An Awit kan Tolong Hoben na Lalaki 1
1
An Pamibi ni Azarias
1Nagpoon sa paglakaw sa tahaw kan kalayo an tolong hoben na lalaki na si Ananias, si Misael, saka si Azarias,#1:1 SI ANANIAS, SI MISAEL, SAKA SI AZARIAS: Iyo ini an tunay na mga ngaran ni Sadrak, ni Mesak asin ni Abednego (hilingon an Dan. 1:6-7). na nag-aawit nin mga himno sa Dios asin nag-oomaw sa Kagurangnan. 2Dangan nag-ontok si Azarias asin duman sa tahaw kan kalayo makosog siyang namibi: 3“O Kagurangnan, Dios kan samong mga ginikanan, inoomaw mi ika saka sinasamba; an saimong ngaran omawon logod sagkod lamang. 4Matanos ka sa gabos na ginibo mo samo. Totoo an gabos mong gibo, tama an saimong mga palakaw asin mayo ka nin kinikilingan sa saimong mga paghukom. 5Ginibo mo an tama kan padarahan mo nin kasakitan an Jerusalem, an banal na syudad kan samong mga ginikanan. Maninigo samo an paghukom na idto huli kan samong mga kasalan. 6Dai kami nagkuyog saimo, nagtalikod kami saka naggibo kan gabos na klase nin kasalan. 7Dai mi ginibo an saimong mga pagboot. Kun kinuyog mi an saimong mga katogonan, nag-uswag kutana kami. 8Kaya maninigo samo an paghukom saka padusa na ipinadara mo samo. 9Itinao mo kami sa kamot kan makauuyam na mga kaiwal na dai nagmidbid kan Katogonan—sa pinakamaraot na hade sa bilog na kinaban. 10Ngunyan kami gabos na nagsasamba saimo nawaraan nin onra; dai mi na ikinakabuka an samong mga ngoso huli sa kasosopgan.
11“Huli kan saimong sadiring ngaran, dai mo nanggad kami pagpabayaan asin dai mo pagputolon an saimong tipan samo. 12Dai mo ipagsayuma samo an saimong pagkaherak. Otoba an saimong mga panuga ki Abraham na saimong namotan, ki Isaac na saimong sorogoon, saka ki Jacob na ama kan banal na banwaan nin Israel. 13Nanuga ka na tatawan mo sinda nin mga kapagarakian na arog kadakul kan mga bitoon sa langit asin kan mga baybay sa tampi kan dagat. 14Alagad ngunyan, Kagurangnan, mas dikit kami sa bilang ki sa arin man na nasyon; saen man kami magduman, nabubuhay kami na mayo nin onra huli kan samong mga kasalan. 15Ngunyan mayo kami nin hade, mayo nin propeta o mga lider. Mayo na kami nin Templo na madudumanan tanganing magdolot saimo nin tinutong na mga atang, mga sakripisyo, mga regalo, o nin insenso; mayo kami nin lugar na pwedeng pagdolotan tanganing makamit mi an saimong pagkaherak. 16Alagad minadolok kami saimo na may pusong nagsosolsol saka espiritung nagpapakumbaba. Akoon mo na kami na garong may darang mga lalaking karnero saka baka, asin rinibong matatabang kordero na tututongon bilang atang saimo. 17Akoon mo an samong pagsolsol ngunyan, tanganing magkuyog kami saimo sa bilog ming puso, huli ta mayo nin napasopog sa mga nagsarig saimo. 18-19Ngunyan, bilog na puso kaming nanunuga na masunod saimo, masamba saka madolok saimo sa pamibi. Trataron mo kami sosog sa saimong pagkamaboot asin pagkamaheherakon; dai mo nanggad kami ipagpasopog. 20Kagurangnan, ligtasan kami sosog sa saimong makangangalas na mga gibo asin tawan mo nin kamurawayan an saimong ngaran.
21“Mahalean logod nin onra saka mapasopog an gabos na nagkukulog samo. Haleon mo an saindang kapangyarihan asin kakayahan sa pagsakop; ronota an saindang kosog. 22Ipahiling mo sainda na ika sana an Kagurangnan, an Dios na mamuraway na namamahala sa bilog na kinaban.”
