan, alagad mayo nin marahay na nangyari sainda. 8An Katogonan mangyayari maski mayo kan mga pandadayang iyan. An Kadonongan, siring sa pakataram kan mga matanos, arog man kaiyan.
An Pagbyahe
9An tawong dakul nang beses na nagbyahe#34:9 An tawong dakul nang beses na nagbyahe; sa nagkapirang kasuratan An tawong may inadalan. dakul an naaaraman asin an tawong dakul nang eksperyensya nagtataram na igwang pakasabot. 10Kadikit sana an saimong maaaraman kun dikit man an saimong eksperyensya, alagad sa pagbyahe, dakul kang manonodan na katusohan. 11Sa sakong pagbyahe dakul na bagay an sakong nahiling asin dakul man an sakong nasabotan na dai ko pwedeng itaram. 12Dakul na beses akong namugtak sa pag-alaman nin kagadanan, alagad danay akong nakakaligtas huli kan sakong mga eksperyensya.
Pagkatakot sa Kagurangnan
13An mga may pagkatakot sa Kagurangnan mabubuhay huli ta ibinugtak ninda an saindang pagsarig sa makakaligtas sainda. 14Matakot ka sa Kagurangnan, asin mayo ka nang matatakotan. Kun nagsasarig ka sa saiya, dai ka na nanggad magigin matalaw. 15Paladan an mga tawong may pagkatakot sa Kagurangnan, huli ta aram ninda kun saen sinda makakakua nin tabang. 16Binabantayan nin Kagurangnan an mga namomoot saiya; siya an makosog nindang pailihan asin pusog na pundasyon. Siya an saindang pailihan sa mainit na doros asin an lindong sa init nin aldaw kun odto. Siya man an nagliligtas sainda sa pagkatumba asin pagkahulog. 17Siya an nagpapaogma sainda asin an nagbubugtak nin kagayagayahan sa saindang mga mata. Benebendisyonan niya sinda nin buhay asin marahay na hawak.
Pagdolot nin mga Sakripisyo
18Kun an hayop na saimong idinodolot bilang sakripisyo napasaimo sa bakong marahay na paagi, iyan may kaninan asin dai maaako. 19An Kahorohalangkawe dai naoogma sa mga sakripisyo kan mga bakong diosnon; mayo nin sakripisyong makakabayad kan saindang mga kasalan. 20An tawong naghahabon nin hayop sa sarong dukha tanganing idolot bilang sakripisyo, nakakaagid sa lalaking nanggagadan nin aking lalaki sa atubang kan ama kaini. 21Para sa mga dukha, an pagkakan iyo an buhay, asin an pagkua kaiyan sa sainda nangangahulogan nin panggagadan. 22An paghale kan ikabubuhay kan saimong kanatad sarong panggagadan; siring man an dai pagtao sa sarong trabahador kan saiyang sweldo.
23Kun an sarong tawo nagpapatindog asin an saro man naggagaba, igwa daw nin nahahaman? Mayo, kundi kapagalan. 24Kun an sarong tawo nagbebendisyon asin an saro man nagmamaldisyon, siisay an dadangogon nin Kagurangnan? 25Kun nagduta ka sa sarong bangkay dangan naglinig ka huli sa paghanaw, pakatapos nagbalik ka giraray asin nagduta sa bangkay, anong karahayan an itinao kan paghanaw mo? 26Kun nag-ayuno ka huli kan saimong mga kasalan, dangan nagluwas ka saka maggibo kan parehong kasalan, ano an nakua mo sa dai pagkakan? Sa paghona mo, siisay an madangog kan saimong mga pamibi?
Currently Selected:
Sirac 34: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.