Mga Bilang 32
32
An mga Tribu sa Sirangan kan Jordan
(Deut. 3:12-22)
1Dakul nin marahay an ataman na mga hayop kan tribu ni Ruben asin ni Gad. Kan mahiling ninda kun gurano karahay para sa mga baka an daga nin Jazer asin nin Gilead, 2nagduman sinda ki Moises, ki Eleazar asin sa mga lider kan komunidad dangan nagsabi, 3-4“An rehiyon na ini nasakop kan mga Israelita sa tabang nin Kagurangnan—an mga banwa nin Atarot, Dibon, Jazer, Nimra, Hesbon, Eleale, Sibma, Nebo, asin Beon—marahay na daga para sa mga hayop, asin dakul nin marahay an samong mga hayop. 5Nakikimaherak kami na itao nindo samo an dagang ini bilang samong pagrogaring asin dai nindo kami pagpabalyohon sa Salog nin Jordan tanganing duman na mag-erok.”
6Nagsimbag si Moises, “Boot nindong magpawalat digdi mantang maduman sa gera an kapwa nindo mga Israelita? 7Tano ta pinapaluya nindo an boot kan mga Israelita na magbalyo sa Jordan asin magdagos sa dagang itinao sainda nin Kagurangnan? 8Iyo iyan an ginibo kan saindong mga ama kan sugoon ko sinda hale sa Kades-barnea tanganing siyasaton an daga. 9Nakaabot sinda sa Kapantayan nin Escol asin nahiling ninda an daga. Alagad kan magbalik sinda, pinaluya ninda an boot kan mga tawo sa pagduman sa daga na itinao sainda nin Kagurangnan. 10Naanggot an Kagurangnan kan aldaw na idto, asin nagsumpa: 11‘Huli ta dai sinda nagin maimbod sako, mayo nin siisay man sa mga lalaking naghale sa Egipto na an edad beynte paitaas an makakalaog sa dagang ipinanuga ko ki Abraham, ki Isaac, asin ki Jacob.’ 12Mayong nakalaog sainda, pwera ki Caleb na aking lalaki ni Jefunne na Cenezeo asin ki Josue na aking lalaki ni Nun; nagin maimbod sinda sa Kagurangnan. 13Naanggot an Kagurangnan sa mga tawo kaya ginibo niyang maglagalag sinda sa laog nin kwarentang taon sagkod na nagadan an bilog na henerasyon na idto na naggibo nin maraot sa atubang nin Kagurangnan. 14Ngunyan kamo an nakasalihid sa saindong mga ama, sarong bagong henerasyon nin parakasalang mga lalaki na mapaanggot giraray sa Kagurangnan laban sa Israel. 15Kun dai kamo magkuyog ngunyan sa Kagurangnan, papabayaan niya liwat an mga tawong ini sa kalangtadan, asin kamo an maninimbag kan saindang kagadanan.”
16Nagdolok sinda ki Moises asin nagsabi, “Tugote ngona kaming magtugdok nin mga gapong laoman kan samong mga karnero asin nin mga nakukudal na banwa para sa samong mga pamilya. 17Dangan magigin andam na kaming makigera kaiba an kapwa mi Israelita; mangengenot kami sa pagsalakay sagkod na madara mi sinda sa dagang masasadirihan ninda mantang an samong mga pamilya digdi maerok sa mga nakukudal na banwa, ligtas sa mga nag-eerok sa dagang ini. 18Dai kami mapuli sa samong mga harong sagkod na dai pa nasasadirihan kan kapwa mi Israelita an dagang kahirasan ninda. 19Dai kami makikihiras sainda kan daga sa ibong kan Jordan, huli ta nag-ako na kami kan samong kahirasan digdi sa sirangan kan Jordan.”
20Nagsimbag si Moises, “Kun tudok sa boot nindo an saindong sinabi, digdi sa atubangan nin Kagurangnan mag-andam kamo sa pakigera. 21Maibong sa Jordan an gabos nindong paralaban asin sa pagboot nin Kagurangnan, sasalakayon ninda an mga kaiwal sagkod na madaog sinda nin Kagurangnan 22asin masadirihan an daga. Pakatapos kaiyan, pwede na kamong magpuli, huli ta naotob na nindo an saindong katongdan sa Kagurangnan asin sa saindong kapwa Israelita. Dangan mimidbidon nin Kagurangnan na an dagang ini sa sirangan nin Jordan kahirasan nindo. 23Alagad kun dai nindo gibohon an saindong panuga, pinapatanidan ko kamo na magkakasala kamo sa Kagurangnan. Tandaan nanggad nindo; papadusahan kamo huli kan saindong kasalan. 24Magpatindog na kamo nin mga banwa para sa saindong mga pamilya asin mga laoman para sa saindong mga karnero, alagad giboha nindo an saindong ipinanuga!”
25Nagsabi an mga aking lalaki ni Gad asin ni Ruben, “Gigibohon mi an saimong pagboot. 26Mawawalat digdi sa mga banwa nin Gilead an samong mga agom, mga sadit na aki, sagkod mga hayop. 27Alagad andam kami gabos sa pakigera. Mabalyo kami sa Jordan asin makikilaban, siring kan sinabi mo.”
28Kaya itinao ni Moises an mga pagboot na ini ki Eleazar, ki Josue, asin sa mga lider nin Israel: 29“Kun bumalyo sa Jordan an mga aking lalaki ni Gad asin ni Ruben na andam para sa gera sa pagboot nin Kagurangnan, asin kun sa saindang tabang masakop nindo an daga, itao nindo sainda an daga nin Gilead bilang saindang kahirasan. 30Alagad kun dai sinda bumalyo sa Jordan asin dai makigera kaiba nindo, maako sinda kan saindang kahirasan sa daga nin Canaan, arog sa saindo.”
31Nagsimbag an mga aking lalaki ni Gad asin ni Ruben, “Gigibohon mi an pagboot nin Kagurangnan. 32Mabalyo kami pasiring sa Canaan asin makikigera tanganing danay na masadirihan mi an samong kahirasan digdi sa sirangan kan Jordan.”
33Kaya itinao ni Moises sa mga tribu ni Gad, ni Ruben, asin sa kabanga kan tribu ni Manases an gabos na teritoryo ni Sihon na hade kan mga Amoreo asin ni Og na hade nin Basan, kaiba an mga banwa asin mga baryo sa palibot kan mga iyan. 34Pinatindog giraray kan tribu ni Gad an nakukudal na mga banwa nin Dibon, Atarot, Aroer, 35Atrot-sofan, Jazer, Jogbeha, 36Bet-nimra, asin Bet-haran. 37Pinatindog giraray kan tribu ni Ruben an Hesbon, Eleale, Kiria-taim, 38Nebo, Baal-meon (rinibayan an ngaran na ini), asin an Sibma. Tinawan ninda nin bagong ngaran an mga banwa na saindang pinatindog giraray.
39An daga nin Gilead sinakop kan kamaganakan ni Makir, na aking lalaki ni Manases; pinalayas ninda an mga Amoreo na yaon duman. 40Kaya itinao ni Moises an Gilead sa kamaganakan ni Makir, asin duman na sinda nag-erok. 41Sinalakay asin sinakop ni Jair, na aking lalaki ni Manases, an nagkapirang mga baryo asin nginaranan idtong “Mga Baryo ni Jair.” 42Sinalakay asin sinakop ni Noba an Kenat asin an mga baryo kaini, dangan nginaranan idtong Noba, sunod sa saiyang ngaran.
Currently Selected:
Mga Bilang 32: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