23An mga sorogoon kan hade na nagtapok sa tolong hoben na lalaki sa horno nagpadagos sa pagpalaad kan kalayo sa paagi nin paggatong nin lana, alkitran, dagami sagkod mga sanga nin kahoy. 24An kalayo uminabot sa langkaw na beynte y tres metros 25asin luminakop kaya nasulo an mga taga Babilonia na nagtitindog sa kataed kan horno. 26Alagad naglusad sa kalayo an anghel nin Kagurangnan tanganing ibahan an tolong hoben na lalaki. Inalaw kan anghel paluwas sa horno an kalayo 27saka ginibo niyang sa tahaw kan horno garo may naghuhuyop na malipot na doros. Kaya dai nadutaan kan kalayo an mga lalaki ni nakulogan sa anoman na paagi.
An Awit kan Tolong Hoben na Lalaki
28Duman sa laog kan horno, sarabay na nag-arawit sa pag-omaw sa Dios an tolong hoben na lalaki:
29“Pag-omawon ka,
O Kagurangnan, Dios kan samong mga ginikanan.
Tawan ka logod nin pag-omaw asin paggalang sagkod lamang.
30Pag-omawon an saimong mamuraway asin banal na ngaran;
tawan logod iyan nin pag-omaw sagkod lamang.
31Pag-omawon ka sa templo nin saimong kamurawayan.
Tawan ka logod nin pag-omaw asin kamurawayan sagkod lamang.
32Pag-omawon ka, ika na nagtutukaw sa saimong langitnon na trono sa ibabaw kan mga kerubin
saka nagdudungaw sa kinaban kan mga gadan.
Tawan ka logod nin pag-omaw asin paggalang sagkod lamang.
33Pag-omawon ka mantang nagtutukaw sa saimong magayon na trono.
Tawan ka logod nin pag-omaw
asin paggalang sagkod lamang.
34Pag-omawon ka sa kahiwasan kan kalangitan.
Awitan ka logod nin kaomawan asin tawan nin kamurawayan sagkod lamang.
35“Omawon nindo an Kagurangnan, kamo gabos na linalang;
mag-awit kamo nin pag-omaw saiya asin tawan nindo siya nin onra sagkod lamang.
36Omawon nindo an Kagurangnan, kamong mga kalangitan;
mag-awit kamo nin pag-omaw saiya asin tawan nindo siya nin onra sagkod lamang.
37Omawon nindo an Kagurangnan, kamo gabos na anghel nin Kagurangnan;
mag-awit kamo nin pag-omaw saiya asin tawan nindo siya nin onra sagkod lamang.
38Omawon nindo an Kagurangnan, kamo gabos na katubigan sa ibabaw nin langit;
mag-awit kamo nin pag-omaw saiya asin tawan nindo siya nin onra sagkod lamang.
39Omawon nindo an Kagurangnan, kamo gabos na langitnon na kapangyarihan;
mag-awit kamo nin pag-omaw saiya asin tawan nindo siya nin onra sagkod lamang.
40Omawon nindo an Kagurangnan, aldaw saka bulan;
mag-awit kamo nin pag-omaw saiya asin tawan nindo siya nin onra sagkod lamang.
41Omawon nindo an Kagurangnan, kamong mga bitoon sa langit;
mag-awit kamo nin pag-omaw saiya asin tawan nindo siya nin onra sagkod lamang.
42Omawon nindo an Kagurangnan, uran saka ambon;
mag-awit kamo nin pag-omaw saiya asin tawan nindo siya nin onra sagkod lamang.
43Omawon nindo an Kagurangnan, kamo gabos na doros;
mag-awit kamo nin pag-omaw saiya asin tawan nindo siya nin onra sagkod lamang.
44Omawon nindo an Kagurangnan, kalayo saka init;
mag-awit kamo nin pag-omaw saiya asin tawan nindo siya nin onra sagkod lamang.
45Omawon nindo an Kagurangnan, makuring lipot saka nakakapasong init;
mag-awit kamo nin pag-omaw saiya asin tawan nindo siya nin onra sagkod lamang.
46Omawon nindo an Kagurangnan, mga ambon saka mga nyebe;
mag-awit kamo nin pag-omaw saiya asin tawan nindo siya nin onra sagkod lamang.
47Omawon nindo an Kagurangnan, mga banggi saka mga aldaw;
mag-awit kamo nin pag-omaw saiya asin tawan nindo siya nin onra sagkod lamang.
