Mga Bilang 3
3
An mga Aking Lalaki ni Aaron
1Iyo ini an pamilya ni Aaron saka ni Moises kan magtaram an Kagurangnan ki Moises duman sa Bukid nin Sinai. 2Si Aaron igwa nin apat na aking lalaki na iyo si Nadab, an matua, si Abihu, si Eleazar, dangan si Itamar. 3An mga ini linahidan nin lana asin inordenan bilang mga padi. 4Alagad nagadan si Nadab saka si Abihu kan magdolot sinda sa Kagurangnan nin bakong banal na kalayo duman sa Desyerto nin Sinai. Dai sinda nin mga aki, kaya naglingkod bilang mga padi si Eleazar asin si Itamar sagkod na buhay pa si Aaron na saindang ama.
Itinalaga an mga Levita tanganing Maglingkod sa mga Padi
5Nagtaram an Kagurangnan ki Moises, 6“Darahon mo digdi an tribu ni Levi, dangan italaga mo sinda bilang mga katabang ni Aaron na padi. 7Gigibohon ninda an mga trabaho para sa Tabernakulo, para sa mga padi saka para sa bilog na komunidad. 8Sinda an mangangataman kan mga kagamitan sa Tabernakulo asin maotob kan mga katongdan para sa mga Israelita. 9An katongdan sana kan mga Levita iyo an maglingkod ki Aaron saka sa mga aki niya. 10Si Aaron asin an saiyang mga aki iyo an italaga mong maglingkod bilang mga padi; an siisay pa man na maggibo kan katongdan na iyan gagadanon.”
11Nagtaram an Kagurangnan ki Moises, 12-13“Sakuya na ngunyan an mga Levita. Kan gadanon ko an gabos na matuang aking lalaki kan mga Egipcio, kinonsagra ko para sakuya an lambang matuang aking lalaki kan mga Israelita asin an lambang matuang ogbon na lalaki kan lambang hayop. Ngunyan, embes na sadirihon ko an mga matuang aking lalaki nin Israel, isinalihid ko an mga Levita; mapapasako sinda. Ako an Kagurangnan.”
An Pagsenso sa mga Levita
14Pinagbotan nin Kagurangnan si Moises duman sa Desyerto nin Sinai 15na bilangon an mga Levita sosog sa saindang kamaganakan saka pamilya dangan ilista an gabos na lalaki na sarong bulan an edad paitaas. 16Kaya binilang ni Moises an mga Levita sosog sa ipinagboot saiya nin Kagurangnan. 17-20Tolo an aking lalaki ni Levi: si Gerson, Kohat, asin si Merari, na mga ginikanan kan mga kamaganakan na nagdadara kan saindang mga ngaran. Duwa an aking lalaki ni Gerson: si Libni asin si Simei; apat an aking lalaki ni Kohat: si Amram, Izar, Hebron, asin si Uzziel; duwa an aking lalaki ni Merari: si Mali asin si Musi. Sinda an mga ginikanan kan mga pamilya na nagdadara kan saindang mga ngaran.
21An kamaganakan ni Gerson iyo an mga pamilya ni Libni saka ni Simei. 22An saindang bilang sosog sa pagsenso sa mga lalaki, na sarong bulan an edad paitaas, uminabot sa syete mil kinyentos. 23An kamaganakan na ini makampo sa solnopan, sa likod kan Tabernakulo, 24asin an magigin pamayo ninda iyo si Eliasaf na aking lalaki ni Lael. 25Sinda an mga mamamahala kan Tabernakulo, kan pang-irarom asin pang-ibabaw na tahob kaiyan, kan kurtinang panlipod sa pintoan kan Tabernakulo, 26kan mga kurtina sa patyo na nasa palibot kan Tabernakulo saka kan altar, asin kan kurtinang panlipod sa pintoan kan patyo. Sainda an gabos na trabaho na may kinaaraman sa mga bagay na ini.
