Mga Bilang 6
6
Mga Pagsusundon Manongod sa mga Nazireo
1Pinagbotan nin Kagurangnan si Moises 2na itao an minasunod na mga katukdoan sa mga Israelita. Kun an sarong lalaki o sarong babae manuga na magigin saro siyang Nazireo asin lalaenon niya an saiyang sadiri sa Kagurangnan, 3dai siya mag-iinom nin arak o nin ano man na maisog na inomon. Dai siya mainom nin arak hale sa duga kan mga ubas asin dai siya makakan nin ubas o pasas. 4Sa bilog na panahon nin saiyang pagigin Nazireo, dai siya makakan nin anoman na gikan sa poon nin ubas, maski kan ubak o pisog kaini.
5Sa bilog na panahon kan saiyang pagigin Nazireo, dai niya puputolan an saiyang buhok, ni aahiton an saiyang barabas. Nabubugkos siya kan panuga sa bilog na panahon na nagdusay siya kan saiyang buhay sa Kagurangnan asin papahalabaon niya an saiyang buhok saka barabas. 6Sa bilog na panahon kan saiyang panuga, dai siya dapat magrani sa sarong gadan, 7maski ini saiyang ama, ina, tugang na lalaki o babae. An saiyang buhok iyo an tanda kan saiyang pagdusay kan saiyang buhay sa Dios, kaya dai niya dapat pagdigtaan an sadiri huli sa pagrani sa gadan. 8Sagkod na siya sarong Nazireo, siya konsagrado sa Kagurangnan.
9Kun may panaling magadan sa kataed niya asin huli kaiyan naatian an saiyang konsagradong buhok, aarison niya iyan pakalihis nin pitong aldaw, sa aldaw nin saiyang paglinig. 10Sa ikawalong aldaw madara siya sa padi nin duwang salampati o duwang agbaan sa may pintoan kan Tabernakulo. 11An sarong gamgam idodolot kan padi bilang dolot para sa kasalan asin an saro bilang tinutong na atang, tanganing gibohon an pagtubos saiya, huli ta nagkasala siya kan makaduta siya sa gadan. Sa aldaw na iyan, makokonsagra niya giraray an saiyang buhok. 12Idudusay niya giraray an saiyang sadiri sa Kagurangnan bilang sarong Nazireo. An mga naenot na aldaw dai ibibilang, huli ta nadigtaan an konsagrado niyang buhok. Bilang pantubos sa kasalan, madara siya nin sarong kordero na sangtaon pa sana an edad.
13Iyo ini an togon manongod sa sarong Nazireo na nakatapos na kan saiyang panuga. Maduman siya sa pintoan kan Tabernakulo 14asin madolot siya sa Kagurangnan nin tolong hayop na mayo nin kaninan—sarong lalaking kordero na sarong taon pa sana bilang tinutong na atang, sarong babaeng kordero na sarong taon pa sana bilang dolot para sa kasalan, asin sarong lalaking karnero bilang dolot para sa katoninongan. 15Laen pa kaiyan, madolot siya nin sarong basket nin tinapay na mayo nin lebadura: mahihibog na tinapay na gibo sa arinang sinalakan nin lana nin oliba, asin maninipis na biskwit na linahidan nin lana nin oliba, kaiba an dolot na pagkakan asin dolot na inomon.
16Ini gabos dadarahon kan padi sa atubangan nin Kagurangnan asin idodolot niya an dolot para sa kasalan saka an tinutong na atang. 17Idodolot niya sa Kagurangnan an lalaking karnero bilang dolot para sa katoninongan, kaiba an basket nin tinapay na mayo nin lebadura, an dolot na pagkakan asin an dolot na inomon. 18Aarison kan Nazireo an saiyang buhok sa may pintoan kan Tabernakulo, asin ibubugtak niya iyan sa kalayo na tinututongan kan dolot para sa katoninongan.
19Kukuahon kan padi an linabonan na abaga kan karnero, kaiba an sarong tinapay asin sarong biskwit hale sa basket, dangan ibubugtak sa mga kamot kan Nazireo. 20Pakatapos, an mga ini idodolot kan padi sa Kagurangnan bilang espesyal na regalo; an mga ini iyo an banal na kahirasan kan padi, kaiba an daghan saka bitis kan karnero. Kun magibo na ini, pwede nang uminom nin arak an Nazireo.
21Iyo ini an pagsusundon manongod sa mga Nazireo; alagad kun an sarong Nazireo nanunuga nin sobra sa hinahagad kan saiyang panuga, kaipuhan gibohon niya iyan.
An Bendisyon kan mga Padi
22Pinagbotan nin Kagurangnan si Moises 23na sabihan si Aaron saka an mga aking lalaki kaini na gamiton an minasunod na mga tataramon sa pagbendisyon kan banwaan nin Israel:
24Bendisyonan logod kamo asin atamanon nin Kagurangnan;
25Paliwanagon logod nin Kagurangnan an saiyang lalawogon sa saindo asin maugayan kamo;
26Mawilihan logod kamo nin Kagurangnan asin tawan nin katoninongan.
27Nagtaram an Kagurangnan, “Kun sambiton ninda an sakong ngaran bilang sarong bendisyon sa banwaan nin Israel, bebendisyonan ko sinda.”
Currently Selected:
Mga Bilang 6: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