48Omawon nindo an Kagurangnan, liwanag saka diklom;
mag-awit kamo nin pag-omaw saiya asin tawan nindo siya nin onra sagkod lamang.
49Omawon nindo an Kagurangnan, yelo saka lipot;
mag-awit kamo nin pag-omaw saiya asin tawan nindo siya nin onra sagkod lamang.
50Omawon nindo an Kagurangnan, yelo saka nyebe;
mag-awit kamo nin pag-omaw saiya asin tawan nindo siya nin onra sagkod lamang.
51Omawon nindo an Kagurangnan, kikilat saka mga panganoron;
mag-awit kamo nin pag-omaw saiya asin tawan nindo siya nin onra sagkod lamang.
52“Tugoteng omawon kan daga an Kagurangnan;
tugote iyan na mag-awit nin pag-omaw saiya asin magtao nin onra sagkod lamang.
53Omawon nindo an Kagurangnan, kabukidan saka kabubuldan;
mag-awit kamo nin pag-omaw saiya asin tawan nindo siya nin onra sagkod lamang.
54Omawon nindo an Kagurangnan,
gabos na nagtatalubo sa daga;
mag-awit kamo nin pag-omaw saiya asin tawan nindo siya nin onra sagkod lamang.
55Omawon nindo an Kagurangnan, mga danaw saka mga salog;
mag-awit kamo nin pag-omaw saiya asin tawan nindo siya nin onra sagkod lamang.
56Omawon nindo an Kagurangnan, mga burabod nin tubig;
mag-awit kamo nin pag-omaw saiya asin tawan nindo siya nin onra sagkod lamang.
57Omawon nindo an Kagurangnan, mga balyena saka gabos na linalang na nasa katubigan;
mag-awit kamo nin pag-omaw saiya asin tawan nindo siya nin onra sagkod lamang.
58Omawon nindo an Kagurangnan, kamo gabos na gamgam;
mag-awit kamo nin pag-omaw saiya asin tawan nindo siya nin onra sagkod lamang.
59Omawon nindo an Kagurangnan, kamo gabos na baka saka mga lalaw na hayop;
mag-awit kamo nin pag-omaw saiya asin tawan nindo siya nin onra sagkod lamang.
60“Omawon nindo an Kagurangnan, kamo gabos na tawo sa daga;
mag-awit kamo nin pag-omaw saiya asin tawan nindo siya nin onra sagkod lamang.
61Omawon nindo an Kagurangnan, banwaan nin Israel;
mag-awit kamo nin pag-omaw saiya asin tawan nindo siya nin onra sagkod lamang.
62Omawon nindo an Kagurangnan, mga padi nin Kagurangnan;
mag-awit kamo nin pag-omaw saiya asin tawan nindo siya nin onra sagkod lamang.
63Omawon nindo an Kagurangnan,
mga sorogoon nin Kagurangnan;
mag-awit kamo nin pag-omaw saiya asin tawan nindo siya nin onra sagkod lamang.
64Omawon nindo an Kagurangnan,
kamo gabos na maimbod na tawo;
mag-awit kamo nin pag-omaw saiya asin tawan nindo siya nin onra sagkod lamang.
65Omawon nindo an Kagurangnan, kamo gabos na mapakumbaba saka banal;
mag-awit kamo nin pag-omaw saiya asin tawan nindo siya nin onra sagkod lamang.
66Omawon nindo an Kagurangnan, Ananias, Azarias, asin Misael;
mag-awit kamo nin pag-omaw saiya asin tawan nindo siya nin onra sagkod lamang.
Ilinigtas niya kita sa kinaban kan mga gadan
asin ilinigtas kita sa kapangyarihan nin kagadanan.
Ilinuwas niya kita sa nagkakalayong horno
asin ilinigtas kita sa kalayo.
67Magpasalamat kita sa Kagurangnan,
huli ta siya marahay
asin an saiyang pagkaherak
nagdadanay sagkod lamang.
68Omawon nindo an Kagurangnan,
kamo gabos na nagsasamba saiya;
mag-awit nin pag-omaw sa Dios nin mga dios dangan magpasalamat saiya,
huli ta an saiyang pagkaherak nagdadanay sagkod lamang.”