27An kamaganakan ni Kohat iyo an mga pamilya ni Amram, Izar, Hebron, asin Uzziel. 28An saindang bilang, sosog sa pagsenso sa mga lalaki, na sarong bulan an edad paitaas, uminabot sa otso mil seis syentos. 29An kamaganakan na ini makampo sa parteng habagat kan Tabernakulo, 30asin an magigin pamayo ninda iyo si Elizafan na aking lalaki ni Uzziel. 31Sinda an mamamahala kan Kaban nin Tipan, kan lamesa, kan kandelero, kan mga altar, sagkod kan mga kasangkapan na ginagamit kan mga padi sa Banal na Lugar, patin kan kurtinang panlipod sa pintoan kan Kabanal-banaleng lugar. Sainda an gabos na trabaho na may kinaaraman sa mga bagay na ini.
32Si Eleazar na aking lalaki ni Aaron iyo an magigin pamayo kan mga Levita. Siya an mamamahala sa mga tawong may katongdan sa Banal na Lugar.
33An kamaganakan ni Merari iyo an mga pamilya ni Mali saka ni Musi. 34An saindang bilang sosog sa pagsenso sa mga lalaki, na sarong bulan an edad paitaas uminabot sa seis mil dos syentos. 35An kamaganakan na ini makampo sa parteng amihan kan Tabernakulo, asin an magigin pamayo ninda iyo si Zuriel na aking lalaki ni Abihail. 36An itinao saindang trabaho iyo an pag-ataman kan mga tabla kan Tabernakulo, kan mga trabisanyo, mga harigi, mga patungtongan, mga kawit asin mga siningsing. Sinda an mangangataman kan mga iyan. 37Mamangnohon man ninda an mga harigi, mga patungtongan, mga taldok saka mga lubid kan panluwas na patyo.
38Si Moises saka si Aaron asin an mga aki kaini iyo an makampo sa parteng sirangan, sa atubangan kan Tabernakulo. Sinda an mamamahala sa gigibohon na mga seremonya sa laog kan Tabernakulo para sa banwaan nin Israel. Pwera sainda, an siisay man na maggibo kaiyan gagadanon. 39An bilang kan gabos na lalaking Levita, na sarong bulan an edad paitaas, na ilinista ni Moises sosog sa saindang kamaganakan, asin sosog sa pagboot nin Kagurangnan uminabot sa beynte y dos mil.
An mga Levita iyo an Kasalihid kan mga Matuang aking Lalaki
40Nagtaram an Kagurangnan ki Moises, “Ilista mo an ngaran kan mga matuang lalaki sa bilog na Israel, na sarong bulan an edad paitaas. 41Dangan kukuahon mo an mga Levita para sakuya bilang kasalihid kan mga matuang lalaki kan banwaan nin Israel. Ako an Kagurangnan! Kukuahon mo man an mga hayop kan mga Levita bilang kasalihid kan mga matuang hayop kan banwaan nin Israel.” 42Nagkuyog si Moises asin ilinista niya an gabos na matuang lalaki, 43na sarong bulan an edad paitaas, asin an bilang kan gabos uminabot sa beynte y dos mil dos syentos setenta y tres.
44Nagtaram an Kagurangnan ki Moises, 45“Laenon mo an mga Levita bilang kasalihid kan mga matuang lalaki nin Israel, siring man an mga hayop kan mga Levita bilang kasalihid kan mga panganay na hayop kan mga Israelita; mapapasako an mga Levita. 46Huli ta an mga panganay na lalaki kan Israel sobra nin dos syentos setenta y tres ki sa mga Levita, kaipuhan ipatubos mo an sobrang mga aki. 47Limang pedaso na plata an pantubos para sa lambang saro, sosog sa kinaugalean na timbang kan Tabernakulo, 48asin itao mo an kwarta ki Aaron asin sa mga aki niya.” 49Kaya kinua ni Moises 50an un mil tres syentos sesenta y singkong plata 51dangan itinao idto gabos ki Aaron asin sa mga aki kaini.
Currently Selected:
Mga Bilang 3: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
