Salmo 107
107
AN IKALIMANG LIBRO
(Mga Salmo 107–150)
Pag-omaw sa Pagkamarahayon nin Dios
1“Magpasalamat kamo sa Kagurangnan, huli ta siya marahayon;
huli ta an saiyang pagkamoot mayo nin kasagkoran!”
2Sabihon nindo an mga tataramon na ini sa pag-omaw sa Kagurangnan,
kamo gabos na saiyang tinubos.
Ilinigtas niya kamo sa saindong mga kaiwal
3asin ibinalik hale sa ibang daga,
hale sa sirangan asin sa solnopan, hale sa amihan asin sa habagat.
4May nagkaralagalag sa desyerto,
mayong nakuang dalan pasiring sa sarong syudad na maeerokan.
5Nagkagurutom asin nagkaparaha sinda,
an saindang kalag pinanruluya.
6Dangan sa saindang kasakitan nag-apod sinda sa Kagurangnan,
asin ilinigtas niya sinda sa saindang kahorasaan.
7Pinangenotan niya sinda sa sarong tanos na dalan,
pasiring sa sarong syudad na saindang maeerokan.
8Kaipuhan magpasalamat sinda sa Kagurangnan, huli kan danay niyang pagkamoot,
huli kan makangangalas na gibo niya sa sainda.
9Huli ta pinapainom niya an mga napapaha,
asin an mga nagugutom pinapakakan nin mga marahay na bagay.
10An nagkapira sainda nabubuhay sa kamondoan asin sa kadikloman,
mga bilanggo na nagtitios asin nakakadenahan,
11dahel sa dai pagkuyog sa mga pagboot nin Dios,
asin pagsikwal kan mga hatol nin Kahorohalangkawe.
12Napagal sinda nin marahay huli sa magabat na trabaho,
nagkaturumba sinda, asin mayo sainda nin nagtabang.
13Dangan sa saindang kasakitan, nag-apod sinda sa Kagurangnan,
asin ilinigtas niya sinda sa saindang kahorasaan.
14Hinawas niya sinda sa kamondoan asin kadikloman,
saka pinaratod an saindang mga kadena.
15Kaipuhan magpasalamat sinda sa Kagurangnan, huli kan danay niyang pagkamoot,
huli kan makangangalas na gibo niya sa sainda.
16Huli ta ginagaba niya an mga bronseng pintoan
asin pinuputol an mga barat na lansang.
17An nagkapira sainda mga lolong, nagtitios huli kan saindang mga kasalan
asin huli kan saindang karatan;
18hinaboan ninda an anoman na pagkakan
asin harani na sinda sa kagadanan.
19Dangan sa saindang kasakitan, nag-apod sinda sa Kagurangnan,
asin ilinigtas niya sinda sa saindang kahorasaan.
20Ipinadara niya an saiyang tataramon asin binolong niya sinda,
ilinigtas sinda sa lulubngan.
21Kaipuhan magpasalamat sinda sa Kagurangnan, huli kan danay niyang pagkamoot,
huli kan makangangalas na gibo niya sa sainda.
22Mga sakripisyo nin pasalamat kaipuhan idolot ninda,
mga gibo niya kaipuhan ipagrukyaw sa mga awit nin kaogmahan.
23An nagkapira sainda nagsakay sa mga barko asin nagpadagat,
naghanapbuhay sa mga katubigan.
24Nahiling ninda an mga gibo nin Kagurangnan,
an makangangalas niyang gibo sa kadagatan.
25Nagboot siya asin nagluwas an makosog na doros,
na nagbukag kan mga alon sa dagat.
26Pinatoron an mga barko sagkod sa kalangitan
asin ihinulog sa mga kairaroman.
Sa siring na pag-alaman, nanruluya an boot kan kalalakihan;
27sinda nagsarayasay asin nagkadarasmag arog sa mga burat—
dai na ninda aram kun ano an gigibohon.
28Dangan sa saindang kasakitan, nag-apod sinda sa Kagurangnan,
asin ilinigtas niya sinda sa saindang kahorasaan.
29Pinaontok niya an makosog na bagyo,
asin nagtoninong an mga alon.
30Nagkaorogma sinda huli kan kalmada,
asin pinadoong niya sinda sa boot nindang padumanan.
31Kaipuhan magpasalamat sinda sa Kagurangnan, huli kan danay niyang pagkamoot,
huli kan makangangalas na gibo niya sa sainda.
32Kaipuhan ipagrukyaw ninda an saiyang kadakulaan sa
katiriponan nin mga banwaan, asin pag-omawon siya sa katiriponan nin kamagurangan.
33Pinamara nin Kagurangnan an mga salog
asin pinaontok sa pagbulos an mga burabod.
34An mayaman na daga ginibo niyang maasgad na kalangtadan
huli kan karatan kan mga nag-eerok duman.
35An desyerto ginibo niyang mga sapa,
an mamarang daga pinangagin niyang mga burabod.
36Duman niya pinaerok an mga tawong nagugutom,
asin pinatindog ninda an sarong syudad na saindang eerokan.
37Hinasukan ninda an kaomahan asin tinanoman an mga ubasan,
dangan nakaani sinda nin dakul.
38Benendisyonan niya an saiyang banwaan, asin nagdakul sinda;
dai niya itinugot na magdiit an saindang mga hayop.
39Kan nadadaog asin nasosopogan an banwaan nin Dios
huli sa pagkaapi asin sa pagtios,
40ipinahiling niya an saiyang kabaldian sa mga nang-aapi sainda,
asin linagalag niya sinda sa mga desyerto na mayong dalan.
41Alagad ilinigtas niya an mga dukha sa saindang kasakitan,
asin pinadakul niya an saindang pamilya siring sa aripunpon nin mga karnero.
42Nahihiling ini kan matanos asin naoogma sinda,
alagad dai pinapagirong an mga maraot.
43Isipon logod kan mga madonong an mga bagay na ini;
akoon logod ninda an danay na pagkamoot nin Kagurangnan.
Currently Selected:
Salmo 107: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