Currently Selected:
An Awit kan Tolong Hoben na Lalaki 1: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
An Awit kan Tolong Hoben na Lalaki 1
1
An Pamibi ni Azarias
1Nagpoon sa paglakaw sa tahaw kan kalayo an tolong hoben na lalaki na si Ananias, si Misael, saka si Azarias,#1:1 SI ANANIAS, SI MISAEL, SAKA SI AZARIAS: Iyo ini an tunay na mga ngaran ni Sadrak, ni Mesak asin ni Abednego (hilingon an Dan. 1:6-7). na nag-aawit nin mga himno sa Dios asin nag-oomaw sa Kagurangnan. 2Dangan nag-ontok si Azarias asin duman sa tahaw kan kalayo makosog siyang namibi: 3“O Kagurangnan, Dios kan samong mga ginikanan, inoomaw mi ika saka sinasamba; an saimong ngaran omawon logod sagkod lamang. 4Matanos ka sa gabos na ginibo mo samo. Totoo an gabos mong gibo, tama an saimong mga palakaw asin mayo ka nin kinikilingan sa saimong mga paghukom. 5Ginibo mo an tama kan padarahan mo nin kasakitan an Jerusalem, an banal na syudad kan samong mga ginikanan. Maninigo samo an paghukom na idto huli kan samong mga kasalan. 6Dai kami nagkuyog saimo, nagtalikod kami saka naggibo kan gabos na klase nin kasalan. 7Dai mi ginibo an saimong mga pagboot. Kun kinuyog mi an saimong mga katogonan, nag-uswag kutana kami. 8Kaya maninigo samo an paghukom saka padusa na ipinadara mo samo. 9Itinao mo kami sa kamot kan makauuyam na mga kaiwal na dai nagmidbid kan Katogonan—sa pinakamaraot na hade sa bilog na kinaban. 10Ngunyan kami gabos na nagsasamba saimo nawaraan nin onra; dai mi na ikinakabuka an samong mga ngoso huli sa kasosopgan.
11“Huli kan saimong sadiring ngaran, dai mo nanggad kami pagpabayaan asin dai mo pagputolon an saimong tipan samo. 12Dai mo ipagsayuma samo an saimong pagkaherak. Otoba an saimong mga panuga ki Abraham na saimong namotan, ki Isaac na saimong sorogoon, saka ki Jacob na ama kan banal na banwaan nin Israel. 13Nanuga ka na tatawan mo sinda nin mga kapagarakian na arog kadakul kan mga bitoon sa langit asin kan mga baybay sa tampi kan dagat. 14Alagad ngunyan, Kagurangnan, mas dikit kami sa bilang ki sa arin man na nasyon; saen man kami magduman, nabubuhay kami na mayo nin onra huli kan samong mga kasalan. 15Ngunyan mayo kami nin hade, mayo nin propeta o mga lider. Mayo na kami nin Templo na madudumanan tanganing magdolot saimo nin tinutong na mga atang, mga sakripisyo, mga regalo, o nin insenso; mayo kami nin lugar na pwedeng pagdolotan tanganing makamit mi an saimong pagkaherak. 16Alagad minadolok kami saimo na may pusong nagsosolsol saka espiritung nagpapakumbaba. Akoon mo na kami na garong may darang mga lalaking karnero saka baka, asin rinibong matatabang kordero na tututongon bilang atang saimo. 17Akoon mo an samong pagsolsol ngunyan, tanganing magkuyog kami saimo sa bilog ming puso, huli ta mayo nin napasopog sa mga nagsarig saimo. 18-19Ngunyan, bilog na puso kaming nanunuga na masunod saimo, masamba saka madolok saimo sa pamibi. Trataron mo kami sosog sa saimong pagkamaboot asin pagkamaheherakon; dai mo nanggad kami ipagpasopog. 20Kagurangnan, ligtasan kami sosog sa saimong makangangalas na mga gibo asin tawan mo nin kamurawayan an saimong ngaran.
21“Mahalean logod nin onra saka mapasopog an gabos na nagkukulog samo. Haleon mo an saindang kapangyarihan asin kakayahan sa pagsakop; ronota an saindang kosog. 22Ipahiling mo sainda na ika sana an Kagurangnan, an Dios na mamuraway na namamahala sa bilog na kinaban.”
