Salmo 10
10
Sarong Pamibi para sa Hustisya
1Tadaw ta harayo kang marahay, Kagurangnan?
Tadaw ta nagtatago ka kun kami nasa kahorasaan?
2Sa kapaabaw-abawan linalamag kan mga maraot an mga dukha;
dakopa sinda sa mga siod na ginibo ninda.
3Huli ta ipinaghahambog kan maraot an mga kamawotan nin saiyang puso;
minamaldisyon asin tinatalikdan an Kagurangnan kan tawong paslo.
4An tawong tampalasan dai naghahanap sa Kagurangnan;
an gabos niyang nasa isip, “Mayo nin Dios.”
5An tampalasan mauswag sa gabos na panahon.
Dai niya nasasabotan an mga paghukom nin Dios;
tinutuya-tuya niya an saiyang mga kaiwal.
6Nasa boot niya, “Mayong makakahiro sako;
dai ako mamumugtak sa kapahamakan.”
7An saiyang ngoso pano nin maldisyon, kaputikan asin pang-aapi;
sa dila niya yaon an karibokan asin karatan.
8Sa mga baryo nagtutukaw siya sa paghipa,
naghahalat tanganing manggadan kan mga mayong sala.
Binabantayan niya an saiyang magigin biktima,
9siring sa sarong leon sa saiyang pinagtatagoan.
Minahipa siya tanganing madakop an mga dukha;
sinisiod niya sinda dangan ginuguyod sa harayo.
10Nagkakaroronot an mga biktima;
nadadaog huli sa kosog niya.
11Nagsaboot siya, “Mayong pagmakulog an Dios!
Tinakpan niya an saiyang lalawogon asin dai niya nanggad ako mahihiling!”
12Tumindog ka, Kagurangnan;
O Dios, itaas mo an saimong kamot!
Hare paglingawe an mga nagtitios!
13Tadaw ta an Dios isinisikwal kan tampalasan
asin minasaboot, “Dai niya ako papadusahan”?
14Alagad nahihiling mo; namamasdan mo an kahorasaan asin kasakitan;
danay kang andam sa pagtao nin tabang.
An dukha minasarig sa saimo;
ika an danay na nagtatabang sa mga ilo.
15Baria an takyag kan maraot saka parakasala;
padusahan mo sagkod na dai na sinda maggibo kaiyan.
16An Kagurangnan hade sagkod pa man.
Mawawara sa saiyang daga
an mga nagsasamba sa ibang dios.
17Dadangogon mo, Kagurangnan, an mga pamibi nin mga mahuyo;
tatawan mo sinda nin kosog nin boot.
18Dadangogon mo an mga inagrangay kan mga naaapi asin mga ilo;
susurogon mo sinda sa saimong paghukom,
tanganing dai na manakot an mga tawong daganon.
Currently Selected:
Salmo 10: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