23An mga sorogoon kan hade na nagtapok sa tolong hoben na lalaki sa horno nagpadagos sa pagpalaad kan kalayo sa paagi nin paggatong nin lana, alkitran, dagami sagkod mga sanga nin kahoy. 24An kalayo uminabot sa langkaw na beynte y tres metros 25asin luminakop kaya nasulo an mga taga Babilonia na nagtitindog sa kataed kan horno. 26Alagad naglusad sa kalayo an anghel nin Kagurangnan tanganing ibahan an tolong hoben na lalaki. Inalaw kan anghel paluwas sa horno an kalayo 27saka ginibo niyang sa tahaw kan horno garo may naghuhuyop na malipot na doros. Kaya dai nadutaan kan kalayo an mga lalaki ni nakulogan sa anoman na paagi.
An Awit kan Tolong Hoben na Lalaki
28Duman sa laog kan horno, sarabay na nag-arawit sa pag-omaw sa Dios an tolong hoben na lalaki:
29“Pag-omawon ka,
O Kagurangnan, Dios kan samong mga ginikanan.
Tawan ka logod nin pag-omaw asin paggalang sagkod lamang.
30Pag-omawon an saimong mamuraway asin banal na ngaran;
tawan logod iyan nin pag-omaw sagkod lamang.
31Pag-omawon ka sa templo nin saimong kamurawayan.
Tawan ka logod nin pag-omaw asin kamurawayan sagkod lamang.
32Pag-omawon ka, ika na nagtutukaw sa saimong langitnon na trono sa ibabaw kan mga kerubin
saka nagdudungaw sa kinaban kan mga gadan.
Tawan ka logod nin pag-omaw asin paggalang sagkod lamang.
33Pag-omawon ka mantang nagtutukaw sa saimong magayon na trono.
Tawan ka logod nin pag-omaw
asin paggalang sagkod lamang.
34Pag-omawon ka sa kahiwasan kan kalangitan.
Awitan ka logod nin kaomawan asin tawan nin kamurawayan sagkod lamang.
35“Omawon nindo an Kagurangnan, kamo gabos na linalang;
mag-awit kamo nin pag-omaw saiya asin tawan nindo siya nin onra sagkod lamang.
36Omawon nindo an Kagurangnan, kamong mga kalangitan;
mag-awit kamo nin pag-omaw saiya asin tawan nindo siya nin onra sagkod lamang.
37Omawon nindo an Kagurangnan, kamo gabos na anghel nin Kagurangnan;
mag-awit kamo nin pag-omaw saiya asin tawan nindo siya nin onra sagkod lamang.
38Omawon nindo an Kagurangnan, kamo gabos na katubigan sa ibabaw nin langit;
mag-awit kamo nin pag-omaw saiya asin tawan nindo siya nin onra sagkod lamang.
39Omawon nindo an Kagurangnan, kamo gabos na langitnon na kapangyarihan;
mag-awit kamo nin pag-omaw saiya asin tawan nindo siya nin onra sagkod lamang.
40Omawon nindo an Kagurangnan, aldaw saka bulan;
mag-awit kamo nin pag-omaw saiya asin tawan nindo siya nin onra sagkod lamang.
41Omawon nindo an Kagurangnan, kamong mga bitoon sa langit;
mag-awit kamo nin pag-omaw saiya asin tawan nindo siya nin onra sagkod lamang.
42Omawon nindo an Kagurangnan, uran saka ambon;
mag-awit kamo nin pag-omaw saiya asin tawan nindo siya nin onra sagkod lamang.
43Omawon nindo an Kagurangnan, kamo gabos na doros;
mag-awit kamo nin pag-omaw saiya asin tawan nindo siya nin onra sagkod lamang.
44Omawon nindo an Kagurangnan, kalayo saka init;
mag-awit kamo nin pag-omaw saiya asin tawan nindo siya nin onra sagkod lamang.
45Omawon nindo an Kagurangnan, makuring lipot saka nakakapasong init;
mag-awit kamo nin pag-omaw saiya asin tawan nindo siya nin onra sagkod lamang.
46Omawon nindo an Kagurangnan, mga ambon saka mga nyebe;
mag-awit kamo nin pag-omaw saiya asin tawan nindo siya nin onra sagkod lamang.
47Omawon nindo an Kagurangnan, mga banggi saka mga aldaw;
mag-awit kamo nin pag-omaw saiya asin tawan nindo siya nin onra sagkod lamang.
48Omawon nindo an Kagurangnan, liwanag saka diklom;
mag-awit kamo nin pag-omaw saiya asin tawan nindo siya nin onra sagkod lamang.
49Omawon nindo an Kagurangnan, yelo saka lipot;
mag-awit kamo nin pag-omaw saiya asin tawan nindo siya nin onra sagkod lamang.
50Omawon nindo an Kagurangnan, yelo saka nyebe;
mag-awit kamo nin pag-omaw saiya asin tawan nindo siya nin onra sagkod lamang.
51Omawon nindo an Kagurangnan, kikilat saka mga panganoron;
mag-awit kamo nin pag-omaw saiya asin tawan nindo siya nin onra sagkod lamang.
52“Tugoteng omawon kan daga an Kagurangnan;
tugote iyan na mag-awit nin pag-omaw saiya asin magtao nin onra sagkod lamang.
53Omawon nindo an Kagurangnan, kabukidan saka kabubuldan;
mag-awit kamo nin pag-omaw saiya asin tawan nindo siya nin onra sagkod lamang.
54Omawon nindo an Kagurangnan,
gabos na nagtatalubo sa daga;
mag-awit kamo nin pag-omaw saiya asin tawan nindo siya nin onra sagkod lamang.
55Omawon nindo an Kagurangnan, mga danaw saka mga salog;
mag-awit kamo nin pag-omaw saiya asin tawan nindo siya nin onra sagkod lamang.
56Omawon nindo an Kagurangnan, mga burabod nin tubig;
mag-awit kamo nin pag-omaw saiya asin tawan nindo siya nin onra sagkod lamang.
57Omawon nindo an Kagurangnan, mga balyena saka gabos na linalang na nasa katubigan;
mag-awit kamo nin pag-omaw saiya asin tawan nindo siya nin onra sagkod lamang.
58Omawon nindo an Kagurangnan, kamo gabos na gamgam;
mag-awit kamo nin pag-omaw saiya asin tawan nindo siya nin onra sagkod lamang.
59Omawon nindo an Kagurangnan, kamo gabos na baka saka mga lalaw na hayop;
mag-awit kamo nin pag-omaw saiya asin tawan nindo siya nin onra sagkod lamang.
60“Omawon nindo an Kagurangnan, kamo gabos na tawo sa daga;
mag-awit kamo nin pag-omaw saiya asin tawan nindo siya nin onra sagkod lamang.
61Omawon nindo an Kagurangnan, banwaan nin Israel;
mag-awit kamo nin pag-omaw saiya asin tawan nindo siya nin onra sagkod lamang.
62Omawon nindo an Kagurangnan, mga padi nin Kagurangnan;
mag-awit kamo nin pag-omaw saiya asin tawan nindo siya nin onra sagkod lamang.
63Omawon nindo an Kagurangnan,
mga sorogoon nin Kagurangnan;
mag-awit kamo nin pag-omaw saiya asin tawan nindo siya nin onra sagkod lamang.
64Omawon nindo an Kagurangnan,
kamo gabos na maimbod na tawo;
mag-awit kamo nin pag-omaw saiya asin tawan nindo siya nin onra sagkod lamang.
65Omawon nindo an Kagurangnan, kamo gabos na mapakumbaba saka banal;
mag-awit kamo nin pag-omaw saiya asin tawan nindo siya nin onra sagkod lamang.
66Omawon nindo an Kagurangnan, Ananias, Azarias, asin Misael;
mag-awit kamo nin pag-omaw saiya asin tawan nindo siya nin onra sagkod lamang.
Ilinigtas niya kita sa kinaban kan mga gadan
asin ilinigtas kita sa kapangyarihan nin kagadanan.
Ilinuwas niya kita sa nagkakalayong horno
asin ilinigtas kita sa kalayo.
67Magpasalamat kita sa Kagurangnan,
huli ta siya marahay
asin an saiyang pagkaherak
nagdadanay sagkod lamang.
68Omawon nindo an Kagurangnan,
kamo gabos na nagsasamba saiya;
mag-awit nin pag-omaw sa Dios nin mga dios dangan magpasalamat saiya,
huli ta an saiyang pagkaherak nagdadanay sagkod lamang.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.